U Nga Hlweli Ku Pfuna Munhu Lweyi A Tsakelaka

1. Vanhu va yangulisa ku yini ka mahungu ya ku tsakisa? (Mintirho 13:47, 48; 16:14, 15)

VANHU va vanyingi ka minkama ya vapostolo va tekele ku yamukela ntiyiso neti va nga twa mahungu ya ku tsakisa. (Lerha Mintirho 13:47, 48; 16:14, 15.) Ninamuntlha vanhu van’wani va tsaka loko va twa mahungu ya ku tsakisa hi khambi la ku sungula. Kambe van’wani a va tekeli ku tsakela, hambileswo hi ku famba ka nkama va gama va wu yamukela ntiyiso. Se i mpsini leswi hi faneleke hi swi yendla loko hi kuma ‘lava kombisaka swaku va lava ku kuma wutomi la ku kala li nga heli’?

2. Hi mhaka muni hi nga fanisaka ntirho wa ku chumayela ni ntirho wa murimi?

² A ntirho wa ku chumayela wu nga ha fanisiwa ni ntirho wa murimi. Phela loko murimi a vona leswaku mafruta ya yena ma sungule ku wupfa, a hantla a ma khaya kambe hi nkama wolowu wa wun’we a tama a lunghiselela misava leswaku ni minsinya leyin’wani yi wupfisa mafruta ya wona. Hilani ku fanaka, loko ka ntirho wa ku chumayela hi kuma munhu lweyi a navelaka ku hi yingisela, hi fanele hi tekela ku mu pfuna swaku a va mudjondzisiwa wa Kreste. Kambe hi nkama wolowu wa wun’we hi fanele hi tama hi pfuna lava kalaka va nga tsakeli leswaku va navela ku djondza hi Yehovha. (Yoh. 4:35, 36) Loko hi twisisa swaku munhu wa swi lava kumbe a nga swi lavi ku djondza Bibele, swi ta hi vevukela ku kuma ndlela ya ku mu pfuna. Se ka nhlokomhaka leyi, hi ta vona swaku hi nga yendla yini loko hi bula ni munhu lweyi a lavaka ku hi yingisela hi khambi la ku sungula, hi tlhela hi vona swaku hi nga yendla yini swaku hi mu pfuna kuva a va munghanu wa Yehovha.

HI NGA MU PFUNISA KU YINI MUNHU LWEYI A TSAKELAKA?

3. Hi fanele hi yendla yini loko hi kuma munhu wa ku tsakela? (1 Vakorinto 9:26)

³ Loko hi kuma munhu wa ku tsakela ansin’wini hi lava ku tekela ku mu pfuna leswaku a djondza hi Yehovha a tlhela a va munghanu wa yena. Hi mhaka leyo, ka mabulu ya ku sungula hi fanele hi mu rhamba swaku hi djondza xikan’we Bibele hi tlhela hi mu rhamba leswaku a ya mintlhanganwini. — Lerha 1 Vakorinto 9:26.

4. Nyikela xikombiso xa munhu lweyi a a tinyimisele ku tekela ku djondza Bibele.

⁴ Mu rhambi swaku mi djondza Bibele. Vanhu van’wani lava hi va chumayelaka va tekela ku pfumela ku djondza Bibele. Hi xikombiso, ntombhi yin’wani ya Canadá yi tshinele ka xikarinyani xa mabuku naswona yi teke broxura leli nge Tikhorisi, hi Quinta-feira. Makwerhu lweyi a a tirha ka xikarinyani a yi tlhamusele leswaku loko yi swi tsakela va nga djondza xikan’we hi ku tirhisa broxura leliyani mahala. Ntombhi liyani yi swi tsakelile funtshi va nyikane tinumeru ta matelefoni. Hi nkama wun’wani hi siku loleliyani, ntombhi liyani yi mandare mensajem yi vutisa makwerhu leswaku va nga djondza siku muni ke. Nkama makwerhu a nga yi byela swaku swi ngo yini va djondza hi mahelo vhiki, yona yi te: “Swi ngo yini hi djondza mundzuku? Ni ta va ni nkama.” Hi mundzuku wa kona va sungule ku djondza naswona ntombhi liyani yi game yi ya mintlhanganwini hi mahelo vhiki wolawo funtshi yi sungule ku kulisa wunghanu la yona na Yehovha hi xihantla.

