Mareferensiya Ya Xibukwana Xa Mintlhanganu Ya Mahanyelo Ni Ntirho
© 2024 Watch Tower Bible and Tract Society of Pennsylvania
6 KU YA KA 12 KA JANEIRO
XUMA XI NGA KA RITO LA XIKWEMBU TIPISALEMA 127-134
Vapsali, Li Hlayiseni Kahle Tshomba Leli Yehovha A Nga Mi Nyika Lona
Swi Nyiki Lisima Ku Lumba Ndjangu Wa Yehovha
9 Yehovha a hi yentxe na hi kota ku va ni vana a tlhela a hi nyika ntirho wa ku va djondzisa swaku va mu rhandza ni ku mu tirhela. Loko u li mupsali, wa mu khensa Yehovha hi leswi a nga ku nyika vana? Khumbuka swaku Yehovha a yentxe tintsumi swaku ti kota ku yentxa mintirho ya yinyingi ku tlula vanhu kambe a nga ti nyikanga nyiko ya ku va ni vana. Hi mhaka leyo, lava nga vapsali va fanele va swi khensa hintamu leswi Yehovha a nga va nyika vana. Phela Yehovha a nyike vapsali ntirho wa lisima hintamu wa ku djondzisa vana va vona minawu ya yena. (Efe. 6:4; Det. 6:5-7; Pis. 127:3) Nhlengeletanu ya Yehovha yi nyika vapsali swilo swa swinyingi kuva va pfuna vana va vona swaku va twisisa Bibele, swa ku fana ni mavhidiyo, tinsimu ni swilo swin’wana swi nga ka jw.org. Leswo swi kombisa swaku Yehovha na Yesu Kreste va va rhandza hintamu vana va hina. (Luk. 18:15-17) Yehovha a tsaka hintamu loko a vona vapsali va mu tshemba va tlhela va yentxa hinkwaswu leswi va swi kotaka swaku va djondzisa vana va vona. Loko vapsali va yentxa leswo, va ta pfuna vana va vona swaku va tama va lumba ndjangu wa Yehovha!
Murindzi 12/19 paj. 26 par. 20
Djondzisani Vana Va N’wina Kurhandza Yehovha
20 Va tivi kahle vana va wena. Pisalema 127 yi fanisa vana ni mimpaxwa. (Lerha Tipisalema 127:4.) Kufana ni leswi mimpaxwa yi yendliwaka hi swilo swo hambanahambana naswona minkama yin’wana yi hambanaka, ni vana ava fani. Hi mhaka leyo, vapsali va fanele va langa leswi vangata djondzisa n’wana ha mun’we. Vatekani van’wana lava tshamaka aYisrayele, lavangaswi kota kupfuna vana va vona vambirhi akuva va kula na va tirhela Yehovha, loko va tlhamusela leswingava pfuna, va te: “Hina ahi djondzisa vana va hina ha mun’we ha mun’we.” Intiyiso leswaku lweyi a rhangelaka ndjangu a fanele a yendla xiboho xa leswi angatava djondzisaka xiswona vana va yena.
Lavetela Xuma Ka Rito La Xikwembu
Perspicaz vol. 1 paj. 543
Minsinya Leyi Ku Vulavuliwaka Hi Yona Ka Bibele
Mupisalema a vulavule hi leswi nsinya wa mawolivhera wu nga tshamisa xiswona leswaku a hi pfuna ku twisisa leswi yendlekaka ka vanhu lava va hloniphaka Yehovha, a te: “Vana va wena va ta ku rhendzela ka meza wa wena ku fana ni tigadja ta nsinya wa mawolivhera.” (Ps 128:1-3) Phela tigadja ta nsinya wa mawolivhera lowu nga ni malembe ya manyingi ti nga ha tsemiwa, ti byaliwa ku tlhela ku mila minsinya yin’wani. Naswona ka timintsu ta nsinya wa mawolivhera lowu nga ni malembe ya manyingi, ku nga ha mila minsinya yin’wani ya mawolivhera leyi yi gamaka yi rhendzela nsinya wolowo. Se swa fana ni leswi swi yendlekaka ndjangwini. Ku fana ni tigadja ta nsinya wa wolivhera, vana va rhendzela papayi wa vona hi ndlela ya ku fanekisela, leswi yendlaka swaku ku va ni ntsaku andjangwini.
13 KU YA KA 19 KA JANEIRO
XUMA XI NGA KA RITO LA XIKWEMBU TIPISALEMA 135-137
“Hosi Ya Hina Yi Tlakuke Ku Tlula Swikwembu Leswin’wani Hinkwaswu”
Perspicaz vol. 2 paj. 666 mapar. 3-4
Ntamu, Mintirho Ya Ku Hlamalisa
Xikwembu xi fuma swilo hinkwaswu leswi swi nga yendliwa. Leswi Xikwembu xi fumaka swilo hinkwaswu leswi swi nga kona, a swi hi hlamalisi loko xi tirhisa swilo leswi swi nga kona leswaku xi hi komba leswaku i Xikwembu xa ntiyiso. (Ps 135:5, 6) Hi xikombiso Xikwembu xi yendle dlambu, n’weti, maplaneta, tinyeleti xi tlhela xi veka minawu ya leswi swilo leswi swi faneleke swi tirhisa xiswona. Xikwembu xi tlhele xi veka minawu ya leswi swi yendlekaka lani misaveni swa ku fana ni ku ba ka moya, ku na ka timpfula ni swin’wani. Xikwembu xi tlhele xi veka minawu ka swiharhi leswi swi nga kona lani misaveni. Hi xikombiso, mintete yi famba hi mintlawa naswona swiharhi swin’wani leswi hahaka swi yendza mpfhuka wa ku leha hintamu. Kambe hambileswi swilo hinkwaswu leswi swi hlamalisaka, a swi va yendli vanhu lava va gandzelaka swikwembu swa mavunhwa kumbe lava va nga djikela Xikwembu va mu dzunisa Yehovha, hikusa swilo hinkwaswu leswi swi tolovelekile ka vona.
Yehovha a nga ha tirhisa swilo leswi a nga swi yendla leswaku a kombisa matimba lawa a nga na wona, kumbe leswaku a hetisisa planu la yena hi nkama wa kona leswaku vito la yena li dzunisiwa; naswona a swi yendlile leswo ka minkama leyi nga hundza. Phela hambileswi swilo swa ku fana ni swidzedze, ku pfumaleka ka timpfula, kumbe swilo swa ku fana ni swoleswo a swi tolovelekile, leswi swilo swoleswo a swi hetisisa wuprofeta a swi hlamalisa hintamu. (Fananisa ni 1Tih 17:1; 18:1, 2, 41-45.) Hambileswo, minkama ya yinyingi swilo leswi a swi yendleka hi ndlela ya ku hlamalisa swinene, (Eks 9:24) hikusa a swi yendleka hi nkama wa ku kala wu nga tolovelekanga, funtshi a swi yendleka hi ndlela leyi vanhu a va nga yi tolovelanga. — Eks 34:10; 1Sa 12:16-18.
Lirhandzu La Yehovha Li Hi Pfunisa Ku Yini?
16 Loko hi tshemba swaku Yehovha a ta hi vhikela a hi nga ta chava nchumu. Kambe minkama yin’wana hi nga ha hela ntamu. Se loko hi hela ntamu i yini leswi Yehovha a nga ta hi yentxela swona? (Lerha Tipisalema 136:23.) Yehovha a ta hi khoma hi mavoko ya yena a hi tiyisa a tlhela a hi pfuna swaku hi hlula xikarhatu lexi hi kumanaka na xona. (Pis. 28:9; 94:18) Ku tiva leswo swi hi pfunisa ku yini? Ku tiva swaku Yehovha a ta va na hina minkama hinkwayu, swi hi pfuna ku vona leswi a hi katekisisaka xiswona hi tindlela timbirhi. Ya ku sungula, ku nga na mhaka swaku hi tshama kwini, Yehovha a ta hi vhikela. Ya wumbirhi, Papayi wa hina lweyi a nga tilweni wa hi rhandza naswona wa hi hlayisa.
