“Langani . . . Lweyi Mi Nga Ta Mu Tirhela”

1. Hi fanele hi yendla yini leswaku hi tsaka hikakunene? (Esaya 48:17, 18)

YEHOVHA Xikwembu xa hina wa hi rhandza hintamu naswona a lava swaku hi va ni wutomi la ku tsakisa swoswi ni ka nkama lowu taka. (Ekl. 3:12, 13) Hi mhaka leyo, a hi yendle na hi kota ku yendla minchumu ya yinyingi, kambe a nga swi tshikelanga hina kuva hi tifuma kumbe hi langa leswi nga swinene ni leswi kalaka swi nga li swinene. (Ekl. 8:9; Yer. 10:23) Yena wa swi tiva swaku hi to tsaka ntsena loko hi mu tirhela ni loko hi yingisa hinkwaswu leswi a hi byelaka swona. — Lerha Esaya 48:17, 18.

2. Sathana a zama ku hi yendla hi pimisa swa ku yini, naswona Yehovha a yendle yini?

² Sathana a zama ku hi yendla hi pimisa swaku hi nga tsaka hambiloko hi nga li vanghanu va Yehovha, ni swaku hi nga swi kota ku tifuma hi hoxe. (Gen. 3:4, 5) Kambe leswaku Yehovha a kombisa swaku leswo i mavunhwa, a nyike vanhu nkama swaku va tifuma. Swilo hinkwaswu leswi yendlekaka lani misaveni swi swi kombisa kahle swaku kuva munhu a tifuma a swi sizi. Hambileswo, Bibele li vulavula hi vavanuna ni vavasati lava va nga tsaka hi ku tirhela Yehovha. Xikombiso xaxikulu xa vanhu volavo i Yesu Kreste. Ka nhlokomhaka leyi hi ta vona swaku hi mhaka muni Yesu a lange ku tirhela Yehovha ni swaku hi mhaka muni swi mu fanela Yehovha ku gandzeliwa. Se hi wugamu, hi ta khumbuka swaku i mpsini swi nga hi yendla hi langa ku tirhela Yehovha.

HI MHAKA MUNI YESU A LANGE KU TIRHELA YEHOVHA?

3. Sathana a mu tshembise yini Yesu, naswona i yini leswi Yesu a nga swi yendla?

³ Nkama lowu Yesu a a li lani misaveni swi lave a langa swaku a a ta tirhela mani. Ndzhaku ka kuva Yesu a tsakamisiwile, Sathana a mu yelile a ya mu byela swaku a ta mu nyika mimfumu hinkwayu ya misava loko o mu khizamela a mu gandzela. Kambe Yesu a te: “Suka, Sathana! Hikusa ku tsaliwile: ‘U fanele u gandzela Yehovha Xikwembu xa wena naswona u fanele u tirhela yena ntsena.’” (Mat. 4:8-10) Swoswi a hi voneni swaku hi mhaka muni Yesu a vule leswo.

4-5. Hi mhaka muni Yesu a lange ku tirhela Yehovha?

⁴ Xivangelo xa lisima hintamu lexi xi nga yendla swaku Yesu a langa ku tirhela Yehovha, hi leswi a mu rhandzaka hintamu Papayi wa yena. (Yoh. 14:31) Yesu a tirhela Yehovha hileswi a swi tivaka swaku hi swona swaswinene leswi a faneleke a swi yendla. (Yoh. 8:28, 29; Nhl. 4:11) Yesu wa swi tiva swaku i Yehovha lweyi a nga hi nyika wutomi ni swaku wa tshembeka naswona a rhandza ku nyika. (Ps. 33:4; 36:9; Yak. 1:17) Yehovha minkama hinkwayu a a mu byela ntiyiso Yesu naswona Yesu a a swi tiva swaku hinkwaswu leswi a a li na swona a swi ta hi ka Yehovha. (Yoh. 1:14) Kambe Sathana a hambanile hi ku helela na Yehovha hikusa yena a tise xidjoho ni lifu lani misaveni naswona i muhembi wamukulu, funtshi hinkwaswu leswi a swi yendlaka a swi yendla hileswi a lavaka ku ganya xan’wanchumu. (Yoh. 8:44) Yesu a mu tiva kahle Yehovha a tlhela a mu tiva kahle Sathana. Se hi mhaka leyo, a a nga swi lavi ku fana na Sathana lweyi a nga djikela Yehovha. — Filp. 2:5-8.

