BIBLIYOTEKA KA INTERNETI la Watchtower
Watchtower
BIBLIYOTEKA KA INTERNETI
xiChangana (Moçambique)
  • BIBELE
  • MABUKU
  • MINTLHANGANU
  • mwbr25 Março pp 1-16
  • Mareferensiya Ya Xibukwana Xa Mintlhanganu Ya Mahanyelo Ni Ntirho

Aku na vhidiyu lihlawuliweke.

Hivaleli, aswikotekanga kuchaya vhidiyu.

  • Mareferensiya Ya Xibukwana Xa Mintlhanganu Ya Mahanyelo Ni Ntirho
  • Mareferensiya Ya Xibukwana Xa Mintlhanganu Ya Mahanyelo Ni Ntirhu — 2025
  • Swihlokwana
  • 3 KU YA KA 9 KA MARÇO
  • 10 KU YA KA 16 KA MARÇO
  • HISEKELA NTIRHO WA KU CHUMAYELA
  • Hi mhaka muni Timboni ta Yehovha ti nga tlangeli Paxkwa?
  • 17 KU YA KA 23 KA MARÇO
  • 24 KU YA KA 30 KA MARÇO
  • 31 KA MARÇO KU YA KA 6 KA ABRIL
  • 7 KU YA KA 13 KA ABRIL
  • HISEKELA NTIRHO WA KU CHUMAYELA
  • 14 KU YA KA 20 KA ABRIL
  • 21 KU YA KA 27 KA ABRIL
  • 28 KA ABRIL KU YA KA 4 KA MAIO
Mareferensiya Ya Xibukwana Xa Mintlhanganu Ya Mahanyelo Ni Ntirhu — 2025
mwbr25 Março pp 1-16

Mareferensiya Ya Xibukwana Xa Mintlhanganu Ya Mahanyelo Ni Ntirho

© 2024 Watch Tower Bible and Tract Society of Pennsylvania

3 KU YA KA 9 KA MARÇO

XUMA XI NGA KA RITO LA XIKWEMBU SWIVURISO 3

Kombisa Swaku Wa Mu Tshemba Yehovha

Nhlokomhaka 14 ya Tindzimana Leti Nga Tlhamuseliwa mapar. 4-5

Swivuriso 3:5, 6 — “U Nga Tshembi Ku Twisisa Ka Wena N’winyi”

“Tshemba Yehovha hi mbilu ya wena hinkwayu.” Ku tshemba Yehovha hi mbilu ya hina hinkwayu, swi vula ku xi tshemba hi ku helela Xikwembu hi tlhela hi yendla swilo hi ku ya hi leswi xona xi swi lavaka. Phela ka Bibele loko ku vulavuliwa hi mbilu, ku va na ku vulavuliwa hi leswi munhu a nga tshamisa xiswona hi le ndzeni, leswi a swi pimisaka, leswi a titwisaka xiswona ni ndlela leyi a yendlaka hi yona swilo. Leswi nge, ku tshemba Yehovha hi mbilu ya hina hinkwayu a swi vuli ntsena ku va hi yendla swilo hi ku ya hi leswi hi titwisaka xiswona, kambe swi vula ku va hi tshemba hi ku helela swaku Xikwembu hi xona xi tivaka leswi nga swinene ka hina. — Varoma 12:1.

“U nga tshembi ku twisisa ka wena n’winyi.” Swi kahle kuva hi tshemba Yehovha hikusa a hi hetisekanga naswona Yehovha a tlharihile hintamu ku hi tlula. (Esaya 55:8, 9) Se loko hi mu pfumelela swaku a kongomisa swiboho leswi hi swi yendlaka, minkama hinkwayu swi ta hi fambela kahle ka wutomi la hina. (Tipisalema 1:1-3; Swivuriso 2:6-9; 16:20) Kuve loko ho titshemba kumbe hi yendla swiboho hi ku ya hi leswi hi titwisaka xiswona, ku sunguleni swiboho leswo swi nga ha tikomba swi li kahle kambe swi nga yendleka hi ku famba ka nkama hi tilaya hi swiboho swoleswo. — Swivuriso 14:12; Yeremiya 17:9.

Nhlokomhaka 14 ya Tindzimana Leti Nga Tlhamuseliwa mapar. 6-7

Swivuriso 3:5, 6 — “U Nga Tshembi Ku Twisisa Ka Wena N’winyi”

“Mu tivisi tindlela ta wena hinkwatu.” Ku tivisa Xikwembu tindlela ta hina hinkwatu swi vula swaku na hi nge se yendla swiboho hi fanele hi khongela hi kombela swaku Xikwembu xi hi pfuna swaku hi yendla xiboho xaxinene hi tlhela hi tirhisa leswi xi hi byelaka swona hi ku tirhisa Bibele ku nga Rito la xona. (Tipisalema 25:4; 2 Timotiya 3:16, 17) Leswi nge, na hi nge se yendla xiboho hi fanele hi rhanga hi ku tiva swaku Xikwembu xi titwisa ku yini hi leswi hi lavaka ku swi yendla.

“Yena a ta lulamisa tindlela ta wena.” Xikwembu xi lulamisa tindlela ta hina hi ku hi pfuna swaku hi kota ku hanya hi ku landza minawu ya xona. (Swivuriso 11:5) Hi ndlela leyo hi ta swi kota ku fambela kule ni swikarhatu hi tlhela hi va ni wutomi la ku tsakisa. — Tipisalema 19:7, 8; Esaya 48:17, 18.

Xikola Xa Wutirheli-TS paj. 76 par. 4

Tama U Kulisa Wunghanu La Wena Na Yehovha

Vanhu va vanyingi loko va kumana ni xiyimu lexi va nga tshama va kumana na xona ka wutomi la vona va tibyela leswi: ‘Mina se ni ni xiperiyensiya, na swi tiva swaku ni nga yi huma ndjhani mhaka leyi.’ Kambe a swi kahle ku pimisa hi ndlela leyo. Bibele li li ‘a hi fanelanga hi tivona na hi tlharihile ka matihlo ya hina.’ (Swivuriso 3:7) I ntiyiso swaku leswi swi nga hi humelela swi nga hi pfuna, kambe munhu lweyi a nga ni wunghanu la ku tiya na Yehovha a nga titshembi hikusa wa swi tiva swaku swilo swi ngo mu fambela kahle ka wutomi la yena loko a katekisiwa hi Yehovha a tlhela a kongomisiwa hi yena. Naswona wa swi khumbuka swaku akuva swilo swi mu fambela kahle ka wutomi la yena, swi dependera hi Yehovha, ku nga li hi xiperiyensiya xa yena.

Lavetela Xuma Ka Rito La Xikwembu

Murindzi-TS 15/09/06 paj. 17 par. 7

Tipontu Ta Lisima Ta Buku La Swivuriso

3:3. A loko Bibele li ku hi fanele hi boha lirhandzu ni ntiyiso ka nhamu ya hina, li lava ku vula leswaku hi fanele hi vona lirhandzu ni ntiyiso na wu li nchumu wa lisima hintamu ka wutomi la hina ku fana ni kolari la ku xonga leli munhu a li bohaka ka nkolo wa yena. Se loko li ku hi fanele hi tsala lirhandzu ni ntiyiso ka mbilu ya hina, li lava ku vula leswaku hi fanele hi hanya hi lirhandzu ni ntiyiso siku ni siku hi tlhela hi swi yendla na swi sukela mbilwini.

10 KU YA KA 16 KA MARÇO

XUMA XI NGA KA RITO LA XIKWEMBU SWIVURISO 4

“Hlayisa Mbilu Ya Wena!”

Murindzi 01/19 paj. 15 par. 4

Ungayi Sirhelelisa Kuyini Mbilu ya Wena?

4 Ka buku la Swivuriso 4:23, a rito lelinge “mbilu” li yimela “leswi hinga swona hi le ndzeni” kumbe “munhu wa le xihundleni”. (Lerha Tipisalema 51:6) Hi marito man’wana, li yimela mimpimiso ya hina, ndlela leyi hi titwaka ha yona, leswi hiswi navelaka ni leswi susumetelaka swiboho swa hina. Li yimela leswi hinga xiswona hi le ndzeni kunga li leswi hi tikombisaka hi li swona hi le handle.

Murindzi 01/19 paj. 17 mapar. 10-11

Ungayi Sirhelelisa Kuyini Mbilu ya Wena?

10 Akuva hi kota kusirhelela mbilu ya hina, hi fanele hi va ni wuswikoti la kuvona makhombo ni kuma papalata hi xihantla. Leswi swihi khumbukisa ntirho lowu awu yendliwa hi varindzi. Ankameni wa Hosi Solomoni, varindzi ava nyima henhla ka makhumbi ya doropa naswona loko va vona khombo li le kuteni ava tivisa vahanyi va doropa. Leswi aswi yendliwa hi varindzi swihi pfuna kutwisisa leswi hi faneleke hiswi yendla leswaku hinga pfumeleli Sathana a kucetela mimpimiso ya hina.

