Jiókuarhispka ambe enga Tata Diosï uandajka iurhiriri ambe”

Doktori ma uandantasïndi ambe enga nitamakuarhipka

OSPITALUARHU jarhaspka auditoriurhu, uandantaxapka ambe enga uérapka autopsiarhu engachi úkupka achamasïni ma enga uarhipka tumori ma jimbo. “Uaakachi uandani —uandaspka— eska i achamasï uarhiska emolisisi jimbo [engaksï uarhijka glóbulosi rojosi] ka insufisiensia renali jimbo enga úkuarhipka jimbokaksï jukari iurhiri jatsirantaska”.

Kánikua ikiaparini, profesori ma anhandespti ka uandaspti uinhachaparini: “¿Arhikuekaxakiri eskachi no úska terukukuntani ima jásï iurhiri enga ima jatsipiringa para jatantani?”. Ji arhispka: “No, no indeni ambesïni arhikuekani jaka”. Jiájkani exeraaspka diapositibeechani máru, nani enga xarhareenga sáni pasientiiri rinioni ka arhiaspka: “Ixú úsïndi xarharani lisisi enga jindeeka [destruksioni] glóbulosi rojosiiri rinionirhu, jimbochisï újka eratseni eska i ambesï úka eska achamasï insufisiensia renali pʼamenchapiringa”.a Ueenasptiksï mámaru ambe uandani ka kʼarhikʼarhichantaspka ji, peru nájkirukani ji doktori máepka engani sapichku japka ka ima profesori ma, no úpiringa ji uandani eska no ísïispka.

Ji no Jeobaeri testiguespka enga i ambe úkuarhipka. Andajpenuska 1943 jimbo Sendai, kʼéri ireta ma jimbo enga norterhu jaka Japón. Juchiiti taati jindeespti patólogu ka psiquiatra, jimbosïni ji uékapka medisina estudiariini. Uéxurhini 1970 jimbo, engani tsimani uéxurhini estudiariipkia karrerani, tembuchaspka uátsï ma jingoni enga arhinheenga Masuko.

Ueenasïnga patolojia estudiariini

Masuko ánchikuarhisïreendi para úni kéndani ambe engachi uétarhinchapiringa engani jamberi ji kʼamarapiringa juchiiti karrerani. Ji kánikua tsitisïreenga medisineeri ambe; ískurini pakatasïreendi na enga sési úkata jaka kʼuiripuecheeri kuerpu. Joperu no méni eratsespka eska jarhaspka Kuerajpiri ma. Eratsesïreenga eska xáni inbestigariini medisineeri ambe jarhuatapiringareni para úni tsípikua jingoni irekani. Ísï jimbo, enga na kʼamarapkia karrerani, ueenaspka estudiariini espesilidadi ma enga jindeeka patolojieri, nani enga ma jorhenguarhijka andisï pʼamenchajki ma, naniksï uérasïni pʼamenchakuecha ma ka ambeksï xáni úsïni pʼamenchakuecha.

Ueenaspka eratseni eskaksï no kánikua marhuasïreenga engaksï nemani iurhiri jatsiranteenga, ísï eratsesïreenga engani ueenapka autopsiuechani úkuani imani kʼuiripuechani engaksï kánseri jimbo uarhienga. Jimbokaksï emorrajiauecha jimbo, ima kʼuiripu enga kánseri pʼamenchani jarhajka ueenasïndi anemia pʼirani ka i ambe sánderu no sési úkuasïndi kimioterapia jimbo. Jimboksïsï imeechani iurhiri jatsirantaajti. Peruni ji eratsesïreenga eska engachi ísï ueenga kánseri sánderu etsakuarhisïreenga. Iásïchi míteskia eska iurhiri jatsirantani nemani úsïnga eska inmunosupresioni jatsiaka, ka i ambe úpirindi úni eska ménderu ueentaka úkuarhini tumori ka sánderu fásiliisïndi eska kʼuiripu uarhiaka.b

Uéxurhini 1975 jimbo, úkuarhispti ambe engani ueenakuarhu uandapka. Profesori enga úpka ini ambe, ístu ematóloguespti. Jimborenisï no ísku pakatapti enga ima xáni ikiapka engani ji uandapka eska achamasï uarhispka jimbokaksï jatsirantaspka iurhiri. Peru nájkiruka ísï úkuarhispka, ji seguiriispka uandani ambe engani eratsienga ka ima profesori sánhani arhispti tsʼirapentani.

