Juliu

Ambe enga Jesúsi úpka ka uandani, xarhataspti eska májkueni ambe pʼikuarherasïreenga ka eratseni eska Taati jémba ka milagruecha jingoni enga uaapka, xarhataspti eska i ambe ísïiska (Juanu 14:9). ¿Ambechi uaa jorhenguarhini ima milagruecheeri enga Jesúsi uaapka? Jesúsi ka imeeri Taati jémbajtsïni kánikua xénchasïndi. Enga Jesúsi Echerirhu jámani japka, xarhataspti na enga xáni xénchauenga kʼuiripuechani, jimbosï úrapti imeeri uinhapikuani para milagruechani uaani ka para jarhuataani kʼuiripuechani. Ma xanhari tsimani acheetiicha engaksï no ueenga exeni, uinhachaparinksï kurhakuspti eska jarhuataapiringa (Mat. 20:30-34). Biblia uandasïndi eska Jesúsi “pʼamojkuasp[ka]” ka úspti eskaksï éskantapiringa. Uandakua griegu enga ixú tradusirikuarhijka “pʼamojpeni” arhikuekasïndi kánikua pʼamojpeni. Jesúsi pʼamojpesïreendi jimboka kánikua xénchaasïreenga kʼuiripuechani, ístu i ambe úspti eska tʼireraapiringa imeechani engaksï no jatsikuarhienga tʼirekua ka eska tsinapiringa acheetini ma enga lepra pʼamencheenga (Mat. 15:32; Mar. 1:41). Ísï jimbo, seguruchi jarhaska eskajtsïni Tata Diosï Jeoba enga ʻkánikua kóntpijkaʼ ka imeeri Uájpa kánikuajtsïni xénchasïnga ka no sésiksï pʼikuarherasïndi engachi no sési nitamakuarhini jarhajka (Luk. 1:78; 1 Ped. 5:7). Ka uékaxatiksïa kʼamajkuani problemechani engaksï kʼuiripuecha jatsiajka. w23.04 3 párr. 4, 5

Uétarhisïndi kómarhini eskachi juchajtu jánguarhintaaka no kurhaani ni arhintani imani ambe enga no sési jaka ka enga Satanásiiri parhakpini no no sési exejka. Parachi imani ambe eratseni enga sési jaka, uétarhisïndi arhintani ka jorhenguarhini Bibliani, tánguarhikuecharhu nirani ka aianhpini. Tata Diosï Jeobajtsïni aiachisïndi eska no jurajkuaka eskachi jukari tsʼéjkunhaaka (1 Kor. 10:12, 13). Parachi no jurajkuni Tata Diosïni ini últimu jurhiatikuechani jimbo enga xáni úkua jukaka, uétarhisïndi eskachi sánderu kómarhiaka. Tata Diosï Jeoba uékasïndi eskachi aiangukuarhiaka ambe enga juchaari “mintsita pʼikuarhenhijka” (Sal. 62:8). Kʼéri ambe arhi je ka diosmaiamukua arhi je imani ambe jimbo enga újka. Kurhaku je eskaksïni íntskuaka balori parajtsï úni aianhpini ka eskaksïni jarhuataaka orhepani uérakuani uandanhiateechani ka parajtsï no úni imani ambe enga no sési jaka. Ísï jimbo, asï jurajku je eskaksïni ambe ma o nema ójkutaaka parajtsï chá kómarhini Tata Diosï Jeobani. w23.05 7 párr. 17, 18

¿Andichisï nirajki tánguarhikuecharhu? Ma ambe ka enga sánderu jukaparhakueka engachi jimbo nirajka tánguarhikuecharhu, jindeesti jimbokachi uékasïnga kʼéri ambe arhini Tata Diosï Jeobani (Sal. 26:12; 111:1). Ka ístu, engachi no sési nitamakuarhini jarhajka, tánguarhikuecharhuchi uinhaperperantasïnga (1 Tes. 5:11). Ísï jimbo, engachi komentarijka tánguarhikuecharhu, indeni tsimani ambechi úni jarhasïnga. Peru jarhasti máru ambe engachi jimbo no újka ísï úni, komueska engachi kánikua chéjka engachi jamberi no újka komentariini o engachi someni tarhatajka jájki ka nóchi iámindu komentariuechani intsïnhaani. Apostoli Pablu uandaspti eska sánderu jukaparhakueska ʻuinhaperperantani máteru ka máteruni jingoniʼ. Engachi méntkisï miáska eskachi uaaka uinhaperaantani máteruechani nájkirukachi no xáni kʼéri komentariu ma íntspiaka, nóchi xáni chéaka jájki tarhatani. Ka engachi no uaaka komentariini xáni eskachi xáni uékapiringa, sésichi pʼikuarheraaka engaksï máteruechajtu uaaka komentariini (1 Ped. 3:8). w23.04 20 párr. 1-3

¡Uandanhasptia! Judiuecha engaksï 70 uéxurhini páni japkia Babilonia, úpirindiksï kʼuanhatsentani Israeli, imeecheri echeri jimbo (Esd. 1:2-4). Solu Tata Diosï Jeoba úpirindi úni indeni ambe. Jimbokaksï Babilonia anapuecha no jurajkuasïreenga imeechani engaksï jupiauenga (Is. 14:4, 17). Peru Babilonia andanhaspti ka jimbanhi juramuti uandaspti eskaksï judiuecha úpiringa kʼuanhatsentani imeecheri paisi jimbo. Iámindu judiuecha ka sánderia imeecha engaksï taatiipka, jatsisptiksï para erakuni ambe úni, Babilonia pakarani o níntani. Peru para máru, jamberi i ambe kánikua úkua jukapti. Máruksï kánikua jatiriisptia paraksï xáni iauani biajarini. Ka jimbokaksï sáno iámindu judiuecha Babilonia andajpenuspka, ima jindeespti imeecheeri ireta. Ireta Israeli, imeecheeri ióntki anapu parientiicheri echeriispti ka no imeecheeri. Ístu, péringaksï uánikua judiuecha riku úkuarhipka Babilonia. Jamberi inde ambe úpti eskaksï úkua jukanchapiringa jurajkuani imeecheeri sési járhati kʼumanchikuechani ka negosiuechani paraksï mótsini ireta ma jimbo engaksï no miiupka. w23.05 14 párr. 1, 2