⁵ Nchumu xin’wani lexi nga yendla Yesu a langa ku tirhela Yehovha, hileswi a a swi tiva swaku loko a tshembeka a swi ta tisa minkateko ya yinyingi. (Heb. 12:2) Yesu a a swi tiva swaku loko a tama a tshembeka, a a ta kwetsimisa vito la Papayi wa yena ni ku tlhela a yendla swaku ku hlupheka hinkwaku loku nga tisiwa hi Sathana ku helisiwa.

HI MHAKA MUNI SWI MU FANELA YEHOVHA KU GANDZELIWA?

6-7. a) Hi mhaka muni vanhu va vanyingi va nga mu gandzeli Yehovha? b) Hi mhaka muni swi mu fanela Yehovha ku gandzeliwa?

⁶ Vanhu va vanyingi namuntlha a va mu gandzeli Yehovha hikusa a va mu tivi funtshi a va li tivi wumunhu la yena la ku hlamalisa, naswona a va swi twisisi leswi a va yendlelaka swona. Phela vanhu volavo va fana ni vanhu lava Pawulo a nga va chumayela a Atena hikusa na vona a va nga xi tivi Xikwembu. — Min. 17:19, 20, 30, 34.

⁷ Pawulo a tlhamusele vanhu va Atena swaku Xikwembu xa ntiyiso “hi xona xi nyikaka vanhu hinkwavu wutomi, moya lowu va wu hefemulaka ni swilo hinkwaswu.” A tlhele a va byela swaku Xikwembu “hi xona xi hi nyikaka wutomi swaku hi hanya hi tlhela hi kota ku fambafamba.” Funtshi leswi xi nga Muyendli wa swilo hinkwaswu, “xi tirhise munhu mun’we swaku xi yendla tinxaka hinkwatu ta vanhu”. Se hinkwaswu leswi swi kombisa swaku Xikwembu xi fanele xi gandzeliwa. — Min. 17:25, 26, 28.

8. I yini swaku Yehovha a nge tshuki a swi yendla, naswona a swi kombisisa ku yini swaku wa hi rhandza?

⁸ Leswi Yehovha a nga Muvumbi wa swilo hinkwaswu ni Hosi Leyikulu, loko a wo swi lava, a a ta hi sindzisa leswaku hi mu tirhela, kambe a nge tshuki a swi yendla leswo. Yehovha a hi komba hi tindlela ta ku hambanahambana swaku a kona ni swaku a rhandza mun’wani ni mun’wani wa hina. Yena a lava leswaku vanhu hinkwavu va va vanghanu va yena hi masiku ni masiku. (1 Tm. 2:3, 4) Hi leswo swi yendlaka swaku Yehovha a hi trenara kuva hi djondzisa vanhu van’wani hi swikongomelo swa yena ni swilo swaswinene leswi a lavaka ku swi yendlela vanhu. (Mat. 10:11-13; 28:19, 20) Yehovha a tlhele a hi nyika bandla leswaku hi mu gandzela a tlhela a hi nyika madoda lawa ma hi pfunaka hi lirhandzu. — Min. 20:28.

9. Yehovha a swi kombisisa ku yini swaku a rhandza vanhu hinkwavu?

⁹ Hi nga li vona lirhandzu lalikulu leli Yehovha a nga na lona loko hi pimisa hi swilo hinkwaswu leswi a swi yendlelaka vanhu lava va kalaka va nga kholwi swaku Xikwembu xi kona. Hi xikombiso, se ku hundza malembe ya manyingi na vanhu va tilangela hi voxe leswi va lavaka ku swi yendla na va nga na mhaka ni minawu ya Yehovha. Hambileswo, Yehovha a tama a va komba lirhandzu hi ku va nyika leswi va swi lavaka swaku va tama va hanya. (Mat. 5:44, 45; Min. 14:16, 17) Hi mhaka ya ku rhandza ka Yehovha, swa koteka swaku vanhu volavo va va ni vanghanu lava va va rhandzaka, va va ni mindjangu, va va ni vana va tlhela va tikhorisa hi mintirho ya vona. (Ps. 127:3; Ekl. 2:24) Impela swa tikomba swaku Yehovha a rhandza vanhu hinkwavu. (Eks. 34:6) Swoswi a hi khumbukeni swaku hi mhaka muni hina hi lange ku tirhela Yehovha, ni swaku hi yini minkateko leyi hi yi kumaka hileswi hi nga langa ku mu tirhela.

