Mateu

9 Jesúsi jataspti barkuni, parhimespti marirhu ka inchaakuspti imeeri ireta jimbo. 2 Ka máru kʼuiripuechaksï pákuspti Jesúsini kʼuírakua ma jimbo* kʼuiripuni ma enga no ueenga manakuarhini. Enga Jesúsi exepka na engaksï xáni mintsikeenga ima kʼuiripuecha, arhispti imani enga no ueenga manakuarhini: “¡Sési pʼikuarherantsï, iju! Tʼuri puáminhaantaskia chiiti pekaduechani”. 3 Jimajkani, máru karariichaksï ueenaspti arhijperani: “I kʼuiripu no sési ambe uandaxati Tata Diosïiri ambe”. 4 Jesúsi mítespti ambe engaksï imeecha eratseni japka ka arhiaspti: “¿Andijtsïsï no sési jásï ambe eratseni jaki chaari mintsitarhu? 5 Arhijtsïni je, ¿ambe sánderu fásiliiski? ¿Uandani ‘puáminhaantaskaria chiiti pekaduechani’ o uandani ‘jauara ka xanharia’? 6 Joperu parakajtsï exeaka eska Achamasïiri Uájpa jatsiska juramukua parhakpinirhu para puátspeantani pekaduechani...”. Jimajkani, arhispti imani enga no ueenga manakuarhini: “Jauara, tarhata chiiti kʼuírakuani ka níia níntani chiiti kʼumanchikuarhu”. 7 Ka ima jauaraspti ka níntaspti imeeri kʼumanchikuarhu. 8 Engaksï kʼuiripuecha exepka ini ambe, ískuksï pakaraspti* ka kʼéri ambeksï arhispti Tata Diosïni jimboka xáni kʼéri juramukua íntsaaspka kʼuiripuechani.

9 Tátsekua enga na kéndikupkia jima uératini, Jesúsi exespti achamasïni ma enga Mateu arhinheenga, jima uaxakatixapti nani enga impuestu maiampinhajka, ka arhispti: “Júreni chúxapuni”. Mateu jirejiresï jauaraspti ka niraspti chúxapani. 10 Sánderu tátsekua, enga Jesúsi kʼumanchikuarhu tʼireni japka,* niárasptiksï uánikua impuestu kobrarpitiicha ka ístu no sési úriicha* ka úndasptiksï Jesúsini jingoni tʼireni ka imeeri chúxapatiichani jingoni. 11 Joperu engaksï fariseuecha exepka ini ambe, kurhamarhiasptiksï imeeri chúxapatiichani: “¿Andisï chaari jorhentpiri impuestu kobrarpitiichani jingoni tʼirejki ka no sési úriichani* jingoni?”. 12 Joperu Jesúsi kurhajchaaspti ka arhiaspti: “Imeecha engaksï sési jámani jaka nóksï uétarhinchasïndi doktorini, joperu pʼamenchatiichaksï kʼóru jo. 13 Ísï jimbo, ní je ka jorhenguarhi je ambe enga arhikuekajka ari ambe: ‘Uékasïnga eskajtsï pʼamojpiaka ka no eskajtsïni kéjtsïtakua ambe úchiaka’. Jimbokani no jurhaska ióarhiani imeechani engaksï sési jámajka sino pekadoriichani”.

14 Jimajkani, Juanueri chúxapatiichaksï andarhieraspti Jesúsini ka kurhamarhisptiksï: “¿Andichisï jucha ka fariseuecha pʼinde kʼarhinda jarhani,* joperuksï chiiti chúxapatiicha nómbe?”. 15 Jesúsi arhiaspti: “Enga tembuchakua ma jarhajka, nobiueri amigu jémbeechaksï no jatsisti para kómu pʼikuarherani jarhani, ¿a no?, jimboka nobiu útasï imeecha jingoni jarhaska. Joperu niáraati ma jurhiani engaksï euanhantaaka nobiuni ka jiánksï kʼóru kʼarhinda jauati. 16 No nema tánharhitasïndi jimbanhi takusï imani takusïrhu enga jiánguarhikia. Jimboka enga jimbanhi takusï sapichu úkuarhintajka* antsinharhikusïndi takusïni enga jiánguarhikia ka sánderu karukurhisïndi. 17 No nema jatsirasïndi jimbanhi binu imani jatakuecharhu* engaksï jiánguarhikia. Enga i ambe úkuarhipiringa, sïkuiri karukurhipirindi ka binu iámu tsïnchepirindi* ka jatakuechaksï méntku nóteru marhuapirindia. Sánderu sési, kʼuiripu jimbanhi jatakuecharhu jatsirasïndi jimbanhi binuni, ka ísï úparini, seguiriini jarhasïndi marhuani jatakua ka binu”.