Tata Diosïiri Karakatajtsïni arhisïndi parachi sánderu tekaantstiini, pʼamojpeni ka xénchpeni. Lukasï 21:19 uandasïndi: “Chaari tekaantskua jimbo, chájtsï andajkuarhiaka pʼímutantaani chaari almeechani”. Ka Kolosasi 3:12 ini konsejujtsïni íntskusïndi: “Mintsita jingoni pʼamojpera je”. Ka 1 Tesalonika 4:9, 10 arhisïndi: “Jimbokajtsï chámindu jorhendanhaska Diosïni jimbo eskajtsï uékperaaka máteru ka máteruni jingoni. [...] Peru jíksïni kómarhisïnga ermanuecha, eskajtsï sánderu ka sánderu uékperaaka”. I uandakuechaksï jindeespti para ima kʼuiripuecha engaksï xarhatani japkia tekaantskua, pʼamojperakua ka xénchperakua, joperuksï jatsispti paraksï sánderu xarhataani ini kualidadiichani. Ka juchajtuchi májkueni ambe jatsiska para úni. ¿Ambejtsïni jarhuataa ísï úni? Ima ambe enga jarhuataapka primeru kristianuechani para ini kualidadiichani xarhataani ka na engachi uaaka májkueni úni parachi tʼuini preparadu jarhania jiáni enga kánikua no sési nitamakuarhinhaaka. Ka jiáni enga kánikua no sési nitamakuarhinhaaka, preparadujtsï jauakia parajtsï seguiriini tekaantani. w23.07 3 párr. 4; 4 párr. 8

I xanharu úsïndi eskachi iásï uaaka kómarhini Tata Diosï Jeobani. Ístu, uaati eskachi sánderu orhepani jatsiauaka kóntperateechani enga Tata Diosïiri Reinu juauaka. Ísï jimbo, erakukateecha ka ʻmáteru karichiichaʼ, jatsiskachi para indeni xanharu jimbo jámani (Juanu 10:16). Ka 1919 jimbo, uánikua acheetiicha, uarhiitiicha ka sapiicha, uéakuntastiksï Kʼéri Babilonia uératini, enga jindeeka iámindu no jurhimbiti relijioniicha, ka pori ísï arhini ueenastiksï jámani “Xanharu Pímbinhasïkueri” jimbo. Engaksï judiuecha kʼuanhatsentapka Babilonia uératini, Tata Diosï Jeoba kénditakuaspti xanharurhu iámindu ambe enga úpiringa ójkutaani (Is. 57:14). ¿Ka májkueni úski iásï anapu “Xanharu Pímbinhasïkueri” jimbo? Jo. Uánikua uéxurhini antesi de 1919, Tata Diosï Jeoba ueenaspti úraani acheetiichani engaksï kánikua janhanharhienga, paraksï ambantskantani indeni xanharuni (terukutanta je Isaías 40:3 jingoni). Pori ísï arhini, imeechaksï ánchikuarhispti ini xanharu jimbo paraka sánderu orhepatini, kʼuiripuecha engaksï ambakiti mintsita ma jataka, úpiringaksï uéakuntani Kʼéri Babilonia uératini ka únksï kómarhini Tata Diosï Jeobani imeeri ireta jingoni ísï eska ima na uéjka. w23.05 15, 16 párr. 8, 9

Tata Diosï Jeoba uékasïndi eskachi tsípikua jingoni marhuakuaka ka iámu mintsita jingoni (2 Kor. 9:7). Jimajkani, ¿andichisï jatsi para jánguarhintani sánderu marhuakuni Tata Diosïni engachi no káni uékani jaka ísï úni? Ju je ménderu exeni apostoli Pablueri ejempluni. Ima uandaspti: ʻJi kastigarhisïnga juchiiti kuerpuni ka úsïnga eskarini janhanharhiakaʼ (1 Kor. 9:25-27). Pablu uinhapikuarhintaspti para úni ambe enga Tata Diosï Jeoba erokuarhienga eska ima úpiringa nájkiruka no káni uékani japka ísï úni. ¿Sési pʼikuarheraspi Tata Diosï Jeoba imani ánchikuarhita jingoni enga Pablu ueenga para marhuakuni? ¡Jo! Ka kóndentaspti enga ima xáni jánguarhintapka (2 Tim. 4:7, 8). Tata Diosï Jeoba ístu sési pʼikuarherasïndi enga exejka eskachi jánguarhintaxaka úni ambe engachi eratsetini jaka nájkirukachi no káni uékani jauaka ísï úni. ¿Andi? Jimboka ima exesïnga eska nájkirukachi no tsitini jarhajka indeni ambe úni, ísïchi úsïnga jimbokachi xénchasïnga. Tata Diosï Jeoba újchakuraspti apostoli Pabluni ka ístujtsïni újchakuraati juchantsïni engachi jánguarhintaska (Sal. 126:5). Ka engachi exeaka eskajtsïni Tata Diosï Jeoba újchakuraxaka, jamberichi sánderu uékaaka úni ambe engachi eratsetini jaka. w23.05 29 párr. 9, 10

Apostoli Pablu uandaspti eskaksï no tsípiti pakaraaka Tata Diosï Jeobaeri jurhiatikuarhu imeecha engaksï ísïika komueska ima kʼuiripuecha engaksï kʼuíni jarhajka. Enga kʼuiripu ma kʼuíni jarhajka, no kuenta íntskukuarhesïndi ambe enga xáni úkuarhini jarhajka jimeesïsï ni na enga xáni tiempu nitamajka. Ístu no mítesti andisï úkuarhijki ambe ma ka ístu no jánhaskasïndi ambe úni. Iásïjtu, pori ísï arhini, sáno iámindu kʼuiripuechaksï kʼuíxati (Rom. 11:8). Nóksï kasu uaasïndi pruebechani engaksï xarhatajka eskachi “últimu jurhiatikuechani jimbo” irekaxaka ka eska kʼéri miskuarhita axuterku jarhaskia (2 Ped. 3:3, 4). Joperu, juchachi míteska eska kánikua jukaparhakueska konseju enga uandajka eskachi jatsiska para pauani pauani tsínharhitini jarhani (1 Tes. 5:6). Peru ¿andichisï jatsi para iámindu ambe sési eratsentani? Jimboka engachi no ísï úska sánderu fásiliuati eskachi ueenaaka inchamukuni politikarhisï ka uandanhiani parhakpini anapu problemeecha jimbo. Ístu, enga na niárani jauaka Tata Diosï Jeobaeri jurhiatikua, sánderuchi arhinhaaka parachi jiminiisï inchamukuni. Peru nóchi jatsiska para uandanhiani ambe engachi uandaaka, jimboka Tata Diosïiri espiritu uaaka eskachi iámindu ambe sési eratsentaaka ka eskachi no chéaka ka ístujtsïni jarhuataati parachi ambakiti ambe erakuni úni (Luk. 12:11, 12). w23.06 10 párr. 6, 7

