Lwela Kukhumba Timbilu ta Lavanga Khongeliki

1. Hi kwihi kucinca loku veke kona ka malembe nyana ya swoswi?

KURINGANA malembe yotala, vanhu vanyingi amisaveni hinkwayu ava lumba wukhongeli lokarhi. Kambe ka malembe ya swoswi nyana kuve ni kucinca loku kulu. Vanhu vanyingi swinene avahana mhaka ni wukhongeli. Kuvula ntiyiso, ka matiko man’wana, kutala ka vanhu va vula leswaku ava khongeli.b — Mat. 24:12.

2. Hi mhaka muni vanhu vanyingi vangaha khongeli?

² Hi mhaka muni nhlayu ya vanhu lavanga khongeliki yiya yi kula?c Hi leswaku vanhu vanyingi va khomekile hi kulandzelela mintsaku, kasi van’wana va kumana ni swikarhatu. (Luk. 8:14) Van’wana lava ava khongela khale swoswi vali avaha kholwi leswaku Xikwembu xi kona. Van’wana va kholwa ka Xikwembu kambe va pimisa leswaku wukhongeli li hundzeliwe hi nkama, alina ntikelo, ali twanani ni siyencia naswona leswi liswi vulaka aswina nhloko. Swingaha maheka va tshame va byeliwa hi vanghanu, vaprisori kumbe vanhu va ndhuma leswaku swilo swiyoti yendlekela. Kambe avase tshama vatwa xivangelo lexi twalaka xa kukholwa leswaku Xikwembu xi kona. Van’wana va nyenyentsiwa hi varhangeli va wukhongeli hi mhaka ya leswi va rhandzaka hintamu male ni swikhundla. Matikweni man’wana minfumu yi veka minawu leyi sivelaka mintirho yokarhi ya wukhongeli.

3. Hi xihi xikongomelo xa djondzo leyi?

³ Yesu ahi rhume leswaku ‘hi famba ka tinxaka hinkwatu, hivayendla vajondzisiwa va yena’. (Mat. 28:19) Hingava pfunisa kuyini vanhu lavanga khongeliki leswaku va djondza kurhandza Xikwembu ni kutlhela vava valandzeli va Kreste? Hi fanele hi twisisa leswaku leswi munhu a yangulisaka xiswona loko himu chumayela swiya hi lomu a humaka kona. Hi xikombiso, loko hi chumayela, vanhu lava taka hi Europa avangehi yingiseli kufana ni vanhu lava taka hi Asia. Hi mhaka muni? Hi leswaku a vanhu lava taka hi Europa va tiva swokarhi hi Bibele, naswona va tshame vatwa swaku Xikwembu hi xona xinga tumbuluxa swilo hinkwaswu. Kuhambana na vona, kutala ka vanhu va le Asia ava tivi nchumu hi Bibele naswona swingaha maheka vanga kholwi leswaku kuni Muvumbi. Xikongomelo xa djondzo leyi, i kuhi pfuna leswaku hi kota kukhumba timbilu ta vanhu hinkwavu lava hi kumanaka na vona ka ntirho wochumayela kungali na mhaka ni leswaku va huma kwini.

HINGATI BYELI LESWAKU AVANGE CINCI

4. Hi mhaka muni hi fanele hiva ni langutelo lelinene?

⁴ Vana ni langutelo lelinene. Lembe ni lembe kuni vanhu lavanga khongeliki va vaka Timboni ta Yehovha. Van’wana avani mahanyela ya manene funtshi ava nyenyentsiwa hi wukanganyisi la vakhongeli. Kasi van’wana avangana mahanyela manene nakona votala va vona ava fanele va tshika mikhuva yobiha. Hi kupfuniwa hi Yehovha ha tiyiseka leswaku hita kuma ‘lavanga ni kutinyimisela lokunene ka wutomi lelinga heliki, [NM]’. — Mint. 13:48; 1 Tim. 2:3, 4.

