Zama Ku Yengesela Vanghanu

Leswi Yentxaka Swi Karhata

Ku tihambanisa ni vanhu lava hi va tekelaka hansi swi ta hi yentxa hi va ni xikheto. Naswona loko hi tlanga ni vanhu lava va fanaka na hina ntsena, hi nga gama hi pimisa swaku leswi hi titwisaka xi swona, mapimiselo ya hina ni leswi hi swi yentxaka hi swona swi nga swinene.

Leswi Bibele Li Swi Vulaka

“Mihipfulela timbilu ta n’wina.” — 2 VAKORINTO 6:13.

Swi vula yini leswi? Rito leli nge, “mbilu” li vula leswi hi titwisaka xiswona. Loko hi rhandza vanhu lava fanaka na hina ntsena mbilu ya hina ya pfaleka. Leswaku leswo swi nga yentxeki, hi fanele hi va vanghanu va lava kalaka va nga fani na hina.

Ku Yengesela Vanghanu Va Hina Swi Nga Hi Pfunisa Ku Yini?

Loko hi va tiva ku yampsa vanhu van’wana, hi sungula ku twisisa swaku hi mhaka muni va hambanile na hina. Naswona loko hi va tolovela hi sungula ku va vona na va lumba ntlawa wa hina. Hi ta sungula ku va nyika lisima hi tlhela hi tsaka na vona loko va tsakile ni ku rila na vona loko va rila.

Vona xikombiso xa Nazaré, lweyi a a nyenya vanhu va ku ta hi ka matiku man’wana. Loko a tlhamusela leswi swi nga mu pfuna a li: “Ni tinyike nkama wa ku tshama na vona ni tlhela ni tirha na vona. Ni tsumbule swaku hinkwaswu leswi a va swi vula hi vona a vo hemba. Loko u va munghanu wa vanhu lava va nga ni mahanyelo ya ku kala ma nga fani ni ya wena, u ta tshika ku va ni xikheto u tlhela u va rhandza ni ku va teka va li va lisima.”

Leswi U Nga Swi Yentxaka

Zama ku vulavula ni vanhu lava taka hi ka tindhawu tin’wana kumbe lava va vulavulaka lirimi lin’wana. Yentxa leswi:

Va kombeli va ku byela leswi swi nga va yentxekela.
Va rhambi swaku mi ta dla xikan’we swakudla.
Yingisela loko va ku kontarela leswi nga va humelela u tlhela u tiva swaku i yini leswi nga swa lisima ka vona.

Loko u zama ku twisisa swaku leswi nga va humelela swi txintxise ku yini wutomi la vona, swi ta ku yentxa u nga ha va tekeli hansi vanhu volavo.

Leswi Nga Humelela Vanhu Van’wana: Kandasamy na Sookammah (Canadá)

“Hi kulele Djoni hi nkama a ku ni xikheto hintamu. Vanhu va ma raça ya ku hambana a va hambanisiwa hi ma zona. Funtshi leswi a swi yentxa swaku va nyenyana. Leswi hi kalaka hi nga li valungu, a hi nga va rhandzi valungu. Hi nkama wolowo, a hi nga swi voni swaku hi ni xikheto, hikusa a hi pimisa swaku hi hina hi nyenyiwaka.

“Swaku hi txintxa mapimiselo ya hina hi sungule ku va vanghanu va vanhu va ku hambanahambana. Nkama hi nga sungula ku tlanga ni valungu, hi tsumbule swaku na hina ha fana na vona. Wutomi la hina la fana naswona hi ni swikarhatu swa ku fana.

“Siku lin’wana hi yamukele nuna na nsati lava a va li valungu funtshi va tshame na hina malembe ya manyingi. Hi va tive ku yampsa funtshi hi ve vanghanu hi tlhela hi tivona na hi fana. Hi mhaka leyo, hi sungule ku va rhandza valungu.”