Swivutiso Swa Valerhi

Tipisalema 12:7 yi kombetela ka “lava va hluphekaka” lava ku vulavuliwaka hi vona ka ndzimana 5, kumbe ka “marito ya Yehovha” lawa ku vulavuliwaka hi wona ka ndzimana 6?

Loko hi kambela a ndzima hinkwayu hi tsumbula leswaku a ndzimana leyi yi kombetela ka vanhu.

Ka Tipisalema 12:1-4, hi kuma swaku “a munhu wa ku tshembeka a nga ha li kona, vanhu va ku tshembeka a va ha li kona.” Se Tipisalema 12:5-7 yi li:

Ka ndzimana 5 Davhida a vule leswaku Yehovha a ponisa lava va hluphiwaka.

Ka ndzimana 6 a vula leswaku a “marito ya Yehovha ma tengile ku fana ni prata leli nga tengisiwa,” phela hi leswo hi titwisaka xiswona hi marito ya Xikwembu. — Ps. 18:30; 119:140.

Se swoswi tlhela u vona a ndzimana 7. Yona yi li: “U ta va hlayisa wena Yehovha; u ta va vhikela hinkwavu, ku sukela swoswi ni hi masiku ni masiku.” Rito leli nge hinkwavu li kombetela ka vamani?

Leswi ndzimana 7 yi landzelaka ndzimana 6 leyi vulavulaka hi marito ya Yehovha, van’wani va pimisa leswaku a ndzimana 7 yi vula leswaku Yehovha a hlayisa marito ya yena. I ntiyiso leswaku Yehovha wa li vhikela a Rito la yena ku nga Bibele. A li vhikelile ka valala va yena lava nga zama ku li helisa ni lava nga tsimbisa swaku li hundzuluxeliwa ni ku nyikeliwa ka vanhu va vanyingi. — Esa. 40:8; 1 Pe. 1:25.

Hambileswo, leswi ndzimana 5 yi swi vulaka i ntiyiso. Yehovha minkama hinkwayu a va pfunile naswona wa ha ta tama a pfuna a “swisiwana” ni “lava va hluphekaka.” — Yob. 36:15; Ps. 6:4; 31:1, 2; 54:7; 145:20.

Se a rito leli nga ka ndzimana 7, leli nge “hinkwavu” li kombetela ka vamani?

Loko hi kambela ndzima 12, hi kuma leswaku rito leli nge “hinkwavu” li kombetela ka vanhu.

Tipisalema 12:1 yi vulavula hi vanhu va Yehovha va ku tshembeka lava nga kanganyisiwa hi vanhu va ku biha. Marito lawa ma landzelaka ma kombisa leswaku Yehovha a ta yendla xan’wanchumu hi vanhu lava vulavulaka mavunhwa. Hi nga tiyiseka swaku Yehovha a ta swi yendla leswo hikusa ndzimana 6 yi kombisa leswaku marito ya Yehovha ma tengile.

Se ndzimana 7 yi kombisa leswaku Yehovha a ta hlayisa a tlhela vhikela lava va nga hluphiwa hi vanhu va ku biha.

Rito leli nge “ hinkwavu” leli li kumekaka ka ndzimana 7 li tirhisiwile ka makopiya ya manyingi ya ku tshembeka ya Matsalwa ya Xiheberu. Ka wuhundzuluxeli la ku sungula ya ndzimana leyi yisiwa ka Xigriki, ku tirhisiwe rito leli nge “hina” makhambi mambirhi; leswi basisaka swaku a ndzimana leyi, yi vulavula hi vanhu va Yehovha va ku tshembeka lava hluphiwaka. Loko ndzimana 7 yi hela yi vula swaku “hinkwavu,” ku nga lava va tshembekaka, va ta vhikeliwa ka vanhu lava va yendlaka swilo swaku biha. (Ps. 12:7, 8) Wuhundzuluxeli lin’wani la Matsalwa ya Xiheberu lawa ma nga hundzuluxeliwa ma ya ka Xiaramu ka ndzimana leyi, li li: “Wena HOSI, u ta va vhikela lava ku lulama, wena u ta va hlayisa ka vanhu va ku biha hi masiku ni masiku.” Wuhundzuluxeli leli la swi basisa swaku Tipisalema 12:7 a yi vulavuli hi marito ya Xikwembu.

Hi mhaka leyo, hi nga vula swaku Tipisalema ndzima 12:7 yi tiyisa ntshembo wa hina wa leswaku Xikwembu xi ta vhikela vanhu va ku tshembeka.