¿Ambejtsï orheta eranhaskasïni engajtsï Sansóniiri ambe kurhaajka? Jamberijtsï eranhaskajka na enga xáni uinhapitiipka. Inde ambe ísïisti, joperu ístu inde achamasï enga kánikua uinhapitiipka ístu úspti ambe ma enga jimbo kánikua no sési nikupka. Nájkiruka ísï úpka, Tata Diosï Jeoba exespti ambe enga xáni úpka Sansóni para marhuakuani iámu imeeri tsípikuarhu. Ísï jimbo, Bibliarhu kararkuarhispti Sansóniiri ejempluni parakachi juchajtu uaaka jorhenguarhini imeeri ambe. Tata Diosï Jeoba úraspti Sansónini paraka ambakiti ambe úpiringa Israeli, enga jindeepka imeeri ireta. Uánikua uéxurhini tátsekua enga Sansóni na uarhipkia, Tata Diosï Jeoba úspti eska apostoli Pablu karapiringa Sansóniiri nombrini, lista ma jimbo ima kʼuiripuecheeri engaksï kánikua mintsikapka Tata Diosïni (Ebr. 11:32-34). Sansóni méntkisï jarhuajperata kurhakuspti Tata Diosï Jeobani, asta jiáni jamberi enga kánikua no sési nitamakuarhini jarheenga. Imeeri ejemplujtsïni kánikua uinhaperantasïndi ka ístujtsïni uánikua ambe jorhendasïndi engajtsïni marhuacheaka. w23.09 2 párr. 1, 2

Mémindu uénhekuarhini Tata Diosï Jeoba jingoni, jarhuataatijtsïni parachi úni tekaantani (1 Tes. 5:17). Jamberijtsï chá iáiasï no jatsika kʼéri problema ma, ¿joperu ambejtsï úsïni engajtsï ikiani jarhajka, no jánhaskani jarhani ambe úni ojtsï kuataratini jarhani? ¿Kurhakusïntsï Tata Diosï Jeobani eskaksïni jarhuataaka? Enga chá pʼindeka kurhakuni Tata Diosïni eskaksïni jarhuataaka orhepani uérakuani pauani pauani anapu problemechani, májkuentsï uaaka sánderu orhepatini enga na sánderu no sési jánhaskuarhini jauakia. Segurujtsï jauaka eska Tata Diosï sési míteska na jatinksïni jarhuataa ka néna (Sal. 27:1, 3). Engachi desde iásï úska tekaantani problemeechani engachi jatsiajka, sánderu segurueuati eskachi uaaka tekaantani jiáni enga kánikua no sési nitamakuarhinhaaka (Rom. 5:3). ¿Andichisï ísï uandajki? Uánikua erachiichaksï uandasïndi eska méni engaksï tekaantajka problema ma, sánderuksï uinhapiti jarhasïndi paraksï úni tekaantani máteru problemani engaksï jatsijka. Engaksï Tata Diosï Jeobaeri jarhuajperata jimbo újka tekaantani uandanhiata ma, imeechaksï sánderu mintsikasïndi eska ima uékasïnga jarhuataani ka indeni ambe jimbo, imeechaksï úsïndi tekaantani máteru problemani engaksï jatsijka (Sant. 1:2-4). w23.07 3 párr. 7, 8

Jimboka Tata Diosï Jeoba kaxumbitiiska ka pʼamojpitiini, ima kurhangusïndi ka no inchandimesïndi. Pori ejemplu, jiáni enga uékani japka Sodoma anapuechani kʼamajkuani xarhataspti eska kaxumbitiispka. Ánjeliichani máru úraspti paraksï arhini Lotini eska juátarhisï nipiringa sïpakuarhini. Peru Loti, kánikua chésïreendi jimeesïsï nirani. Jimbosï mintsita jingoni kurhakupti Tata Diosïni eska jurajkupiringa eska ima ka imeeri familia Soári nipiringaksï, ireta sapichu ma jimbo enga Tata Diosï ístu eratsetini japka kʼamajkuni. Tata Diosï Jeoba úpirindi inchandimentani ka arhini Lotini eska jatsispka para meru ísï úni eska ima na uandapkia. Peru no ísï úspti, ima jurajkuspti eska Loti úpiringa ambe enga uékeenga, nájkiruka indeni ambe jimbo Tata Diosï no kʼamajkupiringa Soárini (Gén. 19:18-22). Uánikua uéxurhini tátsekua Tata Diosï pʼamojkuaspti Nínibe anapuechani. Axaspti profeta Jonásini para arhiani eskaksï imeecha ka ireta kʼamajkunhapiringa, jimbokaksï kánikua no sési úriispka. Peru engaksï Nínibe anapuecha móantapka, Tata Diosï Jeoba pʼamojkuaspti ka no kʼamajkuspti iretani (Jon. 3:1, 10; 4:10, 11). w23.07 21 párr. 5

¿Ambechi jorhenguarhisïni Jeoásiiri ambe? Ima ísïispti eska anhatapu ma enga sïranguechani no xáni iauani inchatsekurhitini jatsiajka; ka paraka úpiringa uíuinhasï jarhani, uétarhinchasïreendi eska nema jarhuatapiringa, ísï eska na úpka kʼéri saserdoti Jeoiadá. Enga i uarhipkia, Jeoási ueenaspti kurhajchaani apostateechani ka jurajkuspti Tata Diosï Jeobani. I ejemplujtsïni jorhendasïndi eskachi no jatsiska para chénharhini Tata Diosï Jeobani nomasi jimbokaksï máteru erachiicha ísï uaaka ka juchaari familiariicha, o jimbokajtsïni iicha apoiarisïnga. Parachi jucha no jurajkuni Tata Diosï Jeobani, jatsiskachi para jorhenguarhini eratsentani ka mémindu kómarhini. Inde ambejtsïni jarhuataati parachi sánderu xénchani ka janhanharhini Tata Diosï Jeobani (Jer. 17:7, 8; Kol. 2:6, 7). Tata Diosï Jeobajtsïni no kurhachesïndi ambe ma engachi jucha no uaaka úni. Eclesiastés 12:13 uandasïndi ambe enga ima erokuarhijka juchaari ambe: “Kánikua janhanharhi Tata Diosïni enga jurhimbitiika ka ú ambe enga ima juramujka, jimbokaksï ini ambesï jatsika para úni kʼuiripuecha”. Engachi jucha chénharhiska Tata Diosï Jeobani, uaakachi orhepani uérakuni náki uéjki uandanhiatani ka uaakachi kurhajchani ka no ma ambe uaati eskachi nóteru sési pájperaakia Tata Diosï Jeoba jingoni. w23.06 19 párr. 17-19