18 Enga Jesúsi útasï ini ambe arhiani japka, jurhaspti andarhierani juramuti ma, tinguixurhikuspti* ka arhispti: “Juchiiti nanaka iáiasï jamberi uarhitia, joperu ju jíndeni jingoni, pʼárhi ka ima niáraati tsíntani”.

19 Jimajkani Jesúsi jauaraspti, niraspti imani jingoni ka imeeri chúxapatiichaksï niraspti pámbeni. 20 Ka ma repentku, uarhiiti ma enga 12 uéxurhini páni japkia enga no ueenga iurhiri anhaxustani,* tátsepanisï andarhieraspti ka jupirhukukuspti imeeri takusïni, 21 jimboka uarhiiti eratsesïreenga: “Engani solu pʼárhikuska imeeri takusïni, ambakentaaka”. 22 Jesúsi pʼirhipakuarhespti ka enga exepka, arhispti: “¡Sési pʼikuarherantsï, ija! Ambakentaskaria jimbokari mintsikaska”. Ka uarhiiti jirejiresï ambakentaspti.

23 Tátsekua, enga inchaakupka juramutiiri kʼumanchikuarhu ka exeani máru kʼuiripuechani engaksï flauta kústani japka ka uánikua kʼuiripuechani engaksï uinhachani japka xáni uerani, 24 Jesúsi arhiaspti: “Uénta je, jimboka nanaka no uarhiska, kʼuíxati”. Engaksï kʼuiripuecha kurhaapka ini ambe, ueenasptiksï teresmarhuni. 25 Engaksï na petaantapkia kʼuiripuechani jima uératini, Jesúsi inchaspti nani enga nanaka japka, jupijkuspti ka ima jauaraspti. 26 Ka méntku iápuru jimeesïsï niáraspti mítekuarhini i ambe.

27 Enga Jesúsi uéakuntani japkia jima uératini, tsimani kʼuiripuechaksï chúxapaspti engaksï no ueenga exeni. Ka uinhachakusïreendiksï: “¡Dabidi Uájpa, pʼamojkujtsïni sáni!”. 28 Enga Jesúsi inchaakupkia kʼumanchikuarhu, ima kʼuiripuecha engaksï no ueenga exeni andarhierasptiksï, ka Jesúsi kurhamarhiaspti: “¿Mintsikasïntsï eskaksïni uaaka ambakerantani?”. Ka imeechaksï arhispti: “Jo, Tata”. 29 Jimajkani Jesúsi pʼánharhikuaspti éskuecharhu ka arhiaspti: “Eska ísï úkuarhiaka eskajtsï na kurhajkuarhika, ísï eskajtsï chá na mintsikajka”. 30 Ka imeechaksï ueenaspti exeni. Joperu kʼóru Jesúsi arhiaspti: “Xéparini je, eska no nema míteaka ini ambe”. 31 Joperu engaksï na uéntapkia, méntkuksï iápuru jimeesïsï jámaxapti Jesúsiiri ambe uandantani.

32 Ísï tátsekua engaksï imeecha níntani japkia, juákusptiksï Jesúsini achamasïni ma enga no ueenga uandani ka enga demoniu ma incharhitini japka. 33 Enga Jesúsi na petarhitantapkia demoniuni, ima achamasï úsptia uandani. Kʼuiripuechaksï ísku pakaraspti ka uandasïreendiksï: “Nóchi méni exexapka xásï ambe ixú Israeli”. 34 Joperu fariseuechaksï uandasïreendi: “Demoniuecheeri juramutini jimbosï újti petarpiantani demoniuechani”.

35 Ka Jesúsi ueenaspti kʼérati ireteecharhisï jámani ka ireta sapirhatiicharhu. Jorhentpisïreendi nani engaksï judiuecha tánguarhijka para Tata Diosïni kómarhini ka aianhpisïreendi ambakiti aianhperakua Tata Diosïiri Reinueri ambe ka ambakeraantasïreendi kʼuiripuechani engaksï mámaru ambe pʼamenchani japka ka no sési pʼikuarherani. 36 Enga Jesúsi exeauenga kʼuiripuechani, mintsita jingoni pʼamojkuasïreendi jimbokaksï kánikua no sési kánhasïreenga ka jandiajkuksï jarhani komueska karichiicha engaksï no jatsika karichi erangutini. 37 Jimajkani arhiaspti imeeri chúxapatiichani: “Kánikuesti para pʼikuntani, joperuksï ánchikuarhiriicha no uáneesti. 38 Ísï jimbo, kómarhi je pʼikuntskueri Dueniuni eska axauaka ánchikuarhiriichani paraksï nirani pʼikuntani”.