“Jánguarhintasïnga na engani xáni uáka”

Pirenchi Irma, Alemania irekasti ka sáno 90 jatiristia. Jimboka tsimani xanhari uinhamu kuarhatseska ka someni operarinhania, nóteru úsïndia kʼumanchikuecha jimbo nirani aianhpini. Iásï, Irma kartechani karakuasïndi imeri familiarichani ka imechani enga míteaka para aianguani ambe enga ima jakajkujka. Uánikuaksï kánikua tsitiasïndi imeri kartechani jimboka uinhaperantaasïnga ka sési pʼikuastantaani, jimboksïsï uandajpajti paraksï kurhamarhini káni axakuaua máteru. Máru engaksï kurhakuajka kartechani pirenchi Irmani, ístuksï karakusïndi paraksï diosmeiamukua arhini. Pirenchi uandasïndi: “I ambe, úsïndi eskani sési pʼikuarheraaka ka jarhuatasïndini parani seguirini jarhani aianhpini”.

Pirenchi Irma ístu kartechani axakuasïndi uánikua kʼuiripuechani engaksï jatirikia. Pirenchi uandantasïndi: “Uarhiiti ma enga jatirikia, uandajpasptirini telefonu jimbo pararini arhini eska karta engani axakupka, kánikua uinhaperantaspka jiáni enga imeri acheeti uarhipka. Ima uarhiiti, Bibliarhu patsaxati kartani ka máru jurhiatikuecha jimbo, xatinichani arhintasïndi. Nótki xáni iónisti, máteru uarhiiti enga ístu tsïndi pakaraka, uandaspti eska juchiti karta sánderu jarhuataspka ka eska ambe enga saserdoti arhijtsïkpipka. Uarhiiti uékasïrendi uánikua ambe míteni ka kurhamarhisptirini sini ima úpirini juchiniu jurhani”.

Uarhiiti ma enga no Testigueka ka enga pirenchi Irmani míteka, máteru nani mótsespti ka arhispti pirenchini eska axakuapiringa kartechani. Pirenchi uandantasïndi: “Ima uarhiiti patsaasïrendi iámindu kartechani engani ji axakuauenga. Enga uarhiiti uarhipkia, imeri uájparini uandajpaspti. Aiangusptirini eska arhiantaspka iámindu kartechani engani ji amambani karakuapka ka kurhachesptirini eskani imantuni axakuapiringa kartechani engaksï Bibliaeri ambe uandapiringa”.

Pirenchi Irma kánikua tsitisïndi kartechani jimbo aianhpini. Ima uandasïndi: “Kurhakusïnga Jeobani eskarini seguirini jauaka uinhapikua íntskuni parani marhuakuni. Nájkirukani nóteru újkia kʼumanchikuecha jimbo nirani aianhpini, jánguarhintasïnga na engani xáni uáka”.