7 Ambakiti jánguechani jorhendaani

¿AMBE ARHIKUEKASÏNI?

Jukaparhakuesti ambakiti jánguechani jatsiani, jimboka jarhuatasïnga kʼuiripuni ma paraka uaaka sési irekani. ¿Chá jánguarhintasïni jurhimbitku jámani? Enga ísïika, seguru eskajtsï jarhuatauaka chaari sapiichani paraksï májkueni jámani.

Kʼuiripu ma enga ambakiti jánguechani jatsiajka, ístu ánchikuarhiriisïndi, májkueni kaasïndi iáminduechani ka kurhangutspisïndi ka sánderu fásiliisïndi ini ambe jorhenguarhini enga ma sapichku jarhajka.

BIBLIERI KARAKATA: “Jorhenda sapini náki jindeeski ambakiti xanharu, nájkiruka jatiriuakia no jurajkuati indeni xanharuni” (Proverbios 22:6).

¿ANDIKSÏSÏ JUKAPARHAKUE?

Ambakiti jánguechaksï kánikua jukaparhakuesti iásï enga xáni teknolojia ambe jaka. Karyn enga sapiichani kaajka, uandasïndi: “Engaksï juchaari sapiicha selularichani úraajka ka máteru járhati aparatuechani, úpirindiksï na uéjki jatini no sési jásï ambe exeni o kurhaani. Úpirindiksï juchantsïni jingoni uaxakatini jarhani ka no sési jásï ambeksï exeni jarhani”.

BIBLIERI KARAKATA: “Imeecha engaksï eratsekua jukaka [...] pʼindes[tiksï] eratseni paraksï úni míteni ambe enga jindeeka ambakiti ambe ka ambe enga no sésiika” (Ebreu 5:14).

Sési uandajpini ístu jukaparhakuesti. Pori ejemplu, uétarhisïndi arhijpini “pori fabori” ka “diosmaiamu” ka pendienti páni máteruecha jimbo, ka i ambe tsïnchexatiia, jimbokaksï kʼuiripuecha sánderu exeni jarhasïnga selulariichani o tableteechani ka eska kʼuiripuechani kurhajchaani.

BIBLIERI KARAKATA: “Eskajtsï chá na uékajka eskaksïni kámaaka kʼuiripuecha, ístu kaa je chá imeechani” (Lukasʌ 6:31).

¿AMBEJTSÏ UAA ÚNI?

Méntku arhia je na engajtsï jásï kʼuiripueka. Exenhastia eskaksï uánikua tumbi sapirhatiicha nóksï niátasïnga ísku jándikua ambe, jimbokaksï taati jémbeecha arhiasïnga eska inde ambe no sési jarhaska.

KONSEJU: Notisiechani úraa je engaksï nótki xáni ióniika engaksï uéraka parajtsï ambakiti ambe jorhendaani chaari uájpeechani. Pori ejemplu, engajtsï kurhaaska eska no sési kámberanhaska kurhunhperakua jimbo, uaakajtsï arhini: “¡Xáni no sési! ¿Amberi jimbo uandapirini eskaksï kʼuiripuecha ísï jámasïnga?”.

“Parakaksï sapiicha erakuaka ambakiti ambe úni, orhetaksï jatsisti para míteni ambe enga sési jaka ka ambe nómbe” (Brandon).

Jorhendaa je chaari sapiichani paraksï pendienti páni máteruecha jimbo. Asta sánderu sapirhatiichaksï uaati jorhenguarhini pendienti páni máteruecha jimbo ka arhijpinksï “pori fabori” ka “diosmaiamu”. Libru Parenting Without Borders (Padres sin fronteras), arhisïndi: “Engaksï sapiicha kuenta íntskukuarhejka eskaksï no imajkueska, eskaksï familiarhu ma jarhaska, eskuelarhu ka ireta ma jimbo, sánderuksï uékaati jarhuataani máteruechani”.

KONSEJU: Úraa je ambe ma chaari sapiichani parajtsï jorhendaani eska jukaparhakueska jarhuataani máteruechani.

“Engaksï chaari sapiicha jarhuajpejka kʼumanchikuarhu, nóksï úkua jukanchasïndi engaksï na jandiajku irekani jarhajkia, jimbokaksï pʼindesïngia úni ambe enga uétarhijka” (Tara).