Tata Diosï ini uandakuechani jingoni xarhatasïndi eska kumpliriuaka ambe enga aiatspejka: “Ima enga kʼéri uaxantskuarhu uaxakatini japka, uandaspti” (Apok. 21:5a). Tata Diosï Jeoba tanimu xanhari uandasïndi libru de Apokalipsisi jimbo ka i jindeesti ma xanhari, jimboksïsï xáni jukaparhakueti i uandakuecha. Ísï jimbo Tata Diosï Jeobasï aiatspeni jati ini ambe, no ánjeli ma, ni Jesúsi. Ka i ambe úsïndi eskachi seguiriuaka mintsikaani uandakuechani engaksï jimini seguirijka arhini, jimboka Tata Diosï Jeoba ‘no chkuanderasïnga’ (Titu 1:2). Ísï jimbo, uaakachi mintsikani ambe enga Apokalipsisi 21:5, 6 uandajka. Ju je exeni uandakuani “¡Exe!”. Uandakua enga griegu jimbo tradusirikuarhika “¡Exe!” uánikua uelta jarhasti libru de Apokalipsisi jimbo. ¿Ka ambe seguirisïni arhini? Tata Diosï uandasïndi: “Jimbanhi úntaxaka iámindu ambe”. Nájkiruka Tata Diosï Jeoba sánderu orhepatinisï uaaka iámindu ini ambe, ima xáni seguru jarhasti eska i ambe úkuarhiaka jimbosï ísï uandajti iiri ambe enajki úkuarhini jakiia (Is. 46:10). w23.11 3 párr. 7, 8

Apostoli Pedru jatsispti para seguiriini mójtakurhini. Ju je exeani máru ejempluechani. Enga Jesúsi aianguani japka eska jatsispka para kómu nitamakuarhini ka uarhini parakaksï kumplirikuarhipiringa Biblieri profesiecha, Pedru xukaspti (Mar. 8:31-33). Ka someni, Pedru ka máteru apostoliichaksï arhirperani jarhasïreendi né jindeespi sánderu kʼéri ambe (Mar. 9:33, 34). Ka ima chúrikua ante de Jesúsi uarhini, Pedru xáni ikiaspti enga kutsïkua pʼikupka acheetini ma (Juanu 18:10). Ístu ima mismu chúrikua, kánikua chéspti ka tanimu xanhari uandaspti eska no mítespka Jesúsini, imeeri amigu (Mar. 14:66-72). Pedru jurajkutakuarhispti uerani xáni no sési pʼikuarherani inde ambe jimbo. Enga Pedru no sési pʼikuarherani japka, Jesúsi no arhispti eska nóteru úpiringia imani marhuakuni. Enga na tsíntapkia, jurajkuspti eska Pedru xarhatakupiringa na enga xáni xéncheenga. Jesúsi arhispti Pedruni eska kaxumbikua jingoni eranguapiringa imeeri karichiichani (Juanu 21:15-17). Ka Pedru kánikua tsípikua jingoni jiókuarhispti indeni ánchikuarhitani, jimbosï Jerusaléni japti jiáni enga kʼuínchikua úkuarhipka Pentekostesi ka ima jindeespti ma imeecheeri engaksï orhetku erakunhapka espiritu santu jimbo. w23.09 22 párr. 6, 7

Apostoli Pedru ístu arhiaspti máteru kristianuechani engaksï orhejtsïkutiipka: “Exeani ja je Tata Diosïiri karichiichani” (1 Ped. 5:1-4). Míteskachi eskaksï orhejtsïkutiicha xénchaasïnga erachiichani ka ístuksï uékasïndi kuidariuani. Joperu ménichanksï úpirindi ísï pʼikuarherani eska difisiliiska indeni ánchikuarhitani úni, jimbokaksï kánikua ánchikuarhita jatsisïnga o kuataratinksï jarhani. Enga chá ísï pʼikuarherajka, ¿ambejtsï uaa úni? Aiangu je Tata Diosï Jeobani na engajtsï pʼikuarherajka. Pedru i ambe karaspti: “Enga nema jántspikuajka máteruechani, eska ísï uaaka Tata Diosïiri uinhapikua jimbo” (1 Ped. 4:11). Jamberiksï erachiicha problemeechani jatsiajti engaksï no uaaka sési niántani ini jurhiatikuecha jimbo. Joperu orhejtsïkutiicha, miá je eska tata Jesukristu, uaaka sánderu kánikua ambe úni imeechani jimbo ka eska chá, iáiasï ka ístu sánderu orhepatini, jimboka ima jindeeska “sánderu kʼéri karichi eranguti”. Ambe enga Tata Diosï Jeoba uéjka jindeesti eskaksï orhejtsïkutiicha xénchauaka erachiichani, sési kuidariuani ka eskaksï imeecha ueenaka “sési jámani”. w23.09 29, 30 párr. 13, 14

Nóchi uékasïnga májkueni eratseni eska parhakpini anapuecha. Engachi jucha ueenaska májkueni eratseni eska imeecha, úpiringachi jurajkuni Tata Diosï Jeobani ka nóteruchi kurhajchania imeeri juramukuechani (1 Kor. 3:19). Sáno méntkisï, “parhakpini anapu jorhengua” úsïndi eskachi jucha imani ambe uaaka engachi tsitijka, peru enga Tata Diosï no sési exejka. Ju je exeni ambe enga úkuarhinchapka Pérgamu ka Tiatira anapu kúnguarhikua. Máru kristianuechaksï májkueni eratsesïreendia eska imeecha engaksï ísku jándikua ambe niáteenga ka engaksï diosï úkateechani kómarhiauenga. Jesúsi uinhamu xukaaspti ini tsimani kúnguarhikuechani jimbokaksï ísku jándikua ambe niátaxapka (Apok. 2:14, 20). Ka ini jurhiatikuechani jimbo, kʼuiripuechaksï uékasïndi eskachi juchajtu májkueni eratseaka eska imeecha. Jamberiksï juchaari familiariicha o imeecha engachi jucha míteaka, arhiatijtsïni eskachi uaaka ambe engajtsïni juchaari mintsita arhijka ka eskachi no kurhajchauaka Tata Diosï Jeobaeri juramukuechani. Jamberijtsïni arhijti eska no no sési jarhaska úni ambe engachi jucha uékaaka ka eskaksï Biblieri juramukuecha nóteru marhuasïngia iásï. Jamberichi ménichani eratsejka eskajtsïni Tata Diosï Jeoba jatsipiringa parajtsïni sánderu sési arhistachini ima ambeeri engachi jatsika para úni. Jamberichi asta jucha mismu uékapiringa jukari ambe jatsikuntani ima ambeeri enga ʻkarakata jakaiaʼ (1 Kor. 4:6). w23.07 16 párr. 10, 11

