PARTI 4
Néna sési úrani tuminani
“Ambe enga ma eratsini jauaka úni arhistakua jimbo sési uaxastakata pakarasïndi.” (Proverbios 20:18)
Iáminduchi uétarhinchasïnga tumina para kéndani juchari familiani ambe engaksï uétarhinchajka (Proverbios 30:8). Jimboka “tumina jindeska para kuájchakukuarhini” (Eclesiastés 7:12). Ménisï úkua jukaati uandontskuarhini tuminaeri ambe, peru asï jurajku je eska inde ambe uandanhiata ambe juaaka chári temungurhirikuarhu (Efesu 4:32). Jatsiskajtsï para mintsikperani ka márku eratsini ambejtsï úraa tuminani.
1 SÉSI ERATSI JE AMBE ENGAJTSÏ UÁKA
AMBE ENGA BIBLIA UANDAJKA: “¿Né jarhaski enga uékani jarhajka úni ma kʼumanchikua ka no uénani kuentuntani sentabu para exeni abersieka andangutaaka para kʼamakutarani?” (Lukasʌ 14:28). Kánikua jukaparhakuesti eskajtsï tsimarani pakaraaka nénajtsï úra tumina (Amós 3:3). Eratsi je ambejtsï uétarhinchasïni piáni ka na xántsï uá úrani (Proverbios 31:16). Kánikua tumina jatsini para ambe ma piáni no arhikuekasïndi eskajtsï jatsiska para piáni. Jánguarhintsï je no kántspini, sino xántku úrani eskajtsï xáni jatsika (Proverbios 21:5; 22:7).
AMBE ENGAJTSÏ UÁKA ÚNI:
Engajtsï pakajkuska tumina mándani semana, eratsi je tsimarani néna úrani
Engajtsï jukari úrakia tumina, exe je ambejtsï uá parajtsï nóteru xáni úrania. Ejemplu ma, uákajtsï chári kʼumanchikuarhu úmantani ka no máteru nanisï nirani tʼireni
2 JIÓKUARHI JE KA EXE JE AMBE ENGA ÚKUARHINI JAKA
AMBE ENGA BIBLIA UANDAJKA: Jurhimbitku jáma je, “no solu juchari Tatani [Jeobani] japarini, sino ístu kʼuiripuechani japarini” (2 Korintu 8:21). Jurhimbitku aiangu je chári uarhiitini o achatini na xántsï andasïni ka na xántsï úrasïni.
Méntkisï uandontskuarhi je tsimarani ante de eratsini ambe ma úni tumina jingoni (Proverbios 13:10). Engajtsï méntkisï uandontskuarhiska nénajtsï úraa tuminani, jatsiakajtsï pínandikua temungurhirikuarhu. Exe je tuminani engajtsï andajka komueska familieri ka no eska chárijku (1 Timoteo 5:8).
AMBE ENGAJTSÏ UÁKA ÚNI:
Uákajtsï pakatperani na xántsï uá úrani tumina táchanisï parajtsï no kurhamarperani jarhani
Asï erokuarhi je eska uandanhiata ma jauaka tuminaeri parajtsï inderi ambe uandontskuarhini