“Yendlani Leswi Rito La Xikwembu Li Vulaka Swona”

1-2. I yini lexi yendlaka vanhu va Yehovha va tsaka? (Yakobe 1:22-25)

YEHOVHA ni N’wana wa yena lweyi a mu rhandzaka va lava leswaku minkama hinkwayu hi tshama na hi tsakile. Mutsali wa buku la Tipisalema 119:2 a te: “Va tsaka lava yingisaka switsundzuxu swa yena lava va mu lavetelaka hi mbilu hinkwayu.” Yesu na yena a tshembise leswaku “va tsaka lava twaka rito la Xikwembu va tlhela va yendla leswi li swi vulaka!” — Luk. 11:28.

² Vanhu va Yehovha amisaveni hinkwayu va tiviwa na va li vanhu lava nga tsaka. Phela nchumu xa lisima hintamu lexi hi yendlaka hi tsaka hi leswi hi lerhaka Bibele nkama ni nkama hi tlhela hi tinyimisela ku tirhisa hinkwaswu leswi hi swi djondzaka ka lona. — Lerha Yakobe 1:22-25.

3. Hi pfunekisa ku yini loko hi tirhisa leswi Rito la Xikwembu li swi vulaka?

³ Ku va muyendli wa leswi Rito la Xikwembu li swi vulaka swa pfuna hintamu. Loko hi yendla leswi Yehovha a swi lavaka mbilu ya yena ya tsaka, leswo swa hi tsakisa hintamu swinene. (Ekl. 12:13) Naswona loko hi tirhisa leswi nga ka Bibele ka wutomi la hina hi ta va ni ntsaku andjangwini naswona hi ta hanyisana kahle ni vamakwerhu bandleni, funtshi hi ta fambela kule ni swikarhatu swa swinyingi leswi vanhu lava kalaka va nga mu yingisi Yehovha va kumanaka na swona namuntlha. Ha pfumelelana na yena hosi Davhida lweyi loko se a yimbelelile hi minawu ni switsundzuxu swa Yehovha a nga gama a vula swaku: “Swa pfuna hintamu ku swi yingisa.” — Ps. 19:7-11.

4. Hi mhaka muni swi nga vevuki ku yendla leswi Bibele li swi vulaka?

⁴ Ntiyiso wa mhaka hi leswaku a swi vevuki ku kuma nkama wa ku yenela wa ku va hi lerha Bibele hi tlhela hi pimisa hi leswi hi swi djondzaka. Se, swi lava hi tihambela programa la kuva hi djondza Bibele hi tlhela hi tiva leswi Yehovha a lavaka leswaku hi swi yendla. Se ka djondzo leyi hi ta vona swaku i yini leswi nga hi pfunaka ku va hi swi kota ku lerha Bibele siku ni siku. Hi ta tlhela hi vona ni leswaku i mpsini leswi nga hi pfunaka ku pimisa hi leswi hi swi djondzaka hi tlhela hi vona ni tindlela ta ku swi tirhisa ka wutomi la hina la siku ni siku.

TINYIKI NKAMA WA KU LERHA RITO LA XIKWEMBU

5. Hi yini mintirho leyi yi hi yendlaka hi tshama na hi khomekile?

⁵ Vanhu va Yehovha namuntlha va tshama na va khomekile hi ku yendla swilo swa lisima. Leswi va lavaka male leswaku va kota ku tihanyisa va tlhela va hlayisa ni mindjangu ya vona, va vanyingi va lavetela ntirho leswaku va kota ku tihlayisa va tlhela va hlayisa ni maxaka ya vona. (1 Tm. 5:8) Va ku tala va hina va hlayisa maxaka ya vona lawa ma vabyaka kumbe lawa se ma nga guga. Naswona hinkwerhu ka hina hi tshama na hi khomekile hi ku yendla mintirho leyi hi nyikiwaka yona bandleni ni ku yendla ntirho wa lisima lowu hi nga na wona wa ku chumayela hi ku hiseka. Se, leswi hi nga ni mintirho leyi hinkwayu hi nga wu kumisa ku yini nkama wa ku lerha Bibele nkama ni nkama, hi pimisa hi leswi hi nga swi lerha ni ku tlhela hi tirhisa leswi hi nga swi lerha?