María, Jesúsiiri amamba, kánikua uinhapikua uétarhinchaxapti. Charhakuni ma kánguarhipirindi, peru nótki uambuchatixapti. María no mítespti néna tʼarhexerani charhakuni ma, ka imani enga tʼarhexerapiringa jindeepirindi Mesíasi. No nemani jingoni jatsixapti relasioni seksuali, peru iásï jatsipirindia para aianguni Joséni, enga jingoni uambuchapiringa, eska sapini ma kánguarhipiringa (Luk. 1:26-33). ¿Néna intsïnhaspi María uinhapikua? Jurajkuspti eskaksï máteruecha jarhuatapiringa. Pori ejemplu, arhispti ánjeli Gabrielini eska aiangupiringa sánderu ambe ima ánchikuarhiteeri enga Tata Diosï Jeoba íntskuni japka (Luk. 1:34). Sánisï tátsekua, niraspti iretarhu ma enga Judá japka para pʼorhembini Elisabetini enga imeeri parienti máepka. Elisabeti felisitariispti Maríani, ka Tata Diosïiri espiritu jimbo uandaspti profesia ma ima charhakueri enga María kánguarhipiringa (Luk. 1:39-45). Ka María arhispti Elisabetini eska Tata Diosï Jeoba imeeri jájki jingoni xarhataspka na “enga xáni uinhapitiika” (Luk. 1:46-51). Tata Diosï Jeoba úraspti ánjeli Gabrielini ka Elisabetini para uinhaperantani Maríani. w23.10 14, 15 párr. 10-12

Jarhasti grupu ma 144,000 kristianuecheeri engaksï espiritu santu jimbo erakunhaka ka engaksï ambakiti pájperakua ma jatsika Tata Diosï Jeobani jingoni. Iichaksï saserdotiuati Jesúsini jingoni jini auandarhu (Apok. 14:1). Engaksï útasï Echerirhu jarhajka, Tata Diosï imeeri espiritu jingoni erakuasïndi ka ísï pʼíkuantasïndi komueska imeeri uájpeecha. Tabernakulurhu anapu Pímbinhasï Kuartu, arhikuekasïndi na engaksï xáni sési pájperajka Tata Diosïni jingoni (Rom. 8:15-17). Sánderu Pímbinhasï Kuartu, auandani arhikuekasïndi nani enga Tata Diosï Jeoba irekaka. Ka “kortina” enga arhukueenga Pímbinhasï Kuartuni Sánderu Pímbinhasï Kuartuni jingoni, Jesúsiiri kuerpuni arhikuekasïndi. Inde kuerpu ójkutasïreendi Jesúsini para auandarhu inchani ka para Sánderu kʼéri Saserdotiini Tata Diosïiri templurhu. Ka enga Jesúsi ísï íntspika imeeri kuerpuni kʼuiripuechani jimbo, úspti eskaksï kristianu erakukateecha úpiringa auandarhu irekani. Ka parakaksï erakukateecha uaaka auandarhu irekani ístuksï jatsisti para jurajkuani imeecheri kuerpuechani engaksï kʼuiripeteerika (Ebr. 10:19, 20; 1 Kor. 15:50). w23.10 28 párr. 13

Gedeóni mítespti eska no perfektuespka ka engaksï Efraíni anapu acheetiicha arhipka eska no sési úspka ambe ma, ima no ikiaspti (Juec. 8:1-3). Enbesi de ikiani, kaxumbikua xarhataspti jimboka jingontku kurhajchaaspka ka iatsitakuarhu arhiaspti ambe ma, ka inde ambe úspti eskaksï ima acheetiicha nóteru ikiani japiringia. Orhejtsïkutiicha engaksï jánhastiika, májkuenksï úsïndi eska Gedeóni. Enga nema arhiajka eskaksï no sési úska ambe ma, jingontkuksï kurhajchasïndi ka sésiksï kurhakuasïndi (Sant. 3:13). Engaksï ísï újka, jarhuajpesïndiksï paraksï iáminduecha sési pájperani kúnguarhikuarhu. Enga Gedeóni sési ambe arhinhapka jimboka andaaspka Madiáni anapuechani, ima arhispti iretani eskaksï kʼéri ambe arhipiringa Tata Diosï Jeobani (Juec. 8:22, 23). ¿Nénaksï uaa májkueni úni orhejtsïkutiicha? Ísïksï úsïndi engaksï kʼéri ambe arhijka Tata Diosï Jeobani imani ambe jimbo engaksï sési úka (1 Kor. 4:6, 7). Pori ejemplu, engaksï orhejtsïkutini ma felisitarijka jimboka sési jorhentpisïnga, ima uaati uandani eska iámindu ambe enga uandaka, Tata Diosïiri Uandakuarhu pʼitakata jarhaska ka eskachi iámindu úsïnga uánikua ambe jorhenguarhini jimbokajtsïni Tata Diosï Jeobaeri organisasioni jorhendasïnga. Kánikua sésiisti eskaksï ménichani orhejtsïkutiicha kurhamarhikuarhiaka sini na engaksï jorhentpijka kʼéri ambe arhisïni Tata Diosï Jeobani, oksï solu uékasïni eskaksï kʼéri ambe arhiauaka imeechani. w23.06 4 párr. 7, 8