5. I yini lexi yendlaka vanhu va tsakela rungula la hina minkama yotala?

⁵ Vana ni wunene u tlhela u kuringanisela. Minkama yotala vanhu va yamukela rungula la hina hi mhaka ndlela leyi hiva khomaka ha yona kungali leswi hiva byelaka swona. Va tsakisiwa hi leswi hi va kombaka wunene, hi va yanakanyelaka ni leswi hinga ni mhaka na vona. A hi va sindzisi kuva va yamukela mavonelo ya hina. Handle ka leswo, hi zama kutwisisa mavonelo ya vona hi wukhongeli. Hi xikombiso vanhu van’wana a va swi rhandzi ku vulavula hi swa wukhongeli ni vanhu lava vangava tiviki. Van’wana aswiva khomi kahle loko va vutisiwa hiswa Xikwembu. Kasi loko kuli van’wana swava danisa ku voniwa na va lerha Bibele ngopfungopfu ni Timboni ta Yehovha. Ka xiyimu xin’wana ni xin’wana hi zama kutwisisa leswi vati twisaka xiswona. — 2 Tim. 2:24.

6. Mupostola Pawulo aswi kombekise kuyini leswaku a ati twananisa ni swiyimu naswona hinga yendla yini leswaku himu tekelela?

⁶ Hita yendla yini loko hi vona swaku lweyi hi bulaka na yena angaswi tsakeli kutwa marito yofana ni lawa mange: “Bibele”, “kutumbuluxa”, “Xikwembu” kumbe “wukhongeli”? Hi fanele hi tekelela xikombiso xa mupostola Pawulo hi kuva hi cincacinca mabulelo ya hina. Loko a vulavula ni Vayuda, Pawulo a atshaha Matsalwa. Kambe loko a vulavula ni vativi va filozofiya va maGriki a Areyopago, a anga tshahi Matsalwa hi kukongoma. (Mint. 17:2, 3, 22-31) Hingamu tekelelisa kuyini Pawulo? Na hina loko hi kumana ni munhu lweyi anga pfumeliki ka Bibele swinga yampsa hingali tshahi hi kukongoma loko hi bulisana na yena. Loko u vona swaku munhu wokarhi wa chava kuvoniwa na a lerha Bibele na wena, zama kumu komba Matsalwa na van’wana vangaswi voni. Ungaha tirhisa foni kumbe tableti.

7. Impsini leswi hi faneleke hiswi yendla leswaku hi tekelela xikombiso xa Pawulo hi kuya hi 1 Vakorinto 9:20-23?

⁷ Va yingiseli u tlhela u zama kutwisisa xiyimu xa vona. Hi fanele hi lwela kutwisisa leswaku hi mhaka muni vanhu lava hi kumanaka na vona va pimisa hi ndlela yokarhi. (Swi. 20:5) Ahi tlhele hi vona xikombiso xa Pawulo, lweyi a kuleke ni Vayuda. Handle kokanakana swi lave a cinca machumayelelo ya yena loko a vulavula ni vamatiko lava avanga tivi swa kuya kwini hi Yehovha ni hi Matsalwa. Swingaha lava hi yendla nkambisiso kumbe kuvutisa van’wana abandleni lava nga ni ntokoto leswaku vahi pfuna kutwisisa kahle vanhu va le ka teritoriyu la hina. Swingahi pfuna kutiva ndlela leyi va pimisaka ni kutitwa ha yona. — Lerha 1 Vakorinto 9:20-23.

8. Hi wahi masungulelo ya manene ya mabulu ya Bibele?

⁸ Xikongomelo xa hina i kukuma lava fanelekaka. (Mat. 10:11) Akuva hi kota kuyendla leswo hi fanele hi vutisa vanhu mavonelo ya vona hi tlhela hiva yingiseta kalhe loko vali karhi va tiphofula. Hi xikombiso, makwerhu mun’wana wa le Inglaterra a tolovela kuvutisa vanhu mavonelo ya vona hi xihundla xa ntsaku andjangwini, makulisela ya vana ni ndlela ya kutiyisela wubihi. Loko va gama kuti phofula yena ali: “Uxi vonisa kuyini xitsundzuxu lexinga ni 2.000 wa malembe naxi tsaliwile?” Ivi na anga zanga a phata rito “Bibele” amu komba ndzimana leyi ayi langeke kahle ka foni ya yena.

