Hi Mhaka Muni Vito La Yehovha Li Li La Lisima Ka Yesu?

1-2. a) I yini leswi Yesu a nga swi yendla nkama na a li kusuhi ni ku fa? b) Hi ta djondza hi yini ka nhlokomhaka leyi?

HI MADLAMBU ya Quinta-feira wa 14 ka Nisani wa lembe la 33, Yesu ni vapostolo va yena va yendle Xilalelo xa Hosi ka sala lin’wani la le henhla. Phela hi nkama wolowo Yesu a a li kusuhi ni ku xavisiwa, a thethisiwa, a hluphiwa a tlhela a dlayiwa. Loko Xilalelo se xi helile, Yesu a game a va nyika switsundzuxu vapostolo va yena a tlhela a va tiyisa; kambe na va nge se suka lani a va li kona, Yesu a yendle xikhongelo xa matimba swinene lexi mupostolo Yohani a nga gama a xi tsala ka buku la Yohani 17.

² I yini leswi Yesu a a karhateka hi swona nkama a nga yendla xikhongelo lexi? Naswona xikhongelo lexi xi hi pfunisa ku yini ku tiva swaku i yini leswi a swi li swa lisima hintamu ka Yesu nkama na a li lani misaveni? Nhlokomhaka leyi yi ta hi hlamula swivutiso leswi.

“NI VA DJONDZISILE VITO LA WENA”

3. I mpsini leswi Yesu a nga swi vula hi vito la Xikwembu, naswona a a lava ku vula yini hi leswo? (Yohani 17:6, 26)

³ Yesu a khongele ka Yehovha a ku: “Ni va djondzisile vito la wena”. Yesu a ma phindhe kambirhi marito lawa, naswona ku va a yendle leswo swi kombisa leswaku leswi a a swi vula a swi li swa lisima swinene ka yena. (Lerha Yohani 17:6, 26.) Kasi a a lava ku vula yini hi marito lawa? Ku nga va leswaku a o djondzisa vadjondzisiwa va yena swaku vito la Xikwembu i Yehovha? Khumbuka leswaku vadjondzisiwa va Yesu a va li Vayuda naswona a va li tiva kahle vito la Xikwembu. Phela vito leli li humelela kolomu ka 7.000 wa makhambi ka Matsalwa ya Xiheberu. Se Yesu a a ngo va djondzisa swaku vito la Xikwembu i Yehovha, kambe a o va pfuna ku mu tiva kahle Yehovha, ku tiva leswi a lavaka ku va yendlela swona vanhu lani misaveni, leswi se a nga va yendlela swona ku patsa ni wumunhu la yena la ku hlamalisa. Phela ko va Yesu ntsena lweyi a a ta va djondzisa hi mhaka leyo hikusa a a mu tiva kahle Yehovha Papayi wa yena.

4-5. a) I yini lexi xi yendlaka swaku munhu a va wa lisima hintamu ka hina? Nyikela xikombiso. b) I yini lexi xi nga yendla swaku vito la Yehovha li va la lisima hintamu ka vadjondzisiwa va Yesu?

⁴ A hi nge ka bandla la wena ku ni doda leli vitaniwaka David leli se i nga khale na u li tiva naswona doda lolelo i mediku. Se u vabya swa kola na kola u gama u ya xibelhela u ya tenderiwa hi doda lolelo; li ku pfuna swaku u hanya ka mavabyi ya wena. Phela leswo swi nga yendla swaku u ya u li rhandza doda lolelo, naswona loko u twa munhu a vula vito la lona u khumbuka swilo swaswinene leswi li nga ku yendlela swona. Ku sukela kolanu, makwerhu David a wo mu vona na a li doda leli u li tivaka ku ringana malembe ya manyingi ntsena, kambe u tlhela u mu vona na a li mediku lweyi a nga ponisa wutomi la wena.