Engachi no intsïnhaska ima ambe engachi kómarhikuarhu kurhajkuarhika, úpiringachi kurhamarhikuarhini: “¿Sési jarhaski ambe engani kurhajkuarhini jaka?”. Ménichani jucha ísï eratsesïnga eskachi míteskia ambe engachi uétarhinchani jarhajka. Joperu jamberi ambe engachi kurhajkuarhini jaka nójtsïni marhuacheati para sánderu orhepatini. Jamberichi kómarhini jaka paraka problema sési niántaaka ísï eskachi jucha na uéjka, joperu jamberichi úpiringa máteru ambe úni parachi sési peentani problemani, ka jamberichi imani ambe kurhajkuarhini jaka enga Tata Diosï Jeoba no jaiapanhintajka (1 Juanu 5:14). Pori ejemplu, ju je exeni taatiicheri ejemplu engaksï kurhakupka Tata Diosï Jeobani eska úpiringa eska imeecheri sapi seguiriipiringa marhuakuni imani. Úpirindi ísï xarharani eska ambakiti ambeespka ambe engaksï kurhajkuarhini japka, joperu Tata Diosï Jeoba no úsïndi eska nema afuersa marhuakuaka. Ima uékasïndi eskachi iáminduecha marhuakuaka jimbokachi uékasïnga ísï úni (Deut. 10:12, 13; 30:19, 20). Jimajkani, ¿taatiichaksï ambe úpirini kurhakuni Tata Diosï Jeobani? Eska jarhuatauaka mintsitarhu niárakuni imeeri uájpani paraka xénchaaka Tata Diosï Jeobani ka imeeri amigueni (Prov. 22:6; Éfes. 6:4). w23.11 21 párr. 5; 23 párr. 12

¿Andichisï uékperakua xarhatakuajki máteruechani engachi sési pʼikuastantajka? Libru ma enga Biblieri ambe uandajka, uandasïndi eska uandakua “sési pʼikuatsperantani” enga Pablu úrapka, griegu jimbo arhikuekasïndi “kʼuiripueri máekandu jarhani para uinhaperantani enga k’éri uandanhiata ma nitamakuarhini jauaka”. Ísï jimbo, engachi sési pʼikuastantajka erachini ma enga no sési nitamakuarhini jarhajka, jarhuatani jarhasïngachi paraka seguiriuaka sési marhuakuni Tata Diosï Jeobani. Ka méntkisï engachi sési pʼikuastantajka erachiichani xarhatakuani jarhasïngachi eskachi xénchaasïnga (2 Kor. 7:6, 7, 13). Pʼamojpeni ka sési pʼikuastpentani, márkuksï úkuarhintatixati. ¿Andichisï ísï uandajki? Jimboka enga kʼuiripu ma pʼamojkujka nemani enga kómu nitamani jarhajka uékasïndi sési pʼikuastantani ka jarhuatani. Peruchi orheta pʼamojkusïnga ka inde ambe úsïndi eskachi uékaaka sési pʼikuastantani. Májkueni úkuarhisïndi Tata Diosï Jeoba jingoni, Pablu uandaspti eska pʼamojperakua enga Tata Diosï pʼikuarherajka kʼuiripuechani jimbo úsïnga eska uékaaka sési pʼikuastantani, ima uandaspti eska Tata Diosï Jeoba jindeeska “Taati enga xáni pʼamojpejka ka ima jindeesti Tata Diosï enga iámindu ambe jimbo sési pʼikuastpentajka” (2 Kor. 1:3). w23.11 9, 10 párr. 8-10

Iámindu kristianuechachi mítetixaka eskachi niáraaka no sési nitamakuarhini. Ju je miáni ambe enga apostoli Pablu arhiapka Tesalónika anapu kristianuechani: “Engani jucha chánksïni jingoni japka, juchaksïni aiangusïreenga eskachi no sési ambe nitamakuarhipiringa, ka chájtsï exeskia eska ísï úkuarhiska” (1 Tes. 3:4). Ka Korintu anapuechani ísï karakuaspti: “Jucha uékasïnga eskajtsï chá mítetini jauaka na engachi no sési nitamakuarhika [...] engachi jamberi no mítepka sinchi tsípiti pakarapirini o nómbe” (2 Kor. 1:8; 11:23-27). Ka ini jurhiatikuechani jimbo májkueniisti, kristianuechachi mítetixaka eskachi uandanhiata ambe jatsiaka (2 Tim. 3:12). Engajtsï ueenaka mintsikani Jesúsini ka chúxapani, jamberiksïni chaari amiguecha o familiariicha niárastiksïni no sési kámani. ¿Jatsiaskijtsï chá uandanhiateechani chaari ánchikuarhitarhu jimbokajtsï uékasïnga jurhimbiti úni iámindu ambe? (Ebr. 13:18). ¿Juramutiichaksïni no sési kámasïni jimbokajtsï aianhpixaka ambe engajtsï erokuarhini jaka? Náki uéjki uandanhiateechanchi jatsiani, Pablu uandaspti eskachi jatsiska para kánikua tsípini jarhani. w23.12 10, 11 párr. 9, 10

Peru Jakobu ístu uánikua problemeechani jatsiaspti. Tsimani Jakobueri uájpeechaksï —Simeóni ka Lebí— no sésiksï pakataspti imeeri familiani ka ístu Tata Diosï Jeobaeri nombrini. Tátsekua, imeeri témba Rakeli enga Jakobu xáni xéncheenga, uarhispti enga kánguarhini japkia imeeri segundu uájpani. Ka jimboka uánikua uéxurhini no jarhaspka tʼirekua jima enga Jakobu irekapka, ima Ejiptu niraspti irekani ka jiánisï kánikua jatiriisptia (Gén. 34:30; 35:16-19; 37:28; 45:9-11, 28). Nájkiruka iámindu indeni ambe nitamakuarhipka, Jakobu méntkisï mintsikaspti Tata Diosï Jeobani ka ambe enga ima aiakupka. Ka Tata Diosï Jeoba xarhatakuspti eska ima sési exesïreenga. Pori ejemplu ima niáraspti uánikua ambe jatsikuarheni Tata Diosïiri jarhuajperata jingoni. Ka seguru eska Jakobu kánikua agradesidu pʼikuarherapka Tata Diosïni jingoni enga uánikua uéxurhini tátsekua úpka ménderu exentani Joséni, enga ísï eratseenga enajki uarhipia. Jakobu úspti tekaantani iámindu indeni ambe jimboka sési pájperasïreenga Tata Diosï Jeoba jingoni (Gén. 30:43; 32:9, 10; 46:28-30). Engachi juchajtu kánikua sési pájperaska Tata Diosï Jeoba jingoni, ístuchi uaaka tekaantani uandanhiateechani engachi ma repentku jatsiauaka. w23.04 15 párr. 6, 7

