“Nóteruni uékasïngia mójtakuni na engaksï eratsejka kʼuiripuecha”

NA ENGANI IREKAPKA IÓNTKI:

Desde sapichu úndantku kánikua tsitisïreenga kueraakata ambe. Somenchi nirasïrenga juátecharhisï xanharani juchiiti familia jingoni o laguecharhisï engaksï iámu Jyväskylä uirhipandajka ixú Finlandia. Ístuni kánikua tsitiasïnga animalichani. Engani sapiipka, kánikua tsitisïreenga kamanharhiani uichuechani ka místuechani engani exeauenga. Engani na kʼépkia, no sési pʼikuarheraspka engani exeenga na engaksï no sési kaauenga animalichani. Ísï jimbo, kúnguarhikuarhu ma kúparakuspka enga animalichani kuájchakuauenga ka jima míteaspka máteru kʼuiripuechani engaksï májkueni eratsenga eska ji.

Kánikuachi jánguarhintaspka para animalichani kuájpiani. Mámaru ambechi aianhpiska ka marchechanchi uaaspka parakaksï no japiringa tiendecha engaksï ataranteenga xukuparhakua enga sïkuiriri úkateenga, nijtu laboratoriuechani engaksï animalicha jingoni tsʼéjkujka sïpiata o máteru ambe. Ka ísïchi niáraspka máteru kúnguarhikuani úni para animalichani kuájpiani. Peru imani ambe jimbo enga juchaari kúnguarhikua ueenga, somenchi arhijperasïreenga juramutichani jingoni ka somentsïni ónhaspti.

Peru no solu uandanhiasïreenga animalicha jimbo, sino ístu máteru ambe jimbo enga úkuarhini japka parhakpinirhu. Ísï jimbo, máteru kúnguarhikuecha jimbo inchaparhakuspka komu Amnistía Internacional ka Greenpeace, ka mintsita jingoni jarhuajpespka imani kúnguarhikuecha jimbo. Ístu kánikua jánguarhintaspka parakaksï jarhuatanhapiringa ima kʼuiripuecha engaksï no jatsikuarheripka.

Peru enga na tiempu nitamapkia exespka eskani no úpiringa mójtakuni na engaksï eratsejka kʼuiripuecha. Nájkirukachi ménichanisï ueenga sési peentani máru ambe, joperuksï jarhaspti máteru uandanhiatecha enga no nema ueenga sési peentani. Ísï xarharasïreendi enajki no nema uandanhiaueni para ambakiti ambe úni. Ka ji kánikua no sési pʼikuarherasïrenga jimbokani no ma ambe úsïreenga úni.

NA ENGARENI BIBLIA MÓJTAKUCHEKA IREKUA:

Kánikua kómu pʼikuarherasïreenga engani ísï no ma ambe ueenga úni, jimbosïni ueenapka Tata Diosïni miántani ka Biblieri ambe eratseni. Ji mítespkia eskaksï Jeobaeri testiguecha ambakiti kʼuiripueska ka eskaksï uandanhiasïnga máteruechani jimbo, jimbokani ióntki imeecha jingoni jorhenguarhispka Biblieri ambe, peruni jiánisï, nótki listu jarhaspka parani mójtakuni juchiiti irekuani. Joperuni iásï, ménderueni eratsesïreengia.

Jirinhantaspka juchiiti Biblia ka ueenaspka arhintani. Sésirini pʼikuastantaspti ambe engani arhintapka. Uánikua tekstuechani arhiantaspka engaksï arhijka para sési kaani animalichani. Pori ejemplu Proverbios 12:10 uandasïndi: “Ima enga jurhimbitiika kuidariuasïndi imeeri animalichani” (La Palabra de Dios para Todos). Ístuni jorhenguarhispka eska Tata Diosï no ma kulpa jatsiska imani no sési jásï ambe jimbo enga úkuarhijka parhakpinirhu, sánderu sési, sánderuksï uánikua uandanhiatecha jarhasïndi jimbokaksï sáno iámindu kʼuiripuecha no kurhajchasïnga Tata Diosï Jeobani. Peru ískurini pakataspti exeni na engajtsïni ima xáni xénchajka ka na engajtsïni xáni tekaachintajka (Salmo 103:8-14).