11 Aminkameni ya khale, varindzi va doropa ava tirhisana ni vavoneleli va tinyanghwa. (2 Sam. 18:24-26) Hawumbirhi la vona ava sirhelela doropa hi kutiyisekisa leswaku tinyanghwa ti pfaliwile loko nala a tshinela. (Neh. 7:1-3) Lipfalu la hina leli djondzisiweke hi Bibele linga tirha kufana ni murindzi, lihi tivisa loko Sathana a zama kuhlasela mbilu ya hina kumbe kukucetela mimpimiso ya hina, ndlela leyi hi titwaka ha yona, leswi hiswi navelaka ni leswi susumetelaka swiboho swa hina. Loko lipfalu la hina li tshuka li ku “nge”, hi fanele hili yingisa ivi hi sirhelela mbilu ya hina.

Murindzi 01/19 paj. 18 par. 14

Ungayi Sirhelelisa Kuyini Mbilu ya Wena?

14 Leswaku hi sirhelela mbilu ya hina, aswi yenelanga kupapalata swilo leswingayi wonhaka. Hi fanele hi pfumelela leswaku yi kuceteliwa hi swilo leswinene. Ahi tlheleni hi bula hi xifaniso xa doropa lelinga ni vavoneleli. Vavoneleli va tinyanghwa ava fanele vati pfala leswaku doropa linga hlaseliwi hi valala. Kambe hi hala tlhelo, ava fanele vati pfula leswaku swakudla ni swilo swin’wana leswi lavekaka swi nghena doropeni. Loko tinyanghwa atotshuka tinga pfuliwi, vahanyi va doropa ava ta sika hi ndlala. Hi ndlela leyi fanaka, hi fanele hi pfumelela mimpimiso ya Xikwembu leswaku yi kongomisa miyanakanyo ya hina.

Murindzi-TS 01/05/12 paj. 32 par. 2

“Hlayisa Mbilu Ya Wena!”

Hi mhaka muni hi fanele hi hlayisa mbilu ya hina? Bibele li vula leswi: “Hlayisa mbilu ya wena ku tlula swilo hinkwaswu leswi u swi hlayisaka, hikusa swihlovo swa wutomi swi le ka yona.” (Swivuriso 4:23) Ndzimana leyi yi swi kombisa kahle swaku leswaku swilo swi hi fambela kahle swoswi ni ka nkama lowu taka, swi ya hi swaku hi yi hlayisisa ku yini a mbilu ya hina, ku nga leswi hi nga tshamisa xiswona hi le ndzeni, hikusa loko Yehovha a hi txuvuka a ngo vona ntsena leswi hi nga tshamisa xiswona hi le handle, kambe a vona leswi hi nga tshamisa xiswona hi le ndzeni. — 1 Samuwele 16:7; 1 Pedru 3:4.

Lavetela Xuma Ka Rito La Xikwembu

Murindzi 08/21 paj. 8 par. 4

U Ta Nyimela Yehovha Minkama Hinkwayu?

4 Swivuriso 4:18 yi li: “Kambe ndlela ya lava va ku lulama yi fana ni ku vonakala ka ku phatima ka nimixo loku voningaka hi kutsongokutsongo anze li xa.” Ndzimana leyi, yi swi kombisa kahle swaku Yehovha a pfuna vanhu va yena hi kutsongokutsongo swaku va twisisa ndlela leyi a swi yentxaka hi yona swilo. Ndzimana leyi, yi tlhela yi hi pfuna ku twisisa ku txintxa loku makwerhu a nga ku yentxaka hi kutsongokutsongo ka wutomi la yena swaku a tama a kulisa wunghanu la yena na Yehovha. Swi teka nkama swaku munhu a va munghanu wa mukulu wa Yehovha. Phela loko hi djondza Bibele, hi tlhela hi hanya hi leswi hi swi djondzaka ni ku yentxa leswi nhlengeletanu ya Yehovha yi hi byelaka swona, hi kutsongokutsongo hi ta ya hi tekelela wumunhu la Yesu Kreste, naswona hi ta ya hi mu tiva kahle Yehovha. Leswaku hi yi twisisa kahle mhaka leyi, a hi kambeleni xikombiso lexi Yesu Kreste a nga xi nyikela.

HISEKELA NTIRHO WA KU CHUMAYELA

Nhlokomhaka 19 ya Swivutiso Leswi Vanhu Va Tolovelaka Ku Swi Vutisa

Hi Mhaka Muni Timboni Ta Yehovha Ti Nga Tlangeli Paxkwa?

Leswi vanhu va swi hlayaka

• Mavunhwa: Timboni ta Yehovha a ti tlangeli Paxkwa hikusa a hi Vakreste.

Ntiyiso: Hina hi kholwa swaku Yesu i Muponisi wa hina naswona hi yendla hinkwaswu hi nga swi kotaka leswaku hi mu tekelela ka wutomi la hina. — 1 Pedru 2:21; Luka 2:11.

• Mavunhwa: N’wina a mi kholwi swaku Yesu a pfuxiwile.

Ntiyiso: Hina ha kholwa ka ku pfuxiwa ka Yesu, funtshi leyo i djondzo ya lisima ka Vakreste; naswona hi djondzisa vanhu hi mhaka leyo. — 1 Vakorinto 15:3, 4, 12-15.

• Mavunhwa: Vana va n’wina a va tlangi hi nkama wa Paxkwa, funtshi n’wina a mu na mhaka na swona leswo.

Ntiyiso: Hina ha va rhandza vana va hina funtshi hi yendla hinkwaswu leswaku hi va djondzisa ni ku va pfuna swaku va tsaka. — Tito 2:4.

Hi mhaka muni Timboni ta Yehovha ti nga tlangeli Paxkwa?

• A fexta la Paxkwa leli yendliwaka namuntlha ka siku a li ti hi ka Bibele.

• Yesu a hi rhume leswaku hi tlangela lifu la yena, ku nga li ku pfuxiwa ka yena. Hina ha li tlangela lifu la Yesu hi siku leli a nga fa hi lona hi ku landza kalendariyu leli a li tirhisiwa ka minkama ya ku tsaliwa ka Bibele. — Luka 22:19, 20.

• Hina hi kholwa swaku mafexta ya Paxkwa lawa ma yendliwaka ka masiku ya hina hi lawa a ma yendleliwa swikwembu swa mavunhwa. Se leswo a swi xi tsakisi Xikwembu; xona xi lava leswaku hi gandzela xona ntsena funtshi xi kwata hintamu loko xi vona vanhu va gandzela swikwembu swin’wani. — Eksoda 20:5; 1 Tihosi 18:21.

Hina ha tiyiseka swaku xiboho xa hina xa ku kala hi nga tlangeli Paxkwa xi fambisana ni leswi Bibele li swi vulaka; hikusa Bibele li hi kutxa leswaku hi tirhisa wutlharhi ni ku twisisa, ku nga li ku landzelela swihena swa vanhu. (Swivuriso 3:21; Matewu 15:3) I ntiyiso swaku loko vanhu va hi yendla swivutiso leswi yelanaka ni Paxkwa, a hi tshiki ku va tlhamusela leswi hi kholwaka ka swona, kambe ha swi tiva swaku mun’wani ni mun’wani a ni mfanelo ya ku langa leswi a lavaka ku swi yendla funtshi ha swi hlonipha leswo. — 1 Pedru 3:15.

17 KU YA KA 23 KA MARÇO

XUMA XI NGA KA RITO LA XIKWEMBU SWIVURISO 5

Fambela Kule Ni Wuntunga La Swa Masangu

Murindzi-TS 15/07/00 paj. 29 par. 1

U Nga Swi Kota Ku Tshama U Basile Ka Misava Leyi Ya Ku Biha

Ka buku leli la Swivuriso ku vulavuliwa hi “wansati wa nghwavani”. Wansati lweyi a tirhisa marito ya ku xonga swaku a xenga djaha. Marito ya kona ma twala na ma tsokombela ku fana ni wulombe funtshi ma wolova ku tlula mafurha. Indjhe a hi swona leswi vanhu va ku tala va swi yendlaka loko va lava ku xengetela munhu leswaku a yendla wuntunga la swa masangu? Hi xikombiso, vona leswi swi nga yendlekela Amy lweyi a nga ni 27 wa malembe, yena a vula leswi: “Ku ni kolega lweyi ni tirhaka na yena, lweyi a tolovelaka ku ni byela marito ya ku xonga. Phela i swinene ku byeliwa marito ya ku xonga ni ku kombiwa swaku wa rhandziwa. Kambe ni swi twisisile swaku leswi a a swi lava a ku li ku famba masangu na mina. Hi mhaka leyo, a ni nge te swi pfumelela leswaku leswo swi yendleka.” Phela marito ya munhu lweyi a nga ni xikongomelo xa ku biha, ma nga ha tikomba ma tsakisa ma tlhela ma nandziha kambe loko hi yi tirhisa kahle mimpimiso ya hina hi ta swi tsumbula leswi a swi lavaka hikakunene.