Lavetela Xuma Ka Rito La Xikwembu
Perspicaz vol. 2 paj. 15
Yah
A rito leli nge Yah li tolovela ku tirhisiwa loko ku yimbeleliwa tinsimu ta ku dzunisa kumbe loko ku yendliwa swikhongelo kumbe swikombelo. Funtshi li tolovela ku tirhisiwa nakambe loko vanhu va Yehovha va kombisa ku tsaka loku va nga na kona hileswi va nga hlula kumbe hileswi va nga chunsiwa, kumbe li tirhisiwa leswaku ku dzunisiwa Yehovha hileswi a nga ni matimba. Hi xikombiso, a rito leli nge “Dzunisani Yah” (Aleluya) li kumeka hi khambi la ku sungula ka buku la Tipisalema 104:35 naswona li tirhiseliwa ku dzunisa Xikwembu. Ka tindzima tin’wani ta buku la Tipisalema, marito lawa ma tolovela ku kumeka a ku sunguleni ka ndzima (Ps 111, 112), kasi minkama yin’wani ma nga ha kumeka a xikarhi (Ps 135:3), funtshi minkama yin’wani ma nga ha kumeka a magamu ka ndzima (Ps 104, 105, 115-117), kambe ka tindzima tin’wani, marito lawa ma tolovela ku kumeka a ku sunguleni ni magamu ka ndzima (Ps 106, 113, 135, 146-150). Se ka buku la Nhlawutelo, tintsumi ti ma vule hi ku phindhaphindha marito lawa leswaku ti kombisa swaku Yehovha swa mu fanela ku dzunisiwa. — Nhl 19:1-6.
Ka tindhawu tin’wani lani Bibele li tirhisaka rito leli nge “Yah”, li tirhisa rito leli swaku li dzunisa Yehovha hi tinsimu ni hi swikhongelo. Hi xikombiso, Moxe a li tirhisile rito leli ka lisimu leli a nga li yimbelela nkama Vayisrayele va nga chunsiwa aGibita. (Eks 15:2) Ka marito lawa Esaya a nga ma tsala a tirhise marito lawa ma nge “Yah Yehovha” hi nkama wa wun’we leswaku a kombisa lisima leli Yehovha a nga na lona. (Esa 12:2; 26:4) Hezekiya na yena a li tirhisile rito leli nge Yah leswaku a dzunisa Yehovha, nkama Yehovha a nga mu daha ka mavabyi ya yena nkama a a li kusuhi ni ku fa. (Esa 38:9, 11) Rito leli li tlhela li tirhisiwa loko ku vulavuliwa hi lava nga fa, lava kalaka va nga swi koti ku mu dzunisa Yehovha; ni lava hanyaka, lava nga tinyimisela ku mu dzunisa wutomi la vona hinkwalu. (Ps 115:17, 18; 118:17-19) Ka Tipisalema tin’wani, rito leli nge Yah la tirhisiwa loko ku yendliwa swikhongelo swa ku chunsiwa, swa ku vhikeliwa kumbe ku layiwa. — Ps 94:12; 118:5, 14.
HISEKELA NTIRHO WA KU CHUMAYELA
Nhlokomhaka 7 Ya Swivutiso Leswi Vanhu Va Tolovelaka Ku Swi Vutisa
Indjhe Timboni Ta Yehovha I Vakreste?
Ina. A hi voneni swaku hi mhaka muni hi vula leswo:
• Hi djondzisa leswi Yesu a nga swi djondzisa hi tlhela hi yendla leswi a nga swi yendla. — 1 Pedru 2:21.
• Hi kholwa leswaku hi ngo ponisiwa ntsena hi mhaka ya Yesu hikusa “a ku na lweyi a nga ta hi ponisa loko ku nga li yena hikusa a ku na vito lin’wani hansi ka tilo leli nga nyikiwa vanhu leli hi faneleke ku ponisiwa hi lona.” — Mintirho 4:12.
• Loko munhu a tsakamisiwa leswaku a va Mboni ya Yehovha, a tsakamisiwa hi vito la Yesu. — Matewu 28:18, 19.
• Loko hi khongela hi tirhisa vito la Yesu. — Yohani 15:16.
• Hi kholwa swaku Yesu hi yena Nhloko, leswi nge hi yena lweyi Yehovha a nga mu veka swaku a rhangela bandleni. — 1 Vakorinto 11:3.
Kambe ku ni swilo leswi yendlaka swaku hi hambana ni vanhu van’wani lava tivulaka Vakreste. Hi xikombiso, hi kholwa swaku Bibele li djondzisa leswaku Yesu i N’wana wa Xikwembu, ku nga li leswaku Yesu, Yehovha ni moya wa ku kwetsima i munhu mun’we. (Matewu 16:16; Marka 12:29) Hi tlhela hi kholwa swaku loko munhu a fa a ku na moya lowu tamaka wu hanya, ni leswaku Bibele a li swi vuli swaku loko munhu wa ku biha a fa a ya hisiwa a infernu. Hi kholwa nakambe leswaku lava nga ni mintirho bandleni a va fanelanga va nyikiwa mavito lawa ma nga yendlaka va tikomba ingi va tlakukile ku tlula van’wani bandleni. — Ekleziyaxta 9:5; Ezekiyele 18:4; Matewu 23:8-10.
20 KU YA KA 26 KA JANEIRO
XUMA XI NGA KA RITO LA XIKWEMBU TIPISALEMA 138-139
U Nga Hlamula Mintlhanganwini Hambiloko U Chava
Murindzi 01/19 paj. 10 par. 10
Dzunisa Yehovha Axikarhi ka Nhlengeletano
10 Xana u tshuka u teliwa hi kuchava loko u lava kutlakusa voko leswaku u hlamula? Loko swi tshame swiku yendlekela, awu wexe. Votala va hina hi tshuka hi titwisa xileswo. Kambe leswaku u hlula kuchava ka wena, u fanele u tsumbula leswiku yendlaka u chava. Xana u chava kurivala leswi u lavaka kuswi hlamula kumbe u pimisa leswaku leswi u lavaka kuswi hlaya swi hoxile? U karhateka hileswi u pimisaka leswaku nhlamulo ya wena ahi ya nchumu loko yi pimanisiwa ni ya van’wana? Kuva u titwa hi ndlela leyi swi kombisa leswaku u ni wumunhu la kahle. Swi kombisa leswaku wa titsongohata naswona u vona van’wana va li lava tlakukeke kuku tlula. Yehovha wava rhandza vanhu va kutshamisa xileswo. (Pis. 138:6; Filp. 2:3) Hambileswo, Yehovha a lava leswaku umu dzunisa ni kukhutaza van’wana aminhlanganwini. (1 Tes. 5:11) Waku rhandza naswona ataku nyika xivindzi lexi uxi lavaka leswaku u hlula kuchava ka wena.
A Hi Tiyisaneni Loko Hi Li Mintlhanganwini
7 U nga kuma swin’wani leswi nga ku pfunaka ka Murindzi. Hi xikombiso, xin’wani lexi Murindzi a nga vulavula hi xona i ku tilunghiselela kahle. (Swi. 21:5) Loko u swi tiva kahle leswi nga ta djondziwa amintlhanganwini swi ta ku vevukela ku nyikela nhlamulu. Xin’wani lexi Murindzi a nga vulavula hi xona i ku nyikela nhlamulu ya ku goma. (Swi. 15:23; 17:27) Ku nyikela nhlamulu ya ku goma swi ta ku pfuna swaku u nga chavi hintamu, naswona vamakwerhu va ta yi twisisa kahle nhlamulu ya wena loko yi gomile ku tlula ku u vuletela minchumu ya yinyingi. Phela loko u nyikela nhlamulu ya ku goma hi marito ya wena u ta kombisa swaku u tilunghiselele kahle naswona u yi twisise kahle mhaka leyi djondziwaka.
