Wumundzuku la Wena Li Le Mandleni ya Wena!

XANA UNGA LANGA NDLELA LEYI WUMUNDZUKU LA WENA LINGATA VA XISWONA? Vanhu van’wana va kholwa leswaku swilo leswi humelelaka awuton’wini la vona se aswi kunguhatiwile. Loko swikongometo swa vona swiba hansi, avaha lweli kuswi fikelela hikuva va pimisa leswaku aswingata siza nchumu. Va vula leswi: “Aswi tsaliwile leswaku aningata tshuka ni fikelela swikongometo swa mina!”

Van’wana va tsemeka nhlana loko va vona leswaku misava leyi yobiha ni leyinga lulamangiki ayi lulamiseki. Swinga yendleka se va ringete kuyampsisa wutomi la vona, kambe swilo swofana ni tinyimpi, wugevenga, timhangu ta ntumbuluku ni mavabyi switshamela kuhonha makungu ya vona makhambe yotala. Hikolaho, vati byela leswi: ‘Naha hluphekela yini hi kulwela kuyampsisa wutomi la mina?’

I ntiyisu leswaku swiyimu swa wutomi swingaha khumba makungu ya wena. (Yakobo 4:13, 14) Hambileswo, loko swita ka wumundzuku la wena la kuhanya hilaha kungaheliki, u ni nfanelo yotihlawulela. Kunene, Bibele li hlamusela leswaku wumundzuku la wena li le mandleni ya wena. Ahi voni leswi liswi djondzisaka.

Loko va li kusuhi ni kunghena aTikweni Leli Tshembisiweke, Moxe, lweyi a arhangela Vayisrayele nkameni wolowo, ava byele leswi: “Niveke mahlweni ka n’wina wutomi ni lifu, nkateko ni khombo. Ufanele ulanga wutomi akuva utaya mahlweni uhanya, wena ni vana va wena, hi kurhandza Yehovha Xikwembu xa wena, hi kuyingisa ritu lakwe ni hi kumunamarhela”. — Deteronoma 30:15, 19, 20.

“Niveke mahlweni ka n’wina wutomi ni lifu, nkateko ni khombo. Ufanele ulanga wutomi”. — Deteronoma 30:19

Yehovha achunse Vayisrayele awukaraweni aEgipta atlhela ava tshembisa leswaku avangahata veli swikarawa atikweni leli a atava yisa ka lona naswona wutomi la vona alita tsakisa. Kambe minkateko leyi ayingota suketana yiva wela. Leswaku vayi kuma ava fanele va “langa wutomi”. Xana avataswi kombisa kuyini leswaku va lange wutomi? ‘Hi kurhandza Yehovha Xikwembu xa vona, hi kuyingisa ritu la xona ni kuxi namarhela.’

Hilaha kufanaka, na wena u fanele u langa leswi ungataswi yendla. Hambiswilitanu, leswi ungataswi langa swita khumba ndlela leyi wumundzuku la wena lingata va xiswona. Loko u langa kurhandza Xikwembu, u yingisa leswi xiku byelaka swona ni kuxi namarhela, utava u kombisa leswaku u langa wutomi — ina, wutomi lelinga heliki aparadeyisini kola misaveni. Kambe xana kurhandza Xikwembu, kuxi yingisa ni kuxi namarhela swikatsa yini?

LANGA KURHANDZA XIKWEMBU

Lirhandzu hi lona li susumetelaka hinkwaswu leswi Xikwembu xiswi yendlaka. Mupostola Yohani a huhuteliwe kutsala leswi: “Xikwembu i rirhandzu.”(1 Yohane 4:8) Hi xivangelo lexo, loko Yesu a vutisiwe leswaku hi wihi nawu wa wukulu kutlula minawu hinkwayu, a te: “Rhandza Hosi Xikwembu xa wena, hi mbilu ya wena hinkwayu, ni moya wa wena hinkwawu, ni kuyanakanya ka wena hinkwaku.” (Matewu 22:37) Wuxaka leli tiyeke ni Xikwembu li fanele li seketeliwa ka lirhandzu, hayi ka kuchava kumbe kupfumela swilo unga rhanganga hi kuswi kambisisa. Se, i yini lexingahi susumetelaka kulanga kuxi rhandza?

Lirhandzu leli Yehovha anga na lona hi vanhu li fana ni leli vapsali vanga na lona hi vana va vona. Hambileswi vanga hetisekangiki, vapsali lavanga ni lirhandzu va djondzisa, va khutaza, va seketela ni kulaya vana va vona hikuva va lava leswaku va tsaka ni leswaku wutomi liva fambela kahle. Kambe xana i yini leswi vona vaswi languteleke ka vana va vona? Va lava leswaku vana na vona vava rhandza vatlhela va landzela hinkwaswu leswi vava djondziseke swona leswaku swiva fambela kahle awuton’wini. Xana leswo ahi swona leswi Yehovha, Tatana wa hina wa le tilweni lweyi ahetisekeke, aswi languteleke ka hina? Xana na yena anga langutelanga leswaku hi tlangela hi mbilu ya hina hinkwayu hinkwaswu leswi ahi yendlelaka swona?