Murindzi-TS 15/07/00 paj. 29 par. 2

U Nga Swi Kota Ku Tshama U Basile Ka Misava Leyi Ya Ku Biha

Munhu lweyi a tipetaka ka wuntunga la swa masangu a nga ha koka ku vava. Phela wuntunga la swa masangu li nga ha fanisiwa ni xinsinyani xa ku bava, kumbe li fanisiwa ni xipada lexi tsemaka hi matlhelo hamambirhi. Munhu lweyi a tipetaka ka wuntunga la swa masangu a nga ha biwa hi lipfalu, a kuma nyimba ya ku kala a nga yi nyimelanga, kumbe ku kuma mavabyi lawa ma tlulelanaka hi ku famba masangu. Handle ka leswo, a nga ha twisa ku vava lweyi a nga chada na yena hileswi a kalaka a nga tshembekanga ka yena, funtshi ku vava koloko a nga ha ku twa wutomi la yena hinkwalu. Impela swa tikomba swaku a wuntunga la swa masangu li nga yendla munhu a koka ku vava wutomi la yena hinkwalu.

Murindzi-TS 15/07/00 paj. 29 par. 5

U Nga Swi Kota Ku Tshama U Basile Ka Misava Leyi Ya Ku Biha

Hi fanele hi fambela kule ni vanhu lava nga ni mahanyelo ya ku biha hi swa masangu. Hi nga yendla leswo hi ku kala hi nga yingiseli mamuzika lawa ma vulavulaka hi swa masangu, hi nga sixtiri swilo leswi nga hi yendlaka hi navela ku famba masangu ni ku kala hi nga voni swilo leswi fambisanaka ni pornografiya. (Swivuriso 6:27; 1 Vakorinto 15:33; Vaefeza 5:3-5) Xin’wani xi nga hi pfunaka ku fambela kule ni vanhu volavo i ku kala hi nga tlangi hi ku gangisana hi tlhela hi yambala mpahla ya ku hlonipheka. — 1 Timotiya 4:8; 1 Pedru 3:3, 4.

Lavetela Xuma Ka Rito La Xikwembu

Murindzi-TS 15/07/00 paj. 29 par. 7

U Nga Swi Kota Ku Tshama U Basile Ka Misava Leyi Ya Ku Biha

Solomoni a kombisa ku vava loku munhu a ku twaka loko a yendla wuntunga la swa masangu. A wuntunga la swa masangu ni ku mbuyeta swi gama swi yendla munhu a titwa a nga li wa nchumu. Phela swa danisa loko munhu a yendla wuntunga la swa masangu hi ku lava ku titsakisa ntsena, funtshi loko munhu a famba masangu ni munhu lweyi a kalaka a nga chadanga na yena a kombisa swaku a nga tirhandzi.

24 KU YA KA 30 KA MARÇO

XUMA XI NGA KA RITO LA XIKWEMBU SWIVURISO 6

Hi Nga Djondza Yini Ka Tinsokoti?

Perspicaz vol. 1 paj. 999 mapar. 1-2

Sokoti

‘Wutlharhi La Ku Hlamalisa.’ Hambileswi tinsokoti ti kalaka ti nga pimisi, wutlharhi leli ti nga na lona li kombisa leswaku Yehovha a ti yendle hi ndlela ya ku hlamalisa swinene. Bibele li vula leswaku a tinsokoti “ti hlengeleta swakudla swa tona hi malanga, naswona ti hlengeleta swakudla swa tona hi nkama wa ku tshovela.” (Swiv 6:8) Phela a tinsokoti leti ti hlengeletaka swakudla ti tolovela ku kumeka aPalestina, naswona ti tolovela ku hlengeleta swakudla hi nkama wa ku tshovela ni hi malanga leswaku ti ta swi tirhisa loko ku fika a wuxika, ku nga nkama lowu swi karhataka ku kuma swakudla. Tinsokoti toleto ti tolovela ku kumeka kusuhi ni ndhawu leyi ku phephetiwaka swilo leswi nga tshoveliwa, lani ku nga ni timbewu ta tinyingi ni tindzoho. Loko swakudla leswi tinsokoti ti nga swi hlengeleta swi tsakama hi mpfula, tona ta swi kota ku swi suselela ti ya swi veka ka mumu leswaku swi ta woma. Xin’wani xa ku hlamalisa hi swaku loko timbewu leti tinsokoti ti nga ti hlengeleta ti sungula ku mila, tona ta swi kota ku tsema ka ndhawu liyani yi nga mila; funtshi a tindlela leti tinsokoti toleto ti fambaka hi tona ta tikomba hikusa ti lunghiseleliwe kahle funtshi kusuhi ni mimbhovo ya tona ku tale hi makamba ya timbewu.

Leswi Hi Nga Swi Djondzaka: Bibele la swi kombisa swaku hi nga djondza swilo swin’wani ka tinsokoti hikusa lona li li: “Famba u ya txuvuka tinsokoti wena lolo; u vona leswi ti tirhisaka swona kutani u tlhariha.” (Swiv 6:6) Tinsokoti a to hlawuleka ntsena hileswi ti lunghiselelaka swakudla na ka ha li nkama, kambe ti tlhela ti hlawuleka hileswi ti nga tinyimisela ku tirha ni ku yendla hinkwaswu ti nga swi kotaka ka ntirho wa tona. Phela tinsokoti tin’wani ti rhwala swilo swa ku tika hintamu. Minkama yin’wana sokoti yi nga ha rhwala kumbe ku kokovisela swilo leswi nga ni pezu leyi phindhaka kambirhi kumbe ku tlula pezu ya yona. Naswona hambiloko sokoti yo wa yi rhetemuka kumbe yi wumbulukela, minkama ya yinyingi yi tlhela yi ya tirha. Tinsokoti ti tlhela ti hlawuleka hileswi ti rhandzaka ku basa ni ku pfunana. Minkama ya yinyingi lani tinsokoti ti tshamaka kona ku tshama na ku basile, naswona tinsokoti ti tolovela ku pfuna tinsokoti tin’wani leti ti nga vavisiwa kumbe leti ti nga karhala hintamu leswaku ti tlhelela ka mbhovo wa tona.

Murindzi-TS 15/09/00 paj. 26 mapar. 4-5

Vhikela Vito La Wena

Indjhe hina a hi fanelanga hi tirha hi matimba ku fana ni tinsokoti? Ku tirha hi matimba hi tlhela hi tikarhata swaku hi yampsisa a ntirho lowu hi wu yendlaka hambiloko hi nga voniwi hi munhu, swi ta pfuna hina. Hi xikombiso, loko hi li xikolweni, hi li ka mintirho ya hina ya ku tihanyisa ni nkama lowu hi tirhelaka Yehovha hi fanele hi yendla hinkwaswu leswi hi nga swi kotaka. Ku fana ni leswi sokoti yi pfunekaka hi ku tirha hi matimba, Xikwembu xi lava swaku hina hi tsaka hi ntirho lowu hi wu yendlaka. (Ekleziyaxta 3:13, 22; 5:18) Phela loko hi tirha hi matimba hi ta va ni lipfalu la ku basa hi tlhela hi tsaka. — Ekleziyaxta 5:12.

Solomoni a tirhise swivutiso swimbirhi leswaku a basopisa malolo ni ku ma pfuxa wurhongweni. Yena a vutise leswi: “Wena lolo, kasi u ta yetlela kolanu anze nkama muni? U ta pfuka hi nkama muni?” A tlhele a ku: “Loko u yetlelanyana, u khudzehelanyana, u khondlanyana mavoko leswaku u humula, wusiwana la wena li ta ta ku fana ni muyivi, ni ku navela ka wena ku fana ni munhu lweyi a nga tilulamisela ku lwa nyimpi.” (Swivuriso 6:9-11) Phela nkama lowu lolo la ha humulaka, a wusiwana la li tela ku fana ni muyivi, funtshi ni ku navela ka lona ku ta ku fana ni munhu lweyi a nga tilulamisela ku lwa nyimpi. A masimu ya munhu lweyi a nga ni wulolo ma tshama na ma tlhumile. (Swivuriso 24:30, 31) Naswona manegosiyu ya yena ma wa ma tlhela ma mu vangela swikweneti. U pimisa swaku patrão a a ta tshama ni mutirhi lweyi a nga lolo nkama wa ku gama kwini? Indjhe alunu lweyi a nga ni wulolo la ku djondza a a ta pasa a xikola?

