Tata Diosï újchakuraasïndi imechani engaksï jarhuataajka máteruechani

Parhakpinirhu, jarhastiksï uánikua kʼuiripuecha engaksï no jatsika tʼirekua ni kʼumanchikua ma. Máteruksï solu uétarhinchasïndi míteni eska ambakiti ambe úkuarhiaka sánderu orhepani. ¿Nénachi uá jarhuataani máteruechani ka úni eskajtsïni Tata Diosï újchakuraaka?

AMBE ENGA UANDAJKA TATA DIOSÏRI KARAKATA

“Ima enga pʼamojperakua xarhatakujka imani enga uétarhinchani jaka ambe ma, Jeobanisï kuánetani jati ka ima maiamuntaati indeni ambe jimbo” (PROVERBIOS 19:17).

¿AMBECHI UÁ ÚNI PARACHI MÁTERUECHANI JARHUATAANI?

Jesusi uandantskua ma uandantaspti acheetiri ma engaksï máru sïparicha jupikapka ka sánoksï uándikuni (Lukasʌ 10:29-37). Ambakiti kʼuiripu ma jarhuataspti imani acheetini engaksï atapka, nájkiruka máteru nani anapuepka.

Ima ambakiti acheeti no solu jarhuataspti imani enga atakata japka ka maiampini imani jimbo. Sino úspti ambe enga xáni uétarhipka paraka ambakintapiringa.

¿Ambechi jorhenguarhisïni ini uandantskueri? Jesusi jorhentpixapti eskachi jatsiska para úni ambe engachi xáni uáka para máteruechani jarhuataani (Proverbios 14:31). Biblia uandasïndi eska no ióni jimbo, Tata Diosï uáka eska nóteru nema pobriuakia ni kómu nitamakuarhini. Peru, ¿néna ka káni ísï uá? Máteru jorhenguarhikua, uandaani jauati ini kóntperatechani enga Tata Diosï jatsiaka para cha.