Lavetela Xuma Ka Rito La Xikwembu
Perspicaz vol. 2 paj. 630 par. 5
Ku Rivalela
Ku nga na mhaka leswaku munhu a hi djohela kangani, minkama hinkwayu hina tanihi Vakreste hi fanele hi mu rivalela. (Luk 17:3, 4; Efe 4:32; Kol 3:13) Phela Xikwembu a xi va rivaleli lava va kalaka va nga va rivaleli vanhu van’wani. (Mat 6:14, 15) Kambe hambiloko makwerhu a yendla xidjoho xaxikulu a gama a susiwa bandleni, loko a tisola ka xidjoho xa yena a ta rivaleliwa naswona bandla hinkwalu li ta mu yamukela li tlhela li mu komba lirhandzu. (1Ko 5:13; 2Ko 2:6-11) Kambe, leswo a swi lavi ku vula leswaku a loko munhu a djoha hi maxivomu a tlhela a nga tisoli hi fanele hi mu rivalela, hikusa hinkwavu lava djohaka hi maxivomu va tlhela va nga tisoli, i valala va Xikwembu. — Heb 10:26-31; Ps 139:21, 22.
HISEKELA NTIRHO WA KU CHUMAYELA
Nhlokomhaka 105 ya Majovhem Ma Vutisa
Ni Nga Ti Hlulisa Ku Yini Tingana?
Xa ku kala xi nga tsakisi: Tingana ti nga ku yendla u luza vanghanu va lisima u tlhela u luza swiperiyensiya swa ku tsakisa.
Xa ku tsakisa: Minkama yin’wani ku va ni tingana swi nga ku pfuna. Swi nga ku pfuna kuva u pimisa na u nge se vulavula u tlhela u swi vona kahle leswi yendlekaka lani u nga kona ni ku tlhela u yingisela van’wani nkama lowu va vulavulaka.
Xa ku tsakisa hintamu: Hambileswi u nga ni tingana swoswi, u nga swi kota ku ti hlula. Se ka nhlokomhaka leyi hi ta vona swaku u nga ti hlulisa ku yini.
I mpsini leswi ku yendlaka u va ni tingana?
Loko tingana ta wena ti ku yendla u chava hintamu ntsena hi ku pimisa ku vulavula ni munhu na mi txuvukanile, swi nga yendleka u titwa na u li wexe ku fana ni loko u li ka kwartu leli nga mphuma. Leswo swi nga ha ku chavisa hintamu! Kambe loko hi ndlela ya ku fanekisela u tlhavika gezi ka kwartu lolelo, u ta kota ku swi vona kahle leswi ku yendlaka u chava; se u vona swaku leswo a swi chavisi hintamu. A hi voneni swilo swinharhu leswi yendlaka vanhu va vanyingi va va ni tingana.
• Xa ku sungula: “Mina a ni swi tivi swaku ni ta vula yini.”
Ntiyiso: Leswi vanhu va salaka va swi khumbuka loko se va bule na wena, a hi leswi u nga swi vula, kambe hi leswi va nga titwisa xiswona nkama na u bula na vona. Se lexi nga ku pfunaka swaku u pumba ku chava, i ku komba lweyi u bulaka na yena swaku u ni mhaka na yena u tlhela u mu yingisela kahle.
Pimisa hi leswi: A wu ta tsakela ku va ni munghanu wa ku tshamisa ku yini? Lweyi a tshamelaka ku vulavula nkama ni nkama, kumbe lweyi a tinyikaka nkama wa ku ku yingisela?
• Xa wumbirhi: “Vanhu a va nga ta ni tsakela.”
Ntiyiso: Minkama hinkwayu vanhu va ta va ni mavonelo hi leswi u nga tshamisa xiswona, ku nga na mhaka swaku u ni tingana kumbe a wu na tona. Se swi ngo yini u va tshika va tiva leswi u nga tshamisa xiswona hikakunene? Loko u yendla leswo, u ta hlula tingana ta wena naswona swi nga yendleka vanhu van’wani va va ni mavonelo yamanene hi wena.
Pimisa hi leswi: Loko u pimisa swaku vanhu van’wani a va nga ta ku tsakela, swi nga yendleka ku li wena u pimisaka swilo swa ku kala swi nga li swinene hi vanhu van’wani.
• Xa wunharhu: “Ni chava swaku ni nga tshuka ni vulavula swilo swa ku huma ndleleni ni gama ni dana.”
Ntiyiso: Phela hinkwerhu ha vulavula swilo swa ku huma ndleleni. Se leswi nga ku pfunaka swaku u nga chavi ku vulavula i ku khumbuka swaku ku phazama ku ta ku pfuna kuva u komba van’wani swaku na wena a wu hetisekanga.
Pimisa hi leswi: U titwisa ku yini loko u bula ni munhu lweyi a pfumelaka swaku minkama yin’wani wa phazama?
Indjhe a wu swi tiva? Vanhu van’wani va pimisa swaku a va na tingana hileswi va swi kotaka ku bula ni van’wani hi ku tirhisa mamensajem. Kambe leswaku u va ni wunghanu la ku tiya ni munhu, swi lava leswaku mi bula na mi txuvukana. Leswi hi leswi Sherry Turkle psicóloga mun’wani lweyi a tirhaka hi teknolojiya a nga swi vula. A vule swaku swi ngo koteka ntsena kuva hi kulisa wunghanu la hina ni vanhu van’wani loko hi bula na vona na hi txuvukanile hi tlhela hi twa ni marito ya vona.
Leswi nga ku pfunaka leswaku u hlula tingana
• U nga tifananisi ni vanhu van’wani. Phela a swi bohi leswaku u vulavula ngopfu, kambe u nga swi kota ku pumbanyana tingana ta wena. Loko u pumba tingana ta wena, u ta swi kota ku va ni vanghanu vavanene u tlhela u va ni swiperiyensiya swa ku tsakisa ka wutomi la wena.
“Leswaku bulu li tsakisa a swi bohi leswaku li leha, naswona a swi bohi swaku ku li wena u vulavulaka hintamu. U nga va ni mabulu ya ku tsakisa ntsena hi ku tivula swaku hi wena mani, u tlhela u mu yendla swivutiso swaswitsongo lweyi u bulaka na yena.” — Alicia.
Bibele li li: “Mun’wani ni mun’wani a a kambele mintirho ya yena, kutani a ta va ni xa ku tibuma hi xona na a nga tiringanisi ni munhu mun’wani.” — Vagalatiya 6:4.
• Djondza ka leswi u swi vonaka. Zama ku vona swaku vanhu lava kalaka va nga na tingana va bulisa ku yini ni van’wani, se u gama u vona swaku i mpsini leswi u nga swi tekelelaka, ni leswi u kalaka u nga fanelanga u swi tekelela.
“Va txuvukisi kahle vanhu lava swi va vevukelaka ku yendla vanghanu u tlhela u djondza ka vona. Vona swaku i mpsini leswi va swi yendlaka kumbe leswi va swi vulaka loko va tiva munhu hi khambi la ku sungula.” — Aaron.
Bibele li li: “Ku fana ni leswi nsimbi yi lotaka nsimbi, ni munhu a lota munghanu wa yena.” — Swivuriso 27:17.
• Yendla swivutiso. Vanhu van’wani, loko va li ku buleni va rhandza ku nyikela mavonelo ya vona hi leswi mu bulaka hi swona. Se a ku yendla swivutiso ku nga va ndlela yayinene ya ku sungula mabulu, funtshi swoleswo swi ta yendla leswaku u nga vulavuli wexe.
“Loko va ku rhamba ka xifextani, pimisa hi leswi u nga ta bula hi swona. Loko u yendla leswo swi ta ku vevukela kuva u bula ni vanhu van’wani na u nga chavi.” — Alana.
Bibele li li: “Mi nga pimiseni hi leswi pfunaka n’wina ntsena, kambe pimiselani ni van’wani.” — Vafilipiya 2:4.
Leswi majovhem man’wani ma swi vulaka
“Sungula hi ku yendla swilo swaswitsongo swa ku fana ni ku hlekela vanhu van’wani kumbe ku va losa. U ta vona swaku leswo swi ta ku pfuna ku sungula mabulu ya ku tsakisa naswona swi ta ku vevukela ku sungula mabulo ya ku tsakisa ka makhambi lawa ma taka.” — Kelsey.
