Tama U Famba Hi Lipfumelo

1. Hi mhaka muni mupostolo Pawulo a a tsaka loko a pimisa hi wutomi la yena?

MUPOSTOLO Pawulo a a swi tiva swaku a ku nga choti kule swaku a dlayiwa. Kambe loko a pimisa hi wutomi la yena a a tsaka swinene, yena a te: “Ni tsutsume ka mpalisanu ni za ni ya heta, ni hlayise lipfumelo.” (2 Tm. 4:6-8) Pawulo a yendle swiboho hi wutlharhi swaku a tirhela Yehovha wutomi la yena hinkwalu funtshi a a swi tiva swaku a a tsakise mbilu ya Yehovha. Na hina hi lava ku yendla swiboho swaswinene hi tlhela hi tsakeliwa hi Yehovha. Kambe hi nga swi yendlisa ku yini leswo?

2. Swi vula yini ku famba hi lipfumelo?

² Pawulo a vule swaku yena ni Vakreste va ku tshembeka a va “famba hi lipfumelo, ku nga li hi ku vona.” (2 Ko. 5:7) Ka Bibele, a rito leli nge “ku famba” minkama yin’wani li kombetela ndlela leyi munhu a langaka ku hanya hi yona. Munhu lweyi a fambaka hi ku vona, a yendla swiboho ntsena hi ku ya hi leswi a swi vonaka, leswi a swi twaka ni ndlela leyi a titwaka hi yona. Kambe munhu lweyi a fambaka hi lipfumelo a yendla swiboho leswi fambisanaka ni ku rhandza ka Yehovha, naswona wa tiyiseka leswaku yena a ta mu hakela ni swaku ku yingisa switsundzuxu swa Yehovha leswi nga ka Bibele hi swona swi nga mu yendlaka a tsaka wutomi la yena hinkwalu. — Ps. 119:66; Heb. 11:6.

3. Hi yini minkateko leyi hi yi kumaka loko hi famba hi lipfumelo? (2 Vakorinto 4:18)

³ Minkama yin’wani hinkwerhu hi yendla swiboho hi ku ya hi leswi hi swi vonaka, leswi hi swi twaka, ni leswi hi titwisaka xiswona. Kambe ku pimisa ntsena hi swilo leswi nkama hi yendlaka swiboho swa lisima, swi nga yendleka swi hi kokela swikarhatu. Hi mhaka muni hi vula leswo? Hi mhaka a hi minkama hinkwayu swi nga hi fambelaka kahle loko hi yendla swilo hi ku ya hi leswi hi swi vonaka, leswi hi swi twaka kumbe hi titwisaka xiswona. Naswona loko hi famba hi ku vona hi wugamu hi ta yendla swiboho leswi Yehovha a kalaka a nga swi tsakeli. (Ekl. 11:9; Mat. 24:37-39) Kambe loko hi famba hi lipfumelo, hi ta yendla swiboho “leswi tsakisaka Hosi.” (Efe. 5:10) Se ku yendla swilo leswi Yehovha a swi tsakelaka swi ta yendla swaku hi va ni ku rhula hi tlhela hi va ni ntsaku wa ntiyiso. (Ps. 16:8, 9; Esa. 48:17, 18) Naswona loko hi tama hi famba hi lipfumelo hi ta kuma wutomi la ku kala li nga heli ka nkama lowu taka. — Lerha 2 Vakorinto 4:18.