HI MHAKA MUNI HI LANGE KU TIRHELA YEHOVHA?

10. a) I ntxini xi hi yendlaka hi tirhela Yehovha? (Matewu 22:37) b) U titwisa ku yini hi ku tiva swaku Yehovha a lehisa mbilu a tlhela a va ni timpsalu? (Tipisalema 103:13, 14)

¹⁰ Ku fana na Yesu, nchumu wa lisima hintamu lowu wu hi yendlaka hi tirhela Yehovha i lirhandzu leli hi nga na lona hi yena. (Lerha Matewu 22:37.) Phela loko hi ya hi djondza hi leswi Yehovha a nga tshamisa xiswona, swi yendla swaku hi swi lava ku tama hi va vanghanu va yena. Hi xikombiso, nkama Vayisrayele va nga tshika ku yingisa minawu ya Yehovha, a va byele a ku: “Ni kombela mi tshika tindlela ta n’wina ta ku biha.” (Yer. 18:11) Leswo swi kombisa swaku Yehovha i Xikwembu lexi nga ni timpsalu, xi va lehiselaka mbilu vanhu xi tlhela xi va komba lirhandzu. Yena wa khumbuka swaku a hi hetisekanga funtshi hi yendliwe hi wuthulu. (Lerha Tipisalema 103:13, 14.) Phela loko hi tinyika nkama wa ku pimisa hi ndlela leyi Yehovha a va lehiselaka hi yona mbilu vanhu, timpsalu leti a nga na tona ni wumunhu lin’wani la ku saseka leli a nga na lona, swi yendla swaku hi swi lava hintamu ku mu tirhela hi masiku ni masiku.

11. I mpsini swin’wani swi hi yendlaka hi tirhela Yehovha?

¹¹ Nchumu xin’wani xi hi yendlaka hi tirhela Yehovha, hi mhaka hi swona swaswinene leswi hi faneleke hi swi yendla. (Mat. 4:10) Nakambe loko hi tshembeka ka Yehovha swi ta tisa minkateko ya ku tala. Hi xikombiso, swi ta yendla swaku vito la Yehovha li kwetsimisiwa, swi kombisa swaku Sathana i muhembi naswona hi ta tsakisa mbilu ya Yehovha Papayi wa hina. Loko hi langa ku tirhela Yehovha swoswi, swi ta yendla swaku hi kuma nkateko wa ku mu tirhela hi masiku ni masiku. — Yoh. 17:3.

12-13. Hi djondza yini ka leswi nga yendlekela Jane na Pamela?

¹² Hambi hi vana vavatsongo, va nga swi kota ku mu rhandza hintamu Yehovha va tlhela va va ni wunghanu la ku tiya na yena. Vona leswi nga humelela Jane na Pamela,a lava va nga sungula ku djondza Bibele na va ha li vatsongo. Jane a sungule ku djondza Bibele na a ni 11 wa malembe, kasi Pamela a a ni 10. Vapsali va vona a va nga na mhaka ni ku djondza Bibele, kambe va va pfumelelile vana va vona swaku va djondza Bibele ntsena loko a vo tama va ya na vona kerekeni hi ma fim de semana. Jane a li: “Ku djondza Bibele ni Timboni ta Yehovha swi ni pfune swaku ni nga vi ni mahanyelo ya ku fana ni ya vakolega va mina, lava a va tirhisa timbangi ni ku yendla wuntunga la swa masangu.”

