Swivutiso Swa Valerhi

A nhlokomhaka leyi nge “Vito La Wena Ali Basisiwe,” leyi nga ka Murindzi wa Junho wa 2020 yi hi pfunise ku yini kuva hi li twisisa ku yampsa vito la Yehovha ni mhaka ya ku yelana ni mfanelo ya yena ya ku fuma?

Ka djondzo liya, hi vone swaku ko va ni mhaka yin’we ntsena leyi khumbaka vanhu ni tintsumi, ku nga ku kwetsimisiwa ka vito la Yehovha. Se a mhaka leyi nga pfuka ya leswaku mafumelo ya Yehovha i manene kumbe ihim ni ya ku tshembeka ka vanhu, yi yelana ni ku kwetsimisiwa ka vito la Yehovha.

Hi mhaka muni swoswi hi vulavula hintamu hi vito la Yehovha ni ku kwetsimisiwa ka lona? A hi voneni swilo swinharhu.

Xa ku sungula, Sathana a chimise vito la Yehovha ka jardim la Edeni. A xivutiso lexi Sathana a nga xi hamba Adamu na Evha a xi yendla Yehovha a voneka na a li munhu wa ku tsonana ni wa ku veka minawu ya ku vanhu a va nge swi koti ku yi yingisa. Phela hinkwaswu leswi Sathana a nga swi vula a swi hambanile hintamu ni leswi Yehovha a a swi vulile. A swi fana ni loko a vula swaku Yehovha i muhembi. Leswi a nga swi yendla swi chimise vito la Yehovha. Hi mhaka leyo, a vitaniwe “Davulosi” leswi vulaka “muhembi”. (Yoh. 8:44) Funtshi leswi Evha a nga kholwa mavunhwa lawayani a tshika ku yingisa Xikwembu, a swo fana ni loko a ku a nga ha mu lavi Yehovha swaku a va Hosi ya yena. (Gen. 3:1-6) Ku ta fikela ni namuntlha, Sathana a ha tama a hangalasa mavunhwa hi Yehovha, funtshi lava ma kholwaka mavunhwa lawo, va gama va nga hanyi hi minawu ya Yehovha. Se hina vanhu va Yehovha, loko hi vona vito la Yehovha na li chimisiwa hi ndlela leyi, hi swi vona na ku li nchumu wa ku biha hintamu swinene ku tlula hinkwaswu swa ku biha leswi nga kona, naswona hi mhaka mavunhwa lawa a nga ma vula, namuntlha hi hanya ku hluphekeni kakukulu hintamu swinene lani misaveni.

Xa wumbirhi, leswaku hinkwavu va pfuneka, Yehovha a ta kwetsimisa vito la yena, a li basisa ka mavunhwa hinkwawu naswona lexo hi xona nchumu xa lisima hintamu ka yena. Hi mhaka leyo, yena a te: “Ni ta kwetsimisa vito la mina lalikulu.” (Ezek. 36:23) Nkama Yesu a nga djondzisa valandzeli va yena leswi a va fanele va khongelisa xiswona, a va kombe swaku a nchumu wa lisima lowu a va fanele va wu khongelela i ku kwetsimisiwa ka vito la Yehovha. A va byele swaku loko va khongela a va fanele va ku: “Vito la wena a li kwetsimisiwi.” (Mat. 6:9) Phela Bibele makhambi ya manyingi li vulavula hi lisima la ku dzunisa a vito la Yehovha. Vona leswi tindzimana tin’wani ti swi vulaka: “Dzunisani Yehovha hi mhaka vito la yena la ku phatima.” (1 Tikro. 16:29; Pis. 96:8) “Yimbelelani tinsimu mi dzunisa vito la yena [Yehovha]”. (Pis. 66:2) ‘Ni ta dzunisa vito la wena hi masiku ni masiku.’ (Pis. 86:12) Khambi lin’wani Yesu Kreste a khongele ka Yehovha na a li ka tempele aYerusalema a ku: “Papayi, dzunisa vito la wena.” Se Yehovha a mu hlamulile a ku: “Ni li dzunisile naswona ni ta tlhela ni li dzunisa.” — Yoh. 12:28.a