Salmo 23 jimbo, Dabidi uandaspti eska seguru jarhaspka eska Tata Diosï Jeoba xénchasïreenga ka eska uékperakua jingoni kuidarisïreenga. Uandaspti eska Tata Diosï Jeoba ísïispka para ima komueska Karichi eranguti ma, ka ístu uandaspti na engaksï xáni sési pájpereenga tsimarhani. Dabidi no chésïreendi jimboka Tata Diosï Jeoba jarhuatasïreenga ka iámindu ambe jimbo mintsikasïreendi. Ístu Dabidi mítespti eska Tata Diosï Jeoba méntkisï xénchapiringa astaka uarhipiringa. ¿Andisï Dabidi xáni seguru japi eska Tata Diosï Jeoba xénchasïreenga? Dabidi exesïreendi eska Tata Diosï Jeoba sési kuidarisïreenga jimboka méntkisï íntskusïreenga ambe enga uétarhincheenga. Ístu mítespti eskaksï sési pájperasïreenga ka eska Tata Diosï Jeoba jaiapanhentasïreenga. Ísï jimbo, ambe uéjki enga Dabidi nitamakuarhipiringa, seguru jarhaspti eska Tata Diosï íntskupiringa ambe enga uétarhinchapiringa. Mítespti eskaksï ísku ambe máespka ima uandanhiateecha enga jatsiapka enga eratsenteenga na enga xáni xéncheenga Tata Diosï Jeoba, ka jimbosï sési pʼikuarhereendi ka tsípikua jingoni jámani (Sal. 16:11). w24.01 28, 29 párr. 12, 13

Desde enga kʼamakurhika Segunda Guerra Mundiali, Tata Diosï Jeobaeri marhuariichaksï úxati aianhpini uánikua paisiicharhu no ma ójkutakua jingoni. Uánikua kʼuiripuechaksï niárastia míteni Tata Diosï Jeobani, ka i aianhperakua iámu parhakpinirhu aianhpinhaxati. Ini jurhiatikuechani jimbo, Grupu enga Orhejtsïkuajka iámindu kúnguarhikuechani jurajkusïndi eska tata Jesukristu jarhuatauaka. Méntkisïksï jánguarhintasïndi exeni eska ambe engaksï jorhentpiaka terukuntaaka imani ambe jingoni enga Tata Diosï Jeoba uéjka ka ístu Jesúsi. Sirkuitueri orhejtsïkutiichani jimbo ka ístu orhejtsïkutiichani úrapariani, arhiasïndiksï kúnguarhikuecharhu anapuechani ambe engaksï jatsika para úni. Erakukateecha engaksï orhejtsïkutiika, ka ístu iámu kúnguarhikuarhu anapu orhejtsïkutiicha, Kristueri “jájki jurhijkandani” jimboksï jarhasti (Apok. 2:1). Ísïisti, íksï orhejtsïkutiicha no perfektuesti ísï komueska Moisési, Josué ka apostoliicha, ka ménisïksï no sési ambe erakusïndi úni (Núm. 20:12; Jos. 9:14, 15; Rom. 3:23). Joperuchi míteska eska Jesúsi jarhuataxaka jántspirini enga mintsinharhikueka ka ístu orhejtsïkutiichani ka seguiriini jauati ísï úni. Ísï jimbo, uaakachi mintsikani eskajtsïni Tata Diosï jarhuatasïnga ini erachiichani úrapariani. w24.02 23, 24 párr. 13, 14

Engachi jucha xénchperakua jingoni uandajka Tata Diosï Jeobaeri ambe ka engachi xarhatakujka eskachi agradesidu jarhaska, kʼéri ambechi arhini jarhasïnga. Engachi aianhpijka, ambe engachi sánderu jánguarhintajka úni jindeesti jarhuatani kʼuiripuni paraka uékaaka andarhierani Tata Diosïni ka májkuenksï xénchani eska jucha (Sant. 4:8). Tsitisïngachi exeraani kʼuiripuechani Biblia jingoni na enga xáni xénchpetiika Tata Diosï, imeeri jurhimbikuani, jánhaskakuani ka uinhapikuani. Ístuchi úsïnga k’éri ambe arhini Tata Diosï Jeobani ka tsíperani imeeri mintsitani engachi jánguarhintajka ísï úni ambe ma eska ima na újka. Engachi ísï újka, jamberiksï kʼuiripuecha exejti ka kurhamarhikuarhini andichisï no májkueni jámajki eska máteruecha (Mat. 5:14-16). Jamberichi úpiringa aianguani andichisï no májkueni Ka ísïksï ima kʼuiripuecha engaksï ambakiti mintsita ma jataka uékanksï sánderu ambe míteni Tata Diosï Jeobaeri. Engachi ini ambe újka para kʼéri ambe arhini Tata Diosï Jeobani tsíperasïngachi imeeri mintsitani (1 Tim. 2:3, 4). w24.02 10 párr. 7

Parari niárani kristianu máeni enga jánhaskatiika, jatsiskari para jorhenguarhini imani ambe úni engakeni marhuacheaka. I ambekini jarhuataati parari sési kumpliriini responsabilidadi ma kúnguarhikuarhu, parari úni exentani ka jatsini ánchikuarhita ma ka parari úni maiampikuarhini chiiti ambe ka chiiti familieri ambe ka ístu parakari uaaka sési pájperani máteruecha jingoni. Pori ejemplu, jorhenguarhi sési arhintani ka karani. Biblia uandasïndi eska kʼuiripu ma niárasïnga tsípikua jingoni irekani ka eska sési uérakusïnga ambe ma enga arhintajka Tata Diosïiri Uandakuani ka eratsentani (Sal. 1:1-3). Ísï niárasïndi míteni na enga exejka Tata Diosï Jeoba ambe ma ka inde ambe jarhuatasïndi sési eratsentani ka kurhanguni ambesï jatsi para úni (Prov. 1:3, 4). Erachiicha ka pirenchiichaksï uétarhinchaasïndi erachiichani engaksï jorhendauaka ka ambakiti konseju íntsaani Biblia jingoni. Engari sési jorhenaaka arhintani ka ístu karani, uaakari preparariuani chiiti diskursuechani ka ambakiti komentariuechani íntspiani ka ísïri jarhuatauaka máteruechani paraksï sánderu mintsikani Tata Diosïni. Ístu uaakari imani ambe karani engakeni jarhuataaka para tʼu mismu sánderu mintsikani Tata Diosïni ka uinhaperantani máteruechani. w23.12 26, 27 párr. 9-11

