Tama U Khongela Ka Xikwembu

Xikwembu xi pfumela swaku vanhu va vulavula na xona, va xi byela leswi va ti twisaka xi swona hi ku tirhisa xikhongelo. Muprofeta Davhida a khongele a ku: “Oh Mutwi wa xikhongelo, vanhu va minxaka hinkwayu va ta ta ka wena.” (Tipisalema 65:2) Hi nga khongelisa ku yini ka Xikwembu swaku xi yingisa swikhongelo swa hina?

BYELA XIKWEMBU LESWI U TI TWISAKA XISWONA

Loko hi khongela ka Xikwembu hi fanele ‘hi xi byela leswi nga timbilwini ta hina’ ni leswi hi ti twisaka xiswona. (Tipisalema 62:8) Xikwembu xi yingisa swikhongelo leswi hi swi yentxaka na swi suka mbilwini.

TIRHISA VITO LA XIKWEMBU LOKO U KHONGELA

Hambi leswi Xikwembu xi nga ni mavitaniwelo ya manyingi, kambe xi ni vito lin’we. Xikwembu xi li: “Hi mina Yehovha. Leli i vito la mina”. (Esaya 42:8) Vito la Xikwembu leli nge Yehovha li kumeka ka 7.000 ni ku tlula ka Bibele. Hambi vaprofeta va tirhise vito la Xikwembu loko va khongela. Muprofeta Abrahamu a khongele a ku: “Na ku kombela Yehovha, . . . ni kombela u ni tshika ni vulavula [na wena]”. (Genesa 18:30) Hinkwerhu hi fanele hi tirhisa vito la Xikwembu loko hi khongela.

KHONGELA HI LIRIMI LA WENA

A swi na mhaka swaku hi vulavula lirimi muni, Xikwembu xa swi twa swikhongelo swa hina. Bibele li li: ‘Xikwembu axiyi hi nghohe; kambe, matikweni hinkwawu, lweyi axichavaka atlhela ayentxa leswilulameke, xamutsakela.’ — Mintirho 10:34, 35.

A hi xikhongelo ntsena xi hi yentxaka hi katekisiwa. Ka tinhlokomhaka leti landzelaka hi ta vona swaku i mpsini swin’wana hi faneleke hi swi yentxa.