Xana Ungalitivisa Kuyini Wukhongeli la Ntiyisu?

1. Xana wukhongeli hinkwalu i la ntiyisu?

Vanhu votala vavula leswaku wukhongeli hinkwalu i linene. Xana wapfumela leswaku wukhongeli la ntiyisu lifanele lidjondzisa ntiyisu? Kambe xana swingakotekisa kuyini leswaku wukhongeli hinkwalu liva la ntiyisu kuve lidjondzisa swilo leswi hambaneke? Yehovha ayamukela ntsena wukhongeli leliseketelaka tidjondzo ta lona ka Bibele. Yesu adjondzise valandzeli vakwe wukhongeli lin’we ntsena, kunga wukhongeli la ntiyisu. Alifanise ni ndlela leyisaka wuton’wini lelingaheliki. Ayengetele aku: “I vatsongo lavayi kumaka” ndlela leyi. (Matewu 7:14) Lavanga ka wukhongeli la ntiyisu vapfumela swilo leswifanaka. — Lerha Vaefesa 4:4, 5; Yohane 4:23, 24; 14:6.

Sixtira vhidiyu lelinge Xana Xikwembu Xi Yamukela Wukhongeli Hinkwalu?

2. Xana Yesu avule yini hi vadjondzisi va mavunwa?

Hixiya leswaku vakhongeli votala lava tivitanaka Vakreste naswona vavulaka leswaku vadjondzisa ntiyisu hi Xikwembu, avatwanani naswona vadjondzisa swilo leswi hambaneke hi kuhelela. Hikolaho Yesu angavula leswaku vadjondzisi va mavunwa avatachakisa tidjondzo ta ntiyisu. Hi handle ka vona vatikomba vali vagandzeli va ntiyisu naswona tikereke ta vona titivitana Vakreste. Kambe loko uswikambisisa kahle, utaswivona leswaku volavo ahi Vakreste va ntiyisu. Njhani? Hi wumunhu ni mintirhu ya vona. Hikuva i ka wugandzeli la ntiyisu ntsena laha ungakumaka Vakreste lava kombisaka wumunhu ni mintirhu leyinene, leyi vanhu hinkwavu vayivonaka. — Lerha Matewu 7:13-23.

3. Xana ungavavonisa kuyini vagandzeli va ntiyisu?

Ku ni 5 wa swikombisu leswi ungava vonaka ha swona:

• Vagandzeli va ntiyisu vateka Bibele tani hi Ritu la Xikwembu. Vatikarhatela kuhanya hi minawu ya lona hikuva wugandzeli la ntiyisu ali seketeliwanga ka miyanakanyu ya vanhu. (Matewu 15:7-9) Va khongeli va ntiyisu vahanya hikuya hi leswi vaswidjondzisaka. — Lerha Yohane 17:17; 2 Timotiya 3:16, 17.

• 

  Vavangamisa vitu la Xikwembu, kunga Yehovha. Yesu avangamise vitu la Xikwembu hi kuliyendla litiviwa. Apfune vanhu leswaku vativa Xikwembu ni kuvadjondzisa kukhongelela leswaku vitu la xona livangamisiwa. (Matewu 6:9) Laha utshamaka kona, hi lihi wukhongeli lelidjondzisaka vanhu vitu la Xikwembu? — Lerha Yohane 17:26; Varhoma 10:13, 14.

• Vachumayela hi ta Mfumu wa Xikwembu. Xikwembu xirhume Yesu leswaku atachumayela mahungu yotsakisa ya Mfumu. Mfumu wa Xikwembu hi wona ntsena wungata lulamisa swikarhatu swa vanhu hinkwavu. Yesu ahambete achumayela hi ta Mfumu lowu kufikela loko afa. (Luka 4:43; 8:1; 23:42, 43) Avule leswaku valandzeli va yena na vona avatachumayela hi wona. I vamani lava kufana na Yesu vachumayelaka hi munti ni munti naswona vabyelaka vanhu hi ta Mfumu wa Xikwembu? — Lerha Matewu 24:14.

• Avangheneleli ka swilo swa misava leyi yobiha. Avatipeti ka swilo swa politika kumbe kunghenelela ka mpfilumpfilu ya switereka. (Yohane 17:16; 18:36) Nakambe avatekeleli swiyendlo ni mahanyelo yobiha ya misava leyi. — Lerha Yakobo 4:4.

• Vakreste va ntiyisu vakombisana lirhandzu hi mbilu hinkwayu. Aritweni la Xikwembu vadjondza kuhlonipha vanhu va tinxaka hinkwatu. Hambileswi wukhongeli la mavunwa liseketelaka tinyimpi amatikweni yo hambanahambana, vagandzeli va ntiyisu avaswiyendli leswo. (Mikiya 4:1-3) Hi kuswirhandza, vatirhisa nkama ni swilo swa vona leswaku vapfuna ni kukhutaza van’wani. — Lerha Yohane 13:34, 35; 1 Yohane 4:20.

4. Xana ungavula leswaku hi lihi wukhongeli la ntiyisu?

Xana hi lihi wukhongeli leliseketelaka tidjondzo ta lona aRitweni la Xikwembu, livangamisaka vitu la Xikwembu naswona lichumayelaka leswaku Mfumu wa Xikwembu hi wona ntsena wungata lulamisa swikarhatu swa vanhu hinkwavu? Hi wihi ntlawa wa wukhongeli lowu kombisanaka lirhandzu swihuma mbilwini naswona wunga ngheneleliki ka tinyimpi ta misava? Xana uswivonisa kuyini? — Lerha 1 Yohane 3:10-12.