⁵ Hilani ku fanaka, ni vadjondzisiwa va Yesu se a va li tiva vito la Yehovha. Kambe hi mhaka leswi Yesu a a swi djondzisa, vito leli li ye li va la lisima hintamu ka vona. Hi mhaka muni? Hikusa Yesu a a li kombisa kahle wumunhu la Yehovha ka hinkwaswu leswi a a swi yendla ni ku swi vula. Se loko vadjondzisiwa va Yesu va twa leswi a a swi vula ni ku vona leswi a a swi yendlela vanhu van’wani a va ya va mu tiva ku yampsa Yehovha. — Yoh. 14:9; 17:3.

“VITO LA WENA LELI U NGA NI NYIKA LONA”

6. Yesu a a lava ku vula yini loko a ku a nyikiwe vito la Yehovha? (Yohani 17:11, 12)

⁶ Ka xikhongelo lexi Yesu a nga xi yendla a kombele Papayi wa yena leswaku a vhikela vadjondzisiwa va yena. A te: “Va vhikeli hi mhaka ya vito la wena leli u nga ni nyika lona.” (Lerha Yohani 17:11, 12.) Ku nga va leswaku Yesu a a lava ku vula swaku a a ta txintxa vito a vitaniwa swaku i Yehovha? A a nga lavi ku vula leswo. Se hi mhaka muni a te “vito la wena leli u nga ni nyika lona”? A vule leswo hikusa nkama lowu a a li lani misaveni a a nyimelela vito la Yehovha, funtshi a yendle swilo swa ku hlamalisa hi ku tirhisa vito lolelo. (Yoh. 5:43; 10:25) Xivangelo xin’wani hileswaku vito leli nge Yesu la fambisana ni vito leli nge Yehovha, hikusa ntlhamuselo wa lona wu vula swaku “Yehovha i Muponisi.”

7. Hi mhaka muni hi vula swaku Yesu a nyimela Yehovha? Nyikela xikombiso.

⁷ Leswaku u yi twisisa kahle mhaka leyi pimisa hi xikombiso lexi. A hi nge hosi yi rhuma munhu leswaku a ya yi vulavulela ka vanhu van’wani. Phela lava va nga ta twa leswi munhu yelweyo a nga ta swi vula, swi to fana ni loko va twa marito ya hosi hi ku kongoma. Se swa fana na Yesu; yena a a nyimela Yehovha hikusa a a vulavula hi vito la Yena naswona leswi a a swi vula a swo fana ni loko swi vuliwa hi Yehovha hi ku kongoma. — Mat. 21:9; Luk. 13:35.

8. Hi swi tivisa ku yini swaku Yesu a a nyikiwe vito la Yehovha na a nge se ta lani misaveni? (Eksoda 23:20, 21)

⁸ Bibele li vula swaku Yesu i “Rito” hikusa hi yena lweyi Yehovha a nga mu tirhisa leswaku a vulavula ni tintsumi ni vanhu. (Yoh. 1:1-3) Swi tikomba na ntsumi liyani Yehovha a nga yi tirhisa swaku a hlayisa Vayisrayele nkama na va li mananga a ku li Yesu. Hi vula leswo hikusa nkama Yehovha a nga vula swaku Vayisrayele a va fanele va yingisa, a vule swaku a va fanele va yendla leswo ‘hikusa vito la yena li ka yona.’a (Lerha Eksoda 23:20, 21.) Yehovha a vule leswo hikusa Yesu hi yena a kwetsimisaka ni ku nyimelela vito la Yehovha ku tlula hinkwavu.