“Hinkwerhu hi ni minchumu ya ku tsakisa leyi hi nga bulaka hi yona ni van’wani, kambe loko hi miyela hi ku ntseem hi nga buli ni vanhu van’wani, a va nge swi koti ku tiva wumunhu lalinene leli hi nga na lona.” — Robin.
“Loko u bula ni van’wani yendla leswaku va titwa na va chunsekile. Phela leswo swi ta yendla leswaku va ku rhandza hambileswi u nga ni tingana. Xin’wani xi nga ku pfunaka, i ku hleka loko mi li ku buleni u tlhela u pimisa swaswinene hi vanhu van’wani.” — Veronica.
27 KA JANEIRO KU YA KA 2 KA FEVEREIRO
XUMA XI NGA KA RITO LA XIKWEMBU TIPISALEMA 140-143
Hanya Hi Ku Pfumelelana Ni Leswi U Swi Kombelaka Ka Yehovha
Murindzi 02/22 paj. 12 mapar. 13-14
“Yingisa Marito Ya Lava Va Ku Tlhariha”
13 Loko va ku nyika xitsundzuxu, swi voni na swi kombisa swaku Yehovha wa ku rhandza. Yehovha wa swi tiva leswi nga swinene ka hina. (Swi. 4:20-22) Se loko a hi laya hi ku tirhisa Bibele, mabuku ya nhlengeletanu kumbe makwerhu, hi fanele hi khumbuka swaku a “yentxa leswo leswaku hi ta pfuneka,” hilani buku la Vaheberu 12:9, 10 li vulaka hi kona.
14 Pimisa hi leswi va ku byelaka swona, ku nga li leswi va ku byelisaka xiswona. Minkama yin’wana hi nga ha pimisa swaku ndlela leyi va nga hi nyika hi yona xitsundzuxu a hi yinene. I ntiyiso swaku loko hi laya munhu hi fanele hi swi yentxa hi ndlela leyi swi nga ta mu vevukela ku swi yingisa. (Gal. 6:1) Kambe loko ku li hina hi layiwaka, hi fanele hi tinyimisela ku yingisa leswi va hi byelaka swona ku nga na mhaka swaku va hi byelisa ku yini. Se i swinene ku tivutisa leswi: ‘Hambileswi ni kalaka ni nga yi tsakelanga ndlela leyi a nga ni laya hi yona, i yini leswi ni nga swi djondzaka ka leswi a nga swi vula? Ni ta tshamela ku pimisa hi leswi a nga ni layisa xiswona kumbe ni ta djondza nchumu ka leswi a nga ni byela swona?’ Phela ku ta va wutlharhi ka hina ku yingisa loko va hi laya, ku nga na mhaka swaku va hi layisa ku yini. — Swi. 15:31.
Murindzi 15/03/10 paj. 32 par. 4
Tama U Va Ni “Mbilu Ya Ku Basa” Ka Masiku Lawa Ya Wugamu
Phela ka masiku lawa ya wugamu ku ni swikarhatu swa swinyingi leswi swi yendlaka swaku vanhu va Yehovha va godola. Hi xikombiso, vanhu va Yehovha namuntlha va hluphiwa, va kumana ni mavabyi ya ku karhata funtshi van’wanyani va tshama na va txonile. Kambe leswi swi va yendlekelaka a swo sungula hi vona, hambi hi Davhida swi mu yendlekelile, hi swona swi nga mu yendla a za a vula leswi: “Ni hela ntamu; ni mbilu ya mina a ya ha gwenti nchumu.” (Ps. 143:4) Se i ntxini lexi xi nga mu pfuna Davhida? Yena a a pimisa hi leswi Yehovha a nga va pfunisa xiswona vanhu va yena, ni leswi a a mu pfunisa xiswona yena hi ku kongoma. A a tlhela a pimisa hi hinkwaswu leswi Yehovha a swi yendlaka swaku a basisa a vito la yena. (Ps. 143:5) Na hina loko hi pimisa hi leswi Yehovha a nga hi pfunisa xiswona khale ni leswi a hi pfunisaka xiswona swoswi, hi ta swi kota ku tiyisela loko hi kumana ni swikarhatu.
Murindzi 15/03/15 paj. 32 par. 2
Indjhe Swa Ha Koteka Ku “Chada . . . AHosini Ntsena?”
Minkama yin’wani u nga ha titwa ku fana ni mupisalema Davhida lweyi a nga vula a ku: “Ni hlamule hi ku hantlisa, Yehovha Xikwembu xanga; se ni hele ntamu. U nga ni tumbeteli nghohe ya wena.” (Ps. 143:5-7, 10) Loko u titwisa xileswo, tinyiki nkama wa ku twisisa leswi Yehovha a swi lavaka ka wena. U nga yendla leswo hi ku tinyika nkama wa ku yenela wa ku djondza Bibele ni ku pimisa hi leswi u swi djondzaka. Loko u yendla leswo, u ta yi twisisa minawu ya Yehovha u tlhela u vona leswi Yehovha a nga va pfunisa xiswona vanhu va yena va khale. Loko u yendla leswi Yehovha a swi lavaka, u ta swi twisisa leswaku ku mu yingisa Yehovha hi swona swa lisima hintamu leswi u nga swi yendlaka ka wutomi la wena.
Lavetela Xuma Ka Rito La Xikwembu
Perspicaz vol. 2 paj. 610
Vhenenu
Ku Tirhisiwa Hi Ndlela Ya Ku Fanekisela. Marito ya vanhu va ku biha, lava hembaka, lava va lumbetaka van’wani leswaku va va wonha vito, ma fanisiwa ni vhenenu la tinyoka. (Ps 58:3, 4) A loko Bibele li vulavula hi vanhu volavo li li: “Minomo ya vona yi ni vhenenu la tinyoka”, funtshi leswo swa twala hikusa a vhenenu la tinyoka li kumeka ka nomo wa tona henhla ka matinyu. (Ps 140:3; Rom 3:13) Se loko munhu a djondzisa mavunhwa, kumbe a lumbeta van’wani, kumbe a va hembela, kumbe ku vulavula swilo swin’wani swa ku biha, swi fana ni loko ka nomo wa yena ku “tale hi vhenenu” leli dlayaka. — Yak 3:8.
HISEKELA NTIRHO WA KU CHUMAYELA
Nhlokomhaka 21 ya tinhlamulu ta Bibele
Hi Mhaka Muni Timboni Ta Yehovha Ti Nga Pfumeli Ku Cheliwa Ngati?
Leswi vanhu va swi pimisaka
• Mavunhwa: Timboni ta Yehovha a ti phuzi murhi funtshi a ti pfumeli ku dahiwa.
Ntiyiso: Hina hi yendla hinkwaswu hi nga swi kotaka leswaku hi dahiwa hi ndlela yayinene, hi tlhela hi pfuna mindjangu ya hina swaku yi dahiwa hi ndlela yayinene. Loko hi vabya, hi lavetela vadotori lava nga ni xiperiyensiya ka ku hamba operação na va nga tirhisi ngati. Ha pfumela swaku ndlela leyi vanhu va dahiwaka hi yona yi ya yi yampsisiwa. Phela tindlela leti ti tirhisiwaka leswaku ku dahiwa Timboni ta Yehovha, ta tirhisiwa swaku ku dahiwa ni vanhu van’wanyani. Ka matiko ya manyingi, vanhu van’wani va vona swi yampsa kuva va dahiwa na va nga cheliwi ngati, hikusa leswo swi va pfuna kuva va nga kumi mavabyi. Naswona swa va vhikela ka swikarhatu leswi swi nga ha vaka kona loko muzimbha wa vona wu tshuka wu nga gwenti ngati leyi va nga cheliwa yona, kumbe loko vadotori va tshuka va phazama nkama lowu va chelaka ngati.
• Mavunhwa: Timboni ta Yehovha ti kholwa swaku ti nga dahiwa hi lipfumelo ntsena.
