ARHUKUKATA 13
Juramuti sési úricha ka no sési úricha
Israeliri nasioni tsimani juramukuaksï úkuarhisïndi, ka uánikua imeri juramuticha jurajkusïndiksï Jeobani. Babilonia anapuecha kʼamajkusïndiksï Jerusalenini
NO IÓNI tátsekua enga Salomoni nóteru kurhajchapkia Jeobani, ireta Israeli arhukurispti ka iásï tsimani juramukuechesptia, úkuarhispti eska na uandapka Jeoba. Reoboami enga juramutipka tátsekua, no sési kámasïrendi iretani, isï jimbosï diesi tribu norti anapu niáraptiksï támu úkuarhini. Ka máteru tsimani tribuecha nóksï méni jurajkuspti Dabidiri juramukuani enga Jerusaleni japka, ka íksï niáraspti jindeni juramukua Judaeri suri anapu.
Ini tsimani juramukuechani no ióni sési nikuaspti ka nóteruksï jatsisptia pínandikua. Jimboka imecheri juramuticha, nóteruksï jakajkusïrengia ka níteruksï uékani kurhajchani Jeobani. Israeliri juramukua norti anapu, sánderu no sési úrispti. Jimboka imeri juramuticha uénaspkaksï arhiani máteruechani eskaksï chúngumapiringa religioni no jurhimbitini. Ka nájkiruka Tata Diosï axapka profetechani komueska Eliasini ka Eliseuni —engaksï niárapka jamberi uarhirichani tsítantani—, nóksï méni kurhandispti. Tátsekua, Tata Diosï jurajkuspti eska Asiria kʼamajkupiringa Israelini.
Jukari sieni uéxurhini tátsekua, ístu Tata Diosï kastigarispti juramukua Juda anapuni enga suri japka. Tata Diosïri profetecha arhiasptiksï juramutichani ambe enga úkuarhipiringa, máruksï jakajkuspti ka jánguarhintasptiksï para jurhimberantani iretani. Ma eranhikua jindesti, enga juramuti Josiasi kʼamajkupka kómarhikuani engaksï diosï úkatechani úkuauenga, ka enga sési jántskantaspka ménderu Jeobaeri templuni. Engaksï sési jántskantani japka templuni, exentasptiksï karakata ma enga Tata Diosï Moisesini íntskupka. Josiasi kánikua tsípispti i ambe jimbo, ka sánderu jánguarhintaspti para sóntku kʼamajkuni kómarhikuani engaksï diosï úkatechani úkuauenga.
Joperu imecha engaksï juramupka tátsekua, nóksï májkueni jámaspti. Isï jimbosï Jeoba jurajkupti eskaksï Babiloniuecha inchakupiringaksï Juda ka eskaksï kʼamajkupiringa Jerusalenini ka ístu templuni. Imecha engaksï tsípiti pakarapka, Babiloniaksï pánhaspti ka Tata Diosï uandaspti eska setenta uéxurhini nitamapiringa parakaksï ménderu úpiringa kʼuanhatsentani imecheri iretarhu. Iámindu i uéxurhinicha nóteru nema irekapirindi Juda.
Astaka janopiringa Juramuti enga Jeoba eiatspipka —enga jindeka Mesiasi—, nóteru nema Dabidiri kʼumanchikuarhu anapu juramupirindi. Sáno iámindu Dabidiri kʼumanchikuarhu anapu engaksï juramupka, xarhatasptiksï eska kʼuiripu no úkata jarhaska para juramutini. Sési jimbo, Mesiasijku úpirindi sési juramuni. Isï jimbosï Jeoba arhipti ultimu juramuti Dabidiri kʼumanchikuarhu anapuni: “Kanakua [...] no nemariuati astaka juuaka ima enga sésikua jatsika para juramuni, imani jindeuati engani íntskuaka” (Ezequiel 21:26, 27).
(Pʼitakata jarhasti 1 de Reyes, 2 de Reyes, 2 Crónicas kapituluecha 10 a 36 ka Jeremías 25:8-11.)