TUMBIICHAKSÏ KURHANGUARHISÏNDI
¿Andisïni méntkisï imani ambe uandajki engani no jatsika para uandani?
“Ménisï pʼíngukuarhisïnga ambe engani uandajka, peru ménisï ísï xarharasïndi enajkini méntku no ma ambe jimbo újki pʼimukukuarhini” (James).
“No eratsiparini uandasïnga engani uandanhiani jarhajka, ka engani sési jarhajka, jukari jamberi uandasïnga. Jo, méntkisï imani ambe uandasïnga enga no sési jaka” (Marie).
Biblia arhisïndi: “Katamba ísïsti eska ma chpiri”, ka ístu arhisïndi: “Na enga xáni kánikua ambe kurhirhajka ma sapichitu chpiri” (Santiagu 3:5, 6). ¿Nori sési ambe úsïni imani ambe jimbo engari uandajka? Engari someni indeni ambe nitamakuarhijka, i artikulukini uáti jarhuatani.
¿Andisïni imani ambe uandajki engani no jatsika para uandani?
Nóchi perfektueska. Biblia arhisïndi: “Jucha iáminduecha mámaru ambe jimbo pekadu úsïnga. Ka enga ma kʼuiripu nómbe pekadu újka uandakua jimbo, ima kʼóru sési jimbo ambakitisti” (Santiagu 3:2). Jimbokachi no perfektueska, astachi uandakua jimbo no sési ambe niátasïnga.
“Jimboka juchiti eratsikua ka katamba no perfektueska, no sési japirindi engani uandapiringa eskani iámindu ambe sési úsïnga” (Anna).
Jukari uandani. Biblia arhisïndi: “Enga nema jukari uandajka, niárasïndi no sési ambe uandani” (Proverbios 10:19). Ima kʼuiripuecha engaksï jukari uandajka ka nóksï káni kurhajchaani máteruechani, sánderu seguruesïndi eskaksï no sési pʼikuastpiaka imani ambe jimbo engaksï uandajka.
“Ima kʼuiripu enga jánhaskatiika, no méntkisï imesïndi enga méntku uandani jarhajka ambe ma kuarturhu. Jesusi kʼuiripu máespti enga sánderu jánhaskatiipka ixú Echerirhu ka ménisï no ma ambe uandaspti” (Julia).
Uandani ambe ma enga no sési pʼikuastpijka. Biblia arhisïndi: “Jarhasti ima enga no eratsiparini uandajka enga ísïka eska espada jimbo chʼurhurpini” (Prov. 12:18). Enga nema no eratsiparini uandajka ambe ma, uáti no sési pʼikuastpini. Teresmarpini úrapariani uandakuechani para máteruni no sési pʼikuastani, no sési jarhasti. Máru kʼuiripuecha engaksï uandakuechani úraajka para no sési pʼikuastpini, jamberiksï uandajti eskaksï chʼanaxaka. Peru kʼuratsetani nemani, no chʼanakua ambesti. Bibliajtsïni arhisïndi eskachi no arhinchpeaka ni no sési útspini (Efesu 4:31).
“Sáno méntkisï, méntkuni uandani jarhasïnga ka tsitisïnga máteruechani tsíperaani, peru xásï kʼuiripu máeni úsïndi eska ma imani ambe uandaaka enga no sési pʼikuastpijka ka no sési pakatpeni ka inde ambe jimbo, ménisï problema ambe jatsisïnga” (Oksana).
Enga ma na pʼitajkia pasta, nóteruchi úsïnguia jatsirantani, májkueni úkuarhisïndi uandakuecha jingoni: enga ma na uandajkia ambe ma, nóteruchi úsïnguia kʼuanhaskuantani.
Jánguarhintsï pʼímukukuarhini
Jánguarhintani pʼímukukuarhini, uáti úkua jukani, peru Bibliaeri konsejuechaksï úsïndi kánikua jarhuajpini. Por ejemplu, exea arichani:
“Uanda je ambe engajtsï uékaaka chári mintsitarhu [...], ka pínasku pakara je” (Salmo 4:4).
Ménisï sánderu sésisïndi pínasku pakarani. Uátsï ma enga Laura arhinhajka, uandasïndi: “Ambe engani pʼikuarherajka engani ikiani jarhajka, jamberi tátsekua nóteruni májkueni pʼikuarherani jarhasïnguia”. Ka ístu uandasïndi: “Engani nóteruni ikiani jarhajkia, tsípisïnga engani no uandapka ambe engani eratsini japka”. Erokuarhini sáni, uáti eskari no uandaaka imani ambe engari no jatsika para uandani.
“¿No ísïski eska kutsïkua kurhauasïnga uandakuechani ísï eska katamba na tsʼémujka tʼirekua ambe?” (Job 12:11).
Nori jatsiauaka uánikua uandanhiatechani engari antesi de uandani, orheta kurhamarhikuarhiska arini ambe:
¿Ísïski? ¿Sési pʼikuastpia? ¿Meru jatsiski parani ini ambe uandani? (Roma 14:19).
¿Néna pʼikuarherapirini engarini nema ini ambe arhipiringa? (Mateu 7:12).
¿Xarhataa eskani no no sési exeska ambe enga uandaka máteru kʼuiripu? (Roma 12:10).
¿Sési jaua engani ini ambe uandaska iáiasï? (Eclesiastés 3:7).
“Sino kaxumbikua jingoni, [...] sánderu kʼéri ambe exeani máteruechani” (Filipusʌ 2:3).
I konsejukini jarhuataati ambakiti ambe eratsini máteruecheri. Ka ísï úni, jarhuataatikini sési úrani katambani ka eratsintani antesi de uandani. Asta jiáni engari tʼuini uandaakia ambe ma ka tʼuindi nemani no sési pʼikuastania, kaxumbikuakini jarhuataati parari sóntku arhini eskakini puáchentaaka (Mateu 5:23, 24). Tátsekua jánguarhinta parari sési úrani katambani.