Kʼuiripu iójtarecha Parhakpinirhu

ENGAKINI andarherani japiringa xánisï iójtara ma, enga chíti kʼumanchikuarhu jamberi andancherapiringa, ¿amberi eratsipirini? ¡Eska jukari iójtaraska! Ióntki irekasptiksï xarhati kʼuiripuecha. Biblia uandasïndi eskaksï imeri tátembecha jindespkaksï ánjilicha engaksï auandarhu irekapka. Joperu, ¿néna niáraspi ísïni?

Miánta, Satanasi ánjili no sési úri, úxapti eskaksï kʼuiripuecha no sési ambe úpiringa. Ka jánguarhintaxapti úni eskaksï ánjilichajtu no kurhajchapiringa Tata Diosïni. Tátsekuaksï, máru ánjilicha úndaspti Satanasini kurhajchani. Jurajkusptiksï ánchikuarhitani enga Tata Diosï íntsaapka auandarhu, jurhasptiksï Parhakpinirhu ka kʼuiripuksï úkuarhintaspti. ¿Mítiskiri andi?

Biblia uandasïndi eskaksï ima ánjilicha, sési jarhati iurhitskirichani exeaspka ixú Parhakpinirhu ka uékasptiksï imecha jingoni irekani. Ísï jimboksïsï jupti para tembuchani imechani jingoni. Biblia uandasïndi eska i ambe kánikua no sési jarhaspka, jimboka Tata Diosï uáska ánjilichani paraksï auandarhu irekani.

Ánjilicha ka témbecha, niárasptiksï kánguarhiani uájpechani, joperuksï i no májkuenispti eska máteru sapicha. Jimbokaksï méntku úndaspka kʼéni, ka eskaksï na kʼépani japka, ístuksï sánderu uinhapipaxapti, ka niárasptiksï kʼérati kʼuiripuecheni.

I kʼuiripu iójtarecha, no sési ambeksï úsïrendi, ka jimbokaksï xáni uinhapispka no sésiksï kásïrendi máteruechani. Ka uékasïrendiksï eskaksï iámindu májkuenipiringa eska imecha.

Enoki uarhisptia, joperu pakaraspti achati ma enga ambakitipka, Noe arhinhasïrendi. I méntkisï úsïrendi ambe enga Tata Diosï uékaenga.

Ma jurhiatikua Tata Diosï arhispti Noeni eska Ima, iámindu no sési úrichani uándikuapiringa. Joperu Noeni ka imeri familiani ka animalichani, kuájchakuapirindi. Ju exeni néna úspi i ambe.