Lavetela Xuma Ka Rito La Xikwembu

Murindzi-TS 15/09/00 paj. 27 par. 4

Vhikela Vito La Wena

A 7 wa swidjoho leswi ku vulavuliwaka hi swona ka buku la Swivuriso swi nyimela swidjoho hinkwaswu leswi vanhu va swi yendlaka. Hi xikombiso, a “ku tibyela” ni “ku pimisa ku yendla swa ku biha”, swi nyimela ku va munhu a djoha hi leswi a swi pimisaka. Kasi “ku hemba” ni “mboni leyi tshamelaka ku vulavula mavunhwa” swi nyimela swidjoho leswi munhu a swi yendlaka hileswi a swi vulaka. Se a “ku dlaya vanhu va ku kala va nga na nandzu” ni ku “tsutsumela ku yendla swa ku biha” swi nyimela ku va munhu a djoha hi leswi a swi yendlaka, funtshi Yehovha wa va nyenya vanhu lava va yendlaka vamakwavu va tshamela ku holova. Naswona ku va buku leli li rhanga hi ku vulavula hi 6 wa swidjoho li gama li vula swaku i 7 wa swona, swi kombisa swaku vanhu a va nga ta nyima ka swidjoho swoleswo kambe a va ta tshamela ku yengesela swidjoho swa vona.

31 KA MARÇO KU YA KA 6 KA ABRIL

XUMA XI NGA KA RITO LA XIKWEMBU SWIVURISO 7

U Nga Tipeti Ka Swiyimu Leswi Nga Ku Yendlaka U Djoha

Murindzi-TS 15/11/00 paj. 29 par. 5

“Yingisa Minawu Ya Mina Leswaku U Tama U Hanya”

Solomoni a a nyime ka janela la yena leli swi tikombaka ingaku a li ni magradi lawa a ma yendliwe hi swipulangwana leswi a swi sasekisiwile. Loko li ya li mphuma, Solomoni a vone djaha lin’wani leli a li nga na wutivi naswona a li nga tlharihanga. Swi tikomba ingi djaha leli a li swi tiva swaku vanhu va muganga lowuyani a va tshamise ku yini naswona a li swi tiva swaku i mpsini leswi a swi ta li yendlekela. Kambe li ye li tshinela swinene ka ndhawu leyi a ku tshama wansati mun’wani. Kasi a ku li mani wansati lweyi? Naswona a a lava yini?

Murindzi-TS 15/11/00 paj. 30 mapar. 4-6

“Yingisa Minawu Ya Mina Leswaku U Tama U Hanya”

Wansati lwiyani a a vulavula marito ya ku kanganyisa funtshi a a vulavula na a nga chavi a tlhela a tiyiseka hi leswi a swi vulaka. Hinkwaswu leswi a a swi vula a a rhanga hi ku swi pimisa kahle. Ku va a vule swaku yena a a nyikelile magandzelo ya ku kombela ku rhula, a a lava ku yendla djaha leliyani li pimisa swaku yena i munhu wamunene lweyi a nga ni wunghanu lalinene ni Xikwembu. Phela khale a ku tirhisiwa azeyiti, vhinyu, nyama ni mpupu swaku ku yendliwa magandzelo ya ku kombela ku rhula. (Levhitika 19:5, 6; 22:21; Tinhlayo 15:8-10) Funtshi a swi koteka swaku munhu lweyi a yendlaka magandzelo ya ku kombela ku rhula a tikhorisa ni ndjangu wa yena hi leswi a swi tirhisiwa swaku ku yendliwa magandzelo wolawo. Se ku va wansati lweyi a vule swaku a yendle magandzelo, a a lava ku xengetela djaha leli swaku li famba kaya ka yena li ya tikhorisa hi ku dla ni ku phuza. Wansati lweyi a byele djaha leli swaku a va ta tikhorisa hintamu ni swaku a a suke hi kaya leswaku a ya li lavetela. Ku nga va swaku wansati lweyi a a lavetela djaha leli hi ku kongoma? Tintivi tin’wanyani ti vula leswaku “wansati lweyi a yo huma leswaku a ya lavetela munhu, kambe a swi vuli swona swaku a a lavetela djaha leli hi ku kongoma.” Se ku va djaha leli li kholwile swaku wansati lweyi a a lavetela lona hi ku kongoma, swi kombisa swaku a li nga na wutivi.

Wansati lweyi a a navetisa hi ku saseka ka mpahla ya yena, hi marito lawa a nga ma hlaya ni hi leswi a nga barasara a tlhela a bejara djaha leli, kambe a nga gamelanga lanu, a tirhise ni swilo swa ku nunh’wela. Wansati lweyi a li byele leswi djaha leliyani: “Ni yandlalele mubedu wa mina hi malensoli ya ku saseka, hi tipanu ta tikorikori leti taka hi Gibita. Ni n’wan’wasele mubedu wa mina hi mira, timhangani ni kanela.” (Swivuriso 7:16, 17) Phela wansati lweyi a yandlalele mubedu wa yena hi tipanu ta tikorikori leti taka hi Gibita funtshi a n’wan’wasele mubedu wa yena hi swilo swa ku nunh’wela swa ku fana ni mira, timhangani ni kanela.

Wansati lweyi a byele djaha leliyani a ku: “Tani, a hi fambe hi ya tikhorisa hi lirhandzu la hina anze li xa; a hi tikhorise hi ku yetlela xikan’we hi rhandzana.” Hi marito lawa, wansati lweyi a a ngo rhamba djaha leli swaku va tikhorisa hi swakudla ni ku phuza ntsena, kambe a a li rhamba leswaku va famba masangu. Leswaku wansati lweyi a yendla djaha leli li pfumela xirhambu xa yena a te: “Nuna wa mina a nga kona kaya; a yendzile a ya kule swinene. A fambe ni paxta la male, a nga ta vuya swoswi anze n’weti wu voneka kahle na wu helelile.” (Swivuriso 7:18-20) Hi ku vula marito lawa, wansati lweyi a a vula swaku djaha leli a li nga fanelanga li chava nchumu hikusa nuna wa yena a a yendzile a ya yendla manegosiyu ka ndhawu ya le kule naswona a a ta hlwela ku vuya. Impela wansati lweyi ‘a kanganyise djaha leli hi ku li xengetela hintamu. A li kanganyisile hi marito ya ku kanganyisa.’ (Swivuriso 7:21) Swa tikomba swaku a ku laveka wanuna wa ku tinyimisela wa ku fana na Yosefa leswaku a yala ku xengeteliwa hi wansati lweyi. (Genesa 39:9, 12) Ku nga va leswaku djaha leli li pfumelile ku xengeteliwa hi wansati lweyi?

Murindzi-TS 15/11/00 paj. 31 par. 2

“Yingisa Minawu Ya Mina Leswaku U Tama U Hanya”

Lexi twisaka ku vava hileswaku djaha leliyani li pfumelile xirhambu xa wansati lwiyani, naswona Bibele li vula leswaku na swi nge se ya kwini, li sungule ku mu landzelela ku fana ni homu leyi yaka ku dlayiweni. Phela djaha leliyani li tipete ka nghozi yayikulu; funtshi li yo tsumbula swaku li le nghozini nkama li nga “tlhaviwa hi mpaxwa ka xivindzi xa lona.” Djaha leli li veke wutomi la lona nghozini hikusa swi nga yendleka a li ta kuma mavabyi lawa ma tlulelanaka hi ku famba masangu ni ku tlhela li wonha wunghanu la lona na Yehovha. Ku fana ni leswi munhu lweyi a nga pfaleliwa djele a kalaka a nga swi koti ku baleka xikhatiso lexi a nga ta kumana na xona, djaha leliyani li djohele Yehovha. Se hi nga vula swaku ku fana ni leswi xinyanyani xi fambaka hi xoxe ka ntlhamu lowu xi nga vekeliwa wona, djaha leliyani li tiyise ku feni hi loxe.

Lavetela Xuma Ka Rito La Xikwembu

Murindzi-TS 15/11/00 paj. 29 par. 1

“Yingisa Minawu Ya Mina Leswaku U Tama U Hanya”

Bibele li li hi fanele hi ‘bohelela [minawu ya Xikwembu] ka tintiho ta hina. Hi yi tsala ka mbilu ya hina.’ (Swivuriso 7:3) Phela leswi hi kotaka ku ti vona kahle tintiho ta hina hi tlhela hi ti tirhisa ka xin’wani ni xin’wani lexi hi xi lavaka, swi kombisa swaku ni minawu ya Xikwembu hi fanele hi yi tirhisa nkama ni nkama hi tlhela hi yi pfumelela swaku yi hi kongomisa ka xin’wani ni xin’wani lexi hi xi yendlaka. Se ku va Bibele li ku hi fanele hi tsala minawu ya Xikwembu ka mbilu ya hina, swi vula swaku hi fanele hi tolovelana na yona, hi yi pfumelela swaku yi hi nghena ni ku tlhela hi zama ku hanya hi yona.

