ARHUKUKATA 12
Ambakiti arhistakuecha para juchari tsípikua
Proberbiusiri libru —enga sáno iámindu Salomoni karaka— jatasti uánikua ambakiti arhistakuecha engaksï Tata Diosïni jimbo jurajka
¿JINDESKI Jeoba juramuti jánhaskati ma? Parachi úni mítini, uétarhisïndi arhintani arhistakuechani engaksï imeri Karakatarhu jaka. ¿Ambakitiskiksï? ¿Uájtsïni jarhuatani parachi úni sési irekani? Proberbiusiri libruni jimbo, juramuti Salomoni karantaspti sientu jimbo proberbiuechani engajtsïni jarhuatajka iápurhu isï juchari tsípikuarhu. Ju je exeani máru.
Pájperakua Tata Diosïni jingoni. Para úni ambakiti pájperakua ma jatsini Jeoba jingoni, kánikua jukaparhakuesti eskachi mintsikaka. Salomoni uandaspti: “Mintsika Jeobani iámindu chíti mintsitani jingoni, ka asï mintsika chíti eratsikuani. Iámindu ambe engari uáka, u imani eratsiparini, ka ima jurhimberauati chíti xanharuechani” (Proverbios 3:5, 6). ¿Nénachi xarhatasïni eskachi mintsikasïnga imani? Jurajkutakuarhiparini eskajtsïni ima jurhimberaka ka kurhajchaparini imeri juramukuechani. Engachi isï úska, uákachi eska juchari tsípikua marhuauaka: jimbokachi tsíperaka Jeobaeri mintsitani ka xarhatakachi eska No Ambakiti chikuandera máeska (Proverbios 27:11).
Familia ka amiguecha. Iásï, familiecha uétarhinchasïndiksï eska Tata Diosï jurhimberauaka. Tata Diosï arhisïndi uámbani: “Sési pʼikuarhera chíti uarhiti jingoni engari jiájkani tembupka, engari tumbipka”, isï miátantasïndi eska no jatsiska para jurajkuni imeri uarhitini ka ni jámani máteru uarhiticha jingoni (Proverbios 5:18-20). Proberbiusi kapitulu 31, ambakiti eranhikua ma íntskusïndi uarhitini, jimboka uandasïnga néna uá uarhiti, úni eska imeri uámba ka imeri uájpecha janhanharhiaka. Ka arhiasïndi uájpechani, eskaksï kurhajchauaka tátembechani (Proverbios 6:20). I librujtujtsïni arhisïndi na enga xáni jukaparhakueka sési pájperani máteruechani jingoni, ka aiangusïndijtsïni eska, enga nema jarhariaska máteruechani, jandiajku uékakuarhini jámaka (Proverbios 18:1). Nájkiruka jukaparhakueka jatsiani amiguechani, jatsiskachi para erakuani amiguechani, ka no kúnguarhini imechani jingoni engajtsïni úpiringa támu isï jánhastani (Proverbios 13:20; 17:17).
Jánhaskakua xarhatani juchari irekakuarhu. Proberbiusi, uánikua arhistakuechani jukanharhiasti engajtsïni jarhuatajka parachi sési pʼikuarherani ka parachi no jámani no sési jásï ambe eratsini, ka parachi no jatsini ikichakueni jásï pʼindekuechani komueska kauini jámani, ístuchi uáka ambakiti kʼuiripueni ka niáranchi jindeni sánderu ambakiti ánchikuarhiricheni (Proverbios 6:6; 14:30; 20:1). Ístujtsïni arhisïndi na engachi no sési nitamakuarhinchaka, engachi jurajkuska eskajtsïni támu isï jánhastaka ima ambe enga no terokuntajka Tata Diosïri juramukuani jingoni (Proverbios 14:12). Ístujtsïni arhisïndi, eskachi no jámaka no sési jásï ambe incharani juchari mintsitarhu, jimboka “jiminisï jaka tsípikua” (Proverbios 4:23).
I arhistakuecha, miioni jimbo kʼuiripuechani jarhuauastia, engaksï iásï sési mítitini jatsikia eska no ma ambe jarhaska enga sánderu sésika ka eska Jeobani kurhajchani.
(Pʼitakata jarhasti Proverbios jimbo.)