Bibele Li Nga Ni Pfunisa Ku Yini? — Xiyenge 2: Yentxa Ku Lerha Ka Wena Ku Tsakisa

Djaha lin’wana leli vitaniwaka Will li li: “Ku lerha Bibele a swi tsakisi, funtshi leswo swi yentxeka loko u nga swi tivi ku li lerha.”

Wa swi lava ku tiva leswi nga ku pfunaka swaku u rhandza ku lerha Bibele? A djondzo leyi yi yentxeliwe swaku yi ku pfuna.

• Zama ku vona leswi u swi lerhaka na swi yentxeka

• Yentxa mapexkiza!

• Leswi vanhu va ku ringana na wena va swi vulaka

Zama ku vona leswi u swi lerhaka na swi yentxeka

Tivoni na u li ndzeni ka mhaka leyi u yi lerhaka. U nga yentxa leswi:

1. Langa mhaka leyi u lavaka ku djondza hi yona. Langa mhaka leyi vulavulaka hi leswi nga yentxeka ka nkama wa Bibele kumbe u lerha mabuku lawa ma vulavulaka hi Yesu nkama na a li lana misaveni, naswona u nga yingisela ku lerhiwa ka Bibele ka site la jw.org.

2. Lerha mhaka leyi u nga yi langa. U nga lerha na u li wexe, u lerha ni ndjangu wa wena kumbe vanghanu va wena. Mun’we ka n’wina a nga lerha leswi yentxekaka, se lavan’wana va va ni swiyenge swin’wana.

3. Vona leswi ti nga ku pfunisaka xiswona tipontu leti landzelaka:

   • Yentxa madezenyu kumbe u tlhamusela leswi nga yentxeka ndzeni ka swikwadradinyana, swaku swi ku pfuna ku twisisa leswi swi nga yentxekisa xiswona.

   • Tirhisa ma gráfico kumbe ma diagrama. Hi xikombiso loko u lerha hi munhu wa ku tshembeka kombisa swaku a wumunhu la yena ni leswi a nga swi yentxa swi mu pfunise ku yini swaku a katekisiwa hi Yehovha.

   • Pimisa hi mavonelo lawa vanhu van’wana a va ta va na wona hi mhaka leyo. Yentxa “swivutiso” ni ku pimisa hi vanhu lava a va li kona ka leswi swi nga yentxeka.

   • Loko lweyi u djondzaka hi yena a nga yentxaka xiboho xa xinene, zama ku pimisa hi loko a a yentxe xiboho xa xinene. Hi xikombiso, pimisa hi Pedru nkama a nga yala Yesu. (Marku 14:66-72) I mpsini leswi Pedru a a ta swi yentxa na a nge se teka xiboho lexiyani?

   • Xin’wana lexi u nga xi yentxaka, zama ku tsala mapimiselo ya wena ka leswi u swi djondzaka hi minchumu leyi nga yentxekela vanhu va khale ni leswi hi nga swi djondzaka hi mhaka ya kona. — Varoma 15:4.

     

Yentxa mapexkiza

Loko u zama ku twisisa hinkwaswu hi mhaka leyi u yi djondzaka, u ta kuma minchumu ya ku hlamalisa leyi a wu nga yi tivi. Leswo swi nga txintxa leswi a wu swi pimisa hi mhaka leyi u yi djondzaka.

Hi xikombiso, fananisa Matewu 28:7 na Marku 16:7.

• Hi mhaka muni Marku a vule swaku Yesu ku nga li khale a ta humelela ka va djondzisiwa va yena “ni ka Pedru”?

• U nga swi yentxisa ku yini: Marku a a nga li kona nkama minchumu leyi yi nga yentxeka, swi nga yentxeka a byeliwe mhaka leyi hi Pedru.

• Minchumu ya lisima leyi yi nga fihliwa: Yesu a a swi lava ku tlhela a vona Pedru, hi mhaka muni leswo swi nga va swi mu tsakisile Pedru? (Marku 14:66-72) Yesu a mu kombise ku yini Pedru swaku a a li munghanu wa ntiyiso? U nga yentxa yini swaku u va munghanu wa ntiyiso ku fana na Yesu?

Loko u tivona u li ndzeni ka leswi u swi lerhaka u tlhela u hamba mapexkiza swi ta yentxa swaku ku lerha ka wena ka Bibele ku tsakisa.