7 KU YA KA 13 KA ABRIL

XUMA XI NGA KA RITO LA XIKWEMBU SWIVURISO 8

Yingisa Lweyi A Nga Ni Wutlharhi

Mulandzeli Wa Mina-TS paj. 131 par. 7

Na Mu Rhandza Papayi

7 Ka ndzimana 22, wutlharhi li li: “Yehovha a ni yendle ni va masungulo ya ndlela ya yena, ni ve wa ku sungula ka mintirho ya yena ya khale swinene.” Swa tikomba swaku ka ndzimana leyi a ku vulavuliwi hi wutlharhi la hikakunene hikusa wutlharhi a li yo yendliwa. Ku sukela ku sunguleni, Yehovha a ve kona naswona minkama hinkwayu a ve ni wutlharhi. (Tipisalema 90:2) N’wana wa Xikwembu lweyi a nga matevula ya hinkwaswu leswi nga yendliwa, a yo yendliwa hi Yehovha funtshi a ve wa ku sungula ka hinkwaswu leswi nga yendliwa. (Vakolosa 1:15) Se swi tikomba wutlharhi leli ku vulavuliwaka hi lona ka buku la Swivuriso ku li Rito kumbe Muvulavuleli Wa Xikwembu. — Yohani 1:1.

Mulandzeli Wa Mina-TS mapaj. 131-132 mapar. 8-9

Na Mu Rhandza Papayi

8 Yesu a a yendla yini na a nga se ta lani misaveni? Ndzimana 30 yi li: “Hi nkama wolowo a ni li tlhelweni ka yena na ni li mutirhi wa kahle swinene”. Ndzimana leyi yi hi pfuna ku twisisa swaku Yesu a a tirhisana na Yehovha. Kambe a ku li wini ntirho wa Yesu? Buku la Vakolosa 1:16 la hi pfuna ku swi twisisa, hikusa li li: “Xikwembu xi tirhise yena leswaku xi tumbuluxa swilo leswin’wani hinkwaswu amatilweni ni lani misaveni; . . . xi tirhise yena swaku xi tumbuluxa swilo leswin’wani hinkwaswu naswona swi tumbuluxeliwe yena.” Ndzimana leyi yi kombisa swaku Yesu a a tirhisana na Yehovha ka ku tumbuluxa swilo hinkwaswu leswi nga kona. Swilo swoleswo swi patsa swilo hinkwaswu swi nga tilweni, tinyeleti, maplaneta ku patsa ni planeta la hina ku nga misava ni swilo hinkwaswu leswi nga kona lani misaveni, leswi patsaka swiharhi, maplanta ni vanhu. Ntirho lowu Yehovha na Yesu va nga wu yendla wu nga ha fanisiwa ni ntirho lowu wu yendliwaka hi lweyi a dezenyaraka maplanta ya tiyindlo ni muyaki. Muyaki a yendla hinkwaswu leswi nga dezenyariwa ka planta; hilani ku fanaka, na yena Yesu a a yendla hinkwaswu leswi Yehovha a a mu rhuma swona. Loko hi hlamalisiwa hi swilo leswi nga yendliwa, hi va na hi dzunisa Yehovha, Muvumbi wa swilo hinkwaswu. (Tipisalema 19:1) Naswona hi nga tinyika nkama wa ku pimisa hi nkama wa ku tsakisa lowu Yehovha na Yesu va nga wu heta na va tirha xikan’we.

9 Minkama yin’wani loko vanhu va tirha xikan’we va pfana va nga twanani. Kambe leswo a hi swona leswi nga yendleka ka Yehovha na Yesu. Yehovha na Yesu va hete malembe ya manyingi na va tirha xikan’we, kambe loko Yesu a vulavula hi leswi a a titwisa xiswona a li: “A ni tsakile phambheni ka yena nkama hinkwawu.” (Swivuriso 8:30) Phela a nkama lowu Yehovha na Yesu va nga wu heta na va tirha xikan’we wu yendle swaku va va ni wunghanu lalikulu hintamu, funtshi Yesu a londzole nkama wolowo swaku a tekelela wumunhu la Yehovha hi ku helela. Naswona hambiloko vanhu kumbe swilo leswin’wani leswi nga kona swo rhandzana kandjhani, a swi nge fiki ka ndlela leyi Yehovha na Yesu va rhandzanaka hi yona!

Murindzi-TS 15/04/09 paj. 31 par. 14

Khensa Yesu, Munhu Wa Lisima Ku Tlula Davhida Na Solomoni

14 Ka vanhu hinkwavu lava nga va kona lani misaveni ko va ni munhu mun’we a nga mu tlula hi wutlharhi Solomoni, ku nga Yesu Kreste. Phela hambi hi yena Yesu a vule leswaku yena a a li “munhu wa lisima ku tlula Solomoni.” (Mat. 12:42) Naswona minkama hinkwayu Yesu a a vulavula “marito lama nga ni wutomi la ku kala li nga heli”. (Yoh. 6:68) Hi xikombiso, ka Dixkursu la yena la le Ntshaveni, Yesu a vulavule hi swilo swin’wani leswi Solomoni a nga vulavula hi swona ka buku la Swivuriso, ku nga swilo leswi nga yendlaka lava tirhelaka Yehovha va tsaka wuton’wini. (Swiv. 3:13; 8:32, 33; 14:21; 16:20) Yesu a vule swaku a ntsaku wa ntiyiso hi ngo wu kuma ntsena loko hi tirhela Yehovha. Yena a te: “Va tsaka lava va lwelaka ku va vanghanu va Xikwembu, hikusa Mfumu wa matilo i wa vona.” (Mat. 5:3) Yesu a vule leswaku lava lwelaka ku tirhisa minawu ya Bibele ka wutomi la vona i va lisima ka Yehovha, “xihlovo xa wutomi”. (Ps. 36:9; Swiv. 22:11; Mat. 5:8) Yesu a tlhela a vitaniwa “wutlharhi la Xikwembu”. (1 Ko. 1:24, 30) Leswi Yesu a nga Mesiya, a ni wutlharhi. — Esa. 11:2.

Lavetela Xuma Ka Rito La Xikwembu

Khindlimuka!-TS 05/14 paj. 16

Indjhe Wa Li Twa Wutlharhi Loko Li Huwelela?

▪ Buku lin’wani leli nge The World Book Encyclopedia, li vula swaku a ku se tshama ku va ni buku lin’wani leli lerhiwaka hintamu ku tlula Bibele, funtshi Bibele li hundzuluxeliwe makhambi ya manyingi ku tlula mabuku lawa man’wani hinkwawu. Naswona swoswi Bibele li kumeka hi kolomuyani ka 2.600 wa tirimi na li helelile kumbe hi swiyenge, naswona ka 100 wa vanhu 90 wa vona va na lona Bibele.

▪ Xin’wani xi kombisaka swaku wutlharhi la huwelela hi leswaku ku hetiseka buku la Matewu 24:14 leli nge: “Mahungu lawa ya ku tsakisa ya Mfumu ma ta chumayeliwa amisaveni hinkwayu leswaku ma va wumboni ka matiko hinkwawu; kutani hi kona magamu ma nga ta fika.”

HISEKELA NTIRHO WA KU CHUMAYELA

Nhlokomhaka 160 ya Tinhlamulu Ta Swivutiso Swa Bibele

Hi Mhaka Muni Ku Vuliwa Swaku Yesu I N’wana Wa Xikwembu?

Nhlamulu ya Bibele

Minkama ya yinyingi loko Bibele li vulavula hi Yesu li vula swaku i “N’wana wa Xikwembu.” (Yohani 1:49) A rito leli nge “N’wana wa Xikwembu” li kombisa swaku Xikwembu hi xona xi nga yendla swilo hinkwaswu, kumbe hi xona xi nyikaka wutomi vanhu hinkwavu ku patsa na Yesu. (Tipisalema 36:9; Nhlawutelo 4:11) A Bibele a li djondzisi swaku Xikwembu xi psale Yesu hi ku kongoma ku fana ni leswi vanhu va va psalisaka xiswona vana va vona.