Xa wunharhu, leswi Yehovha a lavaka ku swi yendla misaveni swa yelana ni vito la yena. Pimisa hi leswi: I mpsini leswi nga ta yendleka loko vanhu va ta va se va ringiwile ka wugamu funtshi na Mfumu wa Kreste wa 1.000 wa Malembe wu ta va se na wu helile? Indjhe tintsumi kumbe vanhu va ha ta tama va banana tinhloko, van’wani na va lwela ku kwetsimisiwa ka vito la Yehovha kasi van’wani na va lwa na kona? Leswaku hi hlamula xivutiso lexo, a hi khumbukeni minchumu yimbirhi leyi yelanaka, ku nga ku tshembeka ka vanhu ni mfanelo ya Yehovha ya ku fuma. Loko Mfumu wa Kreste wa 1.000 wa Malembe wu ta va wu helile, indjhe swa ha ta boha swaku vanhu va kombisa swaku vona va tshembeka ka Yehovha? Ihim. Vona va ta va se na va ringiwile funtshi va pasile. Va ta va va nga ha na xidjoho funtshi va ta kuma wutomi la ku kala li nga heli. Se loko swi ta ka mfanelo ya Yehovha ya ku fuma ke, indjhe ka ha ta va ni ku kanakana swaku Yehovha hi yena a nga Hosi ya kahle? Ihim. Tintsumi matilweni ni vanhu lani misaveni va ta va na va swi vonile swaku Yehovha hi yena Hosi ya ku yampsa funtshi a ku na yin’wani loko ku nga li yona. Kambe a mhaka hi leyi: Se a vito la Yehovha ke? La ha ta tama li va nchumu wa lisima ka vanhu va Yehovha hi nkama lowo?

Loko se ku hundze 1.000 wa Malembe ya ku fuma ka Yesu, hinkwavu va ta tiva ntiyiso mayelana na Yehovha naswona vito la yena li ta va na li kwetsimisiwile hi ku helela. Hambileswo, a vito la Yehovha la ha ta tama li va la lisima ka tintsumi amatilweni ni vanhu va yena amisaveni hikusa hinkwavu va ta swi vona swaku Yehovha a ha tama a yendla swilo swa ku hlamalisa. Pimisa hi leswi: Loko Yesu a ta va a tlhelise mfumu ka Yehovha, Xikwembu xi ta “va swilo hinkwaswu ka vanhu hinkwavu.” (1 Kor. 15:28) Loko leswo se swi yendlekile, vanhu lani misaveni va ta tikhorisa hi “nchunseko wa ku hlamalisa wa vana va Xikwembu.” (Rom. 8:21) Naswona hi wugamu, Yehovha a ta hetisisa xikongomelo xa yena xa ku va tintsumi ni vanhu lani misaveni va va ndjangu wun’we wa ku twanana. — Efe. 1:10.

Loko swilo leswi hinkwaswu se swi yendlekile, ndjangu wa Yehovha amatilweni ni lani misaveni wu ta titwisa ku yini? A hi kanakani swaku hinkwavu va ta navela ku tama va dzunisa Yehovha. Mupisalema Davhida a tsale leswi: “A a dzunisiwi Yehovha Xikwembu . . . vito la yena a li dzunisiwe hi masiku ni masiku.” (Pis. 72:18, 19) Se hi ta va ni swivangelo swa swinyingi swa ku hlamalisa swa ku tama hi dzunisa Yehovha hi masiku ni masiku.

Phela vito leli nge Yehovha li kombekisa leswi yena a nga tshamisa xiswona ni wumunhu la yena. Funtshi loko hi pimisa hi vito la yena hi vhela hi khumbuka swaku yena i lirhandzu. (1 Yoh. 4:8) Funtshi ha ha ta tama hi khumbuka swaku Yehovha a hi yendle hi mhaka leswi a hi rhandzaka, a nyikele N’wana wa yena a hi fela hi mhaka ya leswi a hi rhandzaka, naswona a hi fuma hi ndlela yayinene hi mhaka ya leswi a hi rhandzaka. Funtshi ha ha ta tama hi li vona lirhandzu leli Yehovha a nga na lona hi hina. Impela hi ta va ni swivangelo swa swinyingi swa ku tama hi tiyisa wunghanu la hina na Yehovha ni ku yimbelela tinsimu hi dzunisa vito la yena la ku kwetsima hi masiku ni masiku. — Pis. 73:28.