Xana Kutayendleka Yini hi Wukhongeli?

1. Xana wukhongeli hinkwalu i linene?

Ka wukhongeli lo hambanahambana ku ni vanhu votala lavalavaka kuyendla kurhandza ka Xikwembu. Swa chavelela kutiva leswaku Xikwembu xavavona vanhu volavo ni kukhatala hi vona. Kambe lexitwisaka kuvava, ku ni wubihi lotala leliyendliwaka hi wukhongeli. (2 Vakorinto 4:3, 4; 11:13-15) Swihaxa mahungu swikombisa leswaku tikereke tin’wana tiseketela tinyimpi ni swilo swin’wana swonyenyentsa leswi vanhu vaswiyendlelaka van’wani. Kasi tin’wani tihoxa xiyandla ka kukarhata ni kupfinya ka vana. Hakunene, leswo swivadlisa mbitsi lavalavaka kugandzela Xikwembu hi mbilu hinkwayu. — Lerha Matewu 24:3-5, 11, 12.

Wukhongeli la ntiyisu hi lona livangamisaka Xikwembu, kasi la mavunwa laxinyenyentsa. Hayini? Hikuva lidjondzisa tidjondzo letingaliki kona aBibeleni, kukatsa ni tidjondzo ta muvunwa malunghana ni Xikwembu ni vafi. Kambe Yehovha alava leswaku vanhu vativa ntiyisu malunghana na yena. — Lerha Ezekiyele 18:4; 1 Timotiya 2:3-5.

2. Xana kutayendleka yini hi wukhongeli?

Lexitsakisaka hileswaku Xikwembu axikanganyisiwi hi wukhongeli lelivulaka leswaku laxirhandza kasi antiyisweni lirhandza misava ya Sathana. (Yakobo 4:4) Bibele livula leswaku wukhongeli hinkwalu la mavunwa i “Babilona Lonkulu.” Babilona kuve doropa la khale, lomu wukhongeli la mavunwa lisunguleleke kona endzhaku ka ndhambi ya Nowa. Kungalikhale, Xikwembu xitalihelisela makumu wukhongeli hinkwalu lelihluphaka vanhu ni kuvakanganyisa. — Lerha Nhlavutelo 17:1, 2, 5, 16, 17; 18:8.

Hi lawa man’wani mahungu yotsakisa: Yehovha angava khohlwanga vanhu lavanene lavanga ka wukhongeli la mavunwa. A karhi ahumesela vanhu volavo hi kuvadjondzisa ntiyisu. — Lerha Mikiya 4:2, 5.

3. Xana lava rhandzaka Xikwembu vafanele vayendla yini?

Yehovha wakhatala hi vanhu lavalavaka kutiva ntiyisu ni kuyendla leswinga swinene. Alemukisa vanhu volavo leswaku vahuma ka wukhongeli la mavunwa hi xihantla. Vanhu lava rhandzaka Xikwembu vatiyimisela kuyendla kucinca leswaku vaxitsakisa. — Lerha Nhlavutelo 18:4.

Ka nkama wa vapostola, kuve ni vanhu lavanene lavatweke mahungu yotsakisa ya Xikwembu hi vapostola ivi vamayamukela hi ntsaku. Vadjondze kuhanya hi ndlela leyitsakisaka Xikwembu ni ndlela yotikhorisa hi wutomi lelinga ni xikongomelo ni ntshembo. Volavo i swikombisu leswinene ka hina hikuva vayamukele djondzo hi kuveka Yehovha ava wosungula awuton’wini la vona. — Lerha 1 Vatesalonika 1:8, 9; 2:13.

Yehovha wavayamukela hi mandla mambirhi lavatshikaka wukhongeli la mavunwa ivi vatihlanganisa ni ndjangu lowumbiwaka hi vagandzeli va yena. Loko upfumela xirhambu xa Yehovha xa lirhandzu, utatikhorisa hi kuva munghana wakwe ni ku va xikarhi ka ndjangu lowu rhandzanaka naswona wugandzelaka Yehovha swin’we. Utatlhela ukuma wutomi lelingaheliki. — Lerha Marka 10:29, 30; 2 Vakorinto 6:17, 18.

4. Hayini kuhelisiwa ka wukhongeli la mavunwa kuli mahungu yotsakisa?

Kulovisiwa ka wukhongeli la mavunwa i mahungu yotsakisa hikuva sweswo switayendla leswaku vanhu hinkwavu vahuluxiwa ka kuhluphiwa hi wukhongeli. Akungahatava ni wukhongeli ni lin’we la mavunwa lelingata kanganyisaka vanhu kumbe kuva hambanisa. Hinkwavu lavahanyaka laha misaveni vatagandzela Xikwembu xin’we ntsena xa ntiyisu. — Lerha Nhlavutelo 18:20, 21; 21:3, 4.