5. Minkama yin’wani swi nga ha lava hi yendla yini na hi nge se sungula ku djondza Bibele ni munhu? (Vona mafoto.)

⁵ I ntiyiso swaku a hi vanhu hinkwavu lava va nga ta hantla va pfumela ku djondza Bibele na hina ku fana ni ntombhi liyani. Minkama yin’wani swi lava hi mu pfuna munhu swaku a tsakela. Hi nga yendla leswo hi ku vulavula hi mhaka leyi a yi tsakelaka. Phela loko hi va ni mavonelo yamanene hi tlhela hi tama hi kombisa swaku hi ni mhaka ni munhu, swi nga yendleka a hantla a pfumela ku djondza Bibele. Se i mpsini leswi hi nga swi vulaka loko hi rhamba munhu swaku a djondza Bibele na hina? Hi vutise vamakwerhu va vanyingi lava va swi kotaka ku sungula ku djondza Bibele ni vanhu xivutiso lexi. A hi voneni leswi va nga swi vula.

6. Hi nga vula yini swaku hi pfuna munhu kuva a navela ku djondza Bibele?

⁶ Vamakwerhu lava nga vutisiwa hi ku sungula swidjondzo swa Bibele, va tlhamusele swaku ka tindhawu tin’wani swa pfuna loko hi nga vuli marito ya ku fana ni “djondzo ya Bibele,” “kursu la Bibele” kumbe “ni ta ku djondzisa Bibele.” Kambe va vona swi yampsa ku vula hi ku “hi ta bula” kumbe “hi ta twisisa Bibele.” Leswaku hi yendla vanhu va navela ku djondza na hina, hi nga ha vula hi ku: “Swa hlamalisa ku vona ndlela leyi Bibele li hlamulaka swivutiso swa lisima hintamu awuton’wini” kumbe “Bibele a hi la vakhongeli ntsena, kambe li nga pfuna mun’wani ni mun’wani ka swilo swa siku ni siku.” Hi nga ha tlhela hi vula hi ku: “A swi lavi hi heta nkama wa wunyingi, hi 10 kumbe 15 minutu, hi nga djondza swilo swa lisima hintamu leswi nga ku pfunaka awuton’wini.” Leswaku hi nga mu chavisi munhu, swi nga va swinene loko hi nga vuli swilo swa ku fana ni swaku “hi ta djondza vhiki ni vhiki.”

7. Van’wani va twisise swaku va djondza ntiyiso loko swi te yini? (1 Vakorinto 14:23-25)

⁷ Mu rhambi swaku a ya mintlhanganwini. Ankameni wa mupostolo Pawulo, swi tikomba ingaku van’wani va twisise leswaku va djondza ntiyiso nkama lowu va nga ya mintlhanganwini hi khambi la ku sungula. (Lerha 1 Vakorinto 14:23-25.) Ninamuntlha swa ha yendleka leswo! Ku tala ka swidjondzo swa Bibele swi tekela ku kulisa wunghanu la swona na Yehovha loko swi sungula ku ya mintlhanganwini. Se hi wini nkama wawunene wa ku rhamba munhu lweyi a tsakelaka swaku a ya mintlhanganwini? I ntiyiso swaku buku leli nge Tikhorisi, ka djondzo 10 li kombisa lisima la ku ya mintlhanganwini li tlhela li rhamba xidjondzo xa Bibele swaku xi ya mintlhanganwini; kambe a swi lavi hi nyima anze hi fika ka djondzo leyi leswaku hi mu rhamba. Phela hambi hi ka mabulu ya ku sungula hi nga mu rhamba munhu swaku a ya mintlhanganwini ya mahelo vhiki. Hi nga ha mu byela nhlokomhaka ya dixkursu leli nga ta vekiwa kumbe hi mu bulelanyana hi leswi nga ta djondziwa ka Djondzo ya Murindzi.