A Bibele li tlhela li vula swaku tintsumi na tona i “vana va Xikwembu xa ntiyiso”. (Yobo 1:6) Li tlhela li kombisa swaku Adamu, ku nga wanuna wa ku sungula a a li “n’wana wa Xikwembu.” (Luka 3:38) Kambe leswi Yesu a nga va wa ku sungula ku yendliwa a tlhela a li yena ntsena lweyi a nga yendliwa hi Xikwembu, Bibele li vula swaku i N’wana wa Xikwembu wa ku sungula.

Yesu a a tshama tilweni nkama na a nga se psaliwa lani misaveni?

I mpsini leswi Yesu a a swi yendla nkama na a nga se ta lani misaveni?

Yesu a a tshama tilweni nkama na a nga se psaliwa lani misaveni?

Ina. Yesu a a li ntsumi nkama na a nga se ta lani misaveni. Yesu a te: “Ni xike hi le tilweni.” — Yohani 6:38; 8:23.

Xikwembu xi sungule hi Yesu xi mu yendla na xi nga se yendla swilo hinkwaswu. A Bibele li vula leswi hi Yesu:

• Yena i . . . “matevula ya hinkwaswu leswi nga tumbuluxiwa.” — Vakolosa 1:15.

• Yena i “wa ku sungula ka leswi nga tumbuluxiwa hi Xikwembu”. — Nhlawutelo 3:14.

• Yesu a hetisise wuprofeta leli vulavulaka hi “lweyi a nga va kona ku sukela khale swinene.” — Mikiya 5:2; Matewu 2:4-6.

I mpsini leswi Yesu a a swi yendla nkama na a nga se ta lani misaveni?

Yesu a a li ni xitshamu xa ku hlawuleka amatilweni. Na a vulavula hi ntirho lowu a a wu yendla tilweni Yesu a khongelile a ku: “Papayi, ni nyiki xitshamu lexi a ni li na xona tlhelweni ka wena na misava yi nge se va kona.” — Yohani 17:5.

Yesu a pfune Papayi wa yena ku yendla minchumu leyin’wani hinkwayu. Phela Yesu a a tirha ni Papayi wa yena na a li “mutirhi wa kahle swinene.” (Swivuriso 8:30) A Bibele li vula leswi hi Yesu: “Xikwembu xi tirhise yena leswaku xi tumbuluxa swilo leswin’wani hinkwaswu amatilweni ni lani misaveni.” — Vakolosa 1:16.

Xikwembu xi tirhise Yesu swaku xi yendla swilo leswin’wani hinkwaswu. Swa ku fana ni tintsumi, tilo ni misava. (Nhlawutelo 5:11) Ntirho lowu Xikwembu na Yesu va nga wu yendla, wu fana ni lowu yendliwaka hi enjinyeru ni muyaki. A enjinyeru hi yena a dezenyaraka se muyaki hi yena a yakaka.

Yesu a a li Rito. Loko Bibele li vulavula hi Yesu na nga se ta la misaveni li vula swaku a a li “Rito.” (Yohani 1:1) Leswi vulaka swaku Xikwembu xi tirhise Yesu swaku xi nyikela minkongomiso ka tintsumi letin’wani.

Swi nga yendleka Xikwembu xi tirhise Yesu swaku xi vulavula ni vanhu. Naswona swi nga yendleka xi tirhise yena nkama xi nga vulavula na Adamu na Evha ka jardim la Edeni. (Genesa 2:16, 17) Naswona Yesu swi nga yendleka ku li yena ntsumi leyi a yi kongomisa Vayisrayele amananga leyi a va fanele va yingisa rito la yona hi ku tshembeka. — Eksoda 23:20-23.a

14 KU YA KA 20 KA ABRIL

XUMA XI NGA KA RITO LA XIKWEMBU SWIVURISO 9

Vana Munhu Wa Ku Tlhariha Ku Nga Li Xiphunta

Murindzi 02/22 paj. 9 par. 4

“Yingisa Marito Ya Lava Va Ku Tlhariha”

4 Ku vula ntiyiso, swi nga hi karhatela ku yingisa loko makwerhu a hi byela hi ku kongoma leswi hi faneleke hi yampsisa swona, funtshi minkama yin’wana swi nga ha hi kwatisa. Hi mhaka muni? Hikusa hambiloko hi pfumela swaku a hi psaliwa ni xidjoho, swi nga hi karhatela ku pfumela ku layiwa, ngopfungopfu loko lweyi a hi layaka a hi byela hi ku kongoma hi xihoxo lexi hi nga xi yentxa. (Lerha Eklesiasta 7:9.) Minkama yin’wana hi nga ha tinyimelela, hi vula swaku a swi nga bohi ku va makwerhu wa hina a hi laya hi leswi hi nga swi yentxa, kumbe hi vula swaku a hi laye hi ndlela ya ku biha. Naswona hi nga ha tlhela hi tinyimelela hi vula leswi hi munhu lweyi a nga hi laya: ‘A nga fanelanga a ni laya hikusa na yena wa phazama.’ Phela loko hi nga swi rhandzi ku layiwa, hi nga ha yala loko munhu a hi laya, hi ku pimisa swaku hi fanele hi layiwa hi ndlela leyi hina hi yi rhandzaka.

Murindzi 02/22 paj. 12 mapar. 12-14

“Yingisa Marito Ya Lava Va Ku Tlhariha”

12 I yini lexi nga hi pfunaka ku yingisa xitsundzuxu? Hi fanele hi tiveka hansi hi tlhela hi khumbuka swaku minkama yin’wana, leswi hi nga ni xidjoho hi nga yentxa swilo swa ku huma ndleleni. Hilani hi nga bula hi kona, Yobo na yena a ve ni mapimiselo ya ku biha, kambe hi ku famba ka nkama a txintxe mapimiselo ya yena naswona Yehovha a mu katekisile hikusa a a tiveka hansi. Yobo a tlhele a kombisa swaku a a tiveka hansi hi ku pfumela ku layiwa hi Elihu, hambileswi Elihu a a li mutsongo ka yena. (Yobo 32:6, 7) Ku tiveka hansi swi ta hi pfuna ku yingisa xitsundzuxu hambiloko lweyi a hi nyikaka xitsundzuxu xolexo a li mutsongo ka hina. Doda lin’wana la Canadá li vule leswi: “Swi karhata hintamu ku kulisa wunghanu la hina na Yehovha loko ku nga na munhu mun’wana lweyi a nga ta hi laya, hikusa leswi hina hi tivonisaka xiswona, a hi swona leswi van’wana va hi vonisaka xiswona.” Hinkwerhu hi fanele hi tinyimisela ku va ni mihandzu ya moya wa ku kwetsima hi tlhela hi lwela ku va vadjondzisi va kahle va mahungu ya ku tsakisa. — Lerha Tipisalema 141:5.

13 Loko va ku nyika xitsundzuxu, swi voni na swi kombisa swaku Yehovha wa ku rhandza. Yehovha wa swi tiva leswi nga swinene ka hina. (Swi. 4:20-22) Se loko a hi laya hi ku tirhisa Bibele, mabuku ya nhlengeletanu kumbe makwerhu, hi fanele hi khumbuka swaku a “yentxa leswo leswaku hi ta pfuneka,” hilani buku la Vaheberu 12:9, 10 li vulaka hi kona.

14 Pimisa hi leswi va ku byelaka swona, ku nga li leswi va ku byelisaka xiswona. Minkama yin’wana hi nga ha pimisa swaku ndlela leyi va nga hi nyika hi yona xitsundzuxu a hi yinene. I ntiyiso swaku loko hi laya munhu hi fanele hi swi yentxa hi ndlela leyi swi nga ta mu vevukela ku swi yingisa. (Gal. 6:1) Kambe loko ku li hina hi layiwaka, hi fanele hi tinyimisela ku yingisa leswi va hi byelaka swona ku nga na mhaka swaku va hi byelisa ku yini. Se i swinene ku tivutisa leswi: ‘Hambileswi ni kalaka ni nga yi tsakelanga ndlela leyi a nga ni laya hi yona, i yini leswi ni nga swi djondzaka ka leswi a nga swi vula? Ni ta tshamela ku pimisa hi leswi a nga ni layisa xiswona kumbe ni ta djondza nchumu ka leswi a nga ni byela swona?’ Phela ku ta va wutlharhi ka hina ku yingisa loko va hi laya, ku nga na mhaka swaku va hi layisa ku yini. — Swi. 15:31.