“PAPAYI DZUNISA VITO LA WENA”

9. Yesu a swi kombisise ku yini swaku a a li nyika lisima vito la Papayi wa yena?

⁹ Hilani hi nga swi vona hi kona, Yesu a swi kombisile swaku vito la Yehovha a li li la lisima ka yena na a nge se ta lani misaveni. Nkama na a li lani misaveni, Yesu a swi kombisile swaku vito la Papayi wa yena a li li la lisima hi swilo leswi a nga swi yendla. Na a li kusuhi ni ku heta ntirho wa yena wa ku chumayela lani misaveni, Yesu a kombele Yehovha a ku: “Papayi, dzunisa vito la wena.” Hi nkama wolowo Yehovha a mu hlamulile hi rito leli twalaka a ku: “Ni li dzunisile naswona ni ta tlhela ni li dzunisa.” — Yoh. 12:28.

10-11. a) Yesu a li dzunisise ku yini vito la Yehovha? (Vona mufoto.) b) Hi mhaka muni a swi lava swaku vito la Yehovha li kwetsimisiwa li tlhela li basisiwa?

¹⁰ Nkama Yesu a a li lani misaveni a li dzunisile vito la Papayi wa yena. A swi yendlise ku yini leswo? A djondzise vanhu hi wumunhu la Papayi wa yena a tlhela a va byela swilo swa ku hlamalisa leswi a swi yendlaka. Kambe a nga gamelanga lanu, a swi lava swaku vito la Yehovha li kwetsimisiwa li tlhela li basisiwa kumbe ku nyimeleliwa ka mavunhwa lawa a lumbetiwaka hi wona.b Yesu a swi kombisile swaku leswo i swa lisima swinene nkama lowu a nga djondzisa valandzeli va yena xikhongelo lexi nga ka Matewu 6:9, lani a nga te: “Papayi wa hina lweyi a nga matilweni, vito la wena a li kwetsimisiwe.”

¹¹ Hi mhaka muni a swi lava swaku vito la Yehovha li basisiwa li tlhela li kwetsimisiwa? Hi mhaka Sathana a li chimisile vito la Yehovha Xikwembu hi ku mu hembela ajardim la Edeni, a vula swaku Yehovha i muhembi ni swaku a va tsona swilo swaswinene Adamu na Evha. (Gen. 3:1-5) Hi ku vula leswo, Sathana a a lava ku kombisa swaku ndlela leyi Yehovha a yendlaka hi yona swilo a hi yinene. Naswona hi mhaka mavunhwa ya Sathana swi nga yendleka vanhu va sungule ku pimisa swaku Yehovha a hi Xikwembu xaxinene. Hi ku famba ka nkama ka masiku ya Yobo, Sathana a tlhele a hembela vanhu a vula swaku vo tirhela Xikwembu ntsena hileswi va lavaka ku pfuneka, kambe loko va kumana ni swikarhatu va ta tshika ku xi tirhela. (Yob. 1:9-11; 2:4) Hambileswo, hi ku famba ka nkama a swi ta tikomba swaku ka Yehovha na Sathana i mani lweyi a hembaka.

“NI NYIKELA WUTOMI LA MINA”

12. I mpsini leswi Yesu a a tinyimiselile ku swi yendla hi mhaka leswi a a rhandza vito la Yehovha?

¹² Hi mhaka leswi Yesu a mu rhandzaka hintamu Papayi wa yena, a a tinyimisele ku yendla hinkwaswu leswi a swi kotaka kuva a kwetsimisa ni ku basisa vito la Yehovha. Yena a a tinyimisele hambi hi ku fa leswaku a kombisa swaku Yehovha wa kwetsima naswona a yendla swilo hi ndlela yayinene.c Hi mhaka leyo Yesu a te: “Ni nyikela wutomi la mina”. (Yoh. 10:17, 18) Yesu a a hambanile hi ku helela ni vanhu va ku sungula, ku nga Adamu na Evha lava va nga djikela Xikwembu, va nyima na Sathana. Yena a a tinyimisele hambi hi ku ta lani misaveni kuva a kombisa lirhandzu leli a a li na lona hi Yehovha; a yendle leswo hi ku mu yingisa ka swiyimu hinkwaswu swa wutomi la yena. (Heb. 4:15; 5:7-10) Yesu a tame a tshembeka ka Yehovha anze a ya dlayiwa ka mhandzi ya nxaniso. (Heb. 12:2) Hi ku yendla leswo a kombise swaku a rhandza Yehovha ni vito la Yena.

