Hi Mhaka Muni Tinyimpi Ti Nga Heli?

XIDJOHO

Nkama Xikwembu xi nga yendla vanhu va ku sungula ku nga Adamu na Evha, xi va yendle hi xifaniso xa xona. (Genesa 1:27) Leswo swi vula swaku vona a swi va vevukela ku tekelela wumunhu la Xikwembu la ku fana ni ku rhula ni lirhandzu. (1 Vakorinto 14:33; 1 Yohani 4:8) Kambe Adamu na Evha a va xi yingisanga Xikwembu naswona va djohile. Leswi hi nga vana va vona, hinkwerhu namuntlha ha djoha hi tlhela hi fa. (Varoma 5:12) Naswona a xidjoho xi yendla leswaku hi tshamela ku pimisa ni ku yendla swilo swa ku biha. — Genesa 6:5; Marka 7:21, 22.

MIMFUMU YA VANHU

Hina vanhu a hi vumbiwanga ni wuswikoti la ku tifuma. Bibele li li: “Ni swi tiva kahle swaku munhu a nge swi koti ku tikongomisa.” (Yeremiya 10:23) Hi mhaka leyo, a minfumu ya vanhu a yi swi koti ku helisa tinyimpi ni swilo leswi vangaka tinyimpi.

SATHANA NI MADIMONI YA YENA

Bibele li vula swaku “misava hinkwayu yi le hansi ka matimba ya lweyi wa ku biha.” (1 Yohani 5:19) Leswi nge yi le hansi ka matimba ya Sathana Davulosi. Yena i mudlayi. (Yohani 8:44) Naswona yena ni madimoni ya yena va hlohlotela vanhu swaku va rhandza ku lwa ni ku vanga tinyimpi. — Nhlawutelo 12:9, 12.