YINGISA RITU LAKWE

Hi Xiheberu, ritu lelinge “yingisa” ali vuli kutwa ntsena, kambe lipatsa “kuyendla” leswi twiwaka. Swifana ni loko munhu a byela ntsongwana aku: “yingisa vapsali va wena.” Kahlekahle a vula leswaku n’wana a fanele a yendla leswi a byeliwaka swona hi vapsali. Hi ndlela leyi, kuyingisa Xikwembu swi patsa kudjondza ni kuyendla leswi aswi lavaka. Tani hileswi swinga kotekiki kutwa ritu la Xikwembu hi kukongoma, leswaku hixi yingisa hi fanele hi djondza Ritu la xona kunga Bibele, ni kulandza leswi lihi byelaka swona. — 1 Yohane 5:3.

Leswaku a komba lisima la kuyingisa Xikwembu, Yesu a tshame a vula leswi: “Munhu angakala angahanyi hi svakuja ntsena, kambe atahanya hi marito hinkwawu lawa mahumaka non’weni wa Xikwembu.” (Matewu 4:4) Kufana ni leswi swakudla swinga swa lisima leswaku hi hanya, kutiva Xikwembu i swa lisima hintamu swinene. Hayini? Hosi Solomoni lweyi a atlharihile swinene, a vule leswi: “wutlhari i xisirhelelo, kufana ni leswi male yinga xisirhelelo. Kambe wutivi lipfuna hi leswi: wutlhari li hlayisa wutomi la lweyi anga na lona.” (Eklesiasta 7:12) Kuva ni wutivi ni wutlhari la Xikwembu swingahi sirhelela namuntlha ni kuhi pfuna kuyendla swiboho swa wutlhari leswingatahi pfumelela kukuma wutomi lelinga heliki ka nkama lowu taka.

UMU NAMARHELA

Xana waxi khumbuka xifanisu lexi Yesu axi tirhiseke ka nhlokomhaka leyi hundzeke? A te: “Nyangwa lowuyisaka vuton’wini wukhumile svinene, ni ndlela leyi yiyaka kona yikamanile svinene, kutani lava vayikumaka avatalanga.” (Matewu 7:13, 14) Loko aho famba ka ndlela ya kufana ni leyi, ahita tsakela kuva ni mukongomisi lweyi ayi tivaka kahle ndlela naswona ahitamu namarhela kuya fika lomu hi yaka kona. Hikolaho, hi ni swivangelo swa kunamarhela Yehovha hikuva hi yena ntsena angahi fikisaka awuton’wini lelinga heliki. (Mintirho 2:25) Kambe, hingaswi yendlisa kuyini?

Siku ni siku hi ni swilo swinyingi swa kuswi yendla naswona ku ni swin’wana swotala leswi hi navelaka kuswi yendla. Swilo leswi swingahi kavanyeta la kakuva hiva ni nkama wutsongo kumbe kungavi ni nkama wa kuyanakanya hi leswi Xikwembu xihi yendlelaka swona. Hikolaho ka leswo, Bibele lahi tsundzuxa: “Kambisisani svinene mahanyela ya n’wina; mingahanyeni tani hi vanhu lavangatwisisiki nchumu, kambe hanyani kufana ni lavatlhariheke. Londzovotani nkama lowu minga na wona, hikuva masiku lawa hinga ka wona mabihile.” (Vaefesa 5:15, 16) Hi kombisa leswaku hi namarhela Xikwembu loko hi veka wuxaka la hina na xona ka ndhawu yosungula awuton’wini la hina. — Matewu 6:33.

WUMUNDZUKU LA WENA LI LE MANDLENI YA WENA

I ntiyisu leswaku awungehe cinci leswi uswi yendleke ndzhaku. Kambe swi kona leswi ungaswi yendlaka swoswi leswaku wena ni vanghana va wena miva ni wumundzuku lelinene. Bibele li vula leswaku Tatana wa hina anga matilweni, Yehovha Xikwembu, wahi rhandza swinene naswona wahi byela leswi a lavaka leswaku hiswi yendla. Vona maritu ya muprofeta Mikiya, lamange:

“Akubyelile, wena munhu, leswinga swinene. Xana Yehovha alava yini ka wena? Ntsena kukombisa wululami, kurhandza wutshembeki ni kufamba ni Xikwembu xa wena hi kutitsongohata!” — Mikiya 6:8.

Xana utaxi yamukela xirhambu xa Yehovha xa kufamba na yena ivi u kuma minkateko ya hilaha kungaheliki leyi ayi vekeleke lava langaka kufamba na yena? Hinkwaswu swi le mandleni ya wena!