13. Hi mhaka muni Yesu a a swi tiva swaku leswi Sathana a nga mu lumbeta hi swona Yehovha i mavunhwa? (Vona mufoto.)

¹³ Hinkwaswu leswi Yesu a nga swi yendla swi swi kombise kahle swaku lweyi a nga muhembi i Sathana ku nga li Yehovha! (Yoh. 8:44) Yesu a a mu tiva kahle Yehovha ku tlula munhu mun’wani ni mun’wani lweyi a nga tshama a hanya. Se, loko leswi Sathana a nga lumbeta Yehovha hi swona a ku li ntiyiso, Yesu a a ta swi tiva. Kambe hinkwaswu leswi Sathana a nga lumbeta Yehovha hi swona a ku li mavunhwa, hi mhaka leyo Yesu a a tinyimisele ku nyimelela vito la Papayi wa yena. Hambi nkama lowu a swi tikomba ingi a tshikiwile hi Yehovha, yena a a tinyimisele ku fa ku tlula ku tshika Papayi wa yena wa lirhandzu. — Mat. 27:46.d

NI ‘HETE NTIRHO LOWU U NGA NI NYIKA WONA’

14. Yehovha a mu katekisise ku yini Yesu hileswi a nga tama a tshembeka?

¹⁴ Ka wusiku leli Yesu a nga dlayiwa hi lona a khongelile ka Papayi wa yena a ku: ‘Ni . . . hete ntirho lowu u nga ni nyika wona’. Yesu a a tiyiseka swaku loko a tama a tshembeka, Yehovha a a ta mu katekisa. (Yoh. 17:4, 5) Phela hi swoleswo swi nga gama swi yendleka. Yehovha a nga mu tshikanga N’wana wa yena asirheni. (Min. 2:23, 24) A mu pfuxile a tlhela a mu nyika xitshamu xa ku tlakuka hintamu atilweni. (Filp. 2:8, 9) Hi ku famba ka nkama, Yesu a game a vekiwa leswaku a va Hosi ka Mfumu wa Xikwembu. Se i yini leswi Mfumu wolowo wu nga ta swi yendla? Nhlamulu ya xivutiso lexi hi yi kuma ka marito lawa Yesu a nga ma vula ka xikhongelo xa Hosi, lani a nge te: “Mfumu wa wena a wu te. Ku rhandza ka wena [Yehovha] a ku yendleke amisaveni ku fana ni leswi ku yendlekisaka xiswona tilweni.” — Mat. 6:10.

15. I yini swin’wani leswi Yesu a nga ta swi yendla?

¹⁵ Xin’wani lexi Yesu a nga ta xi yendla ku nga li khale i ku lwa ni valala va Xikwembu a helisa vanhu lava va yendlaka swa ku biha ka nyimpi ya Armajedoni. (Nhl. 16:14, 16; 19:11-16) Loko se a yendle leswo a ta gama a pfalela Sathana ka xikhele xa ku yenta. Hi nkama wolowo swi ta fana ni loko Sathana a file hikusa a nga ha ta kota ku yendla nchumu. (Nhl. 20:1-3) Naswona Yesu a ta yendla swaku misava hinkwayu yi va ni ku rhula, a tlhela a yendla swaku vanhu va ya va hetiseka hi kutsongokutsongo ka Mfumu wa Yena wa 1.000 wa Malembe. A ta tlhela a pfuxa lava nga fa, a yendla misava hinkwayu yi va paradesi. Hi nkama wolowo ku rhandza ka Yehovha ku ta va se ku hetisekile! — Nhl. 21:1-4.