KHUMBA TIMBILU TA VANHU

9. Hingava pfunisa kuyini vanhu lavangaswi rhandziki kuvulavula hi Xikwembu?

⁹ Hinga khumba timbilu ta vanhu lava vangaswi rhandziki kubula hi Xikwembu hi kubula na vona hi swilo leswi vaswi rhandzaka. Hi xikombiso, vanhu vanyingi va hlamalisiwa swinene hi ntumbuluku. Kutani hingava byela leswi: “Swinga yendleka uswi tiva leswaku vativi va siyensiya va yendle swilo swa nyiwana nava tekelela swilo leswi se aswili kona ka ntumbuluku. Hi xikombiso, leswaku va yendla mikrofoni swi lave va djondza leswaku ndleve yi tirhisa kuyini. Kasi leswaku va yendla michini ya kususa mafoto ni kufilmara, swi lave va djondza leswaku tihlo li tirhisa kuyini. Hi mavonelo ya wena ungaku ntumbuluku i yini? Ingava leswaku i matimba yokarhi yohlamalisa? I munhu? Kumbe i xilo xokarhi?” Loko hi gamile kumu yingisela hinga tlhela himu byela leswi: “Loko va enjinyeiro va djondza leswaku tindleve ni matihlo swi tirhisa kuyini va va djondza ka wutivi la mani? Ni hlamalisiwe hi leswi muthokozeli (kumbe poeta) mun’wana aswi vuleke. A te: ‘Ingava leswaku muyendli wa ndleve anga twi? Lweyi a yendleke tihlo, anga voni? . . . Phela hi yena a nyikaka vanhu wutivi.’ Vativi van’wana va siyensiya va pfumelelana ni marito lawa naswona va kholwa ka leswaku swilo swiyo tumbuluxiwa.” (Pis. 94:9, 10) Hinga gama himu komba vhidiyo linga ka jw.org^® (hi xitsonga) Laha kunge: “Mimbulavurisano Ni Mintokoto” ka longoloko wa mavhidiyo lamange: “Leswi Vanhu Va Swi Vulaka Malunghana Ni Laha Vutomi Byi Sunguleke Kona.” (Nghena ka MINKANDZIYISO > TIVHIDIYO.) Kumbe hingahava nyika broxura lelinge “Xana Swilo Leswi Hanyaka Swi Lo Tumbuluxiwa?” (hi xitsonga).

10. Hinga sungulisa kuyini bulu ni munhu wokala anga rhandzi kuvulavula hi Xikwembu?

¹⁰ Vanhu votala va navela kuva ni wumundzuku lelinene. Hambi leswo, vanhu vanyingi va chava leswaku misava yita wonheteliwa ivi swingaha koteki kutshama ka yona. Mudjikelezi mun’wana wa le Noruega a vule leswaku vanhu lava vangaswi rhandziki kuvulavula hi Xikwembu va rhandza kuvulavula hi leswi humelelaka atikweni. Ali loko se ava pfuxelile, ava vutisa leswi: “U vona leswaku i mani lweyi angahi nyikaka wumundzuku lelinene? Kungava leswaku i varhangeli va politika, vativi va siyensiya kumbe munhu mun’wana?” Ivi ndzhaku ka loko ava yingisele kahle, ava lerhela ndzimana leyi vulavulaka hi wumundzuku lelinene. Vanhu van’wana va hlamalisiwa hi xitshembiso lexinga Bibeleni lexinge misava ayinge helisiwe naswona vanhu lavanene vata tshama ka yona hi laha kunga heliki. — Pis. 37:29; Ekl. 1:4.

11. Hi mhaka muni hi fanele hi tirhisa tindlela to hambanahambana loko hi sungula mabulo naswona hingaxi tekelelisa kuyini xikombiso xa mupostola Pawulo lexi tsaliweke ka Varhoma 1:14-16?

