Tinyimpi Ti Ta Helisa Ku Yini?

XIKWEMBU XI TA HELISA MIMFUMU HINKWAYU YA VANHU

Xikwembu xi ta helisa mimfumu hinkwayu ya vanhu hi ku tirhisa nyimpi leyi Bibele li yi vitanaka swaku i Armajedoni.a (Nhlawutelo 16:16) Hi nkama wolowo, “tihosi ta misava hinkwayu” ti ta tlhanganisiwa leswaku ti ta lwa nyimpi ya “siku lalikulu la Xikwembu xa Matimba Hinkwawu.” (Nhlawutelo 16:14) A nyimpi ya armajedoni hi yona leyi nga ta helisa tinyimpi hinkwatu.

Xikwembu xi ta txintxa mimfumu ya vanhu hi Mfumu wa xona. A Mfumu wolowo wu le tilweni naswona wu ta fuma misava hinkwayu, funtshi a wu nga ta tshuka wu helisiwa. (Daniyele 2:44) Xikwembu xi lange N’wana wa xona Yesu Kreste leswaku a va Hosi ya Mfumu wolowo. (Esaya 9:6, 7; Matewu 28:18) A Mfumub lowu, hi lowu Yesu a nga djondzisa vadjondzisiwa va yena swaku va wu kombela hi xikhongelo. (Matewu 6:9, 10) Se hi wugamu a misava hinkwayu yi ta fumiwa hi Mfumu wun’we naswona a Hosi ya Mfumu wolowo ku ta va Yesu Kreste.

Ku hambana ni mimfumu ya vanhu, Yesu a nga ta tirhisa wuhosi la yena leswaku a pfuneka yena. Yena a lulamile naswona a nga na xikheto, hi mhaka leyo a ku na munhu lweyi a nga ta chava ku kala a nga yendleliwi swaswinene hi mhaka ya kori ya yena kumbe lomu a nga psaliwa kona. (Esaya 11:3, 4) Naswona a swi nga ha ta lava swaku vanhu va lwela wululami hikusa Yesu a ta va komba wululami vanhu hinkwavu hi ku yendla swaku hinkwavu va hlayiseka. Bibele li li: ‘A ta pfuna swisiwana leswi kombelaka ku pfuniwa ni lava kalaka va nga na nchumu ni hinkwavu lava kalaka va nga na wa ku va pfuna. . . . A ta swi ponisa ka ku hluphiwa ni ka ku khomiwa hi voko la nsimbi.’ — Tipisalema 72:12-14.

Mfumu wa Xikwembu wu ta helisa swilo hinkwaswu leswi tirhisiwaka nyimpini. (Mikiya 4:3) Wu ta tlhela wu helisa vanhu hinkwavu lava yendlaka swilo swa ku biha naswona va yalaka ku tshika ku lwa ni ku yendla leswaku ku nga na ku rhula. (Tipisalema 37:9, 10) Vavanuna, vavasati ni swivanani, hinkwavu va ta titwa na va vhikelekile ka ndhawu yin’wani ni yin’wani amisaveni. — Ezekiyele 34:28.

Hansi ka Mfumu wa Xikwembu, vanhu va ta va ni wutomi la kahle swinene. Swikarhatu hinkwaswu leswi yendlaka vanhu va lwa swa ku fana ni wusiwana, ndlala ni ku pfumala ndhawu ya ku tshama ka yona, a swi nga ha ta va kona. Hinkwavu va ta va ni swakudla swaswinene ni ndhawu ya kahle ya ku tshama ka yona. — Tipisalema 72:16; Esaya 65:21-23.

Mfumu wa Xikwembu wu ta helisa swilo hinkwaswu leswi nga vangiwa hi tinyimpi. Ku nga li ntsena ku vava loku vanhu va ku twaka muzimbheni kambe hambi hi ku vava loku munhu a ku twaka hi le mbilwini hi mhaka ya swilo swa ku biha leswi nga vangiwa hi tinyimpi. Vanhu hinkwavu lava nga fa va ta tlhela va hanya lani misaveni naswona mindjangu hinkwayu yi ta tlhela yi tlhangana. (Esaya 25:8; 26:19; 35:5, 6) Swilo hinkwaswu swa ku biha leswi nga vangiwa hi tinyimpi a swi nge he khumbukiwi, swi ta va swilo leswi se ‘swi nga hundza.’ — Nhlawutelo 21:4.

XIKWEMBU XI TA HELISA XIDJOHO

Loko Mfumu wa Xikwembu wu ta sungula ku fuma misava, vanhu hinkwavu va ta gandzela Xikwembu xin’we xa ntiyiso ku nga Yehovhac, “Xikwembu xa lirhandzu ni ku rhula.” (2 Vakorinto 13:11) Vanhu va ta djondza ku hanya xikan’we hi ku rhula. (Esaya 2:3, 4; 11:9) Lava va nga ta yingisa Xikwembu a va nga ha ta va ni xidjoho kambe va ta va vanhu va ku hetiseka. — Varoma 8:20, 21.

XIKWEMBU XI TA HELISA SATHANA NI MADIMONI YA YENA

A Mfumu wa Xikwembu wu ta helisa vavangi vakulu va tinyimpi ku nga Sathana ni madimoni ya yena. (Nhlawutelo 20:1-3, 10) Loko Sathana ni madimoni ya yena se va helisiwile, amisaveni ku ta va ni “ku rhula kakukulu.” — Tipisalema 72:7.

U nga tshemba swaku xitshembiso xa Xikwembu xa ku helisa tinyimpi xi ta hetiseka hikusa Xikwembu xi ni matimba naswona xa swi navela ku yendla leswo.

• Xikwembu xi ni wutlharhi ni matimba lawa ma lavekaka swaku tinyimpi ti helisiwa. (Yobo 9:4) Xikwembu xi kota ku yendla swilo hinkwaswu. — Yobo 42:2.

• Xikwembu xa swi nyenya ku vona vanhu na va hlupheka. (Esaya 63:9) Naswona Xikwembu xa mu “nyenya mun’wani ni mun’wani lweyi a rhandzaka ku lwa.” — Tipisalema 11:5.

• Minkama hinkwayu Xikwembu xa swi hetisisa leswi xi swi vulaka, xona a xi hembi. — Esaya 55:10, 11; Tito 1:2.