Jiánisï, sïranda ma exentaspka enga jindeepka para kurhajkuarhini libruni ¿Ambemindusï jorhentpejki Biblia? Ka kurhajkuarhispka eskajtsïni axachepiringa. Sánisï tátsekua, jurhasptiksï juchiniu temungurhiri ma engaksï Jeobaeri testiguepka ka arhisptijtsïni sini uékapirini jorhenguarhini Biblieri ambe ka ji arhiaspka eska jo. Ístuni ueenaspka nirani tánguarhikuecharhu Jeobaeri testiguecha jingoni. Mintsitarhurini niárachespti ambe engani jorhenguarhipka Bibliarhu.

Bibliarini jarhuataspti parani mójtakuni juchiiti irekuani. Nóteruni itsutasïreengia ka nijtuni kauini. Mójtakuspka na engani xukuparheenga ka nóteruni úraasïrengia no sési járhati uandakuechani ka jorhenguarhispka eskani jatsispka parani juramutichani ka leichani janhanharhiani (Roma 13:1). Ka ístu, nóteruni ísku jándikua ambe niátaspkia.

Ambe engani sánderu úkua jukanchapka jindeespti nóteruni jámania imani kúnguarhikuechani jingoni engani antesi jámeenga. Úkua jukanchaspka ísï úni jimbokani ísï pʼikuarherasïrenga enajkini traisionariuani japi imani kúnguarhikuechani. Peruni jorhenguarhispka eska Tata Diosïri Reinujkusï uaaka sési peentani kʼuiripuecheri uandanhiatechani, ka jiájkani ueenaspka mintsita jingoni jarhuajpeni Tata Diosïri Reinueri ambe jingoni ka jánguarhintani parakaksï iáminduecha míteaka i reinueri ambe (Mateu 6:33).

NÁKI KÓNTPERATECHANI INTSÏNHAASKIA:

Engani ji imani kúnguarhikuechani jingoni jámeenga, méntkisï eratsesïreenga eskaksï tsimani járhati kʼuiripuecha jarhaspka: kʼuiripuecha engaksï ambarhatiika ka no sési úricha, ka jirejiresï eratsesïreenga ambe úkuani imeechani engani ji eratsenga eskaksï no sési úriispka. Peru Bibliarini jarhuatasti parani nóteru nemani kurhunhinia, sino jánguarhintani iáminduechani xénchaani (Mateu 5:44). Ka parani xarhatani eskani iásï xénchpesïngia, mámaru ambe úsïnga. Pori ejemplu, nirasïnga aianhpini ambakiti aianhperakua Tata Diosïri Reinueri ambe. Kánikua sési pʼikuarherasïnga exeni na enga i aianhperakua újka eskaksï kʼuiripuecha tsípikua jingoni irekaaka ka eskaksï pínandikua jatsiaka, ka úsïndi eskaksï ambakiti erokuarhikua ma jatsiaka.

Jeobani jurajkukuni iámindu ambe, jarhuatasïndireni parani pínandikua jatsini. Sési mítetixaka eska juchaari Kuerajpiri no jurajkuaka eskaksï kʼuiripuecha ka animalicha seguiriuaka no sési úkuarhinchani, nijtu jurajkua eska kʼuiripu kʼamajkuaka echerini. Imeeri Reinu jimbo, no ióni jimbo sési peentaati iámindu ambe engaksï kʼuiripuecha no sési úka (Isaías 11:1-9). Kánikua tsípisïnga jimbokani míteska ini ambe ka ístu jimbokani jarhuataasïnga máteruechani paraksï imeechajtu mintsikani ini ambe. Iásï nóteruni uékasïngia mójtakuni na engaksï eratsejka kʼuiripuecha.