¹¹ Hi fanele hi tirhisa tindlela to hambanahambana ta kusungula mabulu ni vanhu lava hiva kumaka antirhweni wochumayela. Hi mhaka muni? Hi mhaka vanhu ava fani. Leswi tsakakisaka vanhu vokarhi van’wana aswingeva tsakisi. Kuni lavaswi tsakelaka kubula hi Xikwembu ni Bibele hi kukongoma, kambe kuni van’wana lava swingaha bohaka hi sungula mabulu hi swilo swin’wana. Ka xiyimu xin’wana ni xin’wana hi fanele hi tirhisa mukhandlu wolowo leswaku hi chumayela vanhu va tinxaka hinkwatu. (Lerha Varhoma 1:14-16.) Kambe hi fanele hi khumbuka swaku Yehovha hi yena a yendlaka ntiyiso wu kula timbilwini ta vanhu lava rhandzaka leswinene. — 1 Kor. 3:6, 7.

TINDLELA TA KUCHUMAYELA VANHU VA LE ASIA

12. Hinga yendla yini leswaku hi kota kukhumba timbilu ta vanhu va Asia lava kalaka vanga tivi nchumu hi muvumbi?

¹² A Misaveni hinkwayu, vachumayeli votala va kumana ni vanhu lava humaka a Asia kukatsa ni van’wana lava humaka ka matiko man’wana lawa minfumu ya kona yi vekeke minawu leyi sivelaka mintirho yokarhi ya wukhongeli. Vanhu votala va le Asia avase tshama va pimisa hi leswaku kuni mutumbuluxi. Van’wana va tsakela va tlhela va tekela kusungula kudjondza Bibele. Kasi van’wanana va sungula hi kukanakana, funtshi vati komba vangana mhaka ni kudjondza swilo swa nyiwana. Se hingava pfunisa kuyini? Vachumayeli van’wana lavanga ni ntokoto va vona swi yampsa kusungula bulu hi ndlela ya xinghana ni kukombisa leswaku va ni mhaka ni lweyi va bulaka na yena. Kutani loko se va vona swaku swa fanela, vamu byela leswi matshinya ya minawu ya Bibele mava pfuniseke xiswona kuyampsisa wutomi la vona.

13. I yini lexinga pfunaka vanhu leswaku va tsakela kudjondza Bibele? (Vona xifaniso ka tluka lorhanga.)

¹³ Vanhu vanyingi va tsakisiwa hi leswi matshinya ya minawu ya Bibele mangava pfunisaka xiswona ka wutomi la siku ni siku. (Ekl. 7:12) A tikweni la América, doropeni la Nova York, makwerhu mun’wana wa xisati lweyi a yendzelaka vanhu lava vulavulaka Xixina a te: “Ni zama kukombisa leswaku ni ni mhaka ni vanhu lava ni bulaka na vona naswona nava yingisela. Loko ni tsumbula leswaku vata hi ka matiko man’wana niva vutisa leswi: ‘Kungava leswaku uya uyi tolovela ndhawu leyi? Se uwu kumile ntirho? Injhe vanhu va lomu vaku khoma kahle?’” Minkama yin’wana leswo swimu pfuna kusungula mabulu ya Bibele. Loko swiyimu swi pfumela a yengetela a ku: “U vona swaku kungava kuli yini xa lisima swinene lexingahi pfunaka leswaku hi yaka wuxaka lelinene ni vanhu? Ni kombela kukukomba xihlayahlaya xokarhi xa le Bibeleni. Xona xi li: “Kupfuxa mholovo swifana ni kupfulela mati; Suka na yingasesungula, [NM].” Upimisa swaku xitsundzuxu lexi axingehi pfuni kukota kuhanyisana ni vanhu van’wani?” (Swi. 17:14) Kubula ni vanhu hi ndlela leyi switahi pfuna kukota kukuma vanhu lava tsakelaka kudjondza leswi yengeteleke.

14. Makwerhu mun’wana wa le Oriente Leste ava pfunisa kuyini vanhu lava vulaka leswaku ava kholwi swaku Xikwembu xi kona?

