Nhlengeletanu Leyi Yendlaka Ku Rhandza Ka Yehovha

AMISAVENI hinkwayu ku ni tinhlengeletanu ta tinyingi ta wukhongeli, ta politika, ta manegosiyu ni leti pfunaka vanhu, kambe tona ti hambanile hikusa ti ni mavonelo lama hambaneke ni mintirho ya ku hambana. Kambe ku ni nhlengeletanu yin’we leyi hambaneke ni hinkwatu ka tona. Rito la Xikwembu li vula leswaku nhlengeletanu yoleyo i nhlengeletanu ya Timboni ta Yehovha.

² I nkateko wawukulu ku va u lumba nhlengeletanu ya Yehovha. Swoswi wa swi tiva leswi Xikwembu xi swi rhandzaka naswona u zama ku yendla swoleswo. (Ps. 143:10; Rom. 12:2) U chumayela hi ku hiseka u tlhela u tirha ni vamakwerhu lava rhandzanaka amisaveni hinkwayu. (2 Ko. 6:4; 1 Pe. 2:17; 5:9) Bibele li tshembisa swaku hi ku yendla leswo u ta tsaka u tlhela u kuma minkateko. (Swiv. 10:22; Mar. 10:30) Leswi u yendlaka ku rhandza ka Yehovha hi ku tshembeka swoswi, u ta kuma minkateko ya ku kala yi nga heli ka nkama lowu taka. — 1 Tm. 6:18, 19; 1 Yo. 2:17.

³ Mutumbuluxi wa hina Lwenkulu a ni nhlengeletanu leyi nga hambana ni hinkwatu. Hi yena a yi rhangelaka naswona i Nhloko ya vanhu hinkwavu. Hi mhaka leyo, hi nga mu tshemba hikusa hi yena Muyavanyisi, Munyiki wa nawu ni Hosi ya hina. (Esa. 33:22) Leswi Xikwembu xi kalaka xi nga rhandzi maguwa, xi yendle swilo hi ndlela yayinene ni hi nawu wa kona, leswaku hi ‘tirha na xona’ kuva ku hetiseka xikongomelo xa xona. — 2 Ko. 6:1, 2.

⁴ Leswi magamu ya misava leyi ya ku biha ma yaka ma tshinela, hi tama hi rhangeliwa hi Hosi leyi Yehovha a nga yi veka, ku nga Yesu Kreste. (Esa. 55:4; Nhl. 6:2; 11:15) Phela Yesu a vule swaku vadjondzisiwa va yena a va ta yendla ntirho wawukulu ku tlula lowu yena a nga wu yendla nkama na wa ha li lani misaveni. (Yoh. 14:12) Leswo a swi ta koteka hikusa valandzeli va Yesu a va ta ya va yengeteleka va tlhela va chumayela hi nkama wa wunyingi ni ka tindhawu ta le kule ta misava. — Mat. 24:14; 28:19, 20; Min. 1:8.

⁵ Leswo se swa yendleka. Kambe a ntirho lowu wa ku chumayela mahungu ya ku tsakisa wu ta hela hi nkama lowu Yehovha a nga wu veka, hilani Yesu a nga vula hi kona. Wuprofeta hinkwalu leli kumekaka ka Rito la Xikwembu li kombisa leswaku siku leli lalikulu la Yehovha la ku chavisa li kusuhi. — Yuw. 2:31; Sof. 1:14-18; 2:2, 3; 1 Pe. 4:7.

⁶ Leswi se hi ku twisisaka ku rhandza ka Yehovha ka minkama leyi ya wugamu, hi fanele hi lwela ku yendla ku rhandza ka yena. Leswaku leswo swi koteka hi fanele hi swi tiva kahle leswi nhlengeletanu ya Xikwembu yi tirhisaka xiswona hi tlhela hi tirhisana na yona. Nhlengeletanu leyi yi tirha hi ku landza minawu ni matshinya ya minawu ya Bibele, leswi Xikwembu xi swi lavaka ni leswi Bibele li swi djondzisaka. — Ps. 19:7-9.

⁷ Loko vanhu va Yehovha va khomelela ka minkongomiso ya Bibele, vona va hanyisana kahle va tlhela va tirha xikan’we hi ku rhula ni hi ku twanana. (Ps. 133:1; Esa. 60:17; Rom. 14:19) I yini leswi yendlaka swaku hi twanana amisaveni hinkwayu ni vamakwerhu? I lirhandzu. Phela lirhandzu hi lona li hi kongomisaka ka swilo hinkwaswu. (Yoh. 13:34, 35; Kol. 3:14) Hi mhaka ku twanana koloko, loku Xikwembu xi hi nyikaka kona, hi longoloka ni nhlengeletanu ya Yehovha ya le tilweni.

