Ku Chavisa Ka Nyimpi
A nyimpi i wun’we wa minchumu ya ku chavisa hintamu leyi munhu a nga kumanaka na yona ka wutomi. Amisaveni hinkwayu, masonchwa ni vanhu va ku kala va nga li masonchwa se va swi vonile hi matihlo ya vona leswi chavisaka xiswona ku va ka ndhawu leyi ku nga ni nyimpi.
MASONCHWA
“U vona minchumu ya yinyingi ya ku chavisa. U vona vanhu na va dlayiwa van’wani va vavisiwa, phela a swi koteki ku titwa na u vhikelekile.” — Gary wa Grã-Bretanha.
“Ni duvuliwe ka nhlana ni ka kara. Ni vone vanhu va vanyingi na va dlayiwa, ku patsa swivanani ni lava va nga guga. Phela u vona minchumu ya yinyingi ya ku chavisa na yi yendleka lakakuza u tlanyala u nga ha vi na mhaka na swona.” — Wilmar wa Colômbia.
“Loko u vona munhu na a duvuliwa phambheni ka wena, swi karhata hintamu ku swi susa ka mimpimiso ya wena. U tshamela ku mu khumbuka na a ba nyandha a rila hi ku twa ku vava. Phela a swi koteki ku va u swi khohlwa.” — Zafirah wa Estados Unidos.
XITSHUNGU
“A ni pimisa swaku a ni nge he tshuki ni tsaka. A ni chava ku fa naswona xa ku biha ku tlula leswo a ni chava ku luzekeliwa hi maxaka ni vanghanu va mina.” — Oleksandra wa Ucrânia.
“Ku nyima ka bixa la swakudla ku sukela hi ma 2h anze ma 23h swa chavisa, u chava swaku u nga tshuka u kumiwa hi bala.” — Davron wa Tadjiquistão.
“Ni feliwe hi vapsali va mina a nyimpini. Ni sale noxe na ni nga na wa ku ni hlayisa.” — Marie wa Ruanda.
Vanhu lava va nga kombisiwa lani, hambileswi va nga kumana ni swiyimu swa ku chavisa hi mhaka ya nyimpi, vona se va kume ku rhula funtshi va tiyiseka hi ku helela swaku ku nga li khale tinyimpi ti ta helisiwa. A revhixta leli li ta tirhisa Bibele swaku li tlhamusela leswaku leswo swi ta yendlekisa ku yini.