Achati ma enga kánikua tsʼiueka

ENGAKSÏ sánderu uánikua kʼuiripuecha irekajkia ixú Parhakpinirhu, sánoksï iámindu kʼuiripuecha no sési ambeksï úsïndi, ísï eska Kaini. Joperu jarhaspti achati ma enga ménderuenipka, Enoki arhinhasïrendi, ka i kánikua tsʼiuespti. Imani jurhiatikuechani jimbo, nájkirukaksï kʼuiripuecha kánikua no sési ambe uáenga, ima chúngumaxapti marhuakuni Tata Diosïni.

¿Mítiskiri tʼu andisïksï ima kʼuiripuecha xáni no sési ambe uáni? Eratsi ini ambe: ¿Né úspi eska Adani ka Eba nóksï kurhajchapiringa Tata Diosïni ka eskaksï apiringa frutani? Jo, ánjili no sési úri ma. Biblia arhisïndi ini, Satanasi. Ka uékasïndi eskachi iámindu no sési ambe uáka.

Niárasti jurhiatikua enga Jeoba arhipka Enokini eska aianguapiringa kʼuiripuechani ambe ma engaksï imecha no uékaenga kurhaani. Enoki i ambe arhiaspti: ‘Ma jurhiani Tata Diosï kʼamajkuauati iámu kʼuiripu no sési úrichani’. Jamberi i ambe kánikua ikiataapti kʼuiripuechani, ka jamberiksï ima uékaendi uándikuni Enokini. Ísï jimbo, Enoki jatsispti para kánikua tsʼiueni, para úni uandantani ambe enga Tata Diosï úpiringa.

Tata Diosï no jurajkuspti eska Enoki ióni irekapiringa imani no sési úrichani jingoni. Ísï jimbo Enoki 365 uéxurhintku irekaspti. ¿Joperu jucha andichesï uandajki eska xántku, “365 uéxurhintku”? Jimboka imani jurhiatikuechani jimbo, kʼuiripu sánderuksï uinhapitispka ka sánderuksï ióni irekasïrendi eska iásï. ¡Matusaleni, Enokiri uájpa, 969 uéxurhini irekaspti!

Tátsekua enga Enoki uarhipkia, kʼuiripuecha sánderuksï no sési jásï ambe úsïrendi. Biblia uandasïndi eska ‘iámindu ambe engaksï imecha eratsenga méntkisï no sési jásï ambespka’, ka ‘niáraspti kánikua uarhiperakuecha jarhani Parhakpinirhu’.

¿Mítiskiri andisïksï imani jurhiatikuechani jimbo niárapi xáni uánikua uandanhiatecha ambe jarhani? Jimboka Satanasi ménderu máteru ambe úraxapkia para kʼuiripuechani tsïjpaani. Ju exeni ambespi.