¹³ Loko Jane na Pamela se va kulenyana, va ve vachumayeli naswona hi ku famba ka nkama va ve vapfuli va ndlela, kuve hi nkama wa wun’we a va hlayisa vapsali va vona lava nga guga. Loko Jane a pimisa hi hinkwaswu leswi Yehovha a nga va yendlela swona a li: “Ni swi vone hi ya mina ku hetiseka ka leswi nga ka 2 Timotiya 2:19, leyi yi kombisaka swaku Yehovha wa va hlayisa lava va nga vanghanu va yena funtshi ‘wa va tiva lava va nga va yena.’” Impela Yehovha wa va hlayisa lava mu rhandzaka va tlhela va langa ku mu tirhela!

14. Hi nga yendla yini swaku hi basisa vito la Yehovha? (Vona mafoto.)

¹⁴ Hina lava hi tirhelaka Yehovha hi swi lava hintamu ku basisa vito la yena ka mavunhwa lawa va mu lumbetaka hi wona. Swaku u yi twisisa kahle mhaka leyi pimisa hi loko a wu ni munghanu wa kahle lweyi a rhandzaka ku nyika a tlhela a rivalela, u gama u twa munhu a vula swaku yena i munhu wa ku biha funtshi a nga tshembeki. A wu ta ku yini? Ha tshemba swaku a wu ta yendla hinkwaswu swaku u mu nyimelela. Swi hi ku fana ni leswi yendliwaka hi Sathana ni lava va kongomisiwaka hi yena; phela vona va vula mavunhwa lawa ma chimisaka vito la Yehovha, kambe hina hi yendla hinkwaswu leswi hi nga swi kotaka swaku hi li basisa vito la Yehovha hi tlhela hi vulavula ntiyiso hi yena. (Ps. 34:1; Esa. 43:10) Hi kombisa swaku hi lava ku mu tirhela Yehovha hi mbilu ya hina hinkwayu hi ndlela leyi hi hanyaka hi yona ni hi leswi hi swi vulaka.

15. Hi yini minkateko leyi Pawulo a nga yi kuma hileswi a nga txintxa swin’wani ka wutomi la yena? (Vafilipiya 3:7, 8)

¹⁵ Ha tsaka loko hi txintxa swin’wani ka wutomi la hina swaku hi tsakisa Yehovha ni ku tlhela hi yengesela ntirho lowu hi mu yendlelaka wona. Hi xikombiso, mupostolo Pawulo a a ni ntirho lowu a wu mu yendla a hloniphiwa hintamu hi Vayuda, kambe a wu tshikile leswaku a va mulandzeli wa Yesu Kreste ni ku tirhela Yehovha. (Gal. 1:14) Hi mhaka leyo, a ve ni wutomi la ku tsakisa hintamu a tlhela a kuma ni nkateko wa ku va mun’we wa lava nga ta ya fuma na Yesu atilweni. Pawulo a nga zanga a tisola hi xiboho lexi a nga xi yendla; se na hina a hi nge tshuki hi tisola hi ku tirhela Yehovha. — Lerha Vafilipiya 3:7, 8.

16. Hi djondza yini ka leswi swi nga yendlekela Júlia? (Vona mafoto.)

¹⁶ Loko hi rhangisa ku tirhela Yehovha ka wutomi la hina hi ta pfuneka swoswi ni ka nkama lowu taka. Vona leswi swi nga yendlekela makwerhu mun’wani lweyi a vitaniwaka Júlia. Yena a a tolovela ku yimbelela akerekeni nkama na wa ha li mutsongo naswona hambi hi vanhu van’wani a va swi vona swaku a ni nyiko ya ku yimbelela. Hi mhaka leyo, a sungule ku trenariwa swaku a va muyimbeleli. Nkama a a ya a kula, vanhu va vanyingi a va ya va mu tiva hileswi a a yimbelela kahle naswona a a tolovela ku yimbelela ka tindhawu ta ku hlonipheka hintamu. Nkama lowu na a djondza ka xikola xa muzika, kolega mun’wani a bule na yena a mu byela swaku Xikwembu xi ni vito, naswona vito la xona i Yehovha. Se loko ku hundze nkamanyana, Júlia a sungule ku djondza Bibele kambirhi hi vhiki. Júlia a game a langa ku tirhisa nkama wa yena ni ntamu wa yena swaku a tirhela Yehovha, ku nga li ku va muyimbeleli; kambe leswo a swi mu vevukelanga Júlia. Yena a li: “Vanhu va vanyingi a va vula swaku ni tlanga hi nyiko ya mina ya ku yimbelela, kambe mina a ni swi lava hi mbilu hinkwayu ku mu tirhela Yehovha.” Júlia a titwisa ku yini hi xiboho lexi a nga xi yendla ka 30 wa malembe lawa ma nga hundza? Yena a li: “Ni tsake hintamu hileswi ni nga langa ku tirhela Yehovha naswona na tiyiseka swaku ka nkama lowu taka a ta ni nyika hinkwaswu leswi ni swi navelaka.” — Ps. 145:16.

