Jorhenguarhiska eska Tata Diosï Jeoba ambakitiska ka eskajtsïni puáchentasïnga

NA ENGANI IREKAPKA IÓNTKI: Barriurhu ma kʼuiripespka enga no kánikua sentabu japka jini Montreal. Juchiiti ochu ermanuecheri ji sánderu sapichuespka. Engani seisi mesicha jatiripka juchiiti taati uarhispti ka juchiiti nándi jatsispti para jandiajku kéndani kʼumanchikuani.

Desde engani sapichuepka uénaspka exeni droga ambe, na engaksï chʼaneenga sentabu úraparini, atajperakua ambe ka uánikua no sési úricha. Engani 10 uéxurhini jatiripka, jarhuatasïreenga uarhiitichani engaksï ísku jándipka ka ístu imeecha engaksï sentabu kuántpienga. Kánikua tsitisïreenga chkuanderani ka sïpakuani kʼuiripuechani. Ísïispti komueska droga ma.

Engani 14 jatiripkia kánikua jorhenaspka sïpatspeni. Pori ejemplu, uánikua relojicha piásïreenga, pulserecha ka aniiuecha engaksï sánisï orueripka, jatsikuasïrenga eskaksï 14 kilaterispka ka xanharuecharisï atarantasïrenga ka plasecheri estasionamientuecharhu. ¡Sóntku andasïreenga sentabu! Ma xanhari 10,000 dólari kanadiense andaspka ma jurhiatikua jimbojku.

Engani 15 jatiripka, petanhantaspti jima uératini engaksï tumbiicha jarhajka paraksï jurhimberanhantani, ísï jimbo nóteru nani jatsispkia para irekani. Kʼuísïreenga xanharuecharisï, parkicharhu o juchiiti amiguecheri kʼumanchikuarhu.

Indeni ambe jimbo engani atarantenga, polisiarini someni jupikaspti parareni uánikua ambe kurhamarhini. Peru jimboka inde ambe no sïpakatespka no méntsïni úspti ónhani. Ka nájkiruka jatsipka para uánikua multechani maiampiani jimbokani chkuanderatspisïrenga, sïpatspeni, falsu ambe atarantani ka jimboka ma lisensia kámasïreenga para atarantani. No mani ka no nemani chérhisïrenga, asta jarhuatasïreenga kobrarpini imeechani engaksï sentabu kuántpienga. Ka jimboka inde ambe kánikua peligrosuespka, ménichanisï arma ma kámasïreenga. Asta niáraspka ánchikuarhini mafiosuecha jingoni.

NA ENGARINI BIBLIA MÓJTAKUCHEKA IREKUA: Primeru xanhari engani uénapka kurhaani Biblieri ambe 17 uéxurhini jatirispka. Irekaxapka juchiiti nobia jingoni ka ima uénaspti jorhenguarhini Biblieri ambe Jeobaeri testiguecha jingoni. Joperu jimbokani no tsitispka Biblieri juramukuechani, jurajkuspka ka niraspka irekani máteru uátsï jingoni engani tʼuini mítepkia.

Joperu ístu i uátsï uénasti jorhenguarhini Jeobaeri testiguecha jingoni. Ískurini pakataspti na enga mójtakurhipka: sánderu sési kámpisïreenga ka tekaantstini. Ma jurhiatikuajtsïni pʼímarhispti tánguarhikuarhu ma engaksï imeecha uénga ka niraspka. Jima exeantaspka kʼuiripuechani engaksï ménderuenipka; imeechajtsïni kánikua sési jiókaspti. No méni xáni sési pʼikuarheraxapka. Engani sapichuepka juchiiti familiarini no méni xénchperakua jingoni kámaspti. Na engajtsïni kámapka Jeobaeri testiguecha jindeespti ambe engani uétarhinchani japka. Engajtsïni aiachipka Biblieri jorhenguarhikua ma, sóntku jiókuarhispka.