Ntiyiso: Hina a hi dahi vanhu hi lipfumelo.
• Mavunhwa: Ku dahiwa na ku nga tirhisiwi ngati swi dura hintamu.
Ntiyiso: Ku dahiwa na ku nga tirhisiwi ngati a swi duri hintamu.
• Mavunhwa: Timboni ta Yehovha ta tinyingi ku patsa ni swivavani ta fa hileswi ti yalaka ku cheliwa ngati.
Ntiyiso: A xi kona xi tiyisekisaka swaku hikakunene leswo swa yendleka. Swi tolovelekile kuva vadotori va hamba ma operação ya ku karhata na va nga tirhisi ngati, ya ku fana ni ku operara mbilu, ku operara marhambu, minsiha kumbe ku txintxa xirho xa munhu va vekela xin’wanyani. Funtshi vanhu va vanyingi ku patsa ni swivanani, va swi kotile ku dahiwa ka mavabyi ya vona na ku nga zanga ku tirhisiwa ngati, funtshi minkama yin’wani va yampsa ka mavabyi ya vona ku tlula hambi hi lava va cheliwaka ngati nkama va dahiwaka. Se a hi nge vuli hi ku kongoma swaku loko munhu a nga cheliwi ngati a ta fa, kumbe hi vula swaku loko munhu a cheliwa ngati a ta hanya ka mavabyi ya yena.
Hi mhaka muni Timboni ta Yehovha ti yala ku cheliwa ngati?
A hi pfumeli ku cheliwa ngati hileswi hi lavaka ku yingisa leswi Bibele li swi vulaka. Textamentu ya Khale ni Textamentu ya Nyuwani, yi swi kombisa kahle leswaku hi fanele hi fambela kule ni ngati. (Genesa 9:4; Levhitika 17:10; Deteronoma 12:23; Mintirho 15:28, 29) Naswona Yehovha a fanisa ngati ni wutomi. (Levhitika 17:14) Se, a hi dli ngati kumbe ku yi chela ka muzimbha wa hina hikusa hi lava ku yingisa Yehovha hi tlhela hi mu hlonipha hileswi ku nga yena a nga hi nyika wutomi.
Mapimiselo ya vanhu ma ya ma txintxa
Khale loko munhu a nga pfumeli a ku cheliwa ngati, a va swi vona swi nga li kahle funtshi a swi fana ni loko munhu yelweyo a tisunga. Kambe mapimiselo ya vanhu ma ye ma txintxa hi ku famba ka nkama. Hi xikombiso, hi 2004 ku humesiwe revhixta leli li vulavulaka hi madahelo. Revhixta lolelo li te: “Madahelo ya ku tala lawa ma tirhisiwaka ka Timboni ta Yehovha ku nga li khale ma ta tirhisiwa ni ka vanhu hinkwavu.” Se revhixta lin’wani leli vitaniwaka Heart, Lung and Circulation la 2010 li te: “Ku yendliwa operação na ku nga tirhisiwi ngati, a swi fanelanga swi tirha ntsena ka Timboni ta Yehovha, kambe swi fanele swi tirha ni ka vanhu hinkwavu”.
Vadotori va vanyingi amisaveni hinkwayu va tirhisa tindlela tin’wani leswaku va hlayisa ngati kuva va yendla ma operação na swi nga zanga swi lava va chela ngati. Mayendlela lawa ya operação ma tirhisiwa hambi hi ka matiko lawa ma kalaka ma nga ganyanga, naswona hambi hi vanhu va vanyingi lava kalaka va nga li Timboni va operariwa hi ndlela leyi.
3 KU YA KA 9 KA FEVEREIRO
XUMA XI NGA KA RITO LA XIKWEMBU TIPISALEMA 144-146
“Va Tsaka Vanhu Lava Xikwembu Xa Vona Ku Nga Yehovha!”
Murindzi 04/18 paj. 32 mapar. 3-4
Swivutiso Swa Valerhi
2. Bibele leli li nga yampsisiwa li hundzuluxele kahle buku la Tipisalema 144. Leswi ka Tipisalema 144 tindzimana 12 ku nga tirhisiwa rito leli nge “kutani”, swi kombisa swaku a swilo swaswinene leswi ku vulavuliwaka hi swona ku sukela ka ndzimana 12 ku ya ka 14, swi tirha ka lava va ku lulama, lava va kombelaka Yehovha swaku a va chunsa kumbe a va ponisa ka lava va ku biha (ndzimana 11). A ku txintxa koloko ku tlhele ku yendliwa ni ka ndzimana 15. Ka ndzimana leyi a rito leli nge “va tsaka” li tirhisiwe makhambi mambirhi kambe na li vulavula hi vanhu volavo va van’we, ku nga vanhu lava “Xikwembu xa vona ku nga Yehovha”. I swa lisima nakambe ku khumbuka swaku a matsalelo ya Xiheberu a ma nga fani ni matsalelo ya hina namunthla, hikusa namunthla hina hi tirhisa hintamu tipontu, ma axpa (“ “) ni swa ku fana ni swoleswo. Se, leswaku vahundzuluxeli va hundzuluxela mhaka leyi yi nga ya ntiyiso, a va kambela swaku swi tsalisiwe ku yini hi Xiheberu, ni swaku mhaka ya kona yi vulavula hi yini ni ku tlhela va kambela tindzimana tin’wani leti vulavulaka hi mhaka leyi yi fanaka.
3. Ndlela leyi ndzima leyi yi nga tsaliwa hi yona ka Bibele leli nga yampsisiwa ya fambisana ni tindzimana tin’wani ta Bibele leti vulavulaka hi minkateko leyi Xikwembu xi nga ta yi nyika lava va tshembekaka ka xona. Kuva ku txintxiwile ndlela leyi rito leli nge asher a yi hundzuluxiwe hi yona, swi yendla leswaku swi fambisana kahle ni leswi Davhida mutsali wa Tipisalema 144 a a swi nyimela. Davhida a a nyimela swaku Yehovha a chunsa Vayisrayele ka valala va vona a tlhela a va katekisa hi ku va nyika ntsaku ni ku ganya. (Lev. 26:9, 10; Det. 7:13; Ps. 128:1-6) Hi xikombiso, Deteronoma 28:4 yi li: “Vana va wena va ta katekisiwa, ni ntshovelo wa wena ni vana va swifuyu swa wena, swihon’wani swa wena ni swinyempfani swa wena.” Leswo swi yendlekile nkama Salomoni n’wana wa Davhida a a fuma Israyele. Hi nkama wolowo Vayisrayele a va ganyile swinene va tlhela va va ni ku rhula kakukulu. Naswona swin’wani swi nga yendleka hi nkama wolowo, a swi kombisa leswi swi nga ta yendleka ka Mfumu wa Mesiya. — 1 Tih. 4:20, 21; Ps. 72:1-20.
Murindzi 10/22 paj. 28 mapar. 16-17
Tiyisa Ntshembo Wa Wena
16 Ntshembo lowu hi nga na wona wa ku kuma wutomi la ku kala li nga heli, i xihiwa xa lisima lexi taka hi ka Xikwembu. Hi wu nyimele hintamu nkama lowu switshembiso hinkwaswu swa Yehovha swi nga ta hetiseka. Ntshembo wa hina wu fana ni nsimbi leyi tiyisaka boti. Wu hi yentxa hi tiya loko hi kumana ni swikarhatu, hi hluphiwa kumbe hi langutana ni lifu. Wona wu fana ni kapasete, wu hi vhikela ka mimpimiso ya ku biha ivi hi khomelela ka leswi nga swinene. Ntshembo wa hina lowu kumekaka ka Bibele wu hi tshineta kusuhi hintamu na Yehovha, wu tlhela wu hi komba ku kula ka lirhandzu leli Yehovha a nga na lona hi hina. Loko hi tiyisa ntshembo wa hina, Yehovha a ta hi katekisa.
