DJONDZO 34
Hi Nga Swi Kombisa Ku Yini Swaku Ha Mu Rhandza Yehovha?
Ku nga va swaku u xi rhandza hintamu Xikwembu swoswi ku tlula nkama lowu u nga sungula ku djondza Bibele? Wa swi lava ku tama u kulisa wunghanu la wena na xona? Loko u swi lava, khumbuka swaku loko Yehovha a vona swaku u ya u mu rhandza hintamu, na yena a ta ya a ku rhandza naswona a ta ku hlayisa. U nga mu kombisa ku yini swaku wa mu rhandza?
1. Hi nga swi kombisisa ku yini swaku ha mu rhandza Yehovha?
Hi kombisa lirhandzu la hina ka Yehovha hi ku mu yingisa. (Lerha 1 Yohani 5:3.) Yena a nga sindzisi munhu swaku a mu yingisa. Kambe, a hi tshika hi langa swaku ha swi lava ku mu yingisa kumbe a hi swi lavi. Hi mhaka muni a yentxa leswo? Hi mhaka a lava swaku hi mu ‘yingisa hi mbilu hinkwayu’. (Varoma 6:17) Leswo swi vula swaku, a lava hi mu yingisa hi mhaka leswi hi mu rhandzaka ku nga li hi ku sindzisiwa. Swiyenge 3 na 4 swa buku leli, swi yentxeliwe ku ku pfuna swaku u kombisa ndlela leyi u mu rhandzaka hi yona Yehovha hi ku yentxa leswi swi mu tsakisaka ni ku kala u nga yentxi leswi swi kalaka swi nga mu tsakisi.
2. Hi mhaka muni minkama yin’wana swi karhata ku komba Yehovha swaku ha mu rhandza?
“Swikarhatu swa lweyi wa ku lulama i swinyingi”. (Tipisalema 34:19) Hinkwerhu hi kumana ni swikarhatu hi mhaka leswi hi nga ni xidjoho. Naswona hinkwerhu hi nga ha kumana ni swikarhatu swa ku pfumala male, ku kala hi nga kombiwi wululami ni swin’wana. Loko leswo swi hi yentxekela, swi nga ha hi karhatela ku yentxa leswi Yehovha a swi lavaka hikusa swi nga ha tikomba swi vevuka ku kala hi nga mu yingisi. Kambe loko u yentxa leswi Yehovha a swi lavaka, u kombisa swaku wa mu rhandza ku tlula minchumu hinkwayu. Hi ku yentxa leswo, u kombisa swaku wa tshembeka ka yena, se na yena a ta tshembeka ka wena. A nge tshuki a ku tshika.— Lerha Tipisalema 4:3.
DJONDZA SWIN’WANA
Vona swaku hi mhaka muni Yehovha a tsaka loko u mu yingisa, u tlhela u vona swaku i mpsini swi nga ku pfunaka swaku u tshembeka ka yena.
3. Mhaka leyi yi ku khumbaka
Hi ku ya hi buku la Yobo, Sathana a nga yo lumbeta Yobo ntsena, kambe a lumbete vanhu hinkwavu lava va lavaka ku tirhela Yehovha. Lerhani Yobo 1:1, 6–2:10, mi gama mi bula hi swivutiso leswi landzelaka:
Sathana a vule swaku Yobo a a tirhela Yehovha hi mhaka muni? — Vona Yobo 1:9-11.
I mpsini leswi Sathana a swi vulaka hi vanhu hinkwavu ku patsa na wena? — Vona Yobo 2:4.
Lerhani Yobo 27:5b, mi gama mi bula hi xivutiso lexi landzelaka:
Yobo a swi kombisise ku yini swaku yena a a mu rhandza Yehovha hikakunene?
Yobo a kombise lirhandzu la yena ka Yehovha hi ku tshama na a tshembekile ka yena
Hi kombisa lirhandzu la hina ka Yehovha hi ku tshama na hi tshembekile ka yena
4. Tsakisa mbilu ya Yehovha
Lerhani Swivuriso 27:11, mi gama mi bula hi swivutiso leswi landzelaka:
Yehovha a titwisa ku yini loko u tlhariha u tlhela u mu yingisa? Hi mhaka muni u vula leswo?
5. U nga swi kota ku tshembeka ka Yehovha
Lirhandzu la hina hi Yehovha li hi yentxa hi byela van’wana hi yena. Leswi hi tshembekaka ka Yehovha hi byela van’wana hi yena hambiloko swi karhata. Sixtirani VHIDIYO, mi gama mi bula hi swivutiso leswi landzelaka.
Minkama yin’wana swa ku karhatela ku byela van’wana hi Yehovha?
Ka vhidiyo, i mpsini leswi nga pfuna Gérson swaku a nga chavi?
Swa vevuka ku tshembeka ka Yehovha loko hi rhandza leswi a swi rhandzaka hi tlhela hi nyenya leswi a swi nyenyaka. Lerhani Tipisalema 97:10, mi gama mi bula hi swivutiso leswi landzelaka:
Hi ku ya hi leswi se u nga swi djondza, hi yini minchumu yin’wana leyi Yehovha a yi rhandzaka? Naswona hi yini minchumu yin’wana leyi a yi nyenyaka?
I mpsini leswi nga ku pfunaka ku rhandza swa swinene u tlhela u nyenya swa ku biha?
6. Ku yingisa Yehovha swa hi pfuna
Ku yingisa Yehovha i swinene minkama hinkwayu. Lerhani Esaya 48:17, 18, mi gama mi bula hi swivutiso leswi landzelaka:
Indje Yehovha minkama hinkwayu wa swi tiva leswi nga swinene ka hina? Hi mhaka muni u vula leswo?
Ku djondza Bibele ni ku tiva Yehovha Xikwembu xa ntiyiso swi ku pfunise ku yini ku ta fikela swoswi?
VAN’WANA VA LI: “Xikwembu a xi na mhaka ni leswi ni swi yentxaka.”
Hi yini ndzimana leyi u nga yi tirhisaka kuva u kombisa swaku leswi hi swi yentxaka swi nga yentxa Yehovha a tsaka kumbe a kwata?
LESWI HI NGA SWI DJONDZA
U nga kombisa swaku wa mu rhandza Yehovha hi ku mu yingisa ni ku tama u tshembeka ka yena hambi u kumana ni swikarhatu.
Ku kambela leswi hi nga swi djondza
U djondze yini ka xikombiso xa Yobo?
U ta swi kombisisa ku yini swaku wa mu rhandza Yehovha?
I mpsini swi nga ta ku pfuna ku tshama na u tshembekile ka Yehovha?
LOKO U LAVA KU TIVA SWIN’WANA
Vona leswi u nga swi yentxaka swaku u tshembeka ka Yehovha ni le bandleni.
“Yehovha Wa Tshembeka Ka Lweyi A Tshembekaka Ka Yena” (16:49)
Djondza swin’wana hi leswi Sathana a nga lumbeta vanhu hi swona.
“Yobo U Tshame A Tshembekile” (Bibele — I Mpsini Leswi Nga Tsaliwa Ka Lona? xiyenge 6 hi Xitsonga)
Vona swaku hambi vana va nga swi kombisisa ku yini swaku va mu rhandza Yehovha.
Majovhem ma nga swi kotisa ku yini ku tshama ma tshembekile ka Yehovha hambiloko ma xengeteliwa ku yentxa minchumu ya ku biha?