MISAVA LEYI NGA TALA HI SWIKARHATU

3 | Tiyisa Wunghanu La Wena Ni Vanhu Lava U Va Rhandzaka

HI MHAKA MUNI SWI LI SWA LISIMA

Ka misava leyi ya ku tala hi swikarhatu, vanhu va tshama na va vilela naswona swikarhatu swi yendla swaku vanhu va nga na nkama wa ku tiyisa wunghanu la vona ni maxaka ni vanghanu.

Vanhu van’wani va tihambanisa ni vanghanu va vona.
Lava nga chada va tshama hi ku holova.
Vapsali a va tinyiki nkama wa ku va ni vana va vona, va va yingisela loko va vulavula hi swikarhatu swa vona.

Leswi U Faneleke U Swi Tiva

Vanghanu vavanene i va lisima leswaku u va na vona hikusa va nga ku pfuna leswaku u tsaka u tlhela u hanya kahle, ngopfungopfu loko u kumana ni swikarhatu.
A swikarhatu ni tinghozi leti humelelaka ka misava leyi, swi nga yendla leswaku u biwa hi xitresi naswona swi nga ha khumba ndjangu wa wena hi ndlela ya ku ni ku yi nyimela a wu nga yi nyimelanga.
Loko vana va wena va tshamela ku yingisela mahungu ya ku biha va nga karhateka hintamu va tlhela va chava.

I Mpsini Leswi U Nga Swi Yendlaka

Bibele li li: “Munghanu wa ntiyiso a ni lirhandzu minkama hinkwayu, i makwenu wa ntiyiso loko u li ku karhatekeni.” — Swivuriso 17:17.

Phela vanghanu va nga hi pfuna va tlhela va hi nyika switsundzuxu swaswinene. Ku tiva leswaku hi ni vanghanu lava va nga ni mhaka na hina swi nga hi pfuna leswaku hi swi kota ku tiyisela swikarhatu swa wutomi.

I MPSINI LESWI U NGA SWI YENDLAKA — Leswi Nga Ku Pfunaka

Loko u kumana ni swikarhatu, swilo leswi swi nga ku pfuna swaku u tama u tiyisa wunghanu la wena ni vanhu lava u va rhandzaka

TIYISA MUCHADU WA WENA

Tiyisa muchadu wa wena

Bibele li li: “Vambirhi va yampsa ku tlula mun’we, . . . Hikusa loko mun’we wa vona a wa, lweyi mun’wanyani a nga mu pfuxa.” (Ekleziyaxta 4:9, 10) Nuna na nsati va fanele va fana ni mufambisi wa vhiyawu ni mupfunisi wa yena lava va tirhisanaka leswaku va fika lomu va yaka kona. A va fanelanga va fana ni vafambisi va mavhiyawu ya ku hambana lava va lavaka ku chayisana hileswi va nyenyanaka. Vona swilo swin’wani leswi nga pfunaka nuna na nsati.

Hambiloko mi kwatile, tinyimiseleni ku kala mi nga holovisani, kambe mi lehiselana mbilu.
Vhiki ni vhiki, bulani hi swikarhatu leswi mi nga ha vaka na swona leswi swi lavaka ku lulamisiwa. Zamani ku lulamisa xikarhatu ku tlula ku holova hi mhaka ya xikarhatu.
Tivekeleni nkama wa leswaku mi yendla swilo leswi havambirhi mi swi rhandzaka.
Khumbukani minkama ya ku tsakisa leyi mi nga va na yona; mi nga ha vona mafoto ya muchadu wa n’wina kumbe ya swilo swin’wani swa ku tsakisa.

“Swi nga yendleka nuna na nsati va nga pfumelelani ka swilo swin’wani, kambe leswo a swi vuli swaku a swi nge koteki kuva va tirhisana. Nuna na nsati va nga yendla swiboho swa kahle va tlhela va tirhisana swaku swiboho swa vona swi famba kahle.” — David.

TIYISA WUNGHANU LA WENA

Tiyisa wunghanu la wena

U nga nyimeli swaku vanghanu va wena ku va vona va ku pfunaka ntsena kambe na wena pimisa hi ndlela leyi u nga va pfunaka hi yona. Nkama lowu u pfunaka vanghanu va wena, na wena wa pfuneka.
Siku ni siku lavetela tindlela ta ku bula ni van’wani va vanghanu va wena leswaku u tiva swaku vo yini.
Vutisa vanghanu va wena swaku va swi kotise ku yini ku hlula swikarhatu leswi na wena u kumanaka na swona.

“Loko hi kumana ni swikarhatu ka wutomi la hina, vanghanu hi vona lava hi tsutsumelaka ka vona. Va nga hi komba ndlela ya ku hlula swikarhatu swoleswo hambiloko minkama yin’wani swi lava va hi khumbukisa swilo leswi se hi swi tivaka. Vanghanu va ni mhaka na hina naswona va swi tiva swaku na hina hi ni mhaka na vona.” — Nicole.

PFUNA VANA VA WENA

Pfuna vana va wena

Bibele li li: “Munhu mun’wani ni mun’wani a a hantliseli ku yingisa, a hlwela ku vulavula.” (Yakobe 1:19) Swi nga yendleka ku sunguleni vana va wena va nga swi lavi ku vulavula hi swilo leswi swi va karhataka kumbe swi va yendlaka va chava, kambe loko u va lehisela mbilu va nga titwa va chunsekile leswaku va vulavula.

Pfuna vana va wena swaku va titwa va chunsekile ku vulavula hi leswi va titwisaka xiswona. Vana van’wani swa va karhatela ku vulavula ni vapsali va vona loko swi lava va vulavula na va txuvukanile, kambe swi nga yendleka swi va vevukela ku vulavula loko va famba na vona ndleleni hi minenge kumbe hi movha.
Tiyiseka swaku vana va wena a va tshameli ku vona kumbe ku twa mahungu ya ku biha.
Va byeli leswi u swi yendlaka leswaku u vhikela ndjangu hinkwawu.
Yendla na vona a planu la leswi mi nga ta swi yendla loko ku tshuka ku humelela nghozi ya kola na kola, mi tlhela mi trenara leswi mi nga ta swi yendla ka xiyimu lexo.

“Bula ni vana va wena u tlhela u va yendla va chunseka kuva va vula leswi va titwisaka xiswona. Swi nga yendleka va nga swi lavi ku ku byela leswi va swi chavaka, leswi swi va karhataka kumbe swi va kwatisaka. U nga dani ku va byela swaku na wena minkama yin’wani wa titwa hi ndlela leyi fanaka kambe tlhela u va byela swaku u yendla yini loko u li ka xiyimu lexo.” — Bethany.