8. I mpsini leswi hi nga swi byelaka lweyi hi mu rhambaka swaku a ta mintlhanganwini? (Esaya 54:13)

⁸ Loko hi rhamba munhu lweyi a tsakelaka swaku a ya mintlhanganwini, hi fanele hi mu tlhamusela leswaku leswi a nga ta swi vona swi hambanile ni leswi swi nga ha yendlekaka a swi vonile ka tikereke tin’wani. Xidjondzo xin’wani lexi nga vona Djondzo ya Murindzi hi khambi la ku sungula, xi vutise makwerhu lweyi a a xi djondzela xi ku: “A mufambisi wa djondzo leyi wa ma tiva mavito ya vanhu hinkwavu lava nga lomu ndzeni?” Makwerhu a game a xi tlhamusela swaku ku fana ni leswi hi ma tivaka kahle mavito ya maxaka ya hina, hi yendla hinkwaswu leswaku hi tiva mavito ya vamakwerhu va hina. Xidjondzo lexi xi game xi vula swaku leswo a swi nga yendleki ka wukhongeli la xona. Xin’wani lexi hi nga xi yendlaka, i ku byela xidjondzo xivangelo lexi xi hi yendlaka hi tlhangana. (Lerha Esaya 54:13.) Phela hi tlhangana leswaku hi gandzela Yehovha, hi djondza hi yena hi tlhela hi tiyisana. (Heb. 2:12; 10:24, 25) A mintlhanganu ya hina yi yendleliwe leswaku hi djondza; hi mhaka leyo, a ku na swihena leswi hi swi yendlaka. (1 Ko. 14:40) A Tiyindlo ta Wugandzeli ti yendliwe hi ndlela ya leswaku swi hi vevukela ku djondza hi Yehovha. A ku na ntlawa wa politika lowu hi wu seketelaka, funtshi a hi tipeti ka mabulu ya swa politika. Xin’wani xi nga pfunaka xidjondzo, i ku va hi xi komba vhidiyo leli nge: Ku Maheka Yini Ka Yindlo Ya Wugandzeli? Leswo swi ta xi pfuna leswaku xi tiva leswi swi nga ta yendleka loko xi ta mintlhanganwini.

9-10. I mpsini leswi hi nga swi byelaka munhu lweyi a kanakanaka ku ya mintlhanganwini? (Vona mufoto.)

⁹ Vanhu van’wani va chava ku ya mintlhanganwini hi ku pimisa swaku va ta sindzisiwa ku va Timboni ta Yehovha. Se mu basiseli kahle munhu swaku hina ha swi rhandza ku yamukela vanhu va nyuwani ni swaku a hi sindzisi munhu swaku a va Mboni, a vula kumbe ku yendla nchumu ka mintlhanganu. Mu byeli swaku hinkwavu andjangwini va rhambiwa ku patsa ni vana. Ka mintlhanganu ya hina, vana va tshama ni vanhu vavakulu. Leswi vapsali va tshamaka ni vana va vona va swi tiva swaku va na vamani funtshi va djondza hi yini. (Det. 31:12) Ka mintlhanganu ya hina a ku humesiwi minhlengo funtshi a ku fambisiwi xihlelwani kumbe swin’wani swaku munhu a peta male, hikusa hi landza marito ya Yesu nkama a nga te: “Mi nyikiwe mahala, na n’wina nyikani mahala.” (Mat. 10:8) U nga tlhela u mu byela swaku a swi lavi a yambala mpahla ya ku dura swaku a ya mintlhanganwini; Xikwembu a xi txuvuki leswi hi nga tshamisa xiswona hi le handle kambe xi ni mhaka ni leswi hi nga tshamisa xiswona hi le mbilwini. — 1 Sa. 16:7.

¹⁰ Loko munhu a ta ka mintlhanganu, yendla hinkwaswu leswi u nga swi kotaka swaku a titwa na a yamukelekile. U nga yendla leswo hi ku mu komba madoda ni vamakwerhu. Phela loko munhu a titwa na a chunsekile, swi nga yendleka a swi navela hintamu ku tlhela a ta mintlhanganwini. Loko a nga na Bibele, u nga mu pfuna hi ku lerha na yena tindzimana ka Bibele la wena naswona u nga ha mu pfuna leswaku a twisisa dixkursu ni leswi hi djondzisaka xiswona.

U NGA MU PFUNISA KU YINI LWEYI A HA KU SUNGULAKA KU DJONDZA BIBELE?