6. Hi nga swi kotisa ku yini ku lerha Bibele siku ni siku? (Vona mufoto.)

⁶ Ka hina Vakreste ku lerha Bibele i swa “lisima hintamu.” (Filp. 1:10) Phela swi hi yendla hi tsaka, hambi hi Bibele la hi pfuna leswaku hi lerha siku ni siku. Hi xikombiso Tipisalema 1:1, 2 loko yi vulavula hi munhu lweyi a nga tsaka, yi li: “A rhandza nawu wa Yehovha, a lerha nawu wa Yena hi rito la le hansi wusiku ni nhlikanhi.” Vhela swa tikomba leswaku ku lerha Bibele siku ni siku swa pfuna, naswona ku ni vanhu va vanyingi lava se va nga pfuneka hi swona leswo. Hi xikombiso, makwerhu Victor a li: “Hambileswi ni kalaka ni nga swi rhandzi ku pfukela, nkama wa nimixo hintamu i nkama lowu mimpimiso ya mina yi nga rhula naswona ku kalaka ku nga na nchumu lexi nga ni phazamisaka. Hi mhaka leyo, ni tolovela ku lerha Bibele hi nkama wolowo.” Se wena ke, hi wini nkama wawunene ka wena wa ku lerha Bibele?

PIMISA HI LESWI U SWI LERHAKA

7-8. I mpsini swi nga yendlaka swi hi karhatela ku twisisa leswi hi swi lerhaka? Nyikela xikombiso.

⁷ Swi nga ha yendleka minkama yin’wani loko hi lerha, hi lerha swilo swa swinyingi hintamu kambe loko hi nyima hi pimisa hi leswi hi nga swi lerha hi vona swaku a hi swi twisisanga leswi a hi swi lerha. Leswo swi nga ha yendleka loko hi lerha Bibele. Kumbexana xin’wani lexi nga hi pfunaka ku lerha Bibele siku ni siku i ku tihambela programa, hambi ko va programa la ku lerha tindzima ti nga li tingaki hi siku, kambe hi fanele hi tihambela programa leli hi nga ta swi kotaka ku li fikelela. (1 Ko. 9:26) I ntiyiso leswaku i swa lisima ku lerha Bibele, kambe ku lerha Bibele ko va masungulu ntsena. Ku ni swin’wani swa lisima leswi na swona hi faneleke hi swi yendla.

⁸ Pimisa hi xikombiso lexi: I ntiyiso leswaku mati ma laveka leswaku hi kota ku hanya. Kambe loko a mpfula yo na hintamu yi nga wonhetela minchumu ya yinyingi. Misava yi lava nkama leswaku yi psonga mati hi kutsongokutsongo leswaku minchumu yi kota ku kula kahle. Swa fana ni ku lerha Bibele. Loko hi lerha minchumu ya yinyingi swi nga hi karhatela ku yi twisisa ni ku tlhela hi yi khumbuka. — Yak. 1:24.

9. Hi nga yendla yini loko hi tsumbula leswaku hi lerha hi ku tsutsuma Bibele?

⁹ Hi nga yendla yini loko hi tsumbula leswaku nkama lowu hi lerhaka Bibele hi tsutsuma hintamu? Hi nga ha lerha hi kutsongokutsongo hi tlhela hi yendla minzamu ya ku pimisa hi leswi hi swi lerhaka. Leswo a swi fanelanga swi hi chavisa. Leswi hi pfuniwaka leswaku hi pimisa hi leswi hi swi lerhaka hi fanele hi swi teka swi li swa lisima ka hina ku yendla leswo. Kumbexana hi nga ha yengesela nkama lowu hi wu hetaka na hi lerha Bibele kumbe hi pumba tindzimana leswaku hi kota ku kuma nkama wa ku pimisa hi leswi hi swi lerhaka. Victor, lweyi se hi nga bula hi yena a li: “A ni lehisi ku lerha ka mina ka Bibele. Minkama yin’wani ni lerha ndzima yin’we hi siku. Leswi ni lerhaka Bibele nimixo, swi ni yendla ni pimisa hi leswi ni nga swi lerha siku hinkwalu.” Ku nga na mhaka ndlela leyi hi tirhisaka nkama wa hina leswaku hi lerha Bibele, i swa lisima leswaku nkama hi lerhaka hi nga tsutsumi kambe hi zama ku twisisa hi tlhela hi pimisa hi leswi hi swi lerhaka. — Ps. 119:97; vona kwadru leli nge “Swivutiso Swa Ku Pimisa Hi Swona.”