Murindzi-TS 15/05/01 paj. 30 mapar. 1-2

Masiku Ya Hina Ma Ta Va Manyingi Hi Mhaka Ya Wutlharhi

Solomoni a swi kombise kahle leswaku munhu wa ku tlhariha ni wa ku kala a nga tlharihanga va yendla swilo swa ku hambana loko va layiwa. Yena a te: “Laya munhu wa ku tlhariha a ta ku rhandza. Djondzisa munhu wa ku tlhariha, a ta ya a tlhariha hintamu.” (Swivuriso 9:8b, 9a) Munhu wa ku tlhariha wa swi tiva swaku “ku layiwa a swi tsakisi, swa vava. Kambe swa va pfuna lava lavaka ku djondza, naswona swi gama swi va yendla va hanya hi ndlela yayinene ni hi ku rhula”. (Vaheberu 12:11) Hambileswi ku layiwa swi kalaka swi nga nandzihi, munhu wa ku tlhariha wa pfumela ku layiwa naswona a nga tinyimeleli hikusa wa swi tiva swaku ku yendla leswo swi ta mu pfuna swaku a ya a tlhariha.

Solomoni a tlhele a vula leswi: “Djondzisa munhu wa ku lulama, kutani a ta yengetela wutivi la yena.” (Swivuriso 9:9b) Marito lawa ma kombisa swaku ku nga na mhaka swaku hi vakulu kumbe hi vatsongo swi kahle swaku hi tinyimisela ku tama hi djondza. Swi tsakisa ndjhani ku vona swaku ku ni vanhu lava se va nga vakulu lava va ha djondzaka hi Yehovha va tlhela va tinyiketela ka yena! Se na hina a hi fanelanga hi tibyela swaku se hi ni wutivi la ku yenela, kambe hi fanele hi tinyimisela ku djondza minkama hinkwayu.

Murindzi-TS 15/05/01 paj. 30 par. 5

Masiku Ya Hina Ma Ta Va Manyingi Hi Mhaka Ya Wutlharhi

Mun’wani ni mun’wani wa hina a fanele a yendla xan’wanchumu leswaku a va munhu wa ku tlhariha. Loko a vulavula hi mhaka leyi, hosi Solomoni a te: “Loko u tlhariha, swi ta pfuna wena, kambe loko u poyilana, u ta tshovela mihandzu ya kona na u li wexe.” (Swivuriso 9:12) Hi marito lawa hosi Solomoni a a lava ku hi komba swaku loko hi tikarhatela ku va vanhu va ku tlhariha hi ta tsaka wuton’wini. Kambe loko hi nga li vanhu va ku tlhariha swilo a swi nga ta hi fambela kahle. Impela mun’wani ni mun’wani a ta tshovela leswi a nga swi byala. Se a hi yendleni hinkwaswu hi nga swi kotaka leswaku hi va vanhu va ku tlhariha. — Swivuriso 2:2.

Lavetela Xuma Ka Rito La Xikwembu

Murindzi-TS 15/09/06 paj. 17 par. 5

Tipontu Ta Lisima Ta Buku La Swivuriso

9:17 — I yini “mati ya ku yiviwa”, naswona hi mhaka muni ku vuliwa swaku “ma tsokombela”? Leswi Bibele li fanisaka ku famba masangu ka wanuna ni wansati lava nga chada ni mati lama pepisaka, loko li vulavula hi mati ya ku yiviwa li vulavula hi vanhu lava fambaka masangu na va nga chadanga xikan’we. (Swivuriso 5:15-17) Se ku va Bibele li ku mati wolawo ma tsokombela swi kombisa leswaku lava va yendlaka swoleswo va pimisa swaku a va nga ta tsumbuliwa funtshi a ku nga ta yendleka nchumu hi vona.

21 KU YA KA 27 KA ABRIL

XUMA XI NGA KA RITO LA XIKWEMBU SWIVURISO 10

I Mpsini Leswi Nga Hi Yendlaka Hi Tsaka Hikakunene?

Murindzi-TS 15/07/01 paj. 25 mapar. 1-3

Lweyi Wa Ku Lulama A Ta Katekisiwa

Munhu wa ku lulama a nga ha tlhela a katekisiwa hi tindlela tin’wani. Bibele li li: “Lolo li ta va xisiwana, kambe lweyi a tirhaka hi matimba a ta ganya. N’wana lweyi a twisisaka a hlengeleta leswi a swi tshovelaka hi malanga, Kambe n’wana lweyi a danisanaka o yetlela hi nkama wa ku tshovela.” — Swivuriso 10:4, 5.

Leswi hosi Solomoni a nga swi tsala swi tirha hintamu ka vanhu lava yendlaka ntirho wa ku tshovela. Phela nkama wa ku tshovela a hi nkama wa ku yetlela, kambe i nkama wa kuva munhu a tirha hi matimba, a nga lolohi funtshi a yendla ntirho lowu hi xihantla.

Na a pimisa hi ntshovelo wawukulu wa ku tlula ku tshovela masimu, ku nga ku pfuna vanhu swaku va va vadjondzisiwa va yena, Yesu a te: “Phela ntshovelo i wukulu, kambe vatirhi i vatsongo. Hi mhaka leyo, kombelani N’winyi wa ntshovelo swaku a rhumela vatirhi ka ntshovelo wa yena.” (Matewu 9:35-38) Hi 2000 hi vone ku hetiseka ka marito lawa ya Yesu, hikusa ku tlula 14 milhões wa vanhu va ve kona ka Xitsundzuxu xa lifu la Yesu. Numeru leyo a yi yi tlula kambirhi numeru ya Timboni ta Yehovha hi nkama wolowo. Se a swi tikomba swaku vhela “masimu ma lunghekile swaku ma tshoveliwa.” (Yohani 4:35) Timboni ta Yehovha ti tama ti hanya hi ku twanana ni swikhongelo swa tona hikusa ti yendla hinkwaswu leswi ti nga swi kotaka swaku ti pfuna vanhu kuva va va vadjondzisiwa va Yesu, va nghena ka nhlengeletanu ya Yehovha. (Matewu 28:19, 20) Yehovha a tame a katekisa minzamu ya vona, hikusa hi 2000 ku tlula 280.000 wa vanhu va tsakamisiwile va va Timboni ta Yehovha. Naswona vanhu volavo va tama va zama ku va vadjondzisi va kahle va Rito la Xikwembu. Se swa twala kuva hi tsaka nkama lowu hi yendlaka xan’wanchumu leswaku hi tirha ka ntirho lowu wa ku tshovela, ku nga ku yendla vadjondzisiwa va nyuwani.

Murindzi-TS 15/09/01 paj. 24 mapar. 3-4

Famba Ka Ndlela Ya Wululami

Solomoni a vulavule hi lisima la wululami. Yena a te: “Tshomba la munhu lweyi a nga ganya i doropa la yena leli nga ni mimuru ya ku tiya. Xisiwana xa xanisiwa hi mhaka ya wusiwana la xona. Mintirho ya munhu wa ku lulama yi yisa awuton’wini; kambe ntshovelo wa munhu lweyi a yendlaka swa ku biha wu yisa ku djoheni.” — Swivuriso 10:15, 16.

Tshomba li nga ha yendla munhu a titwa a vhikelelekile ka swiyimu swin’wani ka wutomi la yena, ku fana ni leswi vanhu lava va nga ka doropa leli nga ni mimuru ya ku tiya va titwaka va vhikelelekile. Kasi wusiwana li nga ha yendla munhu a karhateka hintamu kumbe a koka ku vava loko ku tshuka ku humelela swilo swa ku kala a nga swi nyimelanga ka wutomi la yena. (Ekleziyaxta 7:12) Hambileswo, leswi Solomoni a nga swi vula swi basopisa xisiwana ku patsa ni lweyi a nga ni tshomba la linyingi. Phela munhu lweyi a nga ganya a nga ha veka ntshembo wa yena ka swilo leswi a nga na swona a tlhela a swi vona na swi li swa lisima, ku fana ni muru lowu vhikelaka. (Swivuriso 18:11) Kasi wusiwana na lona li nga ha yendla munhu a pimisa hintamu hi wusiwana la yena a za a heleliwa hi ntshembo a tlhela a khohlwa swilo swa ku tsakisa leswi nga ta yendleka ka nkama lowu taka. Se ka swiyimu leswo, lweyi a nga ganya ni lweyi a nga xisiwana va va na va nga tiyendleli vito lalinene ka Xikwembu.

Perspicaz vol. 1 paj. 315

Nkateko

Yehovha wa va katekisa vanhu. Bibele li li: “Ku katekisiwa hi Yehovha hi swona swi ganyisaka munhu, naswona a nga yengeseli ku vaviseka ka swona.” (Swiv 10:22) Yehovha a katekisa vanhu lava a va tsakelaka hi ku va vhikela, a va yendla swi va fambela kahle, a va kongomisa ni ku va nyika leswi va swi lavaka. Leswo swi yendla swi va fambela kahle.