11. I yini leswi hi faneleke hi swi khumbuka loko hi djondza ni munhu Bibele?

¹¹ I yini leswi u faneleke u swi khumbuka loko u djondza ni munhu Bibele? Khumbuka leswaku a ni swilo swin’wani swa ku swi yendla, se hlonipha nkama lowu a nga wu veka. Hi xikombiso, loko u kombinara na yena nkama lowu mi nga ta djondza hi wona, u nga xweli hambiloko van’wani lomu u tshamaka kona va tolovela ku xwela. Xin’wani xa lisima u nga xi yendlaka, i ku kala u nga hlweli ka djondzo ya ku sungula leyi mi nga ta va na yona. Vachumayeli van’wani lava nga ni xiperiyensiya, va vula leswaku i swinene ku djondza ku ringana nkama wawutsongo hambiloko lweyi u djondzaka na yena wa ha swi lava ku tama a djondza. Tivoneli swaku u nga vulavuli ngopfu, kambe tshika lweyi u djondzaka na yena a vula leswi a swi pimisaka ni leswi a titwisaka xiswona. — Swiv. 10:19.

12. Hi xini xikongomelo xa hina loko hi sungula ku djondza Bibele ni munhu?

¹² Loko hi sungula ku djondza Bibele ni munhu, hi lava ku mu pfuna ku sukela ka djondzo ya ku sungula leswaku a tiva Yehovha na Yesu a tlhela a va rhandza. Lexi nga hi pfunaka i ku tirhisa Bibele nkama lowu hi djondzaka na yena, ku nga li ku mu komba leswaku hi tiva ngopfu. (Min. 10:25, 26) Mupostolo Pawulo a hi vekele xikombiso xaxinene ka mhaka leyi. Nkama lowu a a djondzisa vanhu, a a vulavula hi Yesu Kreste lweyi a nga ta lani misaveni leswaku a hi pfuna ku tiva Yehovha hi tlhela hi mu rhandza. (1 Ko. 2:1, 2) Pawulo a tlhele a li kombisa kahle lisima la ku pfuna vadjondzisiwa va nyuwani swaku va va ni wumunhu lalinene leli nga fanisiwaka ni woru, prata ni maribye ya lisima. (1 Ko. 3:11-15) Wumunhu lolelo li patsa ku va ni lipfumelo, wutlharhi, ku twisisa ni ku chava Yehovha. (Ps. 19:9, 10; Swiv. 3:13-15; 1 Pe. 1:7) Hi fanele hi tekelela ndlela leyi Pawulo a a djondzisa hi yona, hi ku pfuna swidjondzo swa hina swa Bibele leswaku swi va ni lipfumelo la ku tiya swi tlhela swi va ni wunghanu na Yehovha, Papayi wa hina wa lirhandzu. — 2 Ko. 1:24.

13. Hi nga swi kombisisa ku yini swaku hi lehisa mbilu hi tlhela hi twisisa nkama hi pfunaka xidjondzo? (2 Vakorinto 10:4, 5) (Vona mufoto.)

¹³ Loko hi djondza ni munhu Bibele hi fanele hi tekelela Yesu hi ku lehisa mbilu ni ku twisisa lweyi hi djondzaka na yena. Hi nga yendla leswo hi ku kala hi nga mu yendli swivutiso leswi swi nga ha mu danisaka. Naswona loko ku ni mhaka leyi swi mu karhatelaka ku kholwa ka yona, swi nga ha pfuna loko hi yi tshika swaku hi vulavula hi yona ka nkama wun’wani. A hi swinene ku sindzisa lweyi hi djondzaka na yena Bibele leswaku a pfumela djondzo ya ku karhi, kambe hi fanele hi mu nyika nkama leswaku ntiyiso wu dzima timintsu ka mbilu ya yena. (Yoh. 16:12; Kol. 2:6, 7) Bibele li fanisa tidjondzo ta mavunhwa ni swilo “leswi nga dzima timintsu” leswi hi faneleke hi swi tsuvula. Phela lirimi leli marito lawa ma nga tsaliwa hi lona ku sunguleni, ma nga ha vula prediyu la ku tiya leli li faneleke li diliziwa. (Lerha 2 Vakorinto 10:4, 5.) Se na hi nge se mu komba leswaku leswi a kholwaka ka swona i mavunhwa, hi fanele hi mu pfuna leswaku a yaka “prediyu” la nyuwani, ku nga ku tshemba leswaku Yehovha i xivhikelo xa yena. — Ps. 91:9.