Nóteru jauatia pʼamenchakua ka ni uarhikua

Jiánisï uarhiiti jatiri ma enga Jeobaeri testiguepka, pʼorhembispti juchiiti uarhiitini. Engaksï uandontskuarheni japka, uarhiiti úraspti uandakua Jeoba, ka juchiiti uarhiiti kurhamarhispti ambe arhikuekasïreeni. Uarhiiti arhispti: “Jindeesti arhinhakua Tata Diosï jurhimbitiiri”. (Juchiiti uarhiiti arhintasïreendi Bibliani desde enga sapichuepka, peru ima Biblia enga ima úreenga no jukaspti Tata Diosïiri nombri, sánderu sési, jukanharhispti nomasi “TATA”). ¡Apenasi niáraspka míteni eska Tata Diosï jatsiska arhinhakua ma!

Juchiiti uarhiiti sóntku ueenaspti jorhenguarhini Biblieri ambe imani uarhiiti jingoni. Engani ji kʼuanhatsentapka ospitalirhu uératini, komu una de la manianisï, juchiiti uarhiiti kánikua tsípikua jingonireni arhispti: “Biblia uandasïndi eska pʼamenchakua ka uarhikua nóteruksï jauakia”. Ka ji arhispka: “Inde ambe kánikua sési japirindi”. Imarini arhispti: “Jimbanhi parhakpini axuterku jarhastia, ísï jimbo, ásteru jámia tiempu tsïtani”. Ji ísï kurhanguspka eskarini ima arhixapka eskani jurajkupiringia medisinani ka i ambe no sésirini ikiataspti jimbochisï úndapka problema ambe jatsini.

Peru ima no kuatantaspti, kómarhisïreendi Tata Diosïni, jirinhaantasïreendi tekstuechani engajtsïni úpiringa jarhuatani ka tátsekuareni exeraasïreendi. Ma tekstu engareni ísku pakatapka, jindeespti Eclesiastés 2:22, 23: “¿Ambe andasïni kʼuiripu ma enga xáni uinhamu ánchikuarhijka ka enga xáni tsitijka uinhamu ánchikuarhini pauani pauani? [...] Imeeri mintsita no jamberi mintsikuarhisïndi chúrikuechani. I ambe ístu ískuesti”. Ka inde ambesïni úkuarhinchani japka ji: pauani pauani ánchikuarhisïreenga medisineeri ambe jingoni ka no agustu pʼikuarherasïreenga.

Juliu de 1975 jimbo, enga juchiiti uarhiiti nípkia Kʼumanchikua Reinueri jimbo Jeobaeri testiguecheri, domingu tsípa ma jimbo, ji ueenaspka eratseni ístu nirani tánguarhini imeechani jingoni. Juchiiti uarhiiti ísku pakaraspti engareni jima exepka ka iáminduechajtsïni sési erokaspti. Jiáni uératini, no méni tsïtakuarhispka tánguarhikua ma dominguechani ka ma kutsï ísï tátsekua ueenaspka jorhenguarhini Bibliani erachi ma jingoni. Juchiiti uarhiiti itsï atakuarhispti tanimu kutsï tátsekua engaksï Jeobaeri testiguecha ueenapka pʼorhembini.

Jiókuarhispka na enga Tata Diosï exejka iurhirini

Sóntkuni mítespka eska Biblia uandasïnga eskaksï kristianuecha no jámaaka jiókuarhini iurhirini (Úk 15:​28, 29; Génesis 9:4). Ji nóteruni xáni jakajkusïreengia eska iurhiri jatantani úsïnga jarhuatani nemani, jimbosïni no úku jukanchapka jiókuarhini ambe enga Tata Diosï eratsejka iurhiriiri ambe.c Eratsespka: “Enga jaka Kuerajpiri ma ka enga ima ini ambe uandajka, jiájkani jatsisti para ísïini”.