Engajtsï chéni pʼikuarherani jauaka, eratsenta je ambe enga uaaka Tata Diosï Jeoba sánderu orhepani. Eranhaska je na enga jándeaka enga Satanási nóteru jauakia ni no ambarhati kʼuiripuecha ka soluksï ambarhati kʼuiripuecha irekani engaksï sánhani arhiaka perfektueni. Uéxurhini 2014 jimbo kʼéri tánguarhikua rejioniri, demostrasioni ma xarhatanhaspti engajtsïni uaaka jarhuatani eratsentani imani ambe engachi erokuarhini jaka. Jimini erachi ma uandontskuarhespti imeeri familia jingoni na enga arhipiringa 2 Timoteu 3:1-5 enga profesia máepiringa para jimbanhi parhakpinirhu: “Jimbanhi parhakpinirhu kánikua sési jánhaskuarhiati. Jimbokaksï kʼuiripuecha xénchperaaka; kánikuaksï jukaparharaati Tata Diosï Jeobaeri ambe, sésiksï jámaati ka kaxumbitiini, kʼéri ambeksï arhiati Tata Diosïni, kurhajchauatiksï taatiichani, kánikuaksï agradesidueuati, mintsinharhikueuatiksï, kánikuaksï xénchaati imeeri familiani, uékaatiksï sési peentani ambe ma, méntkisïksï sési uandaati máteruecheri ambe, pʼíngukuarhiatiksï, sésiksï jámaati, jukaparharaatiksï ambakiti ambe, mintsinharhikueuatiksï ka jorhenaatiksï kurhangutspini, nóksï sáni kʼéramakuarhiati, sánderuksï xénchaati Tata Diosïni ka eska tsípikuarhini ka mintsita jingonksï janhanharhiati Tata Diosïni. Asï méni jarharia indeni járhati kʼuiripuechani”. ¿Pʼíndeskichi uandontskuarheni juchaari familia jingoni o erachiicha jingoni nénachi irekaa jimbanhi parhakpinirhu? w24.01 6 párr. 13, 14

¡Xáni enga sésiika míteni eska “Tata Diosï Jeoba kánikua sési pʼikuarherasïnga imeeri iretani jimbo”! (Sal. 149:4). Joperuksï máru uaati desanimarikuarhini ka eratseni: “Ísïisti eska Tata Diosï Jeoba sési pʼikuarherasïnga imeeri iretani jimbo, joperu ¿sési pʼikuarherajki jíndeni jingoni?”. Ióntki jarhasptiksï uánikua Tata Diosïiri marhuariicha engaksï ménisï niárapka úkua jukanchani jakajkuni eska Tata Diosï Jeoba jaiapanhentasïreenga (1 Sam. 1:6-10; Job 29:2, 4; Sal. 51:11). Biblia arhisïndi eskajtsïni Tata Diosï Jeoba uaaka jaiapanhentani nájkirukachi no perfektueka. Parajtsïni ima jaiapanhentani, ¿ambechi jatsiski para úni? Jatsiskachi para xarhatani eskachi mintsikasïnga tata Jesukristuni ka ístuchi jatsiska para itsï atakuarhini (Juanu 3:16). Engachi itsï atakuarhijka xarhatasïngachi iáminduechani japarini eskachi móantaskia ka eskachi aiakuskia Tata Diosïni eskachi uaaka ambe enga ima uéjka (Úku. 2:38; 3:19). Ka Tata Diosï Jeoba kánikua sési pʼikuarherasïndi enga exejka eskachi úsïnga ambe engajtsïni ima kurachijka parachi imeeri amigueni. Engachi jucha jánguarhintajka úni ambe engachi aiakukia, Tata Diosï Jeobajtsïni jaiapanhentasïndi ka ísïjtsïni exesïndi eska imeeri amiguecha (Sal. 25:14). w24.03 26 párr. 1, 2

Uaakachi májkueni úni eska Jesúsiiri chúxapatiicha ka seguiriini aianhpini nájkirukajtsïni juramutiicha arhiaka eskachi no ísï uaaka. Uaakachi seguru jarhani eska Tata Diosï Jeobajtsïni jarhuataaka aianhpini. Ísï jimbo kurhaku jánhaskakua ka balori, ka ístu ju je kurhakuni Tata Diosï Jeobani eskajtsïni jarhuataaka orhepani uérakuani uandanhiateechani. Uánikuechachi no sési nitamakuarhixaka jimbokachi uarhiranchaska nemani, jimbokachi no sési kánhaxaka, o jimbokachi pʼamenchaxaka o kánikua kómu pʼikuarherani jarhani o jimboka jarhaska ambe ma familiarhu. Ka pandemiecha ka guerreecha, úsïndiksï eska sánderu úkua jukaaka orhepani uérakuni indeni ambe. Ísï jimbo, mintsita jingoni aiangukuarhi je Tata Diosï Jeobani na engajtsï pʼikuarherani jaka, ísï eskajtsï na úpiringa ambakiti amigu ma jingoni ka uaakajtsï seguru jarhani eskaksïni Tata Diosï Jeoba jarhuataaka (Sal. 37:3, 5). Méntku kómarhini jarhani, jarhuatasïndijtsïni parachi úni tekaantani engachi no sési nitamakuarhini jarhajka (Rom. 12:12). Tata Diosï Jeoba mítesti ambe engaksï nitamakuarhijka imeeri marhuariicha ka “kurhaasïndi engaksï uinhachaparini jarhuajperata kurhajkuarhijka” (Sal. 145:18, 19). w23.05 5, 6 párr. 12-15

Engachi eratseni jauaka ambe ma úni, jatsiskachi para exeni “ambesï uéjki Tata Diosï Jeoba” eskachi uaaka, ka iásï kʼóruchi uaakia erakuni ambe úni (Éfes. 5:17). Engachi jirinhantani jarhajka Bibliarhu anapu prinsipiu ma engajtsïni jarhuataaka, sési jimbochi exeni jarhasïnga na eratsesïni Tata Diosï Jeoba indeeri ambe. Engachi ísï uaaka, eska ima prinsipiuecha na arhijka, ambakiti ambechi erakuaka úni. Satanási tsitipirindi eskachi sánderu okupadu japiringa parhakpini anapu ambe jingoni parachi no jatsini tiempu para Tata Diosïni marhuakuni (1 Juanu 5:19). Ísïisti, kánikua fásiliisïndi uékani sánderu sentabu jatsini, sánderu estudiariini eskuelarhu o sánderu ánchikuarhitani enbesi de exeni néna sánderu sési marhuakuni Tata Diosï Jeobani. Indeni ambe uékani úni, no no sési jarhasti, joperu engachi sánderu jukaparharaska indeni ambe juchaari tsípikuarhu, jiájkanchi ísï eratseni japiringia eskaksï i parhakpini anapuecha. w24.03 24 párr. 16, 17