Jovhem li titwaka na li ringiwa loko li vona wanuna ni wansati lava va kombisanaka lirhandzu, vafana vambirhi na va txuvukisela telefoni ni ntombhi leyi ngo hundza

MAJOVHEM MA VUTISA

U Nga Yendla Yini Swaku U Nga Yendli Swilo Swa Ku Biha?

Mupostolo Pawulo a te: “Loko ni lava ku yendla swaswinene, swa ku biha swi kona ka mina.” (Varoma 7:21) Indjhe na wena u tshama u titwa hi ndlela leyo? Loko swi ku u tshama u titwa hi ndlela leyo, nhlokomhaka leyi yi ta ku pfuna leswaku u lwisana ni ku navela koloko ka ku yendla swa ku biha.

Leswi u faneleke u swi tiva

Phela a ku xengeteliwa hi vakolega swi nga ku yendla u navela ku yendla minchumu ya ku biha. Bibele li li: “Vanghanu va ku biha va wonha mintirho yayinene.” (1 Vakorinto 15:33) Phela a ku xengeteliwa hi vakolega kumbe leswi hi swi sixtiraka, swi nga yendla leswaku hi swi navela ku yendla minchumu ya ku biha kumbe swi nga hi yendla hi ‘landzelela xitshungu swaku hi yendla swilo swa ku biha’. — Eksoda 23:2.

Jeremy a li: “Ku lava ku yamukeliwa hi van’wani swi nga yendla leswaku u pfumela ku yendla xin’wani ni xin’wani lexi vona va xi yendlaka leswaku vona va ku tsakela.”

Pimisa hi leswi: Hi mhaka muni swi nga ku karhatelaka ku kala u nga yendli leswi van’wani va swi yendlaka, loko u li ni mhaka hintamu ni leswi vona va swi pimisaka hi wena? — Swivuriso 29:25.

Khumbuka: U nga pfumeleli swaku vakolega va wena va ku xengetela ku yendla swilo leswi wena u swi tivaka swaku swi bihile.

Leswi u nga swi yendlaka

Swi twisisi kahle leswi u kholwaka ka swona. Phela loko u nga tiyiseki hi leswi u swi kholwaka, u ta fana ni xibonekani lexi fumiwaka hi van’wani. I swinene ku yendla leswi Bibele li swi vulaka loko li ku: “Kambisisani swilo hinkwaswu; khomelelani swi tiya ka swaswinene.” (1 Vatesalonika 5:21) Loko u swi twisisa kahle leswi u kholwaka ka swona, swi ta ku vevukela leswaku u hanya hi swona. Funtshi a wu nga ta pfumela ku yendla nchumu lexi lwisanaka na swona.

Pimisa hi leswi: Hi mhaka muni u kholwa swaku ku yingisa minawu ya Xikwembu swi nga ku pfuna?

Kimberly a li: “Ni tsumbule swaku vanhu va ni hlonipha hintamu loko va vona swaku a ni yendli leswi van’wanyani va ni xengetelaka swaku ni swi yendla kambe ni nyima ni tiyile ka leswi ni kholwaka ka swona.”

Xikombiso xa munhu wa le Bibeleni: Daniyele. Swi nga yendleka na a ha li jovhem, Daniyele “a yendle xiboho” xa ku a a ta yingisa minawu ya Xikwembu. — Daniyele 1:8

Jovhem leli pimisaka swaku li nge koti ku yendla nchumu, ingi hiloko swo lava li kontrolariwa ku fana ni xibonekani — Loko u nga tiyiseki hi leswi u swi kholwaka, u ta fana ni xibonekani lexi fumiwaka hi van’wani

Titivi kahle. Bibele li vulavula hi ku “navela ka wujovhem”, ku nga ku navela loko munhu a nga na kona hintamu nkama lowu a nga jovhem. (2 Timotiya 2:22) Ku navela koloko a ku patsi ntsena ku navela ku famba masangu, kambe ku nga ha tlhela ku patsa ku lava ku tsakeliwa hi vanhu van’wani ni ku kala u nga lavi ku mandiwa hi vapsali va wena, na u nga se swi lunghekela ku tiyendlela swiboho hi wexe.

Pimisa hi leswi: Bibele li vula swaku “mun’wani ni mun’wani a ringiwa hi ku kokiwa ni ku wongiwa hi leswi a swi navelaka.” (Yakobe 1:14) Se i mpsini leswi u swi navelaka hintamu leswi nga yendlaka swaku u yendla minchumu ya ku biha?

Sylvia a li: “Pimisa hi swilo swa ku biha leswi u swi tivaka swaku swi nga ku vevukela ku wela ka swona. Pexkizara hi tindlela ta ku swi hlula u tlhela u tsala swin’wani leswi nga ku pfunaka. Se ka khambi leli taka loko u tshuka u kumana na swona u ta swi tiva leswi u nga swi yendlaka swaku u nga weli ka swona.”