10. I mpsini swi nga ku pfunaka ku tirhisa leswi u swi djondzaka? (1 Vatesalonika 5:17, 18)

¹⁰ Minkama hinkwayu loko u lerha Bibele zama ku vona swaku u nga swi tirhisisa ku yini leswi u swi lerhaka ka wutomi la wena. Se, loko u lerha tivutisi leswi: ‘Ni nga swi tirhisisa ku yini leswi ka wutomi la mina swoswi kumbe ka nkama lowu taka?’ Hi xikombiso, a hi nge u lerha a buku la 1 Vatesalonika 5:17, 18. (Lerha.) Loko se u lerhile tindzimana leti, nyimanyana u pimisa hi leswi swikhongelo swa wena swi nga tshamisa xiswona ni nkama lowu u wu hetaka na u yendla swikhongelo. Xin’wani u nga xi yendlaka i ku pimisa hi swilo leswi u nga mu khensaka hi swona Yehovha. Phela loko u nyima nkamanyana leswaku u pimisa hi leswi u swi lerhaka swi ta ku pfuna leswaku u nga vi mutwi ntsena wa rito la Xikwembu kambe u va muyendli wa leswi u swi lerhaka ka rito la Xikwembu. Lexi o va xikombiso ntsena kambe u nga yendla leswi fanaka ni ka tindzimana tin’wanyani ka Bibele. Se u nga yendla yini loko u tsumbula leswaku ku ni swilo swa swinyingi leswi lavaka u swi yampsisa ka wutomi la wena?

TIRHELA KA LESWI U NGA SWI KOTAKA

11. I mpsini swi nga hi karhatelaka minkama yin’wani loko hi djondza Bibele? Nyikela xikombiso.

¹¹ Loko u lerha Bibele u vona swaku ku ni swilo swa swinyingi leswi u faneleke u swi yampsisa ka wutomi la wena, u nga ha sungula ku hela ntamu. A hi nge u djondza ndzima yin’we ya Yakobe hi siku: Namuntlha loko u djondza u vona leswaku Yehovha a lava leswaku hi nga kombisi xikheto ka vanhu, hi va khoma hi ndlela ya ku fana. (Yak. 2:1-8) Se u vona leswaku u fanele u yampsisa kolanu. Loko wa ha yampsisa, mundzuku u djondza swilo swin’wani. U vona leswaku Yehovha a lava hi tivonela ka ndlela leyi hi vulavulaka hi yona. (Yak. 3:1-12) Kolanu u vona leswaku u fanele u yampsisa, u fanele u vulavula hi ndlela yayinene. Na wa ha zama ku yampsisa swoleswo hi mundlwani ka kona u vona swaku Bibele la hi basopisa ka wunghanu ni misava. (Yak. 4:4-12) Kolanu u tekela ku vona leswaku u fanele u yampsisa ndlela leyi u hungataka hi yona. Hi masiku yamatsongo u kuma leswaku ku ni swilo swa ku tala ka wutomi la wena leswi swi lavaka u yampsisa ka swona.

12. Hi mhaka muni u nga fanelanga u hela ntamu loko u vona leswaku i swinyingi leswi u faneleke u yampsisa? (Vona ntlhamuselo.)

¹² Loko u tsumbula leswaku i swinyingi leswi swi lavaka u yampsisa ka swona swi nga ku heti ntamu. Ku va u swi tsumbulile leswo swi kombisa leswaku u munhu lweyi a tivekaka hansi naswona u tinyimisele ku hanya hi leswi u nga swi djondzaka ka Bibele.a Khumbuka leswaku a ku va ni wumunhu la Wukreste swi teka nkama, a swi yendleki hi ku tsopeta ka tihlo. (Kol. 3:10) Se i ntxini lexi nga ku pfunaka ku tama u hanya hi leswi u swi djondzaka ka Bibele?