17 Mupostolo Pawulo a hi tiyisile hi marito lama nge: “Tsakani hi mhaka ya ntshembo wa n’wina”. (Rom. 12:12) Pawulo a a ni swivangelo swa ku twala swa ku tsaka hikusa a a tiyiseka swaku loko a tama a tshembeka a a ta kuma wutomi la ku kala li nga heli amatilweni. Na hina ha tsaka hi mhaka ntshembo wa hina, hikusa ha swi tiva swaku Yehovha a ta swi hetisisa switshembiso swa yena. Mupisalema a tsale a ku: “Wa tsaka lweyi . . . a tshembaka Yehovha Xikwembu xa yena, . . . lweyi a tshamaka a tshembekile.” — Pis. 146:5, 6.
Murindzi 01/18 paj. 26 mapar. 19-20
Lirhandzu Leli Kalaka Li Nga Tisi Ntsaku
19 Se ku hundza kolomu ka 6.000 wa malembe na misava leyi yi fumiwaka hi Sathana yi yendla swaku vanhu va ku tala va hlupheka. Ka masiku lawa ya wugamu ku tale hi vanhu lava va tirhandzaka vona ntsena, va rhandzaka male naswona va rhandzaka mintsaku, funtshi vanhu volavo va rhandza ku xolola vanhu va tlhela va rhangisa leswi swi va tsakisaka. Hambileswo, vanhu volavo a va na wona ntsaku wa ntiyiso. Tipisalema 146:5 yi hi byela leswi swi nga hi nyikaka a ntsaku wa ntiyiso, yi li: “Wa tsaka lweyi a pfuniwaka hi Xikwembu xa Yakobe, lweyi a tshembaka Yehovha Xikwembu xa yena.”
20 Hina vanhu va Yehovha hi ya hi mu rhandza hintamu naswona hi ta tsaka hi masiku ni masiku. Funtshi a ku na xin’wani lexi xi nga hi yendlaka hi tsaka ku tlula kuva hi tsakisa Yehovha. Xin’wani xi hi yendlaka hi tsaka hi leswaku lembe ni lembe vanhu va ku tala va ya va nghena ka nhlengeletanu ya Yehovha swaku va mu gandzela, leswi kombisaka swaku Mfumu wa Xikwembu wa fuma funtshi ku nga li khale wu ta hi tisela minkateko lani misaveni. Ka nhlokomhaka leyi landzelaka, hi ta vona swaku hi swini swilo swa ku biha leswi vaka kona hileswi vanhu va pimisaka hi vona vinyi, hi tlhela hi vona swaku vanhu va Yehovha va hambanisa ku yini ni vanhu volavo.
Lavetela Xuma Ka Rito La Xikwembu
Perspicaz vol. 1 paj. 135 par. 5
Swiharhi
Bibele li kombisa swaku vanhu a va fanelanga va hlupha swiharhi, kambe va fanele va swi khoma kahle. Yehovha a vula leswaku hi yena a nga yendla swiharhi naswona a lava swaku swi hlayiseka. (Swiv 12:10; Ps 145:15, 16) A nawu wa Moxe a wu vulavula hi leswi vanhu a va fanele va swi khomisa xiswona swifuyu. Hi xikombiso, nawu wun’wani a wu vula leswaku loko munhu a kuma xifuyu lexi xi nga lahleka a a fanele a xi tlhelisa ka n’winyi wa xona, naswona loko xifuyu lexi tirhaka xi peziwa hi kangi la xona a xi fanele xi humutiwa. (Eks 23:4, 5) Funtshi loko swifuyu swi tirha a swi nga fanelanga swi hluphiwa. (Det 22:10; 25:4) Nawu wa Savata a wu vula leswaku ni swifuyu a swi fanele swi humula hi ma Sábado. (Eks 20:10; 23:12; Det 5:14) Naswona swifuyu leswi a swi ni nghozi a swi fanele swi hlayisiwa kumbe swi dlayiwa leswaku swi nga dlayi vanhu van’wani kumbe swiharhi swin’wani. (Gen 9:5; Eks 21:28, 29) A swi nga pfumeleliwi leswaku swifuyu swimbirhi swa ku hambana swi tlhanganisiwa leswaku swi famba masangu. — Lev 19:19.
10 KU YA KA 16 KA FEVEREIRO
XUMA XI NGA KA RITO LA XIKWEMBU TIPISALEMA 147-150
Ku Ni Swilo Swa Swinyingi Leswi Hi Yendlaka Hi Dzunisa Yehovha
Murindzi 07/17 paj. 18 mapar. 5-6
Hi Mhaka Muni Hi Fanele Hi ‘Dzunisa Yehovha’?
5 Ka nkama wa Vayisrayele Yehovha a a ngo va tiyisa hi ntlawa ntsena, kambe a a tlhela a pfuna mun’wani ni mun’wani wa vona. Hi swona leswi a swi yendlaka ni namuntlha. Loko mupisalema a vulavula hi Yehovha a li: “A hanyisa lava nga tshoveka timbilu; a bandicha swilondza swa vona.” (Ps. 147:3) Leswi swi lava ku vula leswaku loko Yehovha a hi vona na hi kumana ni swikarhatu, a swi lava hintamu ku hi tiyisa a tlhela a hi daha ni ku hi thova timbilu. (Ps. 34:18; Esa. 57:15) Xin’wani lexi Yehovha a xi yendlaka i ku hi nyika wutlharhi ni ntamu wa ku tiyisela xikarhatu xin’wani ni xin’wani lexi hi nga ha kumanaka na xona. — Yak. 1:5.
6 Nkama mupisalema a nga txuvuka matilweni, a vone tinyeleti ta tinyingi swinene, leswo swi mu yendle a vula marito lawa: “[Yehovha] a kontela tinyeleti; hinkwatu a ti tiva hi mavito.” (Ps. 147:4) Hi mhaka muni mupisalema a sungule ku vulavula hi tinyeleti? Hikusa nkama a nga txuvuka amatilweni a vone tinyeleti ta tinyingi hintamu, kambe leswi ka nkama lowuyani a ku nga na michini ya ku kontela tinyeleti, a swi nga koteki ku tiva leswaku a ti li tingaki. Kambe hi ku famba ka malembe, ku tsumbuliwe swaku ku ni tinyeleti ta tinyingi hintamu, funtshi van’wani va vula leswaku ku ni ma bilhões ya tinyeleti ka galáxia la hina naswona swi nga ha yendleka ku ni ma trilhões ya ma galáxia. Leswi swi kombisa swaku a hi nge swi koti ku konta tinyeleti hinkwatu. Kambe leswi Yehovha a nga Muvumbi wa tona, wa swi kota ku ti konta funtshi a tiva ni vito la nyeleti yin’wani ni yin’wani. (1 Ko. 15:41) Se leswo swi hi djondzisa yini? Swi hi djondzisa swaku tanihi leswi Yehovha a tivaka mavito ya tinyeleti hinkwatu, yena a tiva mun’wani ni mun’wani wa hina funtshi wa hi tiva hi mavito. Xin’wani, a tiva leswi swi hi yendlekelaka a tlhela a tiva leswi hi titwisaka xiswona funtshi wa swi tiva leswi hi swi lavaka.
Murindzi 07/17 paj. 18 par. 7
Hi Mhaka Muni Hi Fanele Hi ‘Dzunisa Yehovha’?
7 Yehovha a ngo hi tiva ntsena, a tlhela a tinyimisela ku hi pfuna leswaku hi hlula swikarhatu leswi hi nga na swona ka wutomi la hina. Yena wa hi twisisa a tlhela a tiva leswi hi titwisaka xiswona. (Lerha Tipisalema 147:5.) Loko swi ku u kumana ni swikarhatu naswona a wa ha gwenti, khumbuka leswaku Yehovha wa swi tiva swaku a wu hetisekanga naswona ku ni leswi u tsandzekaka ku swi yendla. (Ps. 103:14) Hi mhaka leswi hi kalaka hi nga hetisekanga, minkama yin’wani hi yendla swihoxo swoleswi swa swin’we, se leswo swi hi yendla hi hela ntamu. Hinkwerhu hi tshama hi pimisa ni ku yendla swilo swa ku biha, hi kweleta vanhu van’wani, kumbe hi vula swilo leswi hi kalaka hi nga fanelanga hi swi vula. Hambileswi Yehovha a kalaka a nga swi yendli leswo, wa hi twisisa a tlhela a twisisa ndlela leyi hina hi titwaka hi yona! — Esa. 40:28.
