LESWI VAMPSHA VA SWI VUTISAKA
Bibele Li Nga Ni Pfunisa Ku Yini? — Xiyenge 1: Li Tivi Ku Yampsa Bibele
“Ni zamile ku lerha Bibele kambe loko ni vona leswi li nga kulisa xiswona swi ni godolisile.” — Briana, wa 15 wa malembe.
Na wena u titwisa xileswo? Leswi u nga ta swi djondza lana swi ta ku pfuna.
Hi mhaka muni ni fanele ni lerha Bibele?
Swa ku godolisa ku pimisa hi ku lerha Bibele? Swa twisiseka loko leswo swi ku yentxekela. Hileswi Bibele li nga ni mapajina ya manyingi, maletra ya matsongo li tlhela li nga na mafoto, hi mhaka leyo a swi nge fani ni ku sixtira televhizori ni ku sixtira mavhidiyo ka interneti.
Kambe pimisa hi leswi: Loko a wo kuma caixa leli nga vekiwa khale, a wu nga ta swi navela ku li pfula leswaku u vona leswi nga ndzeni?
Bibele li fana ni caixa leli nga tala hi minchumu ya lisima, lona li nga ku pfuna swaku:
U yentxa swiboho swa swinene
U hanyisana kahle ni vapsali va wena
U kuma vanghanu va vanene
U hlula xitressi
Swi nga kotekisa ku yini swaku buku la khale li hi pfuna ka masiku ya hina? Swi koteka hikusa “Matsalwa hinkwawu ma kongomisiwa hi Xikwembu”. (2 Timotiyu 3:16) Leswo swi vula swaku hinkwaswu leswi nga ka Bibele swi ta hi ka Xikwembu.
Bibele i buku leli nga tala hi minchumu ya lisima leyi hi pfunaka ku va ni wutlharhi
Ni nga li lerhisa ku yini Bibele?
Ndlela yin’wana ya ku lerha Bibele i ku lerha lani li sungulaka kona anze magamu. Leswo swi ta ku pfuna swaku u twisisa hinkwaswu leswi Bibele li swi tlhamuselaka. Ku ni tindlela tin’wana ta ku lerha Bibele. Vona swikombiso swimbirhi:
U nga lerha mabuku ya 66 lawa ma nga ndzeni ka Bibele hi ku landzelelana ka wona, ku sukela ka Genesa anze Nhlawutelo.
U nga lerha Bibele hi ndlela leyi minchumu yi nga yentxekisa xiswona.
U nga swi yentxisa ku yini: A Apêndice A7 la Wuhundzuluxeli la Misava ya Nyuwani li vulavula hi minchumu leyi nga humelela Yesu nkama na a li lana misaveni hi ku landzelelana ka yona.
Xa wumbirhi, lerha mhaka leyi yelanaka ni xikarhatu lexi u kumanaka na xona. Hi xikombiso:
U lava ku kuma vanghanu va vanene? Lerha leswi nga yentxeka ka Davhida na Yonatani. (1 Samuwele, tindzima 18-20) U gama u tirhisa papela leli nga ni nhlokomhaka leyi nge “Ndlela Ya Ku Kuma Vanghanu Va Ku Tshembeka” u gama u vona leswi u nga swi djondzaka.
U lava matimba swaku u hlula minchumu ya ku biha? Vona leswi nga humelela Yosefa ni leswi a nga swi hlulisa xiswona. (Genesa, ndzima 39) U gama u lerha papela leli nge: “Ndlela Ya Ku Lwisana Ni Miringo . . . Yosefa — Xiyenge 1” ni “Ku Lumbetiwa! Yosefa — Xiyenge 2”, gama u vona leswi u nga swi djondzaka ka xikombiso xa Yosefa.
U lava ku tiva leswi xikhongelo xi nga ku pfunisaka xiswona? Lerha leswi nga yentxekela Nehemiya. (Nehemiya, ndzima 2) Gama u lerha papela leli nge: “Xikwembu Xi Hlamule Xikhongelo Xa Yena”, gama u vona leswi u nga swi djondzaka ka xikombiso xa Nehemiya.
U nga swi yentxisa ku yini: Loko u lerha Bibele tshama ka ndhawu leyi kalaka yi nga na guwa.
Xa wu 3, u nga lerha hi leswi nga yentxekela vanhu kumbe buku la Tipisalema u gama u vona leswi u nga swi tirhisisaka xiswona ka wutomi la wena. Hi xikombiso, u nga ha tivutisa swaku:
Hi mhaka muni Yehovha a yentxe swaku swi tsaliwa ka Bibele?
Swi ni djondzisa yini hi Yehovha ni leswi a yentxisaka xiswona minchumu?
Ni nga swi tirhisisa ku yini leswi ka wutomi la mina?
U nga swi yentxisa ku yini: Langa siku leli u lavaka ku sungula ku lerha Bibele hi lona, u tlhela u li tsala ka ndhawu.