16. Wutomi li ta tshamisa ku yini loko Mfumu wa 1.000 wa Malembe wu ta va wu helile?

¹⁶ Loko Mfumu wa Yesu wa 1.000 wa Malembe wu ta va wu helile, xidjoho ni ku kala ku hetiseka a swi nga ha ta va kona naswona vanhu a va nga ha ta kombela ku rivaleliwa hi mhaka swidjoho swa vona. Vanhu a va nga ha ta lava nkutsulu naswona va nga ha ta dependera hi vaprista, ku nga lava va 144.000 na Yesu lweyi a nga Muprista Wamukulu leswaku va va vanghanu va Yehovha. Hi wugamu “nala wa wugamu ku nga lifu, [leli li nga vangiwa hi Adamu] a ta helisiwa.” A ku nga ha ta va ni munhu masirheni naswona vafi va ta va se va pfuxiwile. Vanhu hinkwavu amisaveni va ta va se va hetisekile. — 1 Ko. 15:25, 26.

17-18. a) Ku ta yendleka yini a ku heleni ka 1.000 wa Malembe? b) I mpsini leswi Yesu a nga ta swi yendla loko se ku hundze 1.000 wa Malembe? (1 Vakorinto 15:24, 28) (Vona mufoto.)

¹⁷ Ku ni nchumu wun’wani wa ku tsakisa hintamu lowu nga ta yendleka loko se ku hundze 1.000 wa Malembe ya Mfumu wa Kreste. A ku na munhu lweyi a nga ta kanakana leswaku Yehovha i Xikwembu xa ku lulama funtshi wa kwetsima. Hi mhaka muni hi vula leswo? Ka jardim la Edeni, Sathana a lumbete Yehovha a vula swaku a nga va fumi hi ndlela yayinene vanhu, a nga va rhandzi funtshi wa hemba; kambe ku sukela hi nkama wolowo vanhu va Yehovha va yendla hinkwaswu va nga swi kotaka leswaku va basisa vito la Yena ka mavunhwa lawa a lumbetiwaka hi wona. Se a ku heleni ka 1.000 wa Malembe, vito la Yehovha li ta va li basisiwile hi ku helela naswona Yehovha a ta va a swi kombisile swaku i Papayi lweyi a hi rhandzaka ngopfu.

¹⁸ Hi wugamu swi ta tikomba swaku hinkwaswu leswi Sathana a nga mu lumbeta hi swona Yehovha a ku li mavunhwa. Se loko Mfumu wa Yesu wa 1.000 wa Malembe wu hela ke, a ta yendla yini? Ku nga va leswaku ku fana na Sathana a ta djikela Yehovha a zama ku mu tekela wuhosi? Leswo a swi nge tshuki swi yendleka! (Lerha 1 Vakorinto 15:24, 28.) Yesu a ta tlhelisa Mfumu ka Papayi wa yena a tlhela a tiveka hansi ka yena. Ku hambana na Sathana, Yesu a tinyimisele ku mu tlhelisela hinkwaswu Yehovha hi mhaka leswi a mu rhandzaka hintamu.

19. Yesu a li vonisa ku yini vito la Yehovha?

¹⁹ Yehovha a ni swivangelo swa ku twala swa ku nyika vito la yena Yesu hikusa a li nyimela kahle vito la Papayi wa yena. Se Yesu ke, a li vonisa ku yini vito la Yehovha? A li vona na li li la lisima ku tlula swilo hinkwaswu. Leswi hi ku swi rhandza a nga nyikela wutomi la yena hi mhaka vito la Yehovha, a hi kanakani swaku loko se ku ta hela Mfumu wa Yena wa 1.000 wa Malembe a ta nyikela hinkwaswu ka Papayi wa yena hi ku swi rhandza. Hi nga xi tekelelisa ku yini xikombiso xa Yesu? A nhlamulu ya xivutiso lexi hi ta yi kuma ka djondzo leyi landzelaka.