Murindzi 07/17 paj. 21 par. 18
Hi Mhaka Muni Hi Fanele Hi ‘Dzunisa Yehovha’?
18 Mupisalema a a swi tiva swaku tiko la Israyele hi lona li nga katekisiwa hi Yehovha. Phela hi lona ntsena leli a li tiva rito la Yehovha, minawu ya yena, ni swiboho swa yena. (Lerha Tipisalema 147:19, 20.) Swa fana ni vanhu va Yehovha namuntlha. Hi hina ntsena lava hi vitaniwaka hi vito la Yehovha, hi kongomisiwaka hi Rito la yena, hi mu tivaka kahle funtshi hi nga ni wunghanu la ku tiya na yena. Se hilani mutsali wa Tipisalema 147 a nga vula hi kona, ku ni swilo swa swinyingi swi hi yendlaka hi dzunisa Yehovha hi tlhela hi rhamba ni van’wani swaku va yendla leswi fanaka.
Lavetela Xuma Ka Rito La Xikwembu
Perspicaz vol. 1 paj. 262
Swinyanyani
Mupisalema a vule swaku swinyanyani swi nga dzunisa Yehovha. (Ps 148:1, 10) Phela swinyanyani swi dzunisa Yehovha hi ndlela leyi swi nga yendliwa hi yona. Hi xikombiso, xinyanyani xin’we xi nga ha va ni 1.000 kumbe ku tlula 20.000 wa mavoya. A voya lin’we la xinyanyani li ni kolomuyani ka 100 wa swivoyani swaswitsongo. Se xivoyani xaxitsongo ha xin’we, xi ni kolomuyani ka 100 wa swivoyani swaswitsongo hintamu leswi swi vitaniwaka ma bárbula. Se bárbula ha lin’we li ni swivoyani swaswitsongo hintamu swa kolomuyani ka 100 leswi vitaniwaka ma barbicela. Se a voya lin’we la tuva leli nga ni 15 wa masentimetru li nga ha va ni ku tlula 100 wa ma milhões wa ma bárbula ni ma barbicela ya manyingi hintamu lakaku swi nga karhata hambi ku ma konta. Ndlela leyi swinyanyani swi hahaka hi yona swa yi tlula ndlela leyi ma avião lawa ma yendliwaka swoswi ma hahisaka xiswona, hikusa marhambu ya swinyanyani a ma na nchumu ndzeni ka wona, se leswo swi yendla swaku swinyanyani swi nga pezi hintamu. Hi xikombiso, xinyanyani xaxikulu lexi nga ha vaka ni mametru mambirhi loko xi pfula timpapa xi nga ha peza kolomu ka 110 wa magrama. Marhambu ya swinyanyani swaswikulu, ma tiyelile hintamu ku fana ni leswi tirhisiwaka leswaku ku yendliwa timpapa ta ma avião.
17 KU YA KA 23 KA FEVEREIRO
XUMA XI NGA KA RITO LA XIKWEMBU SWIVURISO 1
Wena Jovhem, Kasi U Ta Yingisa Mani?
Murindzi 11/17 paj. 29 mapar. 16-17
U Nga Pfumeleli Nchumu Xi Ku Sivela Ku Kuma Hakelo
16 Majovhem ya manyingi lawa ma nga ni vapsali lava nga Vakreste, ma vona ingaku vapsali va wona va ma vekela swinawanawani swa swinyingi naswona a va ma twisisi. Indjhe na wena u titwisa xileswo? Swi nga yendleka u karhalile hileswi vapsali va wena va ku basopisaka ka minchumu ya yinyingi, se swi nga yendleka u tibyela swaku ku tirhela Yehovha a swi sizi. Kambe loko wo tshika ku tirhela Yehovha, u ta tsumbula swaku a ku na munhu mun’wani a ku rhandzaka hintamu ku tlula vapsali va wena ni vamakwerhu abandleni.
17 Loko vapsali va wena a vo kala va nga ku layi, swi nga yendleka a u ta pimisa swaku a va na mhaka na wena. (Heb. 12:8) Phela minkama ya yinyingi swi nga yendleka leswi swi ku kwatisaka a hi leswi vapsali va wena va nga ku laya, kambe i ndlela leyi va nga ku laya hi yona. Se loko va ku laya, u nga pimisi hintamu hi ndlela leyi va nga ku laya hi yona, kambe pimisa hi leswi nga yendla va za va ku laya. Se loko va ku byela swilo leswi u kalaka u nga swi tsakeli, u nga kwati hintamu kumbe u holova na vona. Bibele li li: “Munhu lweyi a nga ni wutivi wa tikhoma swaku a nga vulavuli, naswona munhu lweyi a twisisaka a tshama na a rhulile.” (Swiv. 17:27) U nga kombisa swaku u munhu wa ku wupfa hi ku tama u rhula hambiloko va ku laya, na u nga karhateki hi swaku va ku layise ku yini. (Swiv. 1:8) Phela i nkateko wawukulu swinene ku va ni vapsali lava tirhelaka Yehovha. Naswona u nga khohlwi swaku vapsali va wena vo lava ku ku pfuna leswaku u kuma hakelo, ku nga wutomi la ku kala li nga heli.
Murindzi 15/02/05 mapaj. 19-20 mapar. 11-12
Tama U Kombisa Swaku U Mukreste Wa Ntiyiso
11 Tsakisa Xikwembu ku nga li vanhu. Hi ntolovelo ku tiva vanhu lava munhu a tlangaka na vona swi nga hi pfuna ku tsumbula leswi munhu yelweyo a nga tshamisa xiswona. Phela hinkwerhu ha va lava vanghanu hikusa swi hi yendla hi titwa kahle. Swi tolovelekile kuva loko ha ha li majovhem kumbe se hi kulilenyana, vakolega va hina va hi xengetela ku yendla swilo swa ku kala swi nga li swinene, naswona leswo swi yendla swaku hi swi navela hintamu ku fana na vona leswaku va ta hi tsakela. Kambe hi fanele hi khumbuka swaku minkama yin’wani vakolega va hina a vo hi navelela swaswinene, swi nga yendleka vo lava munhu wa ku va na yena nkama lowu va yendlaka swa ku biha. (Swiv. 1:11-19) Mukreste lweyi a pfumelaka ku xengeteliwa hi vakolega va yena swaku a yendla swa ku biha, a tolovela ku kala a nga tivuli swaku yena i Mukreste. (Ps. 26:4) Se swi kahle kuva hi khumbuka leswi mupostolo Pawulo a hi byelaka swona ka buku la Varoma 12:2. A te: “Tshikani ku tekelela mahanyelo ya misava leyi”. Funtshi hi nga tiyiseka swaku Yehovha a ta hi nyika ntamu lowu hi wu lavaka leswaku hi nga wi ka ntlhamu wa ku xengeteliwa swaku hi yendla swa ku biha. — Heb. 13:6.
12 Loko vanhu va hi xengetela ku yendla swilo leswi nga wonhaka wunganu la hina na Yehovha, hi fanele hi khumbuka swaku ku tshembeka ka Yehovha i swa lisima hintamu ku tlula leswi vanhu va swi pimisaka ni leswi vanhu va vanyingi va swi yendlaka. Bibele li li: “Mi nga tshuki mi landzelela xitshungu swaku mi yendla swilo swa ku biha”. (Eks. 23:2) Nkama Vayisrayele va ku tala a va nga swi tshembi switshembiso swa Yehovha, Kalebe a nga pfumelanga ku nyima ni xitshungu, kambe a tame a swi tshemba switshembiso swa Yehovha, naswona Yehovha a mu katekisile hintamu hi nkama wa kona. (Tin. 13:30; Yox. 14:6-11) Loko u nga pfumeli ku xengeteliwa ku yendla swilo leswi vanhu va vanyingi va swi yendlaka, u ta va ni wunghanu la ku tiya na Yehovha.