TAMA U TIRHELA YEHOVHA

17. Hi mhaka muni swi li swa lisima ku twisisa swaku hi hanya ka masiku ya wugamu?

¹⁷ Hi hanya ka masiku ya wugamu naswona a ku choti kule swaku misava leyi ya ku biha yi helisiwa. Swaku a basisa mhaka leyi, mupostolo Pawulo a te: “Ku sale ‘nkamanyana,’ naswona ‘lweyi a taka a ta fika naswona a nge hlweli.’” (Heb. 10:37) Leswo swi lava ku vula swaku vanhu va vanyingi namuntlha vo va ni nkama wawutsongo leswaku va langa swaku va ta mu tirhela Yehovha kumbe a va nga ta mu tirhela. (1 Ko. 7:29) Se hina hi tirhelaka Yehovha hi nga tiyiseka swaku hambi ho kumana ni swikarhatu swaswikulu hintamu, swikarhatu swoleswo i swa “nkamanyana.”

18. Yehovha na Yesu va lava swaku hi tama hi yendla yini?

¹⁸ Yesu a nga yo byela vadjondzisiwa va yena swaku va mu landzela ntsena, kambe a va byele swaku va tama va yendla leswo. (Mat. 16:24) Loko se u ni malembe ya manyingi na u tirhela Yehovha, tama u yendla swoleswo. Hinkwerhu hi fanele hi tikarhata leswaku hi tama hi tirhela Yehovha. Leswo a swi vevuki, kambe xiboho lexo xi tisa ntsaku ni minkateko. — Ps. 35:27.

19. U djondze yini ka leswi nga yendlekela Jim?

¹⁹ Van’wani va pimisa swaku ku va Mboni ya Yehovha swi va sivela ku tikhorisa hi wutomi hilani va lavaka hi kona. Loko u li jovhem, ku nga va swaku na wena u titwisa xileswo? Pimisa hi leswi nga yendlekela jovhem lin’wani leli vitaniwaka Jim, lona li li: “A ni pimisa swaku ku va Mboni ya Yehovha a swi ni sivela ku tikhorisa hi wutomi hilani ni lavaka hi kona. A swi tikomba ingaku vakolega va mina va hanya wutomi la ku tsakisa hileswi a va ya mafexteni, va namorara, va tha magemi ya tinyimpi ni ku lwa; kuve xa mina a ku li ku ya nsin’wini ni mintlhanganwini ntsena. Leswo swi ni yendle ni sungula ku yendla swilo swa ku biha a xihundleni naswona hi ku famba ka nkama a ni vona ingaku swilo swoleswo a swi bihanga. Hambileswo ni vone swaku a ni nga tsaki hi wutomi leli a ni li hanya. Se ni sungule ku pimisa hi ndlela leyi a ni pfuneka hi yona nkama a ni tirhisa matshinya ya minawu ya Bibele; se ni swi vone swi yampsa kuva ni tlhela ni tirhela Yehovha hi mbilu ya mina hinkwayu. Naswona ku sukela kolanu ni yi vonile ndlela leyi Yehovha a a xi hlamula hi yona xikhongelo xin’wani ni xin’wani lexi a ni xi yendla.”

20. Hi fanele hi tinyimisela ku yendla yini?

²⁰ Mupisalema mun’wani loko a yimbelelela Yehovha a te: “Wa tsaka lweyi u mu langaka u tlhela u mu tshuneta ka wena, leswaku a ta tshama ka kintari wa wena.” (Ps. 65:4) Ku fana na Yoxuwa, na hina hi fanele hi tama hi tinyimisela ku tirhela Yehovha. Yena a te: “Mina ni ndjangu wa mina, hi ta tirhela Yehovha.” — Yox. 24:15.