¹⁴ Hingaku yini ka vanhu lavahi byelaka leswaku ava kholwi leswaku Xikwembu xi kona? Makwerhu mun’wana lweyi angani nkama wotala na a chumayela vanhu vokala vanga khongeli a Oriente Leste a te: “Hi ntolovelo, loko munhu wokarhi a ku: ‘Ani kholwi swaku Xikwembu xi kona’ a lava kuvula swaku anga kholwi ka swikwembu leswi gandzeliwaka hi vanhu vanyingi ka ndhawu yoleyo. Kutani ni talisa kupfumelelana na yena swaku swikwembu swinyingi swi yendliwe hi vanhu naswona ahiswa ntiyiso. Nigama ni lerha Yeremiya 16:20 leyinge: “Kungava swaku munhu angaswikota kutiyendlela swikwembu leswingaliki swikwembu swa ntiyiso?” Ivi nimu vutisa leswi: ‘Hingaswi tivisa kuyini leswaku xikwembu xokarhi ixa ntiyiso kumbe i xaku yendliwa hi vanhu?’ Kutani nimu yingisela kahle, ni gama ni lerha Esaya 41:23 leyinge: ‘Vulani swilo leswingata ta ndzhaku ka leswo, hitaswi tiva leswaku mi swikwembu’ Se nimu komba swikombiso swa leswaku Yehovha waswi kota kuvula leswingata humelela nkameni lowutaka.”

15. Hinga djondza yini ka xikombiso xa makwerhu mun’wana wa le Korea?

¹⁵ Makwerhu mun’wana wa le Wuxeni la Asia, loko a vulavula hi leswi aswi yendlaka ka mayendzo ya kuvuyela a li: “Niva komba swikombiso swa wutlhari leli kumekaka a Bibeleni, wuprofeta leli se lihetisekeke ni minawu leyi lawulaka tinyeleti, tiplaneta ni swilo swin’wana leswinga mpfhukeni. Kutani nimu komba leswaku swilo hinkwaswo leswi swi seketela mhaka ya leswaku kuni mutumbuluxi lweyi angani wutlhari. Loko munhu a sungula ku kholwa swaku Xikwembu xi kona ni sungula kumu komba leswi Bibele liswi vulaka hi Yehovha.”

16. Hingama tirhisisa kuyini marito ya Pawulo lama kumekaka ka Vaheveru 11:6, leswaku hi pfuna van’wana kukholwa ka Xikwembu ni le ka Bibele?

¹⁶ Loko hi djondza Bibele ni vanhu vokala vanga khongeli, hi fanele hi tama hiva pfuna kukholwa leswaku Xikwembu xi kona. (Lerha Vaheveru 11:6.) Kulaveka hiva pfuna kuva vayi kholwa Bibele. Kambe leswo aswi vevuki, swingaha lava hi phindhaphindha mhaka yoli ya yin’we makhambi yotala. Ka djondzo yin’wana ni yin’wana, swingaha lava hi bula na vona hi swilo leswi kombisaka swaku hikakunene Bibele i Rito la Xikwembu. Leswo swingaha lava hi bula nyana hi wuprofeta la Bibele leli li hetisekeke, ndlela leyi Bibele lingani ntiyiso ha yona loko swita mhakeni ya siyensiya ni le ka matimu, ni leswi lihi pfunisaka xiswona ka wutomi la siku ni siku.

17. Lirhandzu la hina lingava khumbisa kuyini vanhu van’wana?

¹⁷ Hina hi pfuna vanhu leswaku vava vadjondzisiwa va Yesu hikuva komba lirhadzu hambiloko va khongela kumbe vanga khongeli. (1 Kor. 13:1) Loko hili karhi hiva djondzisa, xikongomelo xa hina i kuva komba swaku Yehovha wahi rhandza hinkwerhu ni leswaku a lava na hina himu rhandza. Lembe ni lembe, vanhu votala lava avangana mhaka ni kukhongela va tinyiketela ivi va tsakamisiwa hileswi va dzondzisiweke kurhandza Xikwembu. Kutani ahi veni ni langutelo lelinene, hi komba vanhu hinkwavu leswaku hava rhandza ni leswaku hini mhaka na vona. Ahiva yingiseleni loko vati phofula naswona hi zama kuva twisisa. Tirhisa xikombiso xa wena leswaku uva pfuna vava valandzeli va Kreste.