Xikombiso xa munhu wa le Bibeleni: Davhida. Minkama yin’wani Davhida a pfumelile ku xengeteliwa ku yendla swilo swa ku biha, kasi minkama yin’wani a yendle swa ku biha hi mhaka ku navela ka yena. Kambe a djondzile ka swihoxo swa yena a tlhela a zama ku yampsisa. Yena a khongelile ka Yehovha a ku: “Xikwembu xa mina, ni yendli ni va ni mbilu ya ku tenga ndzeni ka mina, naswona ni yendli ni navela ku yendla swaswinene minkama hinkwayu.” — Tipisalema 51:10.

Nyima u tiyile. Bibele li li: “U nga pfumeli ku hluliwa hi swilo swa ku biha.” (Varoma 12:21) Leswo swi kombisa leswaku u nga swi kota ku hlula minchumu ya ku biha. Phela u nga langa ku yendla minchumu yayinene.

Pimisa hi leswi: Hi swini swiyimu leswi nga ha yendlaka u navela ku yendla minchumu ya ku biha, naswona u nga yendla yini leswaku u tiyiseka swaku u ta nyima u tiyile u yendla minchumu yayinene?

Sophia a li: “Ni pimisa hi ndlela leyi ni nga ta titwa hi yona loko ni tshuka ni pfumela ku yendla swa ku biha. Ni pimisa swaku indjhe ni ta titwa kahle? Kumbexana, kambe swi ta va swa nkamanyana. Loko se ku hundze nkama wa ku leha ke, swi ta yampsa? Nada a swi nga ta yampsa. Se swa siza ku yendla swilo swaku biha? Nada a swi sizi.”

Xikombiso xa munhu wa le Bibeleni: Pawulo. Mupostolo Pawulo a pfumelile swaku a a ni ku navela ka ku yendla swilo swa ku biha kambe a nyime a tiya a nga pfumeli ku mandiwa hi ku navela koloko. Yena a te: “Ni ba muzimbha wa mina ni wu yendla xikarawa.” (1 Vakorinto 9: 27).

Khumbuka: Nyima u tiyile, u nga pfumeli ku mandiwa. Hi wena lweyi u bohaka ku pfumela kumbe ku kala u nga pfumeli ku yendla swa ku biha.

Khumbuka leswaku a ku xengeteliwa ku yendla minchumu ya ku biha swa hundza. Melissa wa 20 wa malembe a li: “Nkama na ni li xikola sekundariya a ku ni minchumu ya yinyingi leyi a ni pimisa swaku a swi ni karhatela ku kala ni nga yi yendli, kambe swoswi a swa ha ni karhateli. Leswo swi ni yendla ni tiyiseka leswaku ni mindzingo ni kumanaka na yona swoswi yi ta hundza. Se ka nkama lowu taka, loko ni ta txuvuka ndzhaku ni ta vona leswaku a wutomi la mina li yampsa hintamu swinene hi mhaka leswi ni nga nyima ni tiyile ni nga pfumeli a ku yendla minchumu ya ku biha.”

Leswi majovhem man’wani ma swi vulaka

Olivia a li: “Ku kala ni nga chavi ku nyimela leswi ni kholwaka ka swona ku nga na mhaka swaku van’wani va vula yini, swa ni pfuna ku kala ni nga pfumeli ku yendla swa ku biha. Hi xikombiso, loko se ni bohile swaku a ni nge te yendla nchumu lexi, a ni txintxi mimpimiso ya mina. A ni pimisi kambirhi funtshi a ni pfumeli ku xengeteliwa hi leswi van’wani va langaka ku swi yendla.”

Jared a li: “Majovhem ya manyingi ma xengeteliwa hintamu leswaku ma ya mafexteni, ma tlhela ma yendla minchumu leyi yi yendliwaka ka mafexta wolawo, ya ku fana ni ku phuza, ku dzaha timbangi ni ku famba masangu. Se lexi ni pfunaka ka mhaka leyi, i ku bula ni vapsali va mina hi swona. Naswona ku tshama na ni khomekile, swa ni pfuna leswaku ni nga pfumeli ku yendla minchumu ya ku biha.”

Mayan a li: “Lexi ni karhatelaka, i ku kala ni nga yendli nchumu lexi van’wani va xi vonaka na xi nga bihanga kambe mina ni xi vona na xi bihile. Hi xikombiso, ku langa leswi ni nga ta hungata hi swona. Swi lava munhu a tiyiseka hi leswi a kholwaka ka swona leswaku a nga yendli minchumu ya ku biha. Leswo swi lava nkama ni xiperiyensiya.”

Julian a li: “Swi lava u tikambela hi ku tshembeka ka mhaka ya ku yendla minchumu ya ku biha. Swi lava u swi tiva kahle leswaku ka interneti hi kwini lani swi nga ha yendlekaka u kumana ni minchumu ya ku kala yi nga basanga, ni leswaku u ta yendla yini leswaku u nga tshuki u swi sixtira. Se swi lava u ti hambela planu la leswaku u ta yendla yini ka swiyimu leswo leswaku u nga tshuki u yendla minchumu ya ku biha.”