HI NGA MU PFUNISA KU YINI LWEYI A NGO SUNGULA KU TA MINTLHANGANWINI?

14. Hi fanele hi va khomisa ku yini lava va taka mintlhanganwini hi khambi la ku sungula?

¹⁴ Yehovha a nga lavi leswaku hi va ni xikheto kambe a lava swaku hi va komba lirhandzu hi tlhela hi va khoma kahle vanhu hinkwavu, ku nga na mhaka swaku va ta hi kwini, i swisiwana kumbe va ganyile. (Yak. 2:1-4, 9) Se hi nga swi kombisisa ku yini swaku ha va rhandza lava taka mintlhanganwini hi khambi la ku sungula?

15-16. Hi nga va pfunisa ku yini lava ngo sungula ku ya mintlhanganwini swaku va titwa kahle?

¹⁵ Van’wani lava taka amintlhanganwini, va tela ku ta vona swaku ku yendleka yini kumbe hileswi va nga rhambiwa hi munhu wa bandla lin’wani. Loko munhu a ta mintlhanganwini hi khambi la ku sungula, mu hoyozeli u tlhela u bula na yena; kambe tivoneli leswaku ndlela leyi u vulavulaka hi yona yi nga mu yendli a daniseka. Mu rhambi leswaku mi tshama xikan’we u tlhela u tirhisa na yena Bibele ni mabuku ya wena kumbe u mu nyika mabuku lawa hi ma tirhisaka. Xin’wani u nga xi yendlaka, i ku zama ku twisisa leswi a titwisaka xiswona. Wanuna mun’wani lweyi a nga ya ka Yindlo ya Wugandzeli hi khambi la ku sungula, a byele makwerhu lweyi a nga mu yamukela leswaku a a nga titwi kahle hi mhaka ndlela leyi a a yambale hi yona. Makwerhu yelweyo a mu pfunile leswaku a titwa kahle a tlhela a mu tlhamusela leswaku hina Timboni ta Yehovha hi vanhu va ku toloveleka ku fana ni van’wani. Hi ku famba ka nkama, wanuna lwiyani a tsakamisiwile kambe a nga swi khohlwanga leswi a nga byeliwa hi makwerhu lwiyani. Loko u vulavula ni munhu lweyi a nga ta mintlhanganwini, minkama hinkwayu khumbuka leswaku hi lava ku kombisa swaku hi ni mhaka na yena, kambe a hi fanelanga hi mu hamba swivutiso leswi nga mu yendlaka a dana. — 1 Pe. 4:15.

¹⁶ Ku ni ndlela yin’wani leyi hi nga va pfunaka hi yona lava ngo sungula ku ta mintlhanganwini. Ka mabulu ya wena, nkama lowu u hlamulaka kumbe u veka swiyenge, kombisa xihlonipho loko u vulavula hi lava kalaka va nga mu tirheli Yehovha. U nga vuli swilo leswi nga ta mu kwatisa kumbe swi mu yendla a nga ha swi lavi ku ya mintlhanganwini. (Tit. 2:8; 3:2) Hi xikombiso, a hi lavi ku vulavula ku biha kumbe ku solasola leswi van’wani va kholwaka ka swona. (2 Ko. 6:3) Vamakwerhu lava vekaka madixkursu lawa ma yaka ka vanhu hinkwavu, va fanele va tivonela hintamu ka mhaka leyi. Vamakwerhu lava, va nga tlhela va kombisa swaku va ni mhaka ni lava ngo sungula ku ta mintlhanganwini hi ku tlhamusela marito lawa swi nga ha va karhatelaka ku ma twisisa.

17. Hi fanele hi yendla yini loko hi kuma lava tsakelaka?

¹⁷ Namuntlha ntirho wa ku yendla vadjondzisiwa wu ya wu va wa xihantla hintamu ku tlula tolo, naswona hi ta tama hi kuma vanhu lava kombisaka “swaku va lava ku kuma wutomi la ku kala li nga heli”. (Min. 13:48) Loko hi va kuma, a hi fanelanga hi kanakana ku sungula ku djondza na vona Bibele ni ku va rhamba swaku va ta ka mintlhanganu. Loko hi yendla leswo, hi ta va na hi va pfuna swaku va famba ka ‘ndlela leyi yisaka wuton’wini’. — Mat. 7:14.