DJONDZO 2

Kuvulavula hi Ndlela ya Mabulu

2 Vakorinto 2:17

U FANELE U YENDLA YINI? Vulavula hi ndlela yotshunxeka, leyi kombisaka leswi uti twisaka xiswona mayelana ni nhlokomhaka swin’we ni vayingiseli va wena.

UNGASWI YENDLISA KUYINI?

Yendla xikhongelo leswaku u kota kuti lunghiselela kahle. Kombela mpfuno hi xikhongelo leswaku u dzikisa miyanakanyo ka rungula leli u li lunghiselelaka, kunga li ka wena n’winyi. Tiva timhakankulu leti u faneleke uti kandzihisa. Vulavula hi marito ya wena n’winyi; awu fanelanga u lerha rito lin’wana ni lin’wana lelinga tsaliwa ka papela.

Loko uti lulamisela kulerha Bibele kumbe buku lin’wana, u fanele u li tiva kahle rungula leswaku u lerha hi ndlela ya ntumbuluku. Loko kutshahiwa marito ya vanhu, kombisa mintlhaveko loko u li karhi u lerha marito ya vona kambe unga tlulisi mpimo.
Vulavula swi huma mbilwini. Pimisa hi xivangelo lexinga yendlaka leswaku vayingiseli va wena va lava kuyingisela rungula la wena. Dzikisa miyanakanyo ya wena ka vona. Unga khohlwi leswaku ndlela leyi u nyimaka hi yona ka palku, ndlela leyi u tirhisaka hi yona mavoko loko u vulavula, ni ndlela leyi u langutaka hi yona vayingiseli va wena, yita komba leswaku u vulavula hi ndlela ya lirhandzu ni ya xinghanu.

Ku ni kuhambana xikarhi ka kuvulavula hi ndlela ya kutshunxeka ni kuvulavula ingaku ho va xitaratwini. Hlayisa lisima la rungula la wena hi kutirhisa marito lama twisisekaka lawa ma kumekaka ka xihlamuselamarito.
Languta vayingiseli va wena. Vulavula na u languta vayingiseli va wena hi ndlela leyingata kala yingava khunguvanyisi. Loko u li karhi u veka nkulumi, languta vayingiseli va wena hi mun’we ha mun’we, kunga li hi ntlawa.