NHLENGELETANU YA YEHOVHA ATILWENI

⁸ Muprofeta Esaya, Ezekiyele na Daniyele va vone nhlengeletanu ya Yehovha ya le tilweni hi ndlela ya ku hlamalisa. (Esa., ndzima 6; Eze., ndzima 1; Dan. 7:9, 10) Mupostolo Yohani na yena a vone leswi fanaka. Ka buku la Nhlawutelo a hi byela hi leswi nhlengeletanu leyi a yi tshamise xiswona. A vone Yehovha ka xitshamu xa wuhosi swin’we ni tintsumi leti a ti vula leswi: “Wa kwetsima, wa kwetsima, wa kwetsima Yehovha lweyi a nga ni Matimba Hinkwawu, lweyi a a li kona, lweyi a nga kona ni lweyi a taka.” (Nhl. 4:8) Yohani a tlhele a vona “xinyempfani lexi a xi . . . nyimile xikarhi ka xitshamu xa wuhosi,” Xinyempfani xa Xikwembu ku nga Yesu Kreste. — Nhl. 5:6, 13, 14; Yoh. 1:29.

⁹ Ku va Yohani a vone Yehovha na a tshame ka xitshamu xa wuhosi, swi kombisa swaku Yena i Nhloko ya nhlengeletanu ya le tilweni. Loko buku la 1 Tikronika 29:11, 12 li vulavula hi Yehovha ni xitshamu xa ku tlakuka lexi a nga na xona li li: “Wena Yehovha, u mukulu, u ni matimba, u sasekile, u munene u tlhela u hlonipheka, hikusa hinkwaswu leswi nga matilweni ni misaveni i swa wena. A mfumu i wa wena Yehovha Xikwembu xa mina. U tlakukile ka swilo hinkwaswu. A tshomba ni ku dzuneka i swa wena funtshi u fuma swilo hinkwaswu, voko la wena li ni matimba, li kota ku yendla minchumu yayikulu ni ku nyika hinkwavu ntamu.”

¹⁰ Leswi Yesu Kreste a tirhaka na Yehovha a nyikiwe xitshamu xa ku tlakuka atilweni a tlhela a nyikiwa ntirho wa ku rhangela swilo hinkwaswu. Bibele li vula swaku Xikwembu ‘xi veke swilo hinkwaswu hansi ka minkondzo ya yena, kutani xi mu yendla nhloko ya swilo hinkwaswu swa bandla.’ (Efe. 1:22) Mupostolo Pawulo na yena a vule leswi hi Yesu: “Kutani Xikwembu xi mu tlakusile hintamu, naswona hi timpsalu xi mu nyika vito leli nga henhla ka mavito hinkwawu leswaku hinkwavu lava nga tilweni, lava nga misaveni ni lava nga hansi ka misava, va khizama hi vito la Yesu naswona vanhu va tirimi hinkwatu va fanele va pfumela leswaku Yesu Kreste i Hosi, leswaku ku dzunisiwa Xikwembu Papayi.” (Filp. 2:9-11) Hi mhaka leyo, hi nga tiyiseka swaku Yesu Kreste a rhangela hi ndlela ya ku lulama.

¹¹ Muprofeta Daniyele a vone lweyi a vuliwaka Lweyi A A Li Kona Ku Sukela Khale na a tshame ka xitshamu xa wuhosi. Naswona a tlhele a vona “1.000.000 wa tintsumi leti a ti mu tirhela ni 100.000.000 wa tintsumi, leti a ti nyime phambheni ka yena.” (Dan. 7:10) Bibele li tlhamusela swaku tintsumi toleto i “tintsumi leti yendlaka ntirho wa ku kwetsima, leti nga rhumiwa ku ya tirhela lava nga ta dla tshomba la ku ponisiwa.” (Heb. 1:14) Tintsumi leto hinkwatu ti tshame hi ku ya hi “switshamu swa wuhosi, hambi wuhosi, hambi mimfumu, hambi matimba ya ku fuma.” — Kol. 1:16.

¹² Loko hi tivekela nkama wa ku pimisa kahle hi nhlengeletanu ya le tilweni, hi ta twisisa ndlela leyi Esaya a nga hlamala hi yona loko a “vone Yehovha na a tshame ka xitshamu xa wuhosi xa ku tlakuka ni lexi nga henhla,” naswona “henhla ka yena a ku nyime tiserafi.” Esaya a vule leswi: “Khombo ka mina! Ni file minoo, hikusa leswi humaka ka nomo wa mina a swi basanga; funtshi ni tshama ni vanhu lava vulavulaka leswi kalaka swi nga basanga; hikusa ni vone Hosi Yehovha murhangeli wa tintsumi!” Leswi Esaya a nga swi vona swi mu khumbe hintamu, lakakuva nkama a nga twa xirhambu na xi huma hi le tilweni xa ku lava munhu swaku a chumayela mahungu ya ku yavanyisa ya Yehovha, a nga ha hlwelanga, a yo vhela a hlamula a ku: “Hi mina lweyi! Ni rhume!” — Esa. 6:1-5, 8.