Ístuni jorhenguarhispka eskaksï pʼamenchakuecha ka uarhikua jurhasïnga Adániiri pekadu jimbo (Roma 5:12). Imani tiempu jimbo ji estudiu ma úxapka arteriosklerosisiiri ambe. Enga ma tʼarepejkia, arteriauechaksï ueenasïndi kʼuanhapiti úkuarhini ka nóteruksï xáni kʼésïndia ka i ambe uánikua problemeechani juásïndi komu enfermedadesi kardiakasi o mintsitarhu anapu, serebrobaskularesi ka rinionicheeri. Ji eratsesïreenga eska i ambe sési jarhaspka. Kurhanguspka eska Adániiri pekadu jimboespka. Ísï tátsekua, nóteruni xáni tsitisïreengia medisineeri ambe, jimbokani kuenta íntskukuarhespka eska Jeobajkusï uaaka kénditani pʼamenchakuechani ka uarhikuani.

Marsuni 1976 jimbo, siete mesesi ísï tátsekua engani ueenapka jorhenguarhini Biblieri ambe, nóteruni seguiriispka estudiarinia ospitali unibersitariurhu. Chésïreenga eskani nóteruni úpiringia ánchikuarhini komu doktori, peru exentapka máteru ánchikuarhitani máteru ospitalirhu. Engani a itsï atakuarhipkia maiuni 1976 jimbo, kurhanguspka eska ambe engani sánderuni úpiringa úni juchiiti tsípikua jingoni, jindeespka prekursori úkuarhini (aianhpiriicha engaksï tiempu kompletu marhuajka) ka ísï ueenaspka marhuani juliu 1977 jimbo.

Kuájpisïnga na enga exejka Tata Diosï iurhirini

Nobiembrini 1979 jimbo, mótsispkachi kúnguarhikua ma jimbo enga japka Chiba, nani engaksï uánikua aianhpiriicha uétarhinchani japka. Jima exentaspka ánchikuarhita ma ospitalirhu engani no jatsipka para pauani pauani ánchikuarhini. Primeru jurhiatikua engani nípka ánchikuarhini sirujanuechajtsïni máru uirhipandaspti ka kurhamarhisptijtsïni: “Tʼu engari Jeobaeri testigueka, ¿amberi uaa enga niáraaka ixú ospitalirhu kʼuiripu ma enga uétarhinchani jauaka iurhiri jatantani?”.

Kánikua janhanharhikua jingoni, arhiaspka eskani úpiringa ambe enga Tata Diosï uandajka iurhiriiri ambe ka arhiaspka eska jarhaspka máteru ambe engaksï úpiringa úrani ka eskani jánguarhintapiringa xáni eskani na xáni úpiringa para jarhuataani kʼuiripuechani. Uandontskuarhespkachi ma ora ka tátsekua, enga jindeepka jefe de Cirugía uandaspti: “Sési jarhasti. Peru enga janoaka kʼuiripu ma enga kánikua iurhiri tsïtani jauaka juchachi exeaka mejori”. Ísïksï mítesti komueska kʼuiripu ma enga kánikua úkua jukajka para uandontskuarhekuni peru engachi na uandontskuarhepka jiáni ísï tátsekua úndaspkachi sési pájperani ka méntkisï janhanharhispti ambe engani ji jakajkujka.

Tsʼéjkunhasïndi na engani xáni janhanharhijka iurhirini

Engachi marhuani japka Chiba, Ebina jimbo, úkuarhixapti jimbanhi sentrali Jeobaeri testiguecheri enga Japón japiringa. Juchiiti uarhiiti ka ji, nirasïreengachi ma jurhiatikua mándani semana para exeani eskaksï no pʼamenchani japiringa imeecha engaksï jima ánchikuarhienga engaksï úni japka imani edifisiuni enga arhinhajka Beteli. Máru kutsïicha tátsekua, pʼímarhinhaspkachi parachi nirani Ebina marhuani tiempu kompletueri. Ka marsu 1981 jimbo, mótsispkachi imani edifisiuechani jimbo engaksï japka ma tiempu ka nani engaksï pakarani japka jukari 500 boluntariuecha engaksï jima ánchikuarhini japka. Tsípa, ji baniuechani limpiariuasïreenga ka inchatiru konsulta íntspisïreenga.

