Tata Diosïjtsïni uinhaperantaspti enga guerra japka ka enga pínandikua japka

Paul: ¡Kánikuachi tsípixapka! Nobiembrini 1985 jimbo Liberia níraxapkachi (enga África Oesterhisï jaka). Inde jindeespti orheta paisi engachi axanhapka parachi ísï marhuani komu misioneruecha. Joperu abioni orheta Senegal anhaxurhispti. Anne uandaspti: “No jamberi ma ora jimbo Liberia jauakachia”. Joperuchi ma repentku arhinhaspka eska imeecha engaksï Liberia nirani japka jatsispkachi para abionirhu kétseni jimboka Liberia anapu kʼuiripuecha uarhiperaxapka gobiernu jingoni ka eskachi no úpiringa Liberia andatserani. Jimbochisï diesi jurhiatikua pakarapka Senegal misioneruecha máru jingoni. Liberia anapu notisiechaksï uandasïreendi eskaksï kamionicha jimbo paasïreenga uarhiriichani ka eska kʼuiripu nóteru uerapiringia paraksï no pistola jimbo kʼuaniranhani.

Anne: Jucha iámindu ambe jimbo jingontku jámasïreenga. Jiáni engani sápichuepka kʼuiripuechajtsïni arhisïreendi “chémsï” jimbokani iámindu ambe jimbo chésïreenga asta parani xanharu ma parhikuni. Joperu nájkirukani chéni japka, uékaxapkachia niárani Liberia.

Paul: Anne ka ji Inglaterra Oesterisï anapueskachi. Engachi uéntapkia sekundariarhu, ueenaspkachi marhuani komueska prekursoriicha. Tsimarhanchi uékasïreenga tiempu kompletueri marhuani. Anneri amamba ka juchiiti taatiichajtsïni kánikua jarhuataspti parachi ísï úni. Engani 19 uéxurhini jatiripka pʼímarhinhaspka Beteli ka 1982 jimbo tembuchaspka Anne jingoni, ísï jimbo Annejtu ueenaspti Beteli marhuani.

Anne: Kánikuachi tsitisïreenga Beteli marhuani. Peru ístu méntkisïchi jima uékaspka marhuani nani enga sánderu uétarhipiringa aianhpiricha. Ka Beteli imeecha jingonchi ánchikuarhisïreenga engaksï antesi misioneruepka, jimbochisï sánderu uékeengia misionerueni. Tanimu uéxurhini meruchi inde ambe kurhakuspka Tata Diosï Jeobani. Ka kánikuachi tsípispka engachi 1985 jimbo pʼímarhinhapka Galaadiiri Jorhentperakuarhu klase 79 jimbo. Tátsekuachi Liberia axanhaspka enga África Esteisï jaka.

UINHAPERANTASPTIJTSÏNI EXENI NA ENGAJTSÏNI XÁNI XÉNCHEENGA ERACHIICHA

Paul: Úpirindiksïa nirani abioniicha Liberia, jimbochisï primeru abionini jatapka enga uérapka para Liberia nirani. Jima xáni no sési jánhaskuarhixapti engaksï kʼuiripuecha jatsikuminhapka ora ma paraksï nóteru uérania kʼumanchikuarhu. Ka engaksï kʼuiripuecha kurhauenga trokani ma merkadurhu, jirejiresïksï chérakuarhisïreendi. Ka parachi no xáni uandanhiani, arhiantasïreengachi Salmuechani. Ka nájkiruka xáni no sési jánhaskuarhini japka, kánikuachi tsitisïreenga i paisi jimbo marhuani jarhani. Anne pauani pauani uérasïreendi aianhpini ka ji Beteli ánchikuarhisïreenga erachi John Charuk jingoni.a Ji kánikua ambe jorhenguarhispka erachi Johni jingoni jimboka ima ióni páxapkia irekani Liberia ka sési mítespti ambe engaksï xáni nitamakuarhienga jima anapu erachiicha.

Anne: Jucha kánikua tsitispka Liberia. Jimboka jima anapu erachiicha ka pirenchiicha kánikuaksï xénchpesïndi ka tsitisïndiksï uandontskuarheni ka kánikuaksï sési marhuakusïndi Tata Diosïni. Sóntkuchi niáraspka ísï exeani erachiichani komueska juchaari familia. Imeecheeri konsejuechajtsïni jarhuatasïreendi parachi sánderu sési marhuakuni Tata Diosïni ka ístu jima anapuecha kánikua tsitisïreendi kurhaani Tata Diosïiri ambe. ¡Kʼuiripuechaksï ikiasïreendi engachi jucha sóntku nínteenga! Ka xanharuecharhisï kʼuiripuechaksï pakarasïreendi eskineecharhu uandontskuarheni Biblieri ambe. Jimbosï fasiliuendi para jucha andarhieraani ka úni uandontskuarheni imeecha jingoni. Uánikua kʼuiripuechanchi jorhendaasïreenga Biblieri ambe ka nóchi jamberi andajkuarhisïreenga iáminduechani nirani exeani. ¡Kánikuachi ambakiti ambe nitamakuarhiska!

TATA DIOSÏ JEOBAJTSÏNI UINHAPERANTASPTI JIÁNI ENGACHI CHÉNI JAPKA

Paul: Támu uéxurhini jimbo nóteru ambe ma úkuarhisptia paisirhu. Joperu 1989 jimbo guerra ma úkuarhispti ka méntku iámindu ambe mójtakurhispti. Ka 2 de juliu de 1990 jimbo, imeecha engaksï gobiernuni uékeenga kénditani, jima no iauanksï niáraspti enga Beteli jaka ka jimaksï pakaraspti. Jimbochisï tanimu kutsï nóteru úpkia uandontskuarheni nema jingoni, ni juchaari familiecha jingoni ni sede mundiali jingoni. Kánikua no sési jánhaskuarhixaptia, nóteru jarhasptia tʼirekua ka nanakechanksï biolariuaxapti, 14 uéxurhini no sési jánhaskuarhispti paisirhu.

Anne: Ma tribu uarhiperasïndi máteru tribu jingoni ka uándikperasïndiksï. Imeecha engaksï uarhipeni jámeenga, sésiksï armadu jámasïreendi xanharuecha jimbo ka ikichakueni jásï xukuparhakuaksï kámasïreendi ka inchaakusïreendiksï kʼumanchikuecharhisï ka pásïrendiksï ambe engaksï imeecha uékeenga. Para máru kʼuiripuecha uándikpini ísïispti komueska “tsíkateechani uándikuani jarhani”. Ka imani karretereecha jimbo engaksï no sési úriicha míkauenga, uánikua uarhiriichaksï jarhasïreendi jimbokaksï jimajku ataasïreenga engaksï uékeenga parhikuni. Ka máru i karretereecha Beteli no iauani jarhaspti. Ka ístuksï uándikunhaspti máru Jeobaeri testiguecha, tsimanksï, misioneruespti enga jucha míteapka.

Nájkirukaksï úpiringa uándikunhani, uánikua testiguecha ka ístu máru misioneruecha ka betelitecha, jískaaxaptiksï máteru testiguechani engaksï imani triburhu anapueka engaksï no sési kánhani japka ka uándikunhani. Uánikua Testiguecha engaksï uéakupka imeecheeri iretarhu Beteliksï pakaraxapti, máruksï primeru pisurhu pakarasïreendi ka máteruechaksï karhakua pakaraxapti. Juchantsïni jingonksï pakarasïreendi ma familia engaksï sieteepka.

Paul: Pauani pauani, sondaduechaksï afuersa uékasïreendi inchaakuni Beteli paraksï exeni sinksï jískaxapi nemani. Jimbosï Beteli, tsimani erachiichaksï puertarhu jarheendi ka máteru tsimani erachiicha bentanarhu uératinksï exeni jarheendi. Joperu engaksï ima erachiicha engaksï puertarhu jarhenga orhepani peerauenga jájkiichani arhikuekasïreendi eska iámindu ambe sési jarhaspka, joperu engaksï imeecha tátsepani peerauenga jájkiichani arhikuekasïreendi eskaksï sondaduecha afuersa uékasïreenga inchaakuni. Ka engaksï imeecha engaksï bentanarhu uératini exeenga ini ambe, sóntkuksï jískaasïreendi erachiichani.

Anne: Ma xanhari, nóteruksï úsptia pʼínguani sondaduechani, ka máru sondaduecha engaksï kánikua ikiani japka inchaakusptiksï Beteli. Ka chúxapasptijtsïni eskalerecharhisï kʼérati armeecha jingoni, Joperuni ji baniurhu ma inchaspka máteru pirenchi jingoni. Ka indeni baniurhu roperhu sapichu ma jarhaspti, ka roperhuru incharini puerta sapichu ma jarhaspti enga ma ueenga jirikuarhini ka pirenchi sóntku jirikuarhespti jimini. Sondaduechacha uékaxapti mítani puertani ka Paul arhiaspti: “Erokuarhi je sáni, juchiiti uarhiiti baniurhu incharhini jarhasti”. Engani sési peentani japka roperuni ka ambe enga jimeesïsï japka ióndaspka sáni ka ístuni kústaspka. Ka ueenaspka manarani jimbokani kánikua chéxapka. Ka jimbosïni no uékeenga mítani puertani paraksï sondaduecha no eratsepiringa eskani ji jískaxapka ambe ma. Ísï jimbo, sïpatikuarku kómarhiska Tata Diosï Jeobani ka kurhakuspka eskarini jarhuatapiringa. Tátsekua úspka puertani mítani ka no míteska néna joperuni úspka sési uandajpaani. Ma sondadu, pʼákchakusptirini parareni kénditani ka niraspti roperurhisï, mítaspti ka iámindu ambe no sési páspti, joperu no ma ambe exentaspti ka seguiriisptiksï nirani máteru kuartuecharhu ka tapankuecharhu joperuksï ístu no ma ambe exentaspti.

SEGUIRIIXAPTIKSÏ TʼÍNTSKANI

Paul: Uánikua mesiicha jimbo nóchi kánikua tʼirekua jatsispka. Joperu tsípa anapu jorhenguarhikua engachi Beteli jatsienga ísïispti komueska juchaari “tʼirekua”, ka inde ambejtsïni jarhuatasïreendi parachi jucha uinhapiti jarhani.

Engachi jucha uéakupiringa Beteli parachi nirani jirinhani tʼirekua ambe o itsï ambe, imeecha engaksï Beteli jirikuarhitini japka úpirindiksï uándikunhani. Joperu someni, Tata Diosï Jeobajtsïni jiáni íntskusïreendi ambe ma engachi uétarhinchani jarhenga, ísïisïreendi komueska milagru ma. Imajtsïni íntskusïreendi ambe engachi jucha xáni uétarhincheenga ka ístujtsïni jarhuatasïreendi parachi jucha no xáni chéni.

Ka nájkiruka paisirhu sánderu no sési jánhaskuarhipka, jurhimbikua ambe Biblieri kánikuajtsïni jarhuatasïreendi parachi jucha uiuinhasï jarhani. Jimini anapu erachiichaksï someni jatsisïreendi paraksï sïpakuarhini paraksï no uándikunhani, joperuksï imeecha méntkisï mintsikaspti Tata Diosïni ka ístuksï jánguarhintaspti para no xáni uandanhiani. Máru erachiichaksï uandasïreendi eska i guerra jarhuataapiringa para ima tiempu engaksï kʼuiripuecha “kánikua no sési nitamakuarhiaka”. Ka kúnguarhikuecharhu uánikua orhejtsïkutiicha ka erachiicha engaksï sapichku japka, balori jingoni jarhuatasïreendiksï erachiichani ka pirenchiichani. Ka ístu ima erachiicha ka pirenchiicha engaksï uéakuenga imeecheeri ireteecha jimbo, jarhuajperasïreendiksï ka aianhpisïreendiksï imani lugari jimbo engaksï mótseenga. Juátarhuksï tánasïreendi ambe engaksï úpiringa para kuákuechani uaani paraksï jima jatsiani tánguarhikuechani. Enga ísï xáni no sési jánhaskuarhini japka, erachiichani kánikua jarhuataasïreendi tánguarhikuecharhu nirani ka aianhpini, jimboka i ambe úsïreenga eskaksï erachiicha no xáni uandanhiapiringa ka ístu parakaksï úpiringa tekaantani. Engachi jucha tʼirekua ambe, takusï ambe ka máteru ambe jámani japka pákuani erachiichani, imeechajtsïni ísku pakatasïreendi jimbokajtsïni sánderu sáni kurhachesïreenga bolsuechani ka portafoliuecha paraksï aianhpini. Ka jimbokaksï kʼuiripuecha mámaru ambe exespka guerrarhu ka mámaru ambeksï nitamakuarhini, uékasïreendiksï kurhaani ambakiti aianhperakuani. Kʼuiripuechaksï kánikua ísku pakarasïreendi engaksï exeauenga Testiguechani tsípiparini jámani. Imeechaksï ísïispti komueska tʼíntskua jima enga pápkʼandejka (Mat. 5:14-16). Ka jimbokaksï juchaari erachiicha kánikua jánguarhintaspka aianhpini, máru imeecha engaksï uarhipeni jámeenga niárasptiksï Testigu úkuarhini.

TATA DIOSÏJTSÏNI ÍNTSKUSTI UINHAPIKUA JIÁNI ENGACHI JURAJKUAPKA ERACHIICHANI

Paul: Méminduchi uéakuntaspka paisirhu, tanimu xanhari, nóchi ióndaspka kʼuanhatsentani, joperu tsimani xanharichi, ma uéxurhini jimbochi kʼuanhatsentaspka. Pirenchi ma enga misionereepka uandaspti na enga pʼikuarherakuarhijka engachi jatsijka para jurajkuani erachiichani, ima uandaspti: “Galaadiri jorhendanhasïnga iámu chiiti mintsita jingoni marhuani jima engari axanhajka, ka ísïchi úsïnga. Joperu engari mítejka eskari jatsiska para jurajkuani erachiichani nájkirukaksï imeecha no sési nitamakuarhini jarhajka, ísïisïndi enajkikini nema mintsitani atachijki”. Joperuchi kánikua tsípispka engachi máteru paisirhu uératini úpka jarhuataani Liberia anapu erachiichani.

Anne: Maiu de 1996 jimbo, jatsispkachi para máteru nani paani sukursalirhu anapu sïrandeechani para jima peeraani enga sánderu seguruepiringa. Ka tʼámu kʼuiripuchi niraxapka karru jimbo. jatsispkachi para 16 kilometru (10 miia) iauani nirani. Ka engachi nirani japkia, ima kʼuiripuecha engaksï ikiani japka, chararaasptiksï armeechani ka anhaxustasptijtsïni. Arhisptijtsïni eskachi kétsepiringa ka imeechaksï páspti karruni ka Paul jima niraspti jatarini. Jucha ískuni pakaraspka, ka ma repentkuchi exespka Pauluni jimeesïsï jurhani jarhani enga xáni uánikua kʼuiripu jámani japka. Paul iurhiri jánharhitixapti. Jucha eratsespka eskaksï pistola jimbo ataspka joperu nómbe, jimboka ima nóteru úpiringia xanharani. Imeecha engaksï karruni pápka, pʼakchakusptiksïnha para karrurhu petantani ka jimbosï atakuarhipti joperu no xáni uinhamu.

Jima jarhaspti sondaduecheeri troka ma ka uánikua kʼuiripuechaksï jatarixapti engaksï kánikua chéni japka. Ísï jimbo, jimachi takujchukuspka. Joperu choferi mátirku antsipataspti trokani ka jucha sáno uékorhispka. Jucha arhixapka eska anhaxustapiringa joperujtsïni ima no kasu úchispti jimboka kánikua chéxapka. Kánikuachi chétku niáraspka ka manaraparini xáni uinhamu jupikuarhini trokarhu.

Paul: Juchaari takusï iámu no sési jáxesptia. Ískuchi eratperaxapka jimbokachi útasï tsípiti jarhaspka. Elikopteru ma jarhaspti juátarhu enga iámu atakata japka baleecha jimbo ka jucha jima jandukutini kʼuíspka. Ísï pauandikua, indeni elikopteru jimbochi niraspka Sierra Leona. Kánikuachi agradesidu jarhaspka engachi útasï tsípiti japka, joperuchi kánikua uandanhiauaxapka juchaari erachiichani.

AMBE ENGAJTSÏNI JARHUATAPKA ORHEPANI UÉRAKUNI MÁTERU UANDANHIATANI

Anne: Úspkachi niárani Beteli enga Freetown jaka jini Sierra Leona. Jimachi sési jarhaspkia ka kánikuajtsïni sési kuidarisïreendi. Joperuni ji ueenaspka miántani ambe engachi nitamakuarhipka. Chúskutasïreenga chétkuni jarhani ka eratsesïreenga eska tsánharhikua máespka. Ka chúrikuechani ma repentkuni jauarasïreenga manaraparini ka tsʼitsʼirasï aparhintaparini, ka eratsesïreenga eska no sési ambe úkuarhipiringa. No úsïreenga jirejtani, Paulurini kamanharhisïreendi, kómarhisïreendi jíndeni jingoni ka tsimarhanchi pireasïreenga pirekuechani Reinueri astakani na nóteru manarani japiringia. Ji uandasïreenga eskani loka jarhaspkia ka eskani nóteruni úpiringia misionereeni.

No méni mirikurhiaka ambe enga úkuarhipka ísï tátsekua. Imani mismu semana jimbojtsïni tsimani rebisteecha niárachespti. Ma jindeespti ¡Despertad! 8 de juniu de 1996 anapu. Ka jimini artikulu ma jarhaspti enga arhinheenga “Qué hacer ante los ataques de pánico”, ka jiáni kurhanguspka andisïni ísï pʼikuarherani japi. Ka máteru rebista jindeespti La Atalaya, 15 de maiu de 1996 anapu. Jimini artikulu ma jarhaspti enga arhinheenga “¿De dónde proviene su fuerza?”. Ini artikulu jimbo parakata ma jarhaspti enga imeeri kʼésï ma atakata japka. Artikulu uandasïreendi eska, ísï eska parakata ma na újka karani nájkiruka ísï jauaka, juchajtuchi uaaka seguiriini jarhuataani máteruechani nájkirukachi no sési ambe nitamakuarhiaka jimbokajtsïni Tata Diosï Jeoba íntskusïnga imeeri espiritu santu. I rebistechajtsïni meru jiáni niárachespti engani xáni uétarhinchani japka ka uinhaperantasptijtsïni (Mat. 24:45). Ka ístuni sánderu ambe jirinhantaspka indeeri ambe engani ji pʼikuarhereenga ka karpeta ma jimbo patsaasïreenga. Tátsekua, sánhani arhispka jurajkuni indeni ambe engareni xáni no sési pʼikuasteenga.

AMBE ENGAJTSÏNI JARHUATAPKA PARACHI MÁTERU NANIISÏ MARHUANI

Paul: Méni engachi kʼuanhatsenteenga Liberia, kánikuachi sési pʼikuarherasïreenga. Para 2004 kʼamarhukuni jámani, 20 uéxurhinchi marhuaspkia jima engachi axanhapka. Guerrajtu kʼamarasptia ka ístu sukursali eratsexapti uánikua ambe mójtakuni jima. Joperu ma repentkuchi pʼimarhinhaspka parachi támisï nirani marhuani.

No fásiliispti ísï úni jimbokachi pʼinderhiaspkia erachiichani. Ísïchi pʼikuarherasïreenga enajkichi no úpirini jurajkuani. Joperuchi exespkia eskachi úspka jurajkuani juchaari familiechani para Galaadi nirani ka ístuchi exespkia na engajtsïni Tata Diosï Jeoba no méni jurajkupka, jimbochisï uandapka eskachi úpiringa mótsini. Ka niraspkachi Ghana, paisi ma enga jima no iauani jaka.

Anne: Kánikuachi ueraspka engachi jurajkupka Liberia. Joperu ískujtsïni pakataspti ambe engajtsïni arhipka erachi Frank enga jatiriipkia joperu enga kánikua jánhaskatiipka. Imajtsïni arhispti: “Jatsiskajtsïni para jurajkuni, jucha mítetixaka eskajtsïni no méni mirikurhiaka. Jatsiskajtsï para meru jánguarhintani jarhuataani jima anapu erachiichani ka pirenchiichani”. Inde uandakuechajtsïni kánikua jarhuataspti parachi jima nirani marhuani engachi no miiupka ka engachi no nemani mítepka.

Paul: Engachi na niárapkia Ghana, méntkuchi no sáni ióndaska sési pájperani jima anapu erachiicha jingoni. Jimaksï uánikua Testiguecha jarhaspti ka uánikua ambejtsïni jorhendaspti parachi méntkisï uiuinhasï jarhani ka nóchi méni jurajkuni Tata Diosï Jeobani. Joperu engachi na 13 uéxurhini marhuapkia jini Ghana, ménderuchi arhinhaspka eskachi iásï Kenia marhuapiringia, Betelirhu enga África Oriental jaka. Nájkirukachi jirinhantauenga erachiichani engachi jima míteapka engachi antesi marhuapka, nóchi ióndaspka sési pájperani Kenia anapuecha jingoni. Ka iásï jamberichi ixú marhuaxaka enga xáni ánchikuarhita jaka.

MIÁNTASÏNGACHI IÓNTKI ANAPU AMBE

Anne: Ióni marhuakuskia Tata Diosï Jeobani ka uánikua ambe nitamakuarhiska enga úkua jukapka ka engareni kánikua chéraka. Ka inde amberini kánikua no sési úchisti ka eskani niárapiringa no sési pʼikuarhinheni. Tata Diosï Jeobajtsïni no milagru ma jimbo kuájchakuati indeeri ambe. Méni engani kurhaajka pistola ambe charani o imani ambe engaksï sondaduecha kámajka, jirejiresï ueenasïnga no sési pʼikuarhearhani ka xújkurhani. Joperuni míteskia eskarini Tata Diosï Jeoba kánikua uinhaperantasïnga ka ménichani úraasïndi erachiichani ka pirenchiichani. Ka ístuni exeskia eska para ma seguiriini jarhani sési marhuani, jatsiska para seguiriini jorhenguarhini Tata Diosïiri ambe, kómarhini, nirani tánguarhikuecharhu ka uérani aianhpini.

Paul: Ménichantsïni kurhamarhisïndi: “¿Chá tsitisïni jima engajtsï marhuani jaka?”. Paisicharhuksï sési járhati lugaricha jarhasïndi, joperu ménichani ma repentku niárasïndi mójtakurhini ambe ma ka kánikua peligru jarhani. Ísï jimbo, ambe engachi sánderu tsitijka, jindeesïndi jima anapu erachiicha ka pirenchiicha jimbokaksï niárasïnga juchaari familieni. Nájkirukachi máteru járhani pʼindekuechani jatsiajka ochi ménderueni tʼarhexerakata jarhani, iáminduechachi májkueni eratsesïnga. Méni engachi nireenga paisi ma jimbo, jucha eratsesïreenga eskachi jimbosï nireenga para uinhaperaantani, joperu nójtu ambe, jimbokajtsïni imeechasï niáreenga uinhaperantani.

Méni engachi máteru paisi jimbo nirajka marhuani, exesïngachi eska ini jurhiatikuechani jimbo juchaari erachiicha ísïiska komueska milagru ma. Náki uéjki kúnguarhikuarhuchi jarhani, méntkisïchi jatsiaka kʼumanchikua ma ka familia ma. Seguruchi jarhaska eskajtsïni Tata Diosï Jeoba íntskuaka imani uinhapikuani engachi uétarhinchajka engachi no méni jurajkuska (Filip. 4:13).