Rhandza Van’wana

Leswi Yentxaka Swi Karhata

Ku fana ni leswi mavabyi ma hlwelaka ku hela ka munhu, xikheto na xona a xi tekeli ku nyamalala. U nga yentxa yini swaku u nga vi ni xikheto?

Leswi Bibele Li Swi Vulaka

Mafoto: 1. Muxina na a pfulela xipfalu mulandi lweyi a nga tamela tikopo ta kafe. 2. Wanuna lweyi wa mulandi a nyika lava a tirhaka na vona kafe, ku patsa ni wansati wa India lweyi hi nga mu vona ka foto lin’wana.

‘Kulaveka lirhandzu, lingalona leli libohaka swilo hinkwaswu switwanana hi kuhetiseka.’ — VAKOLOSA 3:14.

Swi vula yini leswi? Loko vanhu va yentxelana swilo swa swinene va twanana. Na hina loko hi rhandza van’wana, hi ta swi kota ku hlula xikheto. Loko u ya u va rhandza vanhu, u ta tshika ku va nyenya u tlhela u vulavula kahle hi vona.

Leswi U Nga Swi Yentxaka

Mafoto: 1. Xikoxana xa Mulungu na xi pfuniwa hi wansati wa India ku khwela swikada. 2. Xikoxana lexi xa Mulungu xi nyika vhizinyu wa xona mabixkoitu, ku nga Muxina lweyi hi nga mu vona ka foto lin’wana.

Pimisa hi swilo leswi u nga swi yentxaka swaku u kombisa lirhandzu ka vanhu lava a wu va tekela hansi. A swi bohi swaku u yentxa swilo swa swinyingi hi nkama wun’we. Zama ku yentxa nchumu xin’we kumbe swimbirhi ka leswi landzelaka:

Hi ku yentxa swilo swa switsongo leswi kombisaka lirhandzu u nga swi kota ku hlula xikheto

Va khomi kahle vanhu van’wana hi ku va pfulela xipfalu kumbe ku va nyisela xitshamu ka xapa.
Zama ku va bulisa hambiloko va nga vulavuli kahle lirimi la wena.
Lehisa mbilu loko va yentxa swilo swa ku kala u nga swi twisisi.
Va kombi swaku u ni mhaka na vona loko va vulavula hi swikarhatu swa vona.

Leswi Nga Humelela Vanhu Van’wana: Nazaré (Guiné-Bissau)

“A ni nga va rhandzi vanhu va ku ta hi ka matiku man’wana. A ni pimisa swaku vanyingi va vona va hembela mfumu swaku va ta kota ku pfuniwa kasi ku tala ka vona a va li mabandidu. Leswo swi yentxi swaku ni ya ni va nyenya. Kambe a ni nga swi voni swaku ni ni xikheto. Hikusa leswo, a ku li leswi vanhu va vanyingi a va titwisa xiswona hi vanhu va ku ta hi ka matiku man’wana.

“Hi ku famba ka nkama ni swi vonile swaku a ni ni xikheto hi vanhu va ku ta hi ka matiku man’wana. Kambe leswi ni nga swi djondza ka Bibele swi ni pfunile swaku ni va rhandza. Swoswi a na ha va nyenyi funtshi na va pfuxela ni tlhela ni bula na vona. Ni zama ku va tiva ku yampsa. Swoswi a na ha pimisi swa ku biha hi vona funtshi ni titwa kahle loko ni li na vona.”