PARHAKPINIRHU KÁNIKUA NO SÉSI JÁNHASKUARHIXATI

4 Mintsika je eska sési niántaaka iámindu ambe

¿ANDISÏ XÁNI JUKAPARHAKUE?

Enga xáni no sési jánhaskuarhini jaka, úsïndi eskaksï kʼuiripuecha pʼamenchaaka ka eskaksï jukari uandanhiauaka. Imeecha engaksï no sési ambe úkuarhinchaka, úpirindiksï eratseni eskaksï nóteru uaakia orhepani uérani. ¿Andiksïsï niárajki ísï eratseni?

Máruksï no uékasïndi eratseni ambe enga úkuarhiaka sánderu orhepatini.
Máteruechaksï alkoli arhasïndi oksï droga ambe úrani.
Máruksï eratsesïndi eska sánderu sésipiringa uarhini ka eska jánguarhintani orhepani uérani.

¿Mítespijtsï?

Jamberi problemecha engajtsï jatsiaka sánhanksï arhiati sési niántani.
Enga problema ma no sési niántaska, seguru eskajtsï uaaka úni ambe ma parajtsï úni tekaantani.
Biblia aiatspesïndi eskaksï nóteru méni jauakia uandanhiatecha.

¿Ambejtsï uaa úni?

Biblia uandasïndi: “Asï jáma je pendienti páni para ambe enga úkuarhiaka pauani, jimboka pauantu jauaka mískuarhita ambe. Ka sésku kánisti mískuarhita mándani jurhiatikueri” (Mateu 6:34).

Asï uandanhia je pauani anapu ambe jimbo. Asï xáni eratsi je ambe enga úkuarhiaka pauani, jimboka engajtsï ísï úska nójtsï uaaka úni iásï anapu ambe.

Méntku uandanhiani jarhani no sési jásï ambe jimbo enga úpiringa úkuarhini, solu uaati eskajtsï sánderu no sési pʼikuarheraaka ka eskajtsï eratseaka eska no méni uaaka sési niántani ambe ma.

AMBE ENGAJTSÏ UAAKA ÚNI PARAJTSÏ MINTSIKANI ESKA SÉSI NIÁNTAAKA IÁMINDU AMBE: Máru konsejuecha

JÁNGUARHINTA JE AMBAKITI AMBE ERATSENI

Biblia uandasïndi: “Para ima enga kómu nitamakuarhijka, ísï exesïndi enajki pauani pauani no sési jánhaskuarhijki, peru ima enga ambakiti mintsita ma jataka, méntkisï kʼuínchikua ma jatsisïndi” (Proverbios 15:15). Engajtsï méntku eratseni jauaka problemani ma, jamberijtsï no kuenta íntskukuarheaka ambe engajtsï uaaka úni parajtsï sési peentani problemani. Joperu engajtsï no xáni uandanhiaska, jamberijtsï uaaka exeni ambe engajtsï uaaka úni para sési peentani uandanhiatani.

Asï xáni exe je ni kurhauani notisiechani.
Mándani chúrikua eratsenta je tsimani o tanimu ambe engajtsï jimbo agradesidu jaka.
Lista ma ú je ima amberi engajtsï jatsika para úni ma jurhiatikua jimbo. Ka ima ambe enga sánderu úkua jukaka, sánhani ari je úni ka ísïjtsï uaaka exeni ambe engajtsï xáni andajkuarhika úni ma jurhiatikua jimbo.

JARHUAJPERATA KURHAJKUARHI JE

Biblia uandasïndi: “Ima enga no uéjka máteruecha jingoni jarhani [...] no jiókuarhisïndi máteruecheri konsejuni” (Proverbios 18:1). No nema úsïndi jandiajku uénhintani posurhu ma. Uétarhisïndi eska nema jarhuataaka.

Arhi je chaari familiani ka amiguechani eskaksïni jarhuataaka.
Asï mirikuarhi je eskajtsï chájtu uaaka jarhuataani imeechani. Engajtsï uaaka ambe ma máteruecha jimbo, jarhuataatiksïni no xáni uandanhiani chaari problemecha jimbo.
Engajtsï eratseska eskajtsï nóteru uaakia orhepani uérani ka eskajtsï nóteru uékasïngia irekani, kánikua sésiuati engajtsï niuaka doktorini ma exeni. Ménichani enga nema ísï pʼikuarherajka xarhatani jarhasïndi eska depresioni kánguarhisïnga. Uánikuechaksï sési pʼikuarherantastia engaksï tratamientu ma intsïnhaka.a

a Rebista ¡Tsínharhi! no uandasïndi náki tratamientu úrani.

Bibliajtsïni aiachisïndi eska iámu ambe sési niántaaka

Salmueri karari ma arhispti Tata Diosïni: “Chiiti uandakua lámpara máesti para juchiiti jantsiri, ka lusi ma para juchiiti xanharu” (Salmo 119:105). ¿Ambe arhikuekasïni i ambe?

Chúrikuechani lampara májtsïni jarhuatasïndi parachi exeni naniisïsï xanharani. Sáno májkueni, Bibliarhuchi ambakiti konsejuechani exeantasïnga engajtsïni jarhuatajka exeni ambe engachi uaaka úni, jiáni engachi jukaparhakua ambe uékani jauaka úni.

Xanharurhu tʼíntskuajtsïni jarhuatasïndi exeni ambe enga juchaari orhepani jimbo jarhajka. Sáno májkueni, Bibliajtsïni exerasïndi ambakiti ambe enga sánderu orhepatini úkuarhiaka.

Biblia, Tata Diosïri libruesti engajtsïni no solu arhijka na engaksï ueenaka jarhani kʼuiripuecha. Ístujtsïni arhisïndi eska no ióni jimbo iámu ambe sési niántaaka. Mókuantasïndi arini kurhamarhikuechani:

¿Néna ueenaski kómu nitamakua ambe jarhani?

Biblia uandasïndi: “Eska pekadu na juka parhakpinirhu, máechakua kʼuiripuni jimbo ka pekaduni jimbo uarhikua, ka ísï uarhikua pakarani para iámindu kʼuiripuecha jimbokaksï iáminduecha pekadu úska” (Roma 5:12).

¿Andiksïsï kʼuiripuecha no újki sési peuantani problemechani?

Biblia uandasïndi: “Kʼuiripu enga xanharani jaka ni sikiera sésikua jatsi para exeni nani enga ísï jatsika para xanharani” (Jeremías 10:23). Problemecha engaksï parhakpinirhu jaka xarhatasïndiksï eska i ambe meru ísïiska.

¿Ambe uaa Tata Diosï para iámu ambe sési peentani?

Biblia uandasïndi: Tata “Diosï kutsunharhikuauati iámindu uekua ka nóteru jauatia uarhikua ka ni uandanhiata ka nóteru nema ueraati o pʼamenchani” (Jaŋaskuecha [Apocalipsis] 21:4).