Lavetela Xuma Ka Rito La Xikwembu
Perspicaz vol. 2 paj. 1140
Xiphunta
Loko Bibele li vulavula hi ‘xiphunta’, a li vulavuli hi munhu wa ku kala a nga li bom hi nhloko, kambe li vulavula hi munhu lweyi a kalaka a nga yi rhandzi minawu ya Yehovha, kumbe lweyi a delelaka minawu ya Yena. Ka Xiheberu a rito leli li nga vuliwa hi tindlela ta ku tala. Tin’wani ta tindlela toleto i kesíl (“swiphunta” Swiv 1:22), ʼewílʹ (“xiphunta” Swiv 12:15), na·válʹ (“xiphunta”; Swiv 17:7), lets (“lweyi a poyilaka”; Swiv 13:1). Kasi hi Xigriki á fron swi vula “xiphunta” (Luk 12:20), a·nó e·tos swi vula “xiphunta” (Gal 3:1), mo·rósʹ swi vula “xiphunta” (Mat 23:17; 25:2).
24 KA FEVEREIRO KU YA KA 2 KA MARÇO
XUMA XI NGA KA RITO LA XIKWEMBU SWIVURISO 2
Yi Yendli Kahle Djondzo Ya Munhu Hi Yexe
Murindzi 08/22 paj. 18 par. 16
Tama U Rhandza Ntiyiso
16 A hi hinkwerhu hi swi rhandzaka ku lerha ni ku djondza. Kambe Yehovha a li hi fanele hi ‘tama hi lavetela’ ntiyiso anze hi wu twisisa. (Lerha Swivuriso 2:4-6.) Loko hi yentxa minzamu swaku hi djondza ha pfuneka. Corey a tlhamusela swaku ka djondzo ya yena ya Bibele, a kambisisa kahle ndzimana yin’wana ni yin’wana. A li: “Ni lerha tintlhamuselo hinkwatu ti nga ka ndzimana yoleyo, ni tlhela ni lerha tindzimana tin’wana leti fambisanaka ni ndzimana yoleyo, naswona ni hamba mapexkiza. . . . Leswo swi ni pfuna ku tiva minchumu ya yinyingi.” Ku nga na mhaka swaku hi djondzisa leswi Corey a djondzisaka xiswona kumbe hi ni madjondzelo man’wana, loko hi heta nkama na hi djondza Bibele hi kombisa swaku ntiyiso i wa lisima ka hina. — Pis. 1:1-3.
Murindzi 10/22 paj. 19 mapar. 3-4
Wutlharhi La Ntiyiso La Huwelela
3 Bibele li li: “Ku chava Yehovha i masungulo ya wutlharhi, naswona ku twisisa i ku tiva Lweyi wa ku Kwetsima Hintamu”. (Swi. 9:10) Wutlharhi li patsa ku tirhisa leswi hi swi tivaka swaku hi yentxa swiboho. Kambe hi kombisa swaku hi ni wutlharhi la ntiyiso loko “hi tiva Lweyi wa ku Kwetsima Hintamu.” Leswi swi vula swaku hi rhanga hi ku tiva leswi Yehovha a swi pimisaka na hi nga se yentxa swiboho. Hi nga yentxa leswo hi ku vona leswi Bibele ni mabuku ya hina ma swi vulaka. Leswo swi kombisa swaku hi ni wutlharhi la ntiyiso. — Swi. 2:5-7.
4 Ko va Yehovha ntsena lweyi a nga hi nyikaka wutlharhi la ntiyiso. (Rom. 16:27) Hi mhaka muni? Xa ku sungula, hikusa hi Yehovha a nga yentxa swilo hinkwaswu, naswona a swi tiva kahle hinkwaswu leswi a nga swi yentxa. (Pis. 104:24) Xa wumbirhi, hinkwaswu leswi Yehovha a swi yentxaka swi kombisa swaku a ni wutlharhi. (Rom. 11:33) Xa wunharhu, lava va tirhisaka switsundzuxu swa Yehovha swa wutlharhi va pfuneka minkama hinkwayu. (Swi. 2:10-12) Loko hi lava ku va ni wutlharhi la ntiyiso, hi fanele hi pfumelelana ni minchumu leyi yinharhu hi tlhela hi yi tshika yi kongomisa leswi hi swi yentxaka.
Murindzi 09/16 paj. 23 mapar. 2-3
Majovhem, Tiyisani Lipfumelo La N’wina
2 Vanhu va vanyingi namuntlha a va kholwi swaku Xikwembu hi xona xi nga yendla swilo hinkwaswu, ka vona swilo swi yo tiyendlekela. Se loko wena u li jovhem leli nga Mukreste, kumbe wa ha ku sungula ku djondza Bibele, swi nga yendleka u tivutisa swaku i ntxini lexi xi nga ku kholwisaka swaku hikakunene Yehovha hi yena a nga yendla swilo hinkwaswu. Xin’wani lexi xi nga ku pfunaka i kuva u tiyisa lipfumelo la wena u tlhela u yi tirhisa kahle mimpimiso ya wena, kumbe u va ni ku twisisa. Phela ku twisisa ku nga ku vhikela ka mavonelo ya vanhu, lawa ma nga dlayaka lipfumelo la wena. — Lerha Swivuriso 2:10-12.
3 Leswaku u va ni lipfumelo la ku tiya swi lava u mu tiva kahle Yehovha. (1 Tm. 2:4) Se nkama lowu u djondzaka Bibele kumbe mabuku ya nhlengeletanu, zama ku “twisisa” leswi u swi djondzaka ku nga li ku djondza leswaku u hundzisa nkama ntsena, kumbe leswaku u heta leswi u djondzaka swona. (Mat. 13:23) Ka nhlokomhaka leyi hi ta vona swaku ku twisisa ku nga ku pfunisa ku yini ku kholwa leswaku Xikwembu xi yendle swilo hinkwaswu, ni swaku Bibele i Rito la Xona. Phela u ta tiyiseka swaku lowo i ntiyiso. — Heb. 11:1.
Lavetela Xuma Ka Rito La Xikwembu
Perspicaz vol. 1 paj. 1237 par. 1
Ku Tshembeka
Munhu wa ku tshembeka hi lweyi a nga ni lipfumelo la ku tiya ka Yehovha, a mu tshemba, a tlhela a tshemba swaku a ni matimba ya ku ponisa. (Ps 25:21) Yehovha a tshembisa swaku hinkwavu lava tshembekaka ka yena va tlhela va mu yingisa, a ta va vhikela. (Swiv 2:6-8; 10:29; Ps 41:12) Phela munhu lweyi a tikarhatelaka ku tshembeka ka Yehovha a tlhela a yendla ku rhandza ka Yena, a ni wutomi la ku tsakisa funtshi wa swi tiva swaku a hanyela yini. (Ps 26:1-3; Swiv 11:5; 28:18) Yobo a swi vonile swaku minkama yin’wani vanhu va ku tshembeka va hluphiwa hi vanhu va ku biha, funtshi hambiloko munhu a tshembekile wa fa ku fana ni leswi vanhu va ku biha va faka. Kambe xa ku tsakisa hi leswaku Yehovha a hi tiyisekisa swaku ka nkama lowu taka a ta hakela munhu wa ku tshembeka hi ku mu nyika wutomi la ku tsakisa, ku nga wutomi la ku kala li nga heli. (Yob 9:20-22; Ps 37:18, 19, 37; 84:11; Swiv 28:10) Phela ku fana ni leswi nga yendlekela Yobo, lexi xi yendlaka munhu a hlonipheka a hi leswi a nga ganya, kambe hi leswi a tshembekaka. (Swiv 19:1; 28:6) Vana lava nga ni vapsali lava tshembekaka ka Yehovha, va fanele va tsaka hintamu (Swiv 20:7), hikusa va hloniphiwa hileswi vapsali va vona va nga swikombiso swaswinene, ni hileswi va nga ni vito lalinene.