KU DJONDZISA VANHU BIBELE
DJONDZO 10
Tama U Tinyimisela
Bibele li li: “Leswi hi mi rhandzaka swinene, a hi tinyimisele ku mi chumayela mahungu ya ku tsakisa ya Xikwembu ni ku nyikela wutomi la hina swaku hi mi pfuna.” — 1 Tes. 2:8.
I Mpsini Leswi Yesu A Nga Swi Yendla?
1. Sixtira VHIDIYO, kumbe u lerha Yohani 3:1, 2. U gama u hlamula swivutiso leswi landzelaka:
Hi mhaka muni Nikodema a lave ku bula na Yesu niwusiku? — Vona Yohani 12:42, 43.
Hi mhaka muni hi nga vulaka swaku Yesu a a tinyimisele ku djondzisa hileswi a nga pfumela ku vulavula na Nikodema niwusiku?
Hi Djondza Yini Ka Leswi Yesu A Nga Swi Yendla?
2. Hi kombisa swaku ha va rhandza vanhu hi ku tinyimisela ku va pfuna swaku va djondza Bibele.
Tekelela Xikombiso Xa Yesu
3. Loko u djondza ni munhu, djondza na yena hi nkama ni ndhawu leyi nga yinene ka yena. Swi nga yendleka ku ni siku kumbe nkama lowu a rhandzaka ku djondza hi wona. Swi nga yendleka a rhandza ku djondza na a li ntirhweni, kaya ka yena, kumbe ka ndhawu yin’wani. Loko swi koteka txintxa xiyimiso xa wena swaku u ta kota ku djondza na yena ka ndhawu kumbe hi nkama lowu a wu lavaka.
4. Djondzani vhiki ni vhiki. Loko ku li swaku a wu nga ta va kona, u nga mu byeli swaku a mi nga ta djondza kambe handle ka leswo, pimisa hi leswi:
Langa siku lin’wani swaku u djondza na yena hi vhiki lolelo.
Djondza na yena hi ku tirhisa telefoni.
Kombela makwerhu mun’wani swaku a djondza na yena.
5. Khongela swaku u nga heli ntamu. Kombela Yehovha a ku pfuna swaku u nga godoli hambiloko lweyi u djondzaka na yena a nga djondzi vhiki ni vhiki kumbe loko a hlwela ku tirhisa leswi a swi djondzaka ka Bibele. (Filp. 2:13) Swi nga yendleka lweyi u djondzaka na yena ku ni swilo swaswinene leswi a swi yendlaka, khongela u kombela swaku Yehovha a ku pfuna ku vona swilo swaswinene leswi lweyi u djondzaka na yena a swi yendlaka.