Ambe enga kurhanguarhijka ima enga arhintajka

Karakata 1 Timoteu 5:21, ¿neechani arhikuekaxaki enga uandajka “ánjeliichani japarini engaksï erakukateeka”?

Apostoli Pablu arhispti Timoteuni enga ístu orhejtsïkuti máepka: “Jíkeni kurhachexaka Tata Diosïni japarini, Kristu Jesúsini japarini ka ánjeliichani japarini engaksï erakukateeka, eskari seguiriini jauaka ísï úni eskakeni na arhikia. Joperu asï jáma orhetatakuarhini ka ístu iáminduechani májkueni kaa” (1 Tim. 5:21). ¿Neeskiksï inde ánjeliicha engaksï erakukateeka?

Ju je sánhani arhini kurhanguni. Para jiáni enga apostoli Pablu karakupka Timoteuni, no úpirindi 144,000 erakukateechani arhikuekaani, jimboka jiánisï nótki ma erakukata tsíntaxapka auandarhu. Apostoliicha ka níjtu máteru erakukateecha niárani japi ísïini eska ánjeli ma. Ísï jimbo, no 144,000 erakukateechanisï arhikuekaani japti (1 Kor. 15:50-54; 1 Tes. 4:13-17; 1 Juanu 3:2).

Ístuksï no jindeesti ima ánjeliicha engaksï nóteru uékapkia kurhajchani Tata Diosïni jiáni enga Dilubiu úkuarhipka. Jimbokaksï imeecha Satanási jingoni úkuarhispka ka iásïksï demoniuestia ka ikiakusïndiksï Jesúsini (Gén. 6:2; Luk. 8:30, 31; 2 Ped. 2:4). No ióni jimbo, Jesúsi jima kʼuaninhauati demoniuechani enga xáni jauanhika ka 1,000 uéxurhini ónhauati ka tátsekua kʼamajkuauati Satanási jingoni (Jud. 6; Apok. 20:1-3, 10).

Karakata 1 Timoteu 5:21 uandasïndi eskaksï i ánjeliicha engaksï erakukateeka, Tata Diosï jingoni jarhaska ka Kristu Jesúsi jingoni, jiájkani jindeestiksï ima ánjeliicha engaksï auandarhu jaka ka engaksï Tata Diosï ka Jesúsi jingoni ánchikuarhini jaka.

Uánikua ánjeliichaksï jarhasti engaksï sési marhuakuni jaka Tata Diosïni (Ebr. 12:22, 23). Ísï jimbo, ánchikuarhita ma enga Tata Diosï Jeoba arhiajka eskaksï uaaka ánjeliicha, nóksï iáminduecha úsïndi indeni ánchikuarhitani (Apok. 14:17, 18). Ju je miántani eska ma xanhari, Tata Diosï máechakua ánjelintku arhispka eska kʼamajkuapiringa 185,000 sondaduechani engaksï Asiria anapuepka (2 Rey. 19:35). Ka ísï eska Jesúsi na uandapka, erakunhaatiksï máru ánjeliicha engaksï kénditaaka imeeri Reinurhu “iámindu imani ambe enga no sési ambe úrpijka ka ístu imani kʼuiripuechani engaksï no újka ambe enga lei uandajka” (Mat. 13:39-41). Ka péringaksï máteru ánjeliicheuaka engaksï tánantauaka máteru erakukateechani paraksï auandarhu nirani (Mat. 24:31). Ka Salmo 91:11 uandasïndi eska Tata Diosï Jeoba arhiasïnga máteru ánjeliichani eskajtsïni kuájchakuaka (Mat. 8:10; terukutanta je Mateu 4:11 ka Lukasï 22:43 jingoni).

Eskachi na exekia, péringa 1 Timoteu 5:21 imani ánjeliichani arhikuekaani japka engaksï ánchikuarhini japka kúnguarhikuechani jingoni. Ambe enga apostoli Pablu uandapka antesi, jindeespti orhejtsïkutiicheeri ambe ka arhiaxapti erachiichani eskaksï janhanharhiapiringa indeechani. Joperu ístu, arhiaxapti orhejtsïkutiichani eskaksï jatsispka para sési úni imeecheeri ánchikuarhitani, no orhetatakuarhini ka iáminduechani májkueni kaani ka eskaksï no jámapiringa jirejiresï úni ambe ma. Pablu ísï arhiaspti espiritu santu jimbo, jimbokaksï orhejtsïkutiicha marhuakuaxapka erachiichani Tata Diosïni japarini, Kristu Jesúsini japarini ka ánjeliichani japarini engaksï erakukateeka. Jo, Tata Diosï Jeoba, Jesúsi ka ánjeliicha engaksï erakukateeka, exexatiksï na engaksï ánchikuarhini jaka orhejtsïkutiicha kúnguarhikuarhu. Jiájkani, úsïngachi exeni eskaksï máru ánjeliicha intsïnhaska indeni ánchikuarhitani paraksï kúnguarhikuarhu anapu ambe exeni jarhani. Pori ejemplu, kuájchakuani Tata Diosïiri marhuariichani, exeni na enga nirani jaka aianhpikua, ka aianguni Tata Diosï Jeobani ambe engaksï exejka (Mat. 18:10; Apok. 14:6).