Ambe engani jorhenguarhipka jamberi úpti eskani no uarhipiringa. Nipiringa sïpatspeni máteru tsimani acheeticha jingoni, jimbokani uétarhinchaxapka 50,000 dólari para maiampini ambe enga xáni kántspeni japka chʼanakua jimbo. ¡Xáni sési engani no uékapka nirani! Máteru tsimanksï niraspti ka máechakuanksï uándikuspti ka máteruksï ónhani.

Ambe engani jorhenguarhini japka Biblieri ambe, jarhuatasptireni exeni eskani jatsispka para sánderu mójtakurhini. Pori ejemplu, 1 Korintu 6:​10, Biblia uandasïndi: “Imeecha engaksï sïpani jámajka, engaksï tsititspeni jámajka, engaksï kauini jámajka, imeecha engaksï uandakua ambe jauatatspejka ka imeecha engaksï euakuarpijka ambe ma, nóksï pʼiuati Tata Diosïri Reinuni”. Engani arhintapka ini tekstuni uénaspka uerani. Jatsispka para kánikua mójtakurhini (Roma 12:⁠2). Kʼuiripu máespka enga no sési kámpienga ka atajpini ka méntku chkuanderaxapka. No sési irekaspka.

Joperu ístu, jorhenguarhispka eska Tata Diosï Jeoba ambakitiska ka eskajtsïni puáchentasïnga (Isaías 1:18). Ísï jimbo kánikua kómarhispka Jeobani kurhakuparini eskarini jarhuatapiringa jurajkuani bisiuechani ka mójtakuni juchiiti irekua. Imeeri jarhuajperata jingoni sánhani arhispka mójtakurhini. Ka ma jukaparhakua ambe engachi úpka jindeespti eska juchiiti nobia ka ji tembuperaspkachi.

Imani tiempu jimbo, 24 uéxurhini jingontku, tanimu sapiicha kásïrengia. Uétarhinchaxapka ambakiti ánchikuarhita ma parani úni kéndani. Peru kasi no niraspka eskuela, jimbosïni no kánikua ambe jorhenaspka úni. Ka ménderu kurhakuspka Jeobani eskarini jarhuatapiringa ka niraspka ánchikuarhita ma jirinhani. Entrebistecharhu uandasïreenga eskani uékasïreenga mójtakuni ka sési ánchikuarhini. Ka ménichanisï uandasïreenga eskani jorhenguarhixapka Biblieri ambe para ambakiti kʼuiripu. Peru no nemarini uékaspti ánchikuarhita íntskuni. Ka ísï tátsekua enga na uandantapkia ménderu ambe enga nitamakuarhinchapka entrebistarhu ma, acheetirini arhispti: “No sési míteska andi, peru ambe marini arhisïndi eskakeni jatsiska para íntskuni ánchikuarhitani”. Seguru jarhaska eska inde jindeespti mókuntskua juchiiti kómarhikuecheri. Ka sánderu tátsekua juchiiti uarhiiti ka ji Jeobaeri testiguecha úkuarhispka.

NÁKI KÓNTPERATECHANI INTSÏNHAASKIA:

Tsípiti jarhaska jimbokani úxaka ambe enga Biblia arhijka ka ístu májkueni úxaka eska Kristu. Iásï sési jásï familia ma jatsiska ka ambakiti konsiensia ma, jimboka seguru jarhaska eskarini Tata Diosï Jeoba puáchentaskia.

Katorse uéxurhini páxakaia tiempu kompletueri marhuani: sánderu tiempu úrasïnga para jarhuataani máteruechani Biblieri ambe kurhanguni. No xáni iónisti enga juchiiti uarhiitijtu uénapka májkueni marhuani eskani ji. Ka i treinta uéxurhinichani jimbo jarhuataskia 22 ánchikuarhitarhu anapu pámpirichani paraksï ístu Jeobaeri testigu úkuarhini. Útasteru nirasïnga plasecharhu joperu no para k’uiripuechani sïpakuani komu eska ióntki ka sáno méntkisï aianguasïnga k’uiripuechani eska ambakiti aiatsperakua ma jarhaska: eska no ióni jimbo irekaakachi parhakpinirhu ma nani engaksï nóteru jauakia sïpatspiricha (Salmo 37:​10, 11).