Lavetela Xuma Ka Rito La Xikwembu

Murindzi-TS 15/05/06 paj. 30 par. 18

Ku Tshembeka Swi Hi Yendla Hi Tsaka

18 Lexi xi yendlaka vanhu lava tirhelaka Yehovha va tsaka hi leswi va katekisiwaka hi yena, funtshi Bibele li hi tiyisekisa swaku Yehovha a nga yengeseli ku vaviseka ka nkateko wa yena. (Swivuriso 10:22) Se loko swi tshamise xileswo, hi mhaka muni vanhu va Yehovha namuntlha va hlupheka va tlhela va kumana ni mindzingo ya ku hambanahambana? Ku ni minchumu yinharhu leyi yendlaka leswaku leswo swi humelela. 1) Hileswi hi nga psaliwa ni xidjoho. (Genesa 6:5; 8:21; Yakobe 1:14, 15) 2) Hi mhaka ya Sathana ni madimoni ya yena. (Vaefeza 6:11, 12) 3) Hi mhaka leswi hi hanyaka ka misava leyi ya ku biha. (Yohani 15:19) Phela Yehovha a hi yena a yendlaka swaku swilo leswi swi humelela, kambe o swi pfumelela ntsena swaku swi yendleka. Bibele li kombisa swaku “nyiko yin’wani ni yin’wani yayinene ni nyiko yin’wani ni yin’wani ya ku hetiseka yi ta hi le henhla, hi ka Papayi wa ku voninga ka le tilweni.” (Yakobe 1:17) Se hi nga tiyiseka swaku nkateko wa Yehovha a wu nge tshuki wu hi yendla hi vaviseka.

28 KA ABRIL KU YA KA 4 KA MAIO

XUMA XI NGA KA RITO LA XIKWEMBU SWIVURISO 11

Tivoneli Ka Leswi U Swi Vulavulaka!

Murindzi-TS 15/05/02 paj. 26 par. 4

Vanhu Vavanene Va Yendla Swilo Hi Ku Tshembeka

A ku tshembeka ka vanhu vavanene ni ku kala ku tshembeka ka vanhu va ku biha swa va khumba van’wani. Bibele li li: “Munhu lweyi a tshikaka Xikwembu a helisa van’wanyani hi nomo wa yena, kambe lava ku lulama va ponisiwa hi mhaka ya wutivi.” (Swivuriso 11:9) Phela munhu lweyi a hlevaka van’wani, a lumbetaka, a vulavulaka ku biha ni ku tlhela a wonha vito la va’wani, a yendla leswaku van’wani va vaviseka naswona swi nga yendleka va koka ku vava hi mhaka ya leswo. Kambe munhu wamunene a ma langa kahle marito ya yena naswona a vulavula swilo swaswinene ni swa ku basa. Yena a yendla leswo hikusa a ni wutivi naswona ku tshembeka ka yena ku yendla vanhu va swi vona swaku leswi va mu lumbetaka hi swona a hi ntiyiso.

Murindzi-TS 15/05/02 paj. 27 mapar. 2-3

Vanhu Vavanene Va Yendla Swilo Hi Ku Tshembeka

Pimisa hi doropa leli li nga ni vanhu lava va lwelaka ku yendla swaswinene. A hi kanakani swaku ka doropa lolelo a ku ta va ni ku rhula funtshi vanhu a va ta titwa kahle va tlhela va tiyisana. Kambe tlhela u pimisa hi doropa leli li nga ni vanhu lava va rhandzaka ku hleva, va rhandzaka ku lumbeta van’wani, funtshi va rhandzaka ku wonha van’wani vito. Ha tiyiseka swaku vanhu lava va tshamaka ka doropa lolelo a va nga ta rhula, a va nga ta tsaka, a va nga ta twanana funtshi swikarhatu a swi to maha hi ku vuya, ngopfungopfu loko swilo swoleswo swi yendliwa hi vanhu lava va hloniphekaka. Phela doropa lolelo a li ta va li yo tala hi wukanganyisi, ni mahanyelo ya ku biha, funtshi doropa lolelo a li ta va wusiwanini.

Tshinya la nawu leli li nga ka Swivuriso 11:11 la tirha ni ka vanhu va Yehovha namuntlha, hikusa bandla la Wukreste hi nga li fananisa ni doropa. A bandla li fanele li va ni vanhu lava nga ni wunghanu la ku tiya na Yehovha, vanhu vavanene, vanhu va ku tshembeka, lava va vulavulaka swilo swaswinene, leswi yendlaka swaku ku va ni ku tsaka ni ku rhula abandleni, swi tlhela swi yisa ku dzuneka ka Xikwembu. Phela Yehovha wa li katekisa bandla loko li tshamise xileswo. Kambe ku ni van’wani lava va kalaka va nga tsaki, va vulavulaka ku biha hi ndlela leyi swilo swi yendliwaka hi yona. Vona va fanisiwa ni “limintsu leli li nga ni vhenenu”, leli nga hangalakaka li tlhela li djikisa ni vanhu van’wani. (Vaheberu 12:15) Hi ntolovelo vanhu volavo i vanhu lava va lavaka ku rhangela ni ku tlhela va hloniphiwa hi van’wani. Se va vulavula swilo swa ku biha hi ku vula swaku timhaka tin’wani a ti tenderiwi kahle, va vula swaku ku ni xikheto, kumbe va vulavula ku biha hi bandla ni hi madoda. Leswi va swi vulavulaka swi nga ha yendla leswaku ku va ni ku yavana abandleni. Hi mhaka leyo, a hi fanelanga hi swi yingisela leswi vanhu va ku tshamisa xileswo va swi vulaka, kambe hi fanele hi tikarhata leswaku hi va ni wunghanu la ku tiya na Yehovha, leswi swi nga ta yendla leswaku ku va ni ku rhula ni ku twanana abandleni.

Murindzi-TS 15/05/02 paj. 27 par. 5

Vanhu Vavanene Va Yendla Swilo Hi Ku Tshembeka

Munhu wa ku kala a nga tlharihanga a nga rhangi hi ku pimisa na a nga se vulavula, kambe a vulavula xin’wani ni xin’wani. Munhu yelweyo a rhandza ku hleva, a za a hembela vanhu van’wani ni ku va wonha vito. Madoda bandleni ma fanele ma tirha hi matimba leswaku ma nga pfumeli swaku mahanyelo ya ku fana ni lawo ma va kona ka bandla la Wukreste. “Munhu wa ku tlhariha a rhanga hi ku pimisa kahle na a nga se vulavula”, naswona wa wu tiva nkama wawunene wa ku vulavula, funtshi a nga vulavuli hi swilo leswi nga xihundla ka vanhu van’wani naswona wa tshembeka ka vamakwerhu van’wani abandleni. I nkateko wawukulu ku va ni vamakwerhu va ku tshamisa xileswi abandleni!

Lavetela Xuma Ka Rito La Xikwembu

Khindlimuka! N.o 1 wa 2020 paj. 11, kwadru

Unga Yendla Yini loko U Ni Xitresi

“KUKOMBISA WUNENE SWINGA PUMBA XITRESI”

“Munhu wa munene wa tipfuna hi yexe, kambe munhu wa tihanyi a tivangela swikarhatu.” — SWIVURISO 11:17.

Ka buku lelinge “Kuhlula Xitresi” (hi Xinghiza) kuni nhlokomhaka leyinge “Kukombisa Wunene Swinga Pumba Xitresi.” Hikuya hi mutsali wa yona kunga dotori Tim Cantopher, kukhoma kahle vanhu van’wana swingaku yendla u titwa kahle u tlhela u tsaka. Kuhambana ni leswo, loko u ni mona awungata tsaka naswona vanhu avangataku rhandza.

Xin’wana hingaxi yendlaka swaku hingavi ni xitresi i kukala hinga tihluphi hi hoxe. Hi xikombiso, ahi fanelanga hi nyimela swa kutala ka hina swaku ahingeswi koti kuswi yendla. Naswona ahi fanelanga hi titekela hansi. Yesu a te: “Rhandza munhukuloni, kufana ni loko utirhandza.” — Marka 12:31.

[Nhlamuselo a Hansi]

a Yesu a hi yena yexe ntsumi leyi Xikwembu xi nga yi tirhisa swaku xi vulavula ni vanhu. Hi xikombiso, Xikwembu xi tirhise tintsumi tin’wani swaku xi byela Vayisrayele minawu ya xona. — Mintirho 7:53; Vagalatiya 3:19; Vaheberu 2:2, 3.

    Mabuku ya xiChangana (2003-2025)
    Huma
    Nghena
    • xiChangana (Moçambique)
    • Rhumela
    • Hlawula
    • Copyright © 2025 Watch Tower Bible and Tract Society of Pennsylvania
    • Minawu ya Matirhiselo
    • Nawu wa Xihundla
    • Seta Swa Xihundla
    • JW.ORG
    • Nghena
    Rhumela