Nanichi uá exentani jurhimbikua ambe

Desde iónisïa, jimboka no nema mítespka mókuntskua indeni kurhamarhikueri, uánikuechaksï uarhistia kʼérati pʼamenchakuecha jimbo. Tiempu jingoni, sientifikuechaksï niáraspti míteni ambe enga jimboksï úkuarhijka pʼamenchakuecha. Uandasptiksï eskaksï bakteria ka birusicha jimbo úkuarhisïnga. Míteni eskaksï pʼamenchakuecha indeni ambe jimbo úkuarhisïnga, jarhuajpisti paraksï kʼuiripuecha míteni ambe úni paraksï no pʼirani pʼamenchakua ambe ka míteni náki sïpiata sési útspisïni ka ístu para uáni kʼuiripu úni sánderu ióni irekani ka no xáni pʼamenchani.

Peruksï jarhasti máteru kurhamarhikuecha engaksï jukaparhakueka. ¿Exesïntsï eskaksïni uáka jarhuatani chári irekuarhu míteni náki mókuntskuechaksï jurhimbitkueski arini kurhamarhikuecheri?

• ¿Néski Tata Diosï?

• ¿Néski Jesukristu?

• ¿Ambeski Tata Diosïri Reinu?

• ¿Ambechi úkuarhinchaa sánderu orhepani?

Uánikua kʼuiripuechaksï míteastia mókuntskuechani ini kurhamarhikuecheri ka iásïksï sánderu sési irekaxatia. Engajtsï chájtu míteaska mókuntskuechani, ístujtsï niáraaka sánderu sési irekani.

¿UÁCHI MÍTENI IMANI AMBE ENGA JURHIMBITKUEKA?

Jimboka sánhani arhixaka sánderu úkua jukani exeni sini ambe ma jurhimbitkueski o nómbe, jamberijtsï cha kurhamarhikuarhijka: “¿Néna uá jurhimbitku míteni ambe máeri?”.

Uánikua kʼuiripuechaksï úkua jukanchasïndi jakajkuni ambe engaksï juramuticha uandajka, kʼérati negosiuecha o imecha engaksï notisia ambe uandantajka. Para kʼuiripuecha úkua jukasti míteni sinksï máteruecha solu aianguaxaki ambe enga úkuarhika, ambe engaksï eratsijka eska ísïska, ambe ma enga no iámindu ambe ísïka oksï asta chkuanderakuani jarhani. Jimboka kʼuiripu chésïnga jakajkukuni máteru nemani ka uánikua ambe enga uandanhajka no ísïni, nóteru jánhaskasïndia ambesï meru jurhimbitkue o néna jatsiski para exeni ambe ma.

Nájkiruka i ambe úkuarhijka, chájtsï uáka míteani mókuntskuechani engaksï jurhimbitkueka imani kurhamarhikuecheri engaksï sánderu jukaparhakueka para jucha. ¿Nénajtsï uá ísï úni? Uákajtsï imani ambe úni engajtsï újka para máteru ambe míteni.

¿AMBECHI UÁ PARA MÍTENI IMANI AMBE ENGA JURHIMBITKUEKA?

Pauani pauanchi uékasïnga míteni imani ambe enga jurhimbitkueka. Por ejemplu, Jessica jatsisti para exeni eska no imani ambe piáka enga kakauati jukaka. Ima uandantasïndi: “Juchiti nanaka sapichuni kánikua no sési úkusïndi kakauati, asta sánititu kakauati uáti eska uarhiaka. Ísï jimbo, ante de piáni ambe ma, arhintasïnga etiketani parani exeni ambe ka ambe jukaski. Tátsekua, jirinhantasïnga sánderu informasioni ka asta empresarhu kurhanguarhisïnga sini ima ambe engani uéjka piáni, no niáraski sánititu kakauati ambe jingoni jeuetakuarhini. Ístuni kurhanguarhisïnga máteru nani engajtsïni uáka jurhimbitku aianguni eska empresa kuidadu jingoni úsïnga imani ambe enga atarantajka”.

Jamberijtsï cha no jatsiaka para pauani pauani xáni uánikua ambe o jukaparhakua ambe kurhanguarhini ísï eska Jessica, peru engajtsï uékaaka míteni jukaparhakua ambe, uákajtsï májkueni úni eska ima:

• Míteni ambe ma.

• Sánderu inbestigarini.

• Segura jarhani eska jurhimbitkueska ambe engachi inbestigarika.

Ini ambe úni, uátiksïni jarhuatani parajtsï exeantaani mókuntskuechani engaksï sánderu jukaparhakueka. Ju je exeni nénachi uá ísï úni.

MA LIBRUJKUSÏ JATI ENGAJTSÏNI JURHIMBITKU AMBE AIANGUJKA

Enga Jessica uékenga jorhenguarhini ambe enga meru jorhentpijka Biblia, májkueni úspti eska na újka enga uéjka míteni sini ima ambe enga piájka no kakauati jukaski. Ima uandasïndi: “Jingontkuni arhintani ka sési inbestigarini, jarhuatastirini míteni jurhimbikua ambe enga Biblia jorhentpijka”. Ka uánikua kʼuiripu májkueni ústia eska Jessica ka jorhenguarhistiksïa ambe enga uandajka Biblia arini kurhamarhikuecheri ambe:

• ¿Andichisï irekani jaki?

• ¿Ambechi úkuarhinchasïni engachi uarhijka?

• ¿Andichisï xáni kómu nitamakuarhijki?

• ¿Ambe uá Tata Diosï parachi nóteru méni kómu nitamakuarhinia?

• ¿Ambechi uá para juchari familia tsípikua jingoni irekani?

Chájtujtsï uáka míteani ini kurhamarhikuecheri mókuntskuechani engaksï jurhimbitkueka ka ístu máteruecheri engajtsï arhintaska Bibliani ka jirinhantani sánderu informasioni ixú jw.org.