Ilma Iszlaub jindeespti juchiiti pasienti ma, australia anapu misionera ma enga jupka Japón 1949 jimbo. Leusemia pʼamenchaxapti ka doktoriichaksï arhispti eska máru kutsïichajku irekapiringia. Ilma no uékaspti iurhiri jatantani para sánderu ióni irekani, ka sánderu sési, uandaspti eska Beteli nipiringa irekani imeeri últimu jurhiatikuechani engaksï pakarakuenga. Ima jurhiatikuecha jimbo, nóksï jarhaspti medikamentuecha engaksï úrakuarhejka iásï paraka kuerpu sánderu glóbulosi rojosi úntaaka, komu eritropoyetina, ka ménisï imeeri emoglobina kétsesïreendi asta 3 o 4 gramos (normali jindeesti 12 a 15), jánguarhintaspka ji sési atenderiini. Ima méntkisï xarhatasti eska kánikua mintsinharhisïreenga ambe enga Tata Diosïiri karakata uandeenga asta ima jurhiatikua enga uarhipka, eneru de 1988, siete uéxurhini ísï tátsekua.

Ini uéxurhiniicha jimbo, uánikua boluntariuecha Jeobaeri testiguecha engaksï Japón anapu sukursalirhu ánchikuarhini jaka niárastiksïa operarinhani, ka sirujanuecha engaksï ospitaliicharhu ánchikuarhijka jima no iauani ústiksïa operariuani ka no úraparini iurhiri, ka ambe kánikua sési jarhasti. Mémendujtsïni pʼímarhistia parani jíjtuni jima jarhani engaksï operariuajka para exeni ka ménisï asta niárasïnga jíjtuni partisipariini. Kánikua diosmaiamukua íntskuantasïnga ini doktoriichani engaksï respetariijka na engachi jucha exejka iurhirini. Ánchikuarhini ini doktoriicha jingoni, jarhuatasïndirini parani ji úni aianguani ambe engani jakajkujka. Asta no káni ióniisti enga niárakia itsï atakuarhini ma i jásï doktori.

Jukaparhakuesti uandani eska indeni ambe jimbo engaksï xáni jánguarhintajka sirujanuecha paraksï no úrani iurhiri engaksï atenderiuajka Jeobaeri testiguechani kánikua jarhuajpestia medisinarhu. Exenhastia eska kánikua sési jarhaska no úrani iurhiri enga nema operarinhajka, jimboka, seguni máru estudiuecha, sánderuksï sóntku sési jarhasïndi kʼuiripuecha engaksï operarinhajka ka eskaksï no xáni no sési pʼikuarherasïnga engaksï operarinhajkia.

Seguiriixaka jorhenguarhini sánderu ambakiti Doktoriiri

Jánguarhintasïnga parani seguiriini jorhenguarhini na enga xáni orhepani nirani jaka medisina. Peru ístuni jánguarhintasïnga parani seguiriini jorhenguarhini Jeobaeri ambe enga jindeeka sánderu ambakiti Doktori. Ima no nomasi exesïndi na engachi jucha xarharajka uérakisï, sánderu sési, imajtsïni iámu exesïndi (1 Samuel 16:7). Ka jíjtuni jánguarhintasïnga parani májkueni úni juchiiti pasientiicha jingoni ka no nomasi exeni ambe engaksï pʼamenchani jarhajka, sino jánguarhintasïnga sési kaani iáminduechani.

Asta iásï jamberi, útasïni seguiriixaka marhuani Beteli, ka ma ambe engareni sánderu sési pʼikuastajka, jindeesti eskani seguirixaka jarhuataani kʼuiripuechani parakaksï míteaka Jeobani ka ístu eskaksï míteaka na enga exejka ima iurhirini. Juchiiti kómarhikuecha jimbo, kurhakusïnga Kʼéri Doktorini, Tata Diosï Jeobani, eska no ióni jimbo kʼamajkuakia pʼamenchakuechani ka uarhikuani.—Ini uandantasti Yasushi Aizawa.

[Notecha]

[Komentariu]

“Arhiaspka eska jarhaspka máteru ambe engaksï úpiringa úrani ka eskani jánguarhintapiringa xáni eskani na xáni úpiringa para jarhuataani kʼuiripuechani”

[Komentariu]

“Exenhastia eska kánikua sési jarhaska no úrani iurhiri enga nema operarinhajka”

[Imajeni]

Karhakua: arhijtsïkperata ma nitamataraxaka Biblieri

Jurhijkandani: Juchiiti uarhiiti Masuko jingoni, iásï sáni