¿Ambeksï eratsisïni Jeobaeri testiguecha funeralicheri ambe?
Na engachi exeajka funeralichani ka ístu ambe engachi újka jima, Bibliarhu jupindaskuarhisïndi, komu ari ambe:
No no sési jarhasti kómu pʼikuarherani engachi uarhiranchajka nemani engachi kánikua uéjka. Jesusiri disipuluechaksï ueraspti engaksï uarhiranchapka imechani engaksï kánikua uékauenga (Juanu 11:33-35, 38; Ukuecha 8:2; 9:39). Ísï jimbo, para jucha funerali ma no jindesti komu kʼuínchikua ma (Eclesiastés 3:1, 4; 7:1-4). Sánderu sési, jindesti parachi xarhatani eskachi juchajtu no sési pʼikuarherasïnga (Roma 12:15).
Uarhirichaksï no pʼikuarherasïndi, níjtuksï sufririjki. No arhiparini nani uéjkisïchi anapueni o na uéjki jásïchi pʼindekuechani jatsiani, nochi uásïnga pʼindekuechani o úkuecha engaksï jorhentpejka eskaksï uarhiricha útasï pʼikuarherasïnga ka eskajtsïni uáka no sési úcheni o jarhuatani, jimboka Biblia no indeni ambesï jorhentpijka (Eclesiastés 9:5, 6, 10). Ejemplu ma, nochi kéjtsïtakuasïnga uarhirichani, nichi uandontskuarhikuajki o kurhakuani jarhuajperata, níjtuchi uájki pʼindekuechani engaksï tsïndicha úminhajka ka níjtuchi kánikua sentabu úrajki para kʼuínchikua úkuantani uarhirichani. Biblia arhisïndi: “Késtakukua je [...] ka ásteru jáma je p’arhini no sési jásï ambe”, ka juchachi kurhajchasïnga indeni juramukuani no úpariani iámindu indeni úkuechani enga Tata Diosïri Karakata no jaiapanhiantajka (2 Korintu 6:17).
Uarhirichaksï uáti ménderu irentani. Biblia jorhentpesïndi eska sánderu orhepatini uarhirichaksï uáka tsíntani ka eska niáraka jurhiatikua enga nóteru jauaka uarhikua (Ukuecha 24:15; Jaŋaskuecha [Apocalipsis] 21:4). Ini erokuarhikua jimbo, enga ístu jarhuataapka ióntki anapu kristianuechani, nochi jukari kómu pʼikuarherasïnga (1 Tesalonika 4:13).
Biblia pʼímarpisïndi para kaxumbikua xarhatani (Proverbios 11:2). Nochi úraasïnga funeralichani paraksï kʼuiripuecha exeni eskachi jatsikuarheriska o parachi kʼéri ambe exekuarhini máteruechani japarini (1 Juanu 2:16). Ísï jimbo, nochi uásïnga funeralichani engaksï kánikua jukaparhajka para tsíperaani imechani engaksï niuaka, níjtuchi úraajki kajechani engaksï xáni jukaparhakueka ka níjtuchi jukaparhakua ambe xukuparhantajki parajtsïni máteruecha kʼéri ambe exeni.
Nochi arhiasïnga máteruechani eskaksï imani ambe uáka engachi jucha jakajkujka funeralicheri ambe. Sánderu sési, úsïngachi ambe enga Biblia arhijka: ‘Mándani arhini, Diosïni japarini uandakuarhintaati na enga jámajka’ (Roma 14:12). Peru enga jauaka modu, kaxumbikua ka respetu jingonchi aianguasïnga máteruechani juchari jakajkukuechani (1 Pedru 3:15).
¿Nénaksï úkuarhisïni Jeobaeri testiguecheri funeralicha?
Nani enga úkuarhijka: Enga familia erakujka úni funerali ma, imecha mísmuksï erakusïndi nani úni. Uáti úkuarhini Kʼumanchikua Reinueri ma jimbo, imecheri kʼumanchikuarhu o pantionirhu.
Ambe enga úkuarhijka: Para uinhaperantani uarhiriri familiani, arhijtsïkperakua ma jarhasïndi enga explikarijka ambe enga Biblia arhijka uarhikueri ambe ka ístu tsíntskueri ambe (Juanu 11:25; Roma 5:12; 2 Pedru 3:13). Funeralirhuksï úsïndi miánhantani ambarhati kualidadicha ima kʼuiripueri enga uarhikia ka ístu xarhatani ambe engachi jorhenguarhijka imeri ejemplu jimbo de na enga no méni jurajkupka Jeobani (2 Samuel 1:17-27).
Úsïndi pirenhani pirekua ma enga Bibliarhu pʼitakateka (Kolosasi 3:16). Ka arhijtsïkperakua kʼamarasïndi kómarhikua ma jingoni enga iáminduechani uinhaperantajka (Filipusʌ 4:6, 7).
No kobrarinhasïndi: Nochi kobrarisïnga funeralicha jimbo ka ni máteru ambe jimbo engachi újka Jeobaeri testiguecha. Nochi méni euajpisïnga tumina juchari tánguarhikuecharhu (Mateu 10:8).
Néksï úsïni nirani: Iáminduechaksï úsïndi nirani funeralicharhu engaksï Kʼumanchikua Reinuerirhu úkuarhijka, májkueni eska iámindu juchari tánguarhikuecharhu. Ísï jimbo, iámindu kʼuiripuecha engaksï no Testigueka úsïndiksï nirani.
¿Nirasïnksï Jeobaeri testiguecha máteru relijionicheri funeralicharhu?
Mándani kʼuiripu jatsisti para erakukuarhini sini niua o nómbe seguni imeri konsiensia enga Biblia jimbo jorhendakata jaka (1 Timoteo 1:19). Peru nochi úsïnga ambe engaksï máteru relijionicha újka enga no terokuntajka imani ambe jingoni enga Biblia jorhentpijka (2 Korintu 6:14-17).