Asï jiókuari je religióni no jurhimbitini

Satanasi ka imeri demoniuecha noksï uékasïndi eska jucha Tatá Diosïni marhuakuaka. Uékasïndiksï jarharitani iámindu kʼuiripuechani parakaksï no andarieraka Tatá Diosïni. ¿Néna? Ma ambe engaksï úrajka jindesti religiónini enga no jurhimbitika (2 Korintu 11:13-15). Ma religióni no jurhimbitisïndi enga no jurhimbitku jorhentpijka Bibliaueri ambe. Religióni no jurhimbiti isïsti eska tumina enga no marhuajka: uáti isï xarharani eska sesi jimboeska, joperu noma ambe jukaparakueni. Ka úpirindijtsïni uánikua uandanhiatechani juáchiani.

Religióni enga no jurhimbitika no méni uáti jaiapanherantani Tatá Jeobáni, Tatá Diosï jurhimbikuerini. Enga Jesúsi echerirhu japka, jarhaspti ma religióni engaksï uandanga eskaksï jakajkusïremga Tatá Diosïni, joperuksï uékasïremti Jesúsini uándikuni. Imaksï eratsisïremti eska, na engaksï kómarhini japka Tatá Diosïni, jurhimbikuespka. Uandasïremdiksï: «Jucha solo maechakua Tátini jatsiska enga jindeka Diosï». Joperu ¿jiókuarespi Jesúsi imani ambe? Nombe. Ima isï mókukuaspti: «Chári táti jindesti noambakiti ka chájtsï imeriska» (Juanu 8:41, 44). Iásï ini jurhiatikuechani jimbo, uánekua kʼuiripuecha jakajkusïndi eskaksï Tatá Diosïni kómarhixaka, joperu sesi jimbo marhuakuxatiksï Satanasini ka imeri demoniuechani (1 Korintu 10:20).

Isï eska ma anhatapu tereri na íntspejka ámanhenchakua tereri, religióni enga no jurhimbitika íntspesïndi kʼuiripuechani engaksï no sesi jasï ambe újka. Parhakpinirhu uánikua uandanhiatecha jarhasti, jimbokaksï kʼuiripuecha no sesi jasï ambe úsïnga. Jarhasti ísku jándikua, uarhiperakua, sïpakua, no sesi kámberakua, uándikperakua ka engaksï uátsïchani tsïjpajka. Uánikua kʼuiripuecha engaksï indeni ambe újka, jatsikuaristiksï ma religióni, joperu inde religióni no manaatasïndi sesi jasï ambe úrani. Noksï uáti jindéni Tatá Diosïri pʼíchpirini engaksï no jurajkuauaka imecheri no sesi járhati úkuechani (Mateu 7:17, 18).

Religióni enga no jurhimbitika jorhendaasïndi kʼuiripuechani, eskaksï, diosï úkatechani kómarhikuarhiauaka. Tatá Diosïjtsïni arhisïndi eska jucha no uandatsikuarikuauaka o kómarhikuarhiauaka diosï úkatechani. Ka inde isïsti o ¿sesi japirini eska nema chári pʼitakatani jingoni uandontskuarhipiringa ka chánhsïni jingoni no méni uandontskuarhini? ¿Úpirini ima kʼuiripu jindéni chári pʼíchpirini? Nombe, no úpirindi. Tatá Jeobá uékasïndi eskaksï kʼuiripuecha imani uandajpaka, no diosï úkatani ma, nijtu ma pʼitakatani enga no tsípiti jarhajka (1 Korintu 10:14).

No jurhimbiti religióni jorhentpesïndi eskaksï uáka uándikuani máterhuechani enga jauaka ma uarhiperakua. Jesúsi uandaspti eska Tatá Diosïri pʼíchpiricha uékperapiringa. Jucha no uándikuasïnga imechani enga jucha uékajka (Juanu 13:35). Nijtu sesi jakí eska jucha uándikuauaka kʼuiripu no sesi úrichani. Engaksï Jesúsiri ikiatspiticha nípka jupikani, ima no jurajkuaspti eska imeri jorhenguarhiticha uarhipepiringa para kuájpintani (Mateu 26:51, 52).

Religióni no jurhimbiti jorhentpesïndi eskaksï no sesi úricha chupirirhu kʼuanijpanhantaka para kómu nitamani. Joperu Biblia jorhentpesïndi eska kʼamanharintskua, uarhikuarhu pájpesïnga (Roma 6:23). Tatá Jeobá kánikua uékpisïndi. ¿Ma Tatá Diosï enga uékpijka, kómu nitamatarapirini kʼuiripuechani para mentkisï? ¡Nombe, Tatá Jeobá no méni isï úpirindi! Sesi jándekuarhu imajku religióni jauati enga Tatá Jeobá jaiapanhintajka (Jaŋaskuecha 15:4). Iámindu religiónicha engaksï uaxastakata jaka Satanasiri chikuanderakuechani jimbo, nóteruksï jauatia.