I Vamani Lava Nga Yingisa Xikwembu Ka Ndhambi Yayikulu?

Vanhu va vanyingi lava a va hanya nkameni wa Nowa a va yendla swilo swa ku biha swinene. Genesa 6:5

Adamu na Evha va ve ni vana naswona vanhu va sungule ku tala misaveni. Hi ku famba ka nkama, ku ve ni tintsumi leti nga djikela Xikwembu ti seketela Sathana.

Tintsumi leti, ti te lani misaveni ti fika ti tiyendla vanhu leswaku ti chada ni vavasati. Vavasati lava va psale vana na tona; vana va kona a va li ni matimba va tlhela va va ni tihanyi.

Misava a yi tale hi vanhu lava a va yendla swilo swa ku biha swinene. Bibele li li ‘swilo swa ku biha leswi a swi yendliwa hi vanhu a swi ya swi tala misaveni naswona a va tshamela ku pimisa swa ku biha.’

Nowa a yingise Xikwembu se a yaka ngalava. Genesa 6:13, 14, 18, 19, 22

Nowa a a li wanuna wa ku lulama. Yehovha a byele Nowa leswaku a a lava ku helisa vanhu hinkwavu lava a va ni mahanyelo ya ku biha hi ndhambi yayikulu.

Naswona Xikwembu xi byele Nowa leswaku a yaka boti lalikulu, leli nga vitaniwa swaku i ngalava naswona a a fanele a nghena ni ndjangu wa yena ni ku tlhela a nghenisa mixaka hinkwayu ya swiharhi ka lona.

Nowa a byele vanhu hi ta Ndhambi leyi a yi li ku teni kambe a ku na munhu ni mun’we lweyi a nga mu yingisa. Van’wani a va mu poyila kasi van’wani a va mu nyenya.

Loko Nowa a hete ku yaka ngalava, a nghenile yena ni ndjangu wa yena ku patsa ni swiharhi.