¹³ Ku twisisa wukulu la nhlengeletanu ya Yehovha ni ku khensa leswi yi swi yendlaka, swi yendla leswaku vanhu va Yehovha va titwa hi ndlela ya ku fana ni leyi Esaya a nga titwa hi yona. Nkama nhlengeletanu ya Yehovha yi tamaka yi ya phambheni, hi zama ku yendla hinkwaswu leswaku hi longoloka na yona. Hi yendla hinkwaswu leswi hi nga swi kotaka leswaku hi tshemba nhlengeletanu ya Yehovha namuntlha.

NHLENGELETANU YA YEHOVHA A YI NYIMI

¹⁴ Ka buku la Ezekiyele ndzima 1, muprofeta Ezekiyele a vulavula hi Yehovha na a fambisa movha wawukulu wa le tilweni. A movha wolowo wu nyimela nhlengeletanu ya Yehovha leyi kalaka yi nga voneki. Ku va a vulavula hi Yehovha na a fambisa movha, swi kombisa swaku yena a wu kongomisa hi ndlela ya lirhandzu, naswona a wu tirhisa leswaku a hetisisa swikongomelo swa yena. — Ps. 103:20.

¹⁵ Roda lin’wani ni lin’wani a li nghenisiwe ka lin’wani. Hi mhaka leyo, a movha a wu ta swi kota “ku ya ka matlhelo hinkwawu ya 4.” (Eze. 1:17) Maroda lawa, a ma ta swi kota ku djika kola na kola. Kambe movha lowu a wu fambi na wu nga na muvoneleli. Yehovha a nga pfumeli swaku nhlengeletanu ya yena yi ya ka tlhelo lin’wani ni lin’wani leli yi li lavaka. Ezekiyele 1:20 yi li: ‘Wu ya lomu moya wa ku kwetsima wu wu kongomisaka ku ya kona.’ Hi mhaka leyo, Yehovha hi ku tirhisa moya wa ku kwetsima a kongomisa nhlengeletanu leyi lomu a lavaka swaku yi ya kona. Xivutiso lexi hi faneleke hi tiyendla xona hi lexi: ‘Indjhe mina ni fambisana ni nhlengeletanu ya Yehovha?’

¹⁶ Ku fambisana ni nhlengeletanu ya Yehovha a swi vuli ntsena ku ya mintlhanganwini ni ku ya nsin’wini. Ku sungula swi lava hi kulisa wunghanu la hina na Yehovha hi tlhela hi ‘langa swilo swa lisima hintamu’ ni ku djondza mabuku hinkwawu ya nhlengeletanu. (Filp. 1:10; 4:8, 9; Yoh. 17:3) Naswona hi fanele hi khumbuka leswaku kuva swi koteka swaku ku va ni nhlengeletanu yi tlhela yi tirha kahle, ku fanele ku va ni ku tirhisana. Hi mhaka leyo, hi fanele hi wu tirhisa kahle nkama wa hina, matimba ya hina, swilo swa hina, leswi hi kotaka ku swi yendla ni swilo leswi Yehovha Xikwembu a nga hi nyika swona leswaku hi hetisisa ntirho wa yena. Nkama hi longolokaka ni movha wa Yehovha wa le tilweni hi fanele hi hanya hi ku landza leswi hi swi chumayelaka.

¹⁷ Hi ku pfuniwa hi nhlengeletanu ya Yehovha swa koteka swaku hi tama hi yendla leswi Yehovha a swi lavaka. Khumbuka swaku lweyi a fambisaka movha lowu wa le tilweni i Yehovha. Hi mhaka leyo, loko u longoloka ni movha lowu u kombisa swaku wa mu hlonipha Yehovha ni swaku wa mu tshemba leswi a nga Ribye la hina. (Ps. 18:31) Bibele li tshembisa leswi: “Yehovha a ta nyika vanhu va yena matimba. Yehovha a ta katekisa vanhu va yena hi ku va nyika ku rhula.” (Ps. 29:11) Leswi hi nga ka nhlengeletanu ya Yehovha hi yamukela matimba lawa ma taka hi ka yena hi tlhela hi tikhorisa hi ku rhula loku a ku nyikaka vanhu va yena lava yendlaka swilo hi ndlela yayinene ni hi nawu wa kona. Ha tiyiseka leswaku hi ta tama hi kuma minkateko ya Yehovha nkama lowu hi yendlaka ku rhandza ka Yena swoswi ni hi masiku ni masiku.