13. I mpsini leswi u nga swi yendlaka leswaku u yendla ku txintxa loku lavekaka? (Vona mufoto.)

¹³ Handle ka ku lava ku yampsisa hinkwaswu leswi u nga swi kuma nkama na u lerha Bibele hi nkama wa wun’we, zama ku yendla planu la leswi u faneleke u swi yampsisa. (Swiv. 11:2) Se zama ku yendla leswi: Tsala hinkwaswu leswi u faneleke u swi yampsisa, u gama u langa xin’we kumbe swimbirhi leswaku u sungula hi swona, se leswin’wani swi ta gama swi landzela hi nkama wun’wani. Se u nga ha tivutisa leswi: Ni nga sungula hi kwini?

14. Loko hi lava ku yampsisa wumunhu la hina hi nga sungula hi yini?

¹⁴ Swi tsakisa hintamu ku vona swaku ha swi kota ku fikelela wumunhu lalinene leli a hi lava ku li fikelela loko hi hambeta hi lerha Rito la Xikwembu. Hi nga ha langa ku sungula hi ku yampsisa wumunhu leli swi lavaka hi li yampsisa hi xihantla, kambe swi nga ha yendleka ku ni wumunhu leli hi vonaka leswaku swa vevuka ku rhanga hi li yampsisa. Ku tirhisa Índice das Publicações da Torre de Vigia ni Nkongomiso Wa Ku Yendla Pexkiza Wa Timboni Ta Yehovha, swi nga hi pfuna leswaku hi yampsisa a wumunhu la hina. Hi nga tlhela hi khongela ka Yehovha hi mu kombela leswaku a hi nyika “ku navela ni matimba ya ku yendla” hinkwaswu leswi a swi navelaka. (Filp. 2:13) Swi tsakisa hintamu ku vona leswaku ha swi kota ku fikelela wumunhu leli a hi lava ku li fikelela. Naswona swi hi nyika matimba leswaku hi hambeta hi yampsisa wumunhu leli la ha chotaka swaku hi li yampsisa.

PFUMELELA RITO LA XIKWEMBU LI TIRHA KA WENA

15. Vanhu va Yehovha va hambanise ku yini ni vanhu van’wani lava lerhaka Bibele? (1 Vatesalonika 2:13)

¹⁵ Vanhu va vanyingi namuntlha se va li lerhile Bibele makhambi ya manyingi. Kambe lexi telisaka ni wusiwana hi leswaku vanyingi va vona a va swi kholwi hi ku helela leswi nga ka Bibele naswona a va swi pfumeleli swaku swi khumba wutomi la vona, va hanya hi leswi Bibele li swi djondzisaka. Kambe hina hi hambanile na vona hikusa ku fana ni Vakreste va ku sungula hina hi yamukela Bibele leswi li nga xiswona, ku nga “rito la Xikwembu”. Hi mhaka leyo, hi pfumelela leswaku leswi nga tsaliwa ka Bibele swi khumba wutomi la hina, hi hanya hi swona. — Lerha 1 Vatesalonika 2:13.

16. I yini xi nga hi pfunaka ku yendla leswi Bibele li swi vulaka?

¹⁶ Swi nga ha yendleka leswaku loko hi li karhi hi lerha Rito la Xikwembu hi lerha hi ku kahlula hintamu. Xin’wani, hi nga ha vona swaku a hi na nkama wa ku lerha Bibele. Ku nga na mhaka swaku hi swini swikarhatu leswi hi kumanaka na swona leswaku hi kota ku lerha Rito la Xikwembu, loko hi kombela Yehovha swaku a hi pfuna ka xikarhatu xa kona, a ta hi nyika moya wa ku kwetsima a tlhela a hi seketela. Loko hi tama hi lerha Bibele hi ta pfuneka hintamu hikusa a hi nga ta va valerhi ntsena kambe hi ta va vayendli va rito hi tlhela hi yampsisa a wumunhu leli hi faneleke hi li yampsisa ka wutomi la hina. — Yak. 1:25.