4. Munhu a nga swi tivisa ku yini swaku a famba hi lipfumelo ku nga li hi ku vona?

⁴ Hi nga swi tivisa ku yini leswaku hi famba hi lipfumelo ku nga li hi ku vona? Leswi nga hi pfunaka i ku tivutisa leswi: ‘Loko ni yendla xiboho ni pimisa ntsena hi swilo leswi ni swi vonaka, kumbe ni yendla swiboho hi ku landza leswi Yehovha a swi vulaka?’ Ka djondzo leyi hi ta vona leswi hi faneleke hi swi yendla leswaku hi tama hi famba hi lipfumelo ka swiyimu swinharhu swa lisima: 1) Loko hi langa ntirho; 2) loko hi langa munhu wa ku chada na yena ni 3) loko hi yamukela nkongomiso lowu taka hi ka nhlengeletanu ya Yehovha. Ka swiyimu hinkwaswu leswi swa swinharhu hi ta vona leswi hi faneleke hi pimisa hi swona swaku hi yendla xiboho xaxinene.

LOKO HI LANGA NTIRHO

5. Hi ntolovelo, i mpsini leswi munhu a pimisaka hi swona loko a langa ntirho?

⁵ Hinkwerhu hi lava ku hlayisa mindjangu ya hina hi tlhela hi yi xavela leswi lavekaka. (Ekl. 7:12; 1 Tm. 5:8) Mintirho yin’wani yi holela male ya yinyingi ku tlula yin’wani. Ka mintirho yin’wani munhu a nga hola male leyi swi nga kotekaka kuva a hlayisa ndjangu wa yena a tlhela a veka male yin’wani swaku a yi tirhisa ka nkama lowu taka. Kambe ka yin’wani a ngo hola male leyi yi ngo to yenela swaku a hlayisa ndjangu wa yena ntsena. I ntiyiso swaku loko hi langa ntirho hi ta pimisa hi leswaku va ta hi holela male muni, kambe leswo a swi fanelanga swi va swona ntsena swa lisima, hikusa hi nga ha tikuma se na hi famba hi ku vona.

6. Hi nga swi kombisisa ku yini swaku hi famba hi lipfumelo loko hi langa ntirho? (Vaheberu 13:5)

⁶ Loko hi famba hi lipfumelo, hi ta pimisa kahle hi ndlela leyi ntirho lowu hi lavaka ku wu langa wu nga ha li khumbisaka xiswona wunghanu la hina na Yehovha. Hi nga ha tiyendla swivutiso leswi: ‘Indjhe ntirho lowu wu ta lava ni yendla nchumu lexi Yehovha a kalaka a nga xi rhandzi?’ (Swiv. 6:16-19) ‘Indjhe swi ta lava leswaku ni luza mintlhanganu ni tlhela ni nga kumi nkama wa ku yenela leswaku ni chumayela ni tlhela ni djondza Bibele? Indjhe swi ta lava leswaku ni heta nkama wa wunyingi na ni li kule ni ndjangu wa mina?’ (Filp. 1:10) Loko nhlamulu ya xivutiso xin’we ka leswi ku li ina, swi nga va kahle leswaku u nga wu pfumeli ntirho wolowo, hambiloko swi karhata ku kuma wun’wani. Phela leswi hi fambaka hi lipfumelo, hi yendla hinkwaswu swaku swiboho swa hina swi kombisa leswaku ha tshemba swaku Yehovha a ta hi hlayisa. — Mat. 6:33; lerha Vaheberu 13:5.

7-8. Makwerhu Javier a swi kombisise ku yini leswaku a famba hi lipfumelo? (Vona mufoto.)

⁷ Makwerhu Javier,a wa América do Sul a swi vonile swaku i swa lisima ku famba hi lipfumelo. Yena a li: “Ni titsalisile leswaku ni kuma ntirho lowu a wu ta wu phindha kambirhi muholo wa mina, naswona loko a no wu kuma ntirho lowuyani a ni ta tsaka swinene.” Kambe hi nkama wolowo wa wun’we makwerhu Javier a a lava ku va mupfuli wa ndlela. Yena a li: “Va ni vitanile swaku ni yendla entrevhixta kuva ni tholiwa. Kambe na ni nga se ya ka entrevhixta ni khongelile ka Yehovha hikusa a ni tiyiseka leswaku yena wa swi tiva leswi nga swinene ka mina. Phela a ni wu lava ntirho wa ku yampsa lowu a wu ta ni holela kahle, loko wu nga ni siveli ku yengesela ntirho wa mina ka Yehovha.”

⁸ Javier a li: “Nkama na ni entrevhixtariwa ni tsumbule leswaku a ni fanele ni hamba ma horas extras nkama ni nkama. Se hi lirhandzu ni tlhamusele lweyi a a ni entrevhixtara swaku ni nge wu pfumeli ntirho lowuyani hileswi a ni tirhela Yehovha.” Javier a nga wu pfumelanga ntirho lowuyani, naswona loko se ku hundze mavhiki mambirhi a ve mupfuli wa ndlela. Hi ku famba ka nkama, ka lembe loliyani a kume ntirho lowu a a nga tirhi siku hinkwalu. Yena a li: “Yehovha a swi yingisile swikhongelo swa mina naswona a ni pfunile ku kuma ntirho lowu a wu ta ni pfumelela leswaku ni va mupfuli wa ndlela. Phela ni tsake hintamu hileswi ntirho lowu ni wu yendlaka wu ni nyikaka nkama wa ku yenela leswaku ni tirhela Yehovha ni vamakwerhu.”

9. U djondze yini ka xiperiyensiya xa makwerhu Trésor?

⁹ Se loko hi tsumbula swaku ntirho wa hina wu hi yendla hi nga fambi hi lipfumelo ke? Vona leswi nga yendlekela makwerhu mun’wani wa Congo lweyi a vitaniwaka Trésor. Yena a li: “A ni ni ntirho lowu a ni wu lava hintamu, phela a wu wu phindha kanharhu muholo lowu a ni wu kuma ka ntirho lowu a ni wu yendla khale, funtshi a wu yendla leswaku ni hloniphiwa swinene hi vanhu.” Kambe masiku man’wani Trésor a a luza mintlhanganu, hikusa a swi lava a yendla ma horas extras naswona a a sindzisiwa ku hemba swaku a fihla swilo swa ku biha leswi a swi yendliwa ka empreza leyi a a tirha ka yona. Trésor a a lava ku huma ka empreza liyani kambe a a chava leswaku a nga tshuka a nga ha kumi ntirho wun’wani. Se i mpsini leswi nga mu pfuna? Yena a li: “A buku la Habakuku 3:17-19 li ni pfune ku vona swaku Yehovha minkama hinkwayu a a ta ni hlayisa hambiloko a no yendla ntirho wun’wani lowu a wu ta ni holela male yayitsongo. Se ni game ni wu tshika ntirho wolowo.” Yena a tlhela a ku: “Ku tala ka va patrão va pimisa leswaku vatirhi va vona va tinyimisele ku yendla hinkwaswu swaku va hola male ya yinyingi, hambiloko ku yendla leswo swi va yendla va heta nkama wa wunyingi na va li kule ni ndjangu wa vona va tlhela va nga ha xi gandzeli kahle Xikwembu. Phela ni tsaka hintamu hikusa ni vhikele wunghanu leli ni nga na lona ni ndjangu wa mina, naswona a ni pfumelelanga nchumu xi wonha wunghanu la mina na Yehovha. Ka lembe li nga landzela, Yehovha a ni pfune ku kuma ntirho wa kahle lowu a wu ni holela male ya ku yenela swaku ni hlayisa ndjangu wa mina, funtshi ni ni nkama wa wunyingi swaku ni tirhela Yehovha. Phela hambiloko hi rhangisa ku yendla ku rhandza ka Yehovha ka wutomi la hina, minkama yin’wani hi nga ha txona, kambe Yehovha minkama hinkwayu a ta hi hlayisa.” Loko hi yingisa switsundzuxu swa Yehovha hi tlhela hi tshemba switshembiso swa yena hi ta tama hi famba hi lipfumelo na hi tiyiseka swaku Yehovha a ta hi katekisa.

LOKO U LANGA WA KU CHADA NA YENA

10. Munhu a nga swi kombisisa ku yini swaku a nga fambi hi lipfumelo loko a langa lweyi a lavaka ku chada na yena?

¹⁰ A muchadu i prezenti leli taka hi ka Yehovha, se swi nga ha yendleka u navela ku chada. Loko makwerhu wa xisati a lava munhu wa ku chada na yena a nga ha txuvuka wumunhu la yena, ku saseka ka yena, ndhuma leyi a nga na yona, leswi a yi tirhisisaka xiswona male, ni ku tlhela a vona leswaku ku ni munhu lweyi a faneleke a mu hlayisa ka ndjangu wa yena ni swaku a mu hlayisisa ku yini, ni ku vona swaku lweyi a navelaka ku chada na yena a mu yendla a tsaka ke.b Swilo hinkwaswu leswi i swa lisima, kambe loko a pimisa ntsena hi swilo leswi, a ta va a nga fambi hi lipfumelo, kambe a famba hi ku vona.

11. Hi nga yendla yini swaku hi famba hi lipfumelo nkama lowu hi langaka lweyi hi nga ta chada na yena? (1 Vakorinto 7:39)

¹¹ Yehovha a va tsakela hintamu vamakwerhu lava va landzaka leswi a swi lavaka nkama lowu va langaka lweyi va nga ta chada na yena. Phela vamakwerhu lavo, va sungula ku namorara loko “ntanga ya wujovhem yi hundzile.” (1 Ko. 7:36, ntlhamuselo) Loko va lava ku namorara, va rhanga hi ku tiyiseka swaku munhu lweyi va nga ta chada na yena a na lona wumunhu leli Yehovha a vulaka swaku wanuna wamunene ni wansati wamunene va fanele va va na lona. (Swiv. 31:10-13, 26-28; Efe. 5:33; 1 Tm. 5:8) A va namorari ni munhu lweyi a kalaka a nga li Mboni, kambe va chada “aHosini ntsena” hilani buku la 1 Vakorinto 7:39 li vulaka hi kona (lerha.) Naswona va tama va famba hi lipfumelo na va tiyiseka swaku Yehovha hi yena lweyi a nga va yendlaka va tsaka ku tlula munhu mun’wani ni mu’wani. — Ps. 55:22.

12. U djondze yini ka xikombiso xa makwerhu Rosa?

¹² A hi voneni xikombiso xa mupfuli wa ndlela mun’wani wa Colômbia lweyi a vitaniwaka Rosa. Yena a a tshamela ku bula ni wanuna lweyi a a tirha na yena, naswona wanuna yelweyo a a lava ku namorara na yena, kambe a a nga li Mboni ya Yehovha. Hi ku famba ka nkama, na yena Rosa a sungule ku mu tsakela wanuna lwiyani. Yena a li: “Wanuna lwiyani a a tikomba a li munhu wamunene, naswona a a rhandza ku pfuna vanhu van’wani funtshi a a ni mahanyelo yamanene a tlhela a ni yendlela swilo swaswinene. A a ni hinkwaswu leswi a ni swi lava ka munhu lweyi a ni navela ku chada na yena; a ko chota nchumu xin’we ntsena, a a nga li Mboni ya Yehovha. Hi nkama lowuyani a ni tolovela ku titwa na ni li noxe naswona a ni swi navela hintamu ku chada, kambe a ni nga se mu kuma wanuna wa ku chada na yena ka nhlengeletanu ya Yehovha. Se hi mhaka leyo, a swi ni vevukelanga ku yala ku namorara ni wanuna lwiyani.” Hambileswi Rosa a a li ka xiyimu xa ku karhata, a nga pfumelanga ku namorara ni wanuna lwiyani. Leswi nga pfuna Rosa i ku pimisa hi leswi wunghanu la yena na Yehovha a li ta tshamisa xiswona loko a wo pfumela ku namorara ni wanuna lwiyani. Rosa a nyime ku vulavula na yena a tlhela a hisekela mintirho ya nhlengeletanu ya Yehovha. Hi ku famba ka nkama a game a rhambiwa leswaku a ya ka Xikola Xa Vachumayeli Va Mfumu, naswona swoswi i mupfuli wa ndlela wa ku hlawuleka. Yena a li: “Ni tsake hintamu hi ku vona leswi Yehovha a nga ni pfunisa xiswona.” Hambileswi swi kalaka swi nga vevuki ku famba hi lipfumelo loko ku ni munhu lweyi hi mu tsakelaka, hi nga tiyiseka swaku loko hi pfumela ku kongomisiwa hi Yehovha, minkama hinkwayu swilo swi ta hi fambela kahle.

LOKO HI NYIKIWA NKONGOMISO HI NHLENGELETANU YA YEHOVHA

13. I mpsini leswi nga hi yendlaka hi nga fambi hi lipfumelo loko hi nyikiwa minkongomiso?

¹³ Swi tolovelekile swaku nhlengeletanu ya Yehovha yi hi nyika minkongomiso leyi nga ta hi pfuna ku tama hi mu tirhela kahle Yehovha. A minkongomiso yoleyo hi nga ha nyikiwa hi madoda abandleni, vadjikelezi, hi Betele kumbe hi Ntlawa Lowu Rhangelaka. Se ku nga yendleka yini loko hi nga swi twisisi swaku hi mhaka muni vamakwerhu va hi nyika nkongomiso wolowo? Phela leswo swi nga ha yendla swaku hi sungula ku pimisa ntsena hi swikarhatu leswi nga ha vaka kona nkama lowu hi tirhisaka nkongomiso wolowo, funtshi swi nga yendleka hi sungula ku pimisa ntsena hi swihoxo leswi vamakwerhu lava nga hi nyika nkongomiso va swi yendlaka.

14. I mpsini swi nga hi pfunaka kuva hi famba hi lipfumelo loko hi yamukela minkongomiso? (Vaheberu 13:17)

¹⁴ Ku famba hi lipfumelo swi ta hi pfuna kuva hi tshemba swaku Yehovha hi yena a kongomisaka nhlengeletanu ya yena, ni leswaku yena wa swi tiva swiyimu swa mun’wani ni mun’wani wa hina. Se leswo swi ta yendla leswaku hi yingisa minkongomiso na hi tsakile. (Lerha Vaheberu 13:17.) Ha swi tiva leswaku a ku yingisa swi ta yendla leswaku ku va ni ku twanana abandleni. (Efe. 4:2, 3) Hambileswi vamakwerhu lava va rhangelaka va kalaka va nga hetisekanga, ha tiyiseka leswaku Yehovha a ta hi katekisa loko minkama hinkwayu hi va yingisa. (1 Sa. 15:22) Naswona loko ku ni nchumu lexi lavaka ku yampsisiwa, ha tiyiseka leswaku Yehovha a ta swi yendla hi nkama lowu faneleke. — Mik. 7:7.

15-16. I mpsini leswi nga pfuna Kevin kuva a tama a famba hi lipfumelo hambileswi a a nga yi twisisi kahle minkongomiso? (Vona mufoto)

¹⁵ Phela ku famba hi lipfumelo ni ku yingisa minkongomiso ya nhlengeletanu swa pfuna. Hi xikombiso, aPerú vanhu va vanyingi va vulavula xiPanyoli naswona van’wani va vulavula tirimi ta koseniyani Perú. Lin’we la kona i xiQuechua. Se a ku hundza malembe ya manyingi vamakwerhu na va lavetela vanhu lava va vulavulaka lirimi leli. Leswaku hi titwananisa ni minawu ya tiko, swi lave hi txintxa ndlela leyi a hi ta va lavetela hi yona vanhu lava. (Rom. 13:1) Leswo swi yendle swaku vamakwerhu van’wani va sungula ku tivutisa swaku indjhe ku txintxa koloko a ku nga ta khumba ntirho lowu a va wu yendla leswaku va kuma vanhu lava va vulavulaka xiQuechua? Kambe leswi vamakwerhu va nga yingisa minkongomiso leyi nhlengeletanu yi nga va nyika yona, Yehovha a katekise minzamu ya vona ya ku kuma vanhu va vanyingi lava vulavulaka xiQuechua.

¹⁶ Kevin, doda la bandla lin’wani la xiQuechua na yena a a karhatekile hi minkongomiso ya nyuwani leyi va nga yi yamukela. A a tivutisa swaku va ta va kumisa ku yini vanhu lava a va vulavula a xiQuechua. I mpsini leswi nga mu pfuna? Yena a li: “Ni pimise hi leswi swi nga ka Swivuriso 3:5 ni hi xikombiso xa Moxe. Hambileswi minkongomiso yin’wani leyi Yehovha a nga mu nyika a yi tikomba yi nga twisiseki kahle, Moxe a yi yingisile hinkwayu. Hi xikombiso, nkama Vayisrayele va nga baleka ka tiko la Gibita, Yehovha a byele Moxe leswaku va famba hi ndlela leyi a yi ya ka Lwandle la Ku Pshuka. Phela ku famba hi ndlela liyani a swi ta yendla swaku swi va vevukela Vagibita kuva va va hlasela. Hambileswo, Moxe a yi yingisile minkongomiso hinkwayu leyi Yehovha a nga mu nyika yona, se hi mhaka leyo Yehovha a va ponisile hi ndlela ya ku hlamalisa.” (Eks. 14:1, 2, 9-11, 21, 22) Hambileswi Kevin a a karhatekile hi minkongomiso ya nyuwani leyi a nga nyikiwa yona, a a tinyimiselile ku yi yingisa. Se i mpsini leswi nga yendleka? Yena a li: “Swi tsakise hintamu ku vona ndlela leyi Yehovha a nga hi pfuna hi yona. Khale a swi lava leswaku hi famba mpfhuka wa ku leha leswaku hi kuma munhu mun’we kumbe vambirhi. Kambe swoswi hi famba ka tindhawu leti nga ni vanhu va vanyingi lava va vulavulaka xiQuechua. Hi mhaka leyo, hi kota ku vulavula ni vanhu va vanyingi naswona hi ni marevhizita ni swidjondzo swa swinyingi swa Bibele. Hambi hi numeru ya vanhu lava taka mintlhanganwini yi yengeselekile.” Swa tikomba swaku impela ku famba hi lipfumelo minkama hinkwayu swa pfuna.

17. U djondze yini ka nhlokomhaka leyi?

¹⁷ Ka nhlokomhaka leyi hi vone swaku hi nga swi kombisisa ku yini swaku hi famba hi lipfumelo loko hi yendla swiboho ka swiyimu swinharhu swa lisima. Kambe a swi gameli lanu ntsena, hi fanele hi tama hi kombisa swaku hi famba hi lipfumelo ka swiyimu hinkwaswu swa wutomi la hina. Hi xikombiso, nkama lowu hi langaka leswi hi nga ta hungata hi swona, leswi hi nga ta swi yendla ka nkama wa hina wa ku humula, swaku hi ta djondza anze kwini ni ndlela leyi hi nga ta va wundla hi yona vana va hina. Se ka xiboho xin’wani ni xin’wani hi fanele hi rhangisa wunghanu la hina na Yehovha, switsundzuxu leswi a hi nyikaka swona hi tlhela hi khumbuka swaku minkama hinkwayu a ta hi hlayisa, ku nga li ku yendla xiboho ntsena hi ku ya hi leswi hi swi vonaka. Se loko hi yendla leswo, hi ta tama hi “famba hi vito la Yehovha Xikwembu xa hina hi masiku ni masiku.” — Mik. 4:5.