¿Iápurisï jarhasïni Tata Diosï?
Ambe enga Biblia uandajka
Tata Diosï úsïndi exeni iámindu ambe ka úsïndi úrani imeeri uinhapikua nani enga ima uékaaka (Proverbios 15:3; Ebreu 4:13). Peru Biblia no jorhentpisïndi eska ima iápurisï jarhasïnga o eska iápurisï irekasïnga. Sino uandasïndi eska ima espiritu máeska ka eska jatsikuarheska nani enga ima irekaka.
Na jáxeski Tata Diosï: Ima espiritu máesti (Juanu 4:24). Ísï jimbosï no ma k’uiripu újti exeni (Juanu 1:18). Imani jánhaskuechani jimbo enga Bibliarhu uandaajka, méntkisï xarharasïndi eska Tata Diosï, ma lugari jimbojku jarhaska. No nani uandasïndi eska ima iápurisï jarhaska (Isaías 6:1, 2; Jaŋaskuecha 4:2, 3, 8).
Nani irekaski: Biblia uandasïndi eska Tata Diosï auandarhu irekaska (1 Reyes 8:30). I ambe arhikuekasïndi eska Tata Diosï no irekaska parhakpinirhu ni jimeesïsï engachi uaaka exeni. Bibliarhu uandasïndi eska ma uelta, ánjelichaksï ‘tánguarhintaspka Jeobani japarini’,a i ambe xarhatasïndi eska jatsikuarheska lugari ma nani enga ima irekaka (Job 1:6).
Enga Tata Diosï no jarhajka iápurisï, ¿jiáni imarini újki kuidarini?
Jo, nájkiruka auandarhu irekaka, ima kánikua uandanhiasïndi kʼuiripuechani jimbo. Imajtsïni exesïndi na engachi xáni jánguarhintajka para kurhajchani imani ka jarhuatasïndijtsïni (1 Reyes 8:39; 2 Crónicas 16:9). ¿Nénajtsïni xarhatachesïni eska uandanhiasïnga juchantsïni jimbo ka eskajtsïni kuidarisïnga?
Engachi kómarhijka: Jeoba jirejiresï kurhaasïndi engachi kómarhijka (2 Crónicas 18:31).
Engachi kánikua kómu p’ikuarherani jarhajka: “Jeoba imeecha jingoni jarhasti engaksï no sési pʼikuarhinhijka mintsitarhu ka pʼímutantaasïndi imeechani engaksï kómu pʼikuarherajka” (Salmo 34:18).
Engachi konseju ma uétarhinchajka: Imeeri Karakata jimbo, Tata Diosï Jeobajtsïni jánhastasïndi ka arhistachesïndijtsïni ambe engachi jatsika para úni (Salmo 32:8).
Ambe enga uandanhajka íri ambe
Ambe engaksï jakajkujka máru: Tata Diosï iápuru jimeesïsï jarhasïndi nani enga imeeri kueraakata jaka.
Ambe enga jurhimbitkueka: Tata Diosï no irekasti parhakpinirhu ni jimeesïsï engachi uaaka exeni (1 Reyes 8:27). Ísïsti, Bibliarhu uandasïndi eska jóskuecha ka máteru ambe enga ima kueraaka sésiksï ‘xarhatasïnga Tata Diosïri tʼíntskuani’ (Salmo 19:1). Peru inde ambe no arhikuekasïndi eska ima jima jarhasïnga nani enga imeeri kueraakata jaka. Pori ejemplu, uaakachi uánikua ambe míteni k’uiripueri ma imani kuadruechani jimbo enga ataantajka, peruchi no úpiringa uandani eska ima, kuadruecharhu irekasïnga. Májkuenisti, iámindu ambe enga xáni Tata Diosï kueraaka ka engachi újka exeni, aiangusïndijtsïni na enga jásïika ima, eska uinhapitiska, jánhastini ka uékpitini (Roma 1:20).
Ambe engaksï jakajkujka máru: Tata Diosï no uaati iámindu ambe úni ka iámindu ambe míteni enga no iápurisï jauaka.
Ambe enga jurhimbitkueka: Espiritu santu, Tata Diosïri uinhapikuesti enga ima úrajka para úni ambe ma. Nájkiruka Tata Diosï no meru jima jauaka, espiritu santu jimbo, ima úsïndi míteni iámindu ambe enga úkuarhini jaka ka úni ambe uéjki, nani uéjki ka káni enga uétarhiaka (Salmo 139:7).
Ambe engaksï jakajkujka máru: Salmo 139:8 xarhatasïndi eska Tata Diosï iápurisï jarhasïnga jimboka uandasïnga: “Engani auandarhu nipiringa, tʼuri jima japiringa, ka engani Tumbarhu japiringa, tʼujturi jima mismu japiringa”.
Ambe enga jurhimbitkueka: I tekstu no arhikuekasïndi eska Tata Diosï iápurisï jarhaska, sino sési járhati uandakuecha jingoni arhisïndi eskajtsïni Tata Diosï uaaka jarhuatani nani uéjkisïchi jarhani.
[NOTECHA]
a Biblia uandasïndi eska Tata Diosï arhinhasïnga Jeoba.