¿Tata Diosï ebolusionini úraski para kueraani mámaru jásï ambe enga tsípiti jaka?
Ambe enga Biblia uandajka
Nómbe. Biblia uandasïndi eska Tata Diosï kueraaska k’uiripuechani ka mámaru jásï ambe enga tsípiti jaka komu animalicha o plantecha (Génesis 1:12, 21, 25, 27; Jaŋaskuecha 4:11). Biblia uandasïndi eskaksï juchaari taaticha jindeeska Adáni ka Eba jimbokachi imeechani jimbo jurhaska (Génesis 3:20; 4:1). Biblia no nani uandasïndi eska Tata Diosï ebolusioni jimbo kueraaska iámindu ambe enga tsípiti jaka. Peru ístu, Biblia no uandasïndi eska no ísïiska ambe engaksï sientifikuecha exentakia eska máru ambe enga tsípiti jaka úpiringa sánhani arini mójtakurhini.
¿Ambeksï jakajkusïni máru kʼuiripuecha?
Ima kʼuiripuecha engaksï jakajkujka eska Tata Diosï ebolusionini úraska para kueraani mámaru jásï ambe enga tsípipti jaka, mámaru ambeksï uandasïndi. Encyclopædia Britannica uandasïndi eskaksï máru k’uiripuecha jakajkusïnga eska solu uaaka irekani ima enga sánderu uinhapitiika (selección natural), ka eska inde jindeeska ambe ma enga Tata Diosï úrajka paraka iámindu ambe enga tsípiti jaka uaaka irekani.
Ebolusioni teístika, ístu ini ambe jorhentpisïndi:
Iámindu ambe enga iásï tsípiti jaka uéraspti máteru amberi enga ióntki irekapka.
Ambe ma enga tsípiti jaka uaati mójtakurhini jarhani astaka niáraaka méntku máteru ambe úkuarhintani.
Tata Diosïsti enga újka eska i ambe ísï úkuarhini jauaka.
¿Terokuntasïni ebolusioniri ambe imani ambe jingoni enga Biblia uandajka?
Enga ísïipiringa ambe enga ebolusioni teístika jorhentpijka, no ísïipirindi ambe enga Génesis uandajka na enga Tata Diosï kueraaka iámindu ambe. Peru enga Jesúsi Génesisiri ambe uandapka, ísï uandaspti komu ambe ma enga meru ísïika (Génesis 1:26, 27; 2:18-24; Mateu 19:4-6). Biblia uandasïndi eska ante de jurhani Echerirhu, Jesúsi auandarhu irekaspka Tata Diosï jingoni ka jarhuataspti kueraani ‘iámindu ambe’ (Juanu 1:3). Ísï jimbo, eratseni eska Tata Diosï úraska ebolusionini para kueraani iámindu ambe enga tsípiti jaka, no terukuntasïndi imani ambe jingoni enga Biblia jorhentpijka.
¿Arhikuekasïni eska ísïiska ebolusioniri ambe, jimbokaksï animalicha ka plantecha úsïnga sési jarhani nani uéjki engaksï niáraaka?
Biblia no uandasïndi na xáni úpirindi mójtakurhini ambe ma enga tsípiti jaka. Ístu no uandasïndi eskaksï animalicha ka plantecha enga Tata Diosï kueraaka, eskaksï no uaaka mójtakurhini engaksï na sánderu uánipani jauaka o engaksï máteru nanisï niáraaka. Máruksï eratsesïndi eska ebolusioni jimboeska enga ambe ma niárajka ísï mójtakurhini, joperu enga ambe ma mójtakurhiska sáni, no